ཟླ་9ཚེས་10ཉིན། ལྗོངས་ཡོངས་ཀྱི་སྤྱི་བདེ་ལས་ཁུངས་ཀྱིས་དྲ་རྒྱའི་དཀྲོག་གཏམ་ལ་རྡུང་རྡེག་གཏོང་བ་དང་བཅོས་སྒྲིག་བྱེད་པའི་ཆེད་དོན་བྱ་སྤྱོད་ཀྱི་གསར་འགྱུར་ཡོངས་བསྒྲགས་ཚོགས་འདུ་ལྷ་སར་འཚོགས་པ་རེད། གསར་འགོད་པར་ཚོགས་འདུའི་ཐོག་ནས་ཤེས་རྟོགས་བྱུང་བར་གཞིགས་ན། 2023ལོའི་ཟླ་12ནས་2024ལོའི་ཟླ་9ཚེས་9ཉིན་བར། ལྗོངས་ཡོངས་ཀྱི་སྤྱི་བདེ་ལས་ཁུངས་ཀྱིས་དྲ་རྒྱའི་དཀྲོག་གཏམ་གྱི་ཆ་འཕྲིན་ཁྲི་1.3ལྷག་ཙམ་གཙང་བཤེར་བྱས་པ་དང་། དྲ་རྒྱའི་དཀྲོག་གཏམ་རིགས་ཀྱི་གྱོད་གཞི་ཁག་69མྱུལ་ཞིབ་ཐག་གཅོད་བྱས་པ། སྒྲིག་འགལ་ཁྲིམས་འགལ་གྱི་ཨང་རྟགས་65ཁྲིམས་ལྟར་བཀག་ནས་དྲ་རྒྱའི་བར་མཐོངས་ཀྱི་སྒྲིག་ལམ་དང་སྤྱི་ཚོགས་བདེ་འཇགས་བརྟན་ལྷིང་ལ་ནུས་ཤུགས་ཡོད་རྒུས་སྲུང་སྐྱོང་བྱས་པ་རེད།

རང་སྐྱོང་ལྗོངས་སྤྱི་བདེ་ཐིང་ཏང་ཨུད་ཀྱི་ཨུ་ཡོན་དང་ཐིང་ཀྲང་གཞོན་པ་ཞེ་ཤང་ཕིང་གིས་ངོ་སྤྲོད་བྱས་པར་གཞིགས་ན། ཆེད་དོན་བྱ་སྤྱོད་སྤེལ་ཚུན་ལྗོངས་ཡོངས་ཀྱི་སྤྱི་བདེ་ལས་ཁུངས་ཀྱིས་དྲ་རྒྱའི་དཀྲོག་གཏམ་ལ་རྡུང་རྡེག་གཏོང་བ་དང་བཅོས་སྒྲིག་བྱེད་པ་དེ་དྲ་ཐོག་གི་ཆབ་སྲིད་བདེ་འཇགས་སྲུང་སྐྱོང་བྱེད་པའི་ནང་དོན་གལ་ཆེན་ལ་བརྩིས་ནས། དྲ་ཐོག་གི་སྐོར་ཞིབ་ལ་ཤུགས་སྣོན་རྒྱག་པ་དང་ཉེན་རྟོག་པས་དྲ་བར་དོ་དམ་བྱེད་ཚད་རྒྱུན་ཆད་མེད་པར་ཆེ་རུ་བཏང་སྟེ་དྲ་ཐོག་གི་ཁྲིམས་འགལ་བྱེད་སྤྱོད་སྤེལ་ཚད་ནུས་ཤུགས་ཡོད་རྒུས་ཉུང་དུ་བཏང་ཡོད་པ་རེད། དེ་དང་ཆབས་ཅིག་དྲ་རྒྱའི་ལག་རྩལ་གསར་པ་དང་ཉེར་སྤྱོད་གསར་པའི་འཕེལ་ཕྱོགས་ཀྱི་རྗེས་སུ་དམ་པོར་བསྙེགས་ཏེ་དྲ་རྒྱའི་ཐད་གཏོང་དང་། བརྙན་ཐུང་རྫུན་བཟོ། ཐ་ཤལ་ཟང་ཟིང་གི་སྣང་ཚུལ་བཅས་ལ་དམིགས་ནས་གཅིག་སྡུད་ཐོག་གཙང་བཤེར་བཅོས་སྒྲིག་བྱས་པ་མ་ཟད། དེའི་རིང་གནད་དོན་ཡོད་པའི་ཐད་གཏོང་བྱེད་མཁན་36ཁྲིམས་ལྟར་སྐོང་འདྲི་བྱས་པ་དང་མི་14ལ་སྲིད་འཛིན་གྱི་ཆད་པ་བཅད་པ་རེད།