ཤིན་ཧྭ་གསར་འགྱུར་ཁང་ལྷ་ས་ནས་ཟླ་9ཚེས་15ཉིན་གློག་འཕྲིན་འབྱོར་གསལ། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བོད་ཀྱིས་རིམ་རྩིས་བྱས་ན“ཁ་གསབ་ཁག་གཉིས”ཏེ་དཀའ་ངལ་ཡོད་པའི་དབང་པོ་སྐྱོན་ཅན་གྱི་འཚོ་བའི་ཁ་གསབ་དང་ཚབས་ཆེའི་དབང་སྐྱོན་གྱི་ལྟ་སྐྱོང་ཁ་གསབ་མ་དངུལ་སྒོར་དུང་ཕྱུར་15.5སྤྲད་པས་དབང་པོ་སྐྱོན་ཅན་ཁྲི་12ཙམ་ལ་ཕན་པ་ཐོབ་ཡོད། 2023ལོའི་ལོ་མཇུག་ཏུ་བོད་ཀྱིས་དབང་པོ་སྐྱོན་ཅན་གྱི“ཁ་གསབ་ཁག་གཉིས”བོད་རང་སྐྱོང་ལྗོངས་ཀྱི་2024ལོའི་དམངས་འཚོའི་བྱ་བ་དངོས་ནང་བཅུག་པ་དང་འདི་ལོ་ནས་བཟུང་ཁ་གསབ་ཚད་གཞི་སླར་ཡང་20%མཐོ་རུ་བཏང་བ་རེད།

གསར་འགོད་པས་བོད་རང་སྐྱོང་ལྗོངས་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ནས་ཤེས་རྟོགས་བྱས་པར། ཉེ་བའི་ལོ་ཤས་རིང་བོད་ཀྱིས་རིག་སྟོབས་དང་སྨྱོ་ནད་ཕོག་པའི་ནད་པ་དང་དེ་བཞིན་རིམ་པ་དང་པོ་དང་གཉིས་པའི་ཚབས་ཆེའི་དབང་པོ་སྐྱོན་ཅན་བཅས་ཁེར་རྐྱང་དུད་ཚང་ལྟར་མ་མཐའི་འཚོ་བའི་འགན་ལེན་གྱི་ཁྱབ་ཁོངས་ནང་བཅུག་པ་དང་། ཁྱིམ་ཚང་གི་ཡོང་འབབ་མ་མཐའི་འཚོ་བའི་འགན་ལེན་གྱི་ཚད་གཞིར་སླེབས་མེད་པའི་དབང་པོ་སྐྱོན་ཅན་ཁྲི་1.6ཚང་མ་སྔོན་ལ་མ་མཐའི་འཚོ་བ་འགན་ལེན་བྱེད་ཁོངས་སུ་འཇུག་རྒྱུ་ཡིན་པ་རེད།

རྫོང(ཆུས)རིམ་པའི་དབང་པོ་སྐྱོན་ཅན་གྱི་ཕྱོགས་བསྡུས་ཞབས་ཞུའི་སྒྲིག་བཀོད་72བསྐྲུན་ཏེ། གྲོང་ཁྱེར་དང་གྲོང་གསེབ་ཀྱི་དབང་པོ་སྐྱོན་ཅན་གྱི་གཞི་རྩའི་རྒན་གསོ་འགན་བཅོལ་དང་གཞི་རྩའི་སྨན་བཅོས་འགན་བཅོལ་ནང་ཞུགས་ཚད་ཚང་མ་95%ཡན་ཟིན་ཡོད་པ་རེད།

བོད་རང་སྐྱོང་ལྗོངས་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱི་ལས་འཛིན་འགོ་གཙོ་གཞོན་པ་སྒྲོལ་མ་ཚེ་རིང་གིས། 2021ལོ་ནས་བཟུང་བོད་ཀྱིས་དབང་པོ་སྐྱོན་ཅན་མི་ཐེངས་ཁྲི་5.6ལ་གནད་སྨིན་བདེ་ཐང་སླར་གསོའི་ཞབས་ཞུ་བསྒྲུབས་པ་དང་གཞི་རྩའི་བདེ་ཐང་སླར་གསོའི་ཞབས་ཞུ་ཁྱབ་ཚད་90%ཡན་ཟིན་ཡོད། མིག་སྔར་བོད་དུ་དམིགས་བསལ་སློབ་གསོའི་སློབ་གྲྭ་7བསྐྲུན་ཟིན་པ་དང་། སློབ་གྲྭར་འགྲོ་མུས་ཀྱི་སློབ་མ་978ཡོད་པ། འོས་འགན་སློབ་གསོའི་དུས་མཚམས་ཀྱི་དབང་པོ་སྐྱོན་ཅན་སློབ་མ་སློབ་གྲྭར་ཞུགས་ཚད་97%ཡན་ཟིན་པ། དབང་སྐྱོན་བྱིས་པ་3646གྲལ་སྡོད་མཉམ་སློབ་ཐུབ་པ་བཅས་བྱུང་ནས་དབང་པོ་སྐྱོན་ཅན་ལ་སློབ་གསོ་ཐོབ་པའི་ཆུ་ཚད་རྒྱུན་ཆད་མེད་པར་མཐོ་རུ་ཕྱིན་ཡོད་ཅེས་ངོ་སྤྲོད་བྱས་པ་རེད།