ཧྭ་ཉིའུ་ཀུ་ཤུ་ཇེ་དམར་དུ་ཕྱིན་པ་དང་སྦྲགས་ཏུང་ཀུའེ་ཧུང་ཡང་ལས་བྲེལ་ཇེ་ཆེར་འགྲོ་བཞིན་ཡོད།

ཟླ་9པའི་ཟླ་དཀྱིལ་དུ་ཧྭ་ཉིའུ་ཀུ་ཤུ་བསྡུ་བའི་དུས་ཚིགས་འཆར་ཞིང་། ཀན་སུའུ་ཐེན་ཧྲུའེ་གྲོང་ཁྱེར་མའེ་ཅི་ཆུས་ཀྱི་ལྷོ་རིའི་ཧྭ་ཉིའུ་ཀུ་ཤུའི་རྟེན་གཞིར་བཟོ་པ་ཏུང་ཀུའེ་ཧུང་གིས་བྱང་ཆུབ་པོས་ཀུ་ཤུ་འཐོག་བཞིན་འདུག་ལ། ཁོང་གི་དཔྲལ་བ་ལས་རྔུལ་ཆུ་ཁྲུམ་ཁྲུམ་དུ་ཐོན་པ་དང་རྐང་མཐིལ་འདམ་རྫབ་ཀྱིས་ཁེངས་ཞིང་བལྟས་པ་ཙམ་གྱིས་ལས་ཀར་ཧུར་སེམས་ཆེ་བ་ཞིག་འདུག

མའེ་ཅི་ཆུས་ཧྭ་ཉིའུ་གྲོང་རྡལ་ཨེར་ཧྲི་ལི་ཕུའུ་གྲོང་ཚོར་ཏུང་ཀུའེ་ཧུང་གི་སྐོར་གླེང་སྐབས་ཚང་མས་ཧ་ཅང་འཇོན་པོ་ཡོད་ཅེས་བསྔགས་བརྗོད་བྱེད་མོད། ཁོང་རང་ཉིད་ཀྱིས་འཇོན་པོ་ཡོད་ཀྱང་གོ་སྐབས་ཡག་པོ་མེད་ཚེ་སྟོང་པ་རེད་ཅེས་ཤོད་ཀྱི་ཡོད།

དེ་སྔ་ཏུང་ཀུའེ་ཧུང་གིས་གྲོ་དང་རྒུན་འབྲུམ་འདེབས་མྱོང་བ་དང་ཁྱོ་ཀར་ཞིང་ལས་བྱེད་རོགས་བྱེད་ཞོར་དུ་མི་ལག་ཙག་ཙིག་རྒྱུག་གི་ཡོད། ལོ་ཞིག་གི་དགུན་དུས་སུ་གྲོང་རྡལ་དུ་མི་ལག་རྒྱུག་པར་འགྲོ་ཆེད་ཁོང་གིས་ཞོགས་པའི་ཆུ་ཚོད་ལྔ་པ་ཡོལ་ཙམ་ནས་ལངས་ཏེ་ནང་མི་ཚོར་ཞོགས་ཟས་བཟོས་རྗེས་རྐང་འཁོར་ཆུ་ཚོད་ཕྱེད་ཀ་ལྷག་ཙམ་བཞོན་ནས་གྲོང་རྡལ་དུ་འགྲོ་དགོས་པ་དང་ཉིན་དགུང་སླར་ཡང་ལོག་འོང་ནས་ལྟོ་ཆས་བཟོ་དགོས། ཁོང་གིས“ཉིན་20ལྷག་ཙམ་ལ་སྒོར་བརྒྱ་ཕྲག་ཁ་ཤས་ལས་རག་མ་སོང་། མ་ཟད་དེ་དག་ཀྱང་ཉར་ལོང་མེད་པར་བུ་ལོན་འཇལ་དགོས”ཅེས་བཤད།

ཧྭ་ཉིའུ་གྲོང་རྡལ་ནི་ཧྭ་ཉིའུ་ཀུ་ཤུར་བརྟེན་ནས་སྐད་གྲགས་ཆོད། དེ་གའི་ཞིང་ལས་ས་ཚིགས་ཀྱིས་ཤིང་འབྲས་ཧྲེ་ཀོ་རྨང་གཞིར་བྱས་ཏེ་བཏབ་པའི་ཤིང་འབྲས་རིགས་དེའི་སྤུས་ཀ་དག་ལ་བྲོ་བ་ཞིམ་པ་དང་། ལོ་དེར་ཕྱིར་བཙོངས་མ་ཐག་བྲིན་ཁ་ཧ་ཅང་རྒྱུག་པོ་བྱུང་ནས་རྒྱལ་སྤྱིའི་ཁྲོམ་ར་ནས་དངོས་གཞིའི་ཚོང་རྟགས་ཐོབ་ཡོད།

འཚོ་ཚིས་ཀྱི་ཆེད་དུ་ཏུང་ཀུའེ་ཧུང་གིས་ཀྱང་ཧྭ་ཉིའུ་ཀུ་ཤུ་འདེབས་རྩིས་བྱས་མོད། འོན་ཀྱང་ཁྱིམ་གྱི་ས་ཞིང་ཕལ་ཆེ་བ་རི་ཞིང་ཡིན་སྟབས་རླངས་འཁོར་ཤར་གཏོང་ཐུབ་ཀྱི་མེད། གལ་ཏེ་དེ་གར་ཀུ་ཤུ་བཏབ་ཚེ་ཆུ་ལུད་ཚང་མ་སྒལ་པར་དབོར་དགོས་པ་མ་ཟད་འབྲས་བུ་བཏགས་རྗེས་ཀྱང་སླེལ་པོ་རེ་རེ་བཞིན་དབོར་དགོས་ཀྱི་ཡོད། ཏུང་ཀུའེ་ཧུང་གིས“ནུས་ཤུགས་མི་འདང་བ་ལས་དཀའ་སྡུག་ལ་སྐྲག་གི་མི་འདུག་རང་ཉིད་ནི་ཧྭ་ཉིའུ་བ་ཞིག་ཡིན་ཡང་ཧྭ་ཉིའུ་ཀུ་ཤུ་འདེབས་མ་ཐུབ་སྟབས་བློ་ཕམ་ཆེན་པོ་འདུག”ཅེས་བཤད།

ཧྭ་ཉིའུ་ཀུ་ཤུ་འདེབས་མཁན་ཚོས་རང་སོ་སོའི་འདེབས་སྟངས་ལྟར་བཏབ་པས་ལག་རྩལ་ཡག་ཉེས་སྣ་ཚོགས་ཡོད་ཅིང་། ཀུ་ཤུ་དེར་སྐད་གྲགས་ཆེན་པོ་ཡོད་རུང་ཁེ་ཕན་ཆེན་པོ་དེ་ཙམ་མེད་ལ། སྔ་ཕྱི་བར་གསུམ་དུ་ཐོན་ལས་ཅན་གྱི་ལམ་བུར་བསྐྱོད་ཐུབ་མེད།

གྲོང་གསེབ་དར་རྒྱས་གཏོང་བར་འགག་རྩ་ནི་ཐོན་ལས་དར་རྒྱས་གཏོང་དགོས་ཤིང་། ལོ་ཤས་གོང་དུ་ཐོན་ལས་ཕྱོགས་སྒྱུར་བྱུང་ནས་མའེ་ཅི་ཆུས་ཀྱིས་རྣམ་གྲངས་མ་དངུལ་སྒོར་དུང་ཕྱུར་1.7བསྡུ་སྒྲིལ་བྱས་ཏེ་ལྷོ་རིའི་ཧྭ་ཉིའུ་ཀུ་ཤུ་འདེབས་འཛུགས་རྟེན་གཞི་མུའུ་ཁྲི་15བསྐྲུན་པ་དང་ཐོན་ལས་ལམ་བུ་སྤྱི་ལེ་360དང་ཞིང་ཆུ་འཐེན་གཏོང་གི་ལས་གྲྭ་ཁུལ་6ལེ་ལག་ཚང་བའི་ངང་འཛུགས་སྐྲུན་བྱས་ཏེ་ཆུ་དང་། ལམ། གློག་ཤར་གཏོང་བྱས་པ་མ་ཟད། ད་དུང་ལས་མི་སྐྱེལ་བསུའི་རླངས་འཁོར་ཡང་ཡོད་པ་རེད། དེ་ལྟར་ཏུང་ཀུའེ་ཧུང་ཡང་རི་སྟེང་དུ་བསྐྱོད་དེ་ཐོན་ལས་བཟོ་པ་ཞིག་ཏུ་གྱུར་པ་དང“རླངས་འཁོར་ལ་བསྡད་དེ་རི་སྟེང་དུ་འགྲོ་བར་སྐར་མ་10ལྷག་ཙམ་ལས་འགོར་གྱི་མེད་ཁར་ཁྱིམ་དུ་ལོག་པར་དེ་བས་མགྱོགས་པ་འདུག”ཅེས་བཤད།

ཀུ་ཤུ་འདེབས་ཐེངས་དང་པོ་ཡིན་པའི་ཏུང་ཀུའེ་ཧུང་གིས་རི་སྟེང་གང་སར་ཁེངས་པའི་སྡོང་ཕྲུག་ལ་ལྟ་བཞིན་ཇི་ལྟར་འདེབས་དགོས་སམ། ནམ་ཞིག་འབྲས་བུ་འདོགས་ཐུབ་བམ། ལས་ཀའི་གླ་ཆ་རག་གི་ཡོད་དམ་ལ་སོགས་པའི་བསམ་བློ་འདྲ་མིན་སྣ་ཚོགས་འཁོར།

སྔོན་ལ་རྩྭ་ངན་འགོག་པ་དང་ལུད་རྒྱག་པ་སོགས་ཞིང་ནང་གཡོག་བྱེད་སྣ་ཚོགས་བྱེད་པ་ནས་ལོ་ལྟར་རྒྱ་ལོའི་ཚེས་ཉི་ཤུ་ནས་བཟུང་ལག་ཆ་གྲ་སྒྲིག་བྱེད་པ་སོགས། ཏུང་ཀུའེ་ཧུང་ལས་ཀ་དེ་དག་ལ་རིམ་བཞིན་བྱང་ཇེ་ཆུབ་ཏུ་ཕྱིན་ལ། དཔྱིད་ཀར་མེ་ཏོག་བཞད་རྗེས་དབྱེ་གསེས་བྱེད་པ་དང་། དབྱར་དུས་འབྲས་བུ་འདོགས་སྐབས་འབྲས་བུ་དབྱེ་འབྱེད་བྱེད་པ། སྟོན་དུས་འབྲས་བུ་བཏོག་པ། དགུན་དུས་ཡལ་བཞུར་རྒྱག་པ་ལ་སོགས་ལོ་གསར་དང་དུས་ཆེན་ཕུད་ལོ་ཧྲིལ་པོར་ལས་བྲེལ་བྱེད་དགོས་ཀྱི་ཡོད།

དུས་ཚོད་ཆུ་མོ་བཞིན་རྒྱུག་འགྲོ་བ་དང་བསྟུན་ནས་སྡོང་ཕྲུག་དེ་དག་རེ་རེ་བཞིན་སྐྱེ་འཚར་བྱུང་ལ། ཀུ་ཤུ་རེ་རེ་བཞིན་ཇེ་དམར་དུ་ཕྱིན་པ་དང་ཆབས་ཅིག གླ་ཆའང་ལོ་རེ་བཞིན་ཇེ་མང་དུ་འགྲོ་བཞིན་ཡོད། ད་ཆ་ཏུང་ཀུའེ་ཧུང་གི་ལོ་གཅིག་གི་ཡོང་འབབ་སྒོར་ཁྲི་3ལྷག་ཙམ་ཟིན་གྱི་ཡོད་པ་རེད།

ཁྱད་ལྡན་ཐོན་ལས་སྟོབས་ཆེར་བཏང་ནས་མང་ཚོགས་དེ་བས་མང་བར་ཧྭ་ཉིའུ་ཀུ་ཤུ་ལས་ཁེ་ཕན་ཐོབ་ཅིང་། 2023ལོར་རྟེན་གཞིའི་ཤིང་འབྲས་ཐོན་འབབ་བསྡོམས་ཏུན་ཁྲི་22ཟིན་པ་དང་ཐོན་རྫས་རིན་ཐང་བསྡོམས་འབོར་སྒོར་དུང་ཕྱུར་6བྱུང་ནས། ས་ཁོངས་དེའི་མི་རེའི་ཆ་སྙོམས་ཤིང་འབྲས་ཀྱི་ཡོང་འབབ་ཁེ་གཙང་སྒོར་8000ལྷག་ཙམ་ཟིན་ཏེ་མི་ཁྲི་4ལྷག་ཙམ་ལ་འབབ་འཕར་ཡོང་རྒྱུར་སྐུལ་ཁྲིད་ཐུབ་ཡོད།

མི་ལག་ཙག་ཙིག་རྒྱུག་པ་ནས་གླ་ཕོགས་ལེན་པའི་བར་ཏུང་ཀུའེ་ཧུང་གིས་ཧྭ་ཉིའུ་ཀུ་ཤུ་བཏབ་ནས་ཁེ་ཕན་ཆེན་པོ་ཐོབ་ཅིང་། ཁོང་གིས་ཁ་ཕྱིར་བསྐོར་ནས་དམར་ལ་རྡོག་ཆེ་བའི་ཀུ་ཤུ་ཞིག་བཏོགས།