ཉེ་ཆར་གསར་འགོད་པར་པུའུ་དང་ཞིང་ཆེན་གྱིས་མཉམ་དུ་མཚོ་སྔོན་གྱི་ལྗང་མདོག་སྐྱེ་ལྡན་ཞིང་འབྲོག་ཐོན་རྫས་ཕྱིར་གཏོང་བྱ་ཡུལ་གཏོད་པའི་ལས་དོན་ཚོགས་འདུ་ནས་ཤེས་རྟོགས་བྱུང་བར། ལོ་གསུམ་ལྷག་ཙམ་རིང་མཚོ་སྔོན་གྱིས“ཞིང་གསུམ”ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་དང་མཚོ་སྔོན་གྱི་ལས་དོན་སྐོར་གྱི་བླང་བྱ་གལ་ཆེན་ལག་བསྟར་དོན་འཁྱོལ་ནན་ཏན་བྱས་ནས་སྤུས་ཚད་མཐོ་བའི་འཕེལ་རྒྱས་དམིགས་ཚད་དུ་བྱེད་པ་དང“སྤུས་ཀ་ལེགས་གཏོང་དང་། འབོར་ཚད་བརྟན་གཏོང་། འཁོར་འབྲེལ་ཁ་གསབ། ཕྱིར་གཏོང་རྒྱ་སྐྱེད”བཅས་ཐབས་ལམ་དུ་བྱས་ནས་ཚན་རྩལ་གྱི་སྣེ་ཁྲིད་བྱེད་ཤུགས་ཆེ་རུ་གཏོང་བ་དང་། ཞིང་འབྲོག་ལས་ཀྱི་ལག་རྩལ་དང་། ལས་རྣམ། དཔེ་དབྱིབས་བཅས་གསར་གཏོད་ལ་སྐུལ་འདེད་གཏོང་བ། ལྗང་མདོག་སྐྱེ་ལྡན་ཞིང་འབྲོག་ཐོན་རྫས་ཀྱི་སྤུས་ཚད་ཀྱི་ཕན་འབྲས་དང་འགྲན་རྩོད་ནུས་པ་ཆེ་རུ་གཏོང་བ་བཅས་བྱས་ཤིང་། རིམ་རྩིས་བྱས་ན་ཞིང་ཆེན་ཕྱིར་ལྗང་མདོག་སྐྱེ་ལྡན་ཞིང་འབྲོག་ཐོན་རྫས་སྣ་ཚོགས་བཏང་བར་སྒོར་དུང་ཕྱུར་300ལྷག་ཙམ་ཟིན་པ་དང་། ཕྱིར་གཏོང་བྱ་ཡུལ་གྱི་འཛུགས་སྐྲུན་ལ་གྲུབ་འབྲས་མངོན་གསལ་དོད་པོ་ཐོབ་ཡོད།

ཞིང་ཆེན་ཡོངས་ཀྱིས་ཐོན་སྐྱེད་ཀྱི་རྨང་གཞི་རྒྱུན་ཆད་མེད་པར་བརྟན་དུ་བཏང་བ་དང་། མཁོ་སྤྲོད་གྲུབ་ཆ་ལེགས་སུ་བཏང་བས། སྐྱེ་ལྡན་རྩྭ་ཐང་གི་ལྟ་ཞིབ་ཚད་ལེན་རྒྱ་ཁྱོན་གྱི་དམིགས་ཚད་ལས་འགན་གྱི་200%འགྲུབ་པ་དང་ཚད་གཞི་མཐོ་བའི་ཞིང་ཁ་འཛུགས་སྐྲུན་གྱི་དམིགས་ཚད་ལས་འགན་གྱི་98.6%འགྲུབ་ཡོད། གཙོ་ཁྲིད་ཐོན་ལས་ཆེན་པོ་བཅུའི་ཁྲོད། འབྲི་གཡག་དང་། ལུག ནས། སྔོ་ཚལ། གྲང་ཆུའི་ཉ་བཅས་ཀྱི་ཐོན་ལས་མཁོ་སྤྲོད་ནུས་པ་5མངོན་གསལ་དོད་པོས་ཆེ་རུ་ཕྱིན་པ་དང་འབྲི་གཡག་དང་ལུག་གི་ཐོན་ཡུལ་རྫོང་རིམ་པའི་སྲིད་འཛིན་ས་ཁོངས་85%ལ་ཕུགས་འདེད་གཏོང་ཆོག སྤུས་ཚད་ཀྱི་ལྟ་འདོམས་ལ་རྒྱུན་ཆད་མེད་པར་ཤུགས་སྣོན་བརྒྱབ་པས་ཞིང་ལས་ཐོན་རྫས་ཀྱི་སྤུས་ཚད་བདེ་འཇགས་ཀྱི་ལྟ་ཞིབ་ཚད་ལེན་ཚད་ལོན་ཚད་98.2%ཟིན་ནས་དམིགས་ཚད་ལས་འགན་གྱི་བརྒྱ་ཆའི་གྲངས་0.2ལྷག་ཙམ་ཟིན་པ་དང་། འབྲི་གཡག་དང་། ལུག གྲང་ཆུའི་ཉ་བཅས་ཐོན་ཡུལ་གྱི་ཕུགས་འདེད་ལམ་ལུགས་རགས་ཙམ་ཆགས་ནས། ཞིང་འབྲོག་ཐོན་རྫས་ལས་སྣོན་གཞན་སྒྱུར་ཐུབ་ཚད་64%ཟིན་ཏེ་དམིགས་ཚད་ལས་འགན་དང་ཉེ་བ་མ་ཟད། ལྗང་མདོག་བཟའ་བཅའ་དང་། སྐྱེ་ལྡན་ཞིང་ལས་ཐོན་རྫས། ས་ཁམས་མཚོན་རྟགས་ཀྱི་ཞིང་ལས་ཐོན་རྫས་བཅས་1200(དམིགས་ཚད་1000ཡན)ཁས་ལེན་དཔང་འདོན་ཐུབ་པ་དང་། གྲོ་ཚང་གི་སྒོག་པ་དང་། ཡ་རྫིའི་སུར་པན། ཏ་ཐུང་གི་རྒྱ་ཙོང་སོགས་ས་ཁམས་མཚོན་རྟགས་ཀྱི་ཐོན་རྫས་སྤུས་རྟགས་ཁག་གཅིག་བཏོད་པ། “ཚོང་ཟོག་རྩེ་གྲ”100དང“མཚོ་སྔོན་གྱི་ཞིང་ལས་ཐོན་རྫས་རྩེ་གྲ”100ཡི་ཞིང་ལས་ཐོན་རྫས་ཀྱི་སྤུས་རྟགས་ཁྱབ་བསྒྲགས་བྱས་པ། “ས་ཁོངས་ཀྱི་སྤྱི་པའི་སྤུས་རྟགས+ཁེ་ལས་ཀྱི་སྤུས་རྟགས+ཐོན་རྫས་ཀྱི་སྤུས་རྟགས”བཅས་རིམ་པ་བཞིན་གྱི་སྤུས་རྟགས་མ་ལག་ཅིག་ཆགས་ཡོད། ཞིང་ཆེན་དེ་གའི་ཕྱིར་གཏོང་བྱ་ཡུལ་གྱི་དྲིལ་བསྒྲགས་འོས་སྦྱོར་བྱེད་སྒོ་སྤེལ་ནས་རིམ་རྩིས་བྱས་ན་ཕྱིར་ཚོང་བྱེད་ཚད་སྒོར་དུང་ཕྱུར་3.5ཟིན་ཏེ་གན་རྒྱ་བཞག་ཚད་སྒོར་དུང་ཕྱུར་24ཟིན་ནས“མཚོ་སྔོན་མིང་ཅན”གྱི་སྤུས་རྟགས་ཀྱི་ཤུགས་རྐྱེན་ནུས་པ་རྒྱུན་མཐུད་ཆེ་རུ་ཕྱིན་པ་དང་ཞིང་ཆེན་ཕྱི་ནང་གི་ཁྲོམ་ར་རྒྱུན་མཐུད་རྒྱ་ཆེར་སོང་ཡོད།