འདི་ནི་ལྷོ་ཁ་གྲོང་ཁྱེར་རྒྱ་ཚ་རྫོང་ངར་རབ་གྲོང་རྡལ་རུ་མི་གྲོང་ཚོར་གནས་པའི་བོད་ལྗོངས་ཨན་ཆི་ཇོ་མོ་གླང་མའི་སྐྱེ་དངོས་ཚན་རྩལ་ཚད་ཡོད་ཀུང་སི་ཡིན་པ།

འདི་ནི་བོད་ལྗོངས་ཨན་ཆི་ཇོ་མོ་གླང་མའི་སྐྱེ་དངོས་ཚན་རྩལ་ཚད་ཡོད་ཀུང་སིའི་ལྟེ་བའི་ཚོད་འཛིན་ཁང་དུ་ལས་དོན་མི་སྣས་སྒྲིག་ཆས་སྙོམས་སྒྲིག་ཚོད་ལྟ་དང་བཀོལ་སྤྱོད་ཀྱི་བཀའ་གཏོང་བཞིན་པ།

ཉེ་ཆར། ལྷོ་ཁ་གྲོང་ཁྱེར་རྒྱ་ཚ་རྫོང་ངར་རབ་གྲོང་རྡལ་རུ་མི་གྲོང་ཚོའི་ཐོན་ལས་གླིང་དུ་བོད་ལྗོངས་ཨན་ཆི་ཇོ་མོ་གླང་མའི་སྐྱེ་དངོས་ཚན་རྩལ་ཚད་ཡོད་ཀུང་སིའི་ས་མཐོའི་སྐྱེ་ཕན་ཕྲ་སྲིན་གྱི་རྣམ་གྲངས་དངོས་སུ་སྤྱོད་འགོ་ཚུགས་པ་རེད།

ད་ཐེངས་སྤྱོད་འགོ་ཚུགས་པའི་ས་མཐོའི་སྐྱེ་ཕན་ཕྲ་སྲིན་གྱི་རྣམ་གྲངས་ནི་ཧུའུ་པེ་ཞིང་ཆེན་གྱི་ཚན་རྩལ་བོད་སྐྱོར་གྱི་གྲུབ་འབྲས་གཞན་སྒྱུར་དོན་འཁྱོལ་བྱས་པའི་རྣམ་གྲངས་ཐོག་མ་དེ་རེད།

མཐའ་བཞི་སྔོ་ལྗང་རི་བོས་བསྐོར་བའི་དེང་རབས་ཅན་གྱི་མཐོ་གསར་ལག་རྩལ་ཁེ་ལས་ཏེ། བོད་ལྗོངས་ཨན་ཆི་ཇོ་མོ་གླང་མའི་སྐྱེ་དངོས་ཚན་རྩལ་ཚད་ཡོད་ཀུང་སི་དེ་གར་གཞིས་ཆགས།

2021ལོར་ཧུའུ་པེ་ཞིང་ཆེན་དབྱི་ཁྲང་གྲོང་ཁྱེར་དུ་གནས་པའི་ཨན་ཆི་ཚོགས་པ་ཧུའུ་པེའི་ཁ་གཏད་བོད་སྐྱོར་གྱི་གྲས་སུ་ཞུགས་ཏེ་རང་ངོས་ཀྱི་ལག་རྩལ་གྱི་ལེགས་ཆ་འདོན་སྤེལ་གང་ལེགས་ཀྱིས། སྔོན་ཐོན་དང་གནད་སྨིན་འཐུས་ཚང་གི་ལག་རྩལ་སྤྱད་ནས་ས་གནས་དེ་གའི་སྐྱེ་དངོས་ཕྲ་རབ་ཀྱི་ཁྱད་ལྡན་ཐོན་ཁུངས་སྲུང་སྐྱོང་དང་། གསར་སྤེལ། བེད་སྤྱོད་བཅས་ལ་སྐུལ་འདེད་བཏང་བ་རེད།

ལོ་གསུམ་རིང་ཨན་ཆི་ཀུང་སིའི་ཚན་ཞིབ་ཚོགས་པས་འབྲོག་ཁྱིམ་དུ་བསྐྱོད་དེ་དཀར་ཆུའི་ཐོན་རྫས་བསྡུ་རུབ་དང་། ས་བབ་མཐོ་བའི་ས་ཁུལ་དུ་བསྐྱོད་དེ་ནོར་དེད་པ་དང་ལྕི་བ་སྒྲུག་པ་སོགས་སྐྱེ་དངོས་ཕྲ་རབ་ཐོན་ཁུངས་ཡོངས་ཁྱབ་ཞིབ་བཤེར་འཚོལ་བསྡུ་དང་གསལ་འབྱེད་གདེང་འཇོག་གི་ལས་དོན་རབ་དང་རིམ་པ་སྤེལ་བ་རེད།

ཐེངས་ཤིག་ཞིབ་འཇུག་ཚོགས་པས་འབྲོང་བཙལ་ནས་སྐྱེ་དངོས་ཕྲ་རབ་ཀྱི་མ་དཔེ་འཚོལ་བསྡུ་བྱ་ཆེད་མི་མེད་ཁུལ་དུ་བསྐྱོད་པ་རེད།

རླངས་འཁོར་ལ་བསྡད་དེ་ལམ་ཐག་རིང་པོ་བསྐྱོད་རུང་ཞིབ་འཇུག་ཚོགས་པར་སྔར་བཞིན་མ་དཔེ་རྙེད་མེད། དེ་ནས་རུ་སྣེ་འཁྲིད་མཁན་གྱིས་བསམ་བློ་ཞིབ་པར་བཏང་ནས་ཕྱིར་ལོག་སྐབས་རླངས་འཁོར་ལ་སྣུམ་འདང་ཙམ་ཡོད་པས་མུ་མཐུད་མ་དཔེ་འཚོལ་བར་འགྲོ་རྒྱུའི་ཐག་བཅད།

དེ་ལྟར་མུ་མཐུད་སྤྱི་ལེ་བཅུ་ཕྲག་གི་སར་བཙལ་བས་ཞིབ་འཇུག་ཚོགས་པར་འབྲོང་རྙེད་ནས་འཚོལ་བསྡུའི་ལས་དོན་བདེ་བླག་ངང་ལེགས་གྲུབ་བྱུང་བ་རེད།

འདི་ལྟ་བུའི“གསོ་རླུང་ཉུང་ཡང་སྙིང་སྟོབས་མི་ཉམས་པ་དང་དཀའ་ཚེགས་ཆེ་ཡང་དཀའ་སྡུག་ལ་མི་སྐྲག་པའི”སྙིང་སྟོབས་ལས་ཞིབ་འཇུག་ཚོགས་པར་གྲུབ་འབྲས་གཡུར་དུ་ཟ་བ་ཐོབ་ནས་སྔ་རྗེས་སུ་སྲིན་སྡོང་རྐང་1800ལྷག་ཙམ་འཚོལ་བསྡུ་དང་ཉར་ཚགས་བྱས་པ་རེད།

སྐྱེ་ཕན་ཕྲ་སྲིན་གྱི་ཐོན་རྫས་དེ་བཟའ་བཅའི་བཟོ་ལས་དང་། བདེ་ཐང་སྨན་བཅོས། ཞིང་ལས་འདེབས་འཛུགས་སོགས་ཁྱབ་ཁོངས་སུ་རྒྱ་ཁྱབ་ངང་སྤྱོད་ཆོག་པས་དཔལ་འབྱོར་གྱི་རིན་ཐང་ཧ་ཅང་ཆེན་པོ་ལྡན་ལ་ཁྲོམ་རའི་མདུན་ལམ་ཡང་ཡག་པོ་ཡོད། 2023ལོར་རྒྱལ་ནང་གི་སྐྱེ་ཕན་ཕྲ་སྲིན་གྱི་ཁྲོམ་རའི་གཞི་ཁྱོན་སྒོར་དུང་ཕྱུར་1400ཟིན་གྱི་ཡོད།

ཧུའུ་པེ་ཞིང་ཆེན་དབྱི་ཁྲང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་ལྔ་པ་དང་དྲུག་པས་འཕྲལ་མར་རྗེས་སྙེག་བྱས་ནས་ས་གནས་དེ་གར་རྣམ་གྲངས་དོན་འཁྱོལ་ཡོང་བའི་བརྩོན་ལེན་ཧུར་ཐག་བྱས། ཨན་ཆི་ཚོགས་པས་དཔལ་འབྱོར་གྱི་ཕན་འབྲས་དང་སྤྱི་ཚོགས་ཀྱི་ཕན་འབྲས་ལ་ཕྱོགས་བསྡུས་བསམ་གཞིག་བྱས། མཐར་ལྷོ་ཁ་གྲོང་ཁྱེར་རྒྱ་ཚ་རྫོང་དུ་བོད་ལྗོངས་ཨན་ཆི་ཇོ་མོ་གླང་མའི་སྐྱེ་དངོས་ཚན་རྩལ་ཚད་ཡོད་ཀུང་སི་བཙུགས་ནས་སྐྱེ་ཕན་ཕྲ་སྲིན་གྱི་ཐོན་རྫས་ཐོན་སྐྱེད་དང་གཉེར་སྐྱོང་བྱ་རྒྱུའི་ཐག་བཅད།

ཁེ་ལས་རྒྱ་ཚར་རྩ་བ་ཚུགས་ནས་བདེ་བླག་ངང་ལས་འགོ་འཛུགས་པར་རོགས་རམ་བྱ་ཆེད། དབྱི་ཁྲང་གྲོང་ཁྱེར་བོད་སྐྱོར་ལས་དོན་རུ་ཁག་གིས་ཆེད་དོན་ཚན་ཁག་བཙུགས་ནས་བརྒྱུད་རིམ་ཧྲིལ་པོར་དགོས་ངེས་ཀྱི་གཞོགས་འདེགས་དང་རོགས་རམ་བྱས་ཏེ། བུ་རྫི་ལྟ་བུའི་ཞབས་འདེགས་ཞུས་ནས་ཁེ་ལས་ལ་ཆུ་དང་གློག་སྤྱོད་་སོགས་ཀྱི་དངོས་ཡོད་གནད་དོན་ཐག་གཅོད་བྱེད་རོགས་བྱས་པ་རེད།

རྒྱ་ཚ་རྫོང་སྲིད་གཞུང་གིས་ཚོང་གཉེར་ཁོར་ཡུག་བཟང་པོ་ཧུར་ཐག་བསྐྲུན་ཞིང་། ཤེས་རྟོགས་བྱུང་བར་གཞིགས་ན། རྒྱ་ཚ་རྫོང་ཞིང་ལས་གྲོང་གསེབ་ཅུས་ཀྱིས་སྔོན་ལ་སྒོར་ཁྲི་4511བཏང་ནས་ཁེ་ལས་ཀྱི་ཐོན་སྐྱེད་སྒྲུབ་རིམ་ཇུས་འགོད་དང་སྒྲིག་ཆས་ཉོ་སྒྲུབ་ལ་སྤྱད་པ་དང་། ཁེ་ལས་ལ་ཁེ་འབབ་རག་རྗེས་ཁེ་བཟང་གི་12%ལོ་ལྟར་དངུལ་སློག་ཆོག་གི་ཡོད་པ་རེད།

ཕྱོགས་ཁག་གིས་ཐུན་མོང་ཐོག་སྐུལ་འདེད་བཏང་བ་བརྒྱུད་བོད་ལྗོངས་ཨན་ཆི་ཇོ་མོ་གླང་མའི་ས་མཐོའི་སྐྱེ་ཕན་ཕྲ་སྲིན་གྱི་རྣམ་གྲངས་འཕེལ་རྒྱས་མྱུར་པོ་ཕྱིན་ཡོད།

མིག་སྔར་རང་རྒྱལ་གྱི་སྐྱེ་ཕན་ཕྲ་སྲིན་ཁྲོམ་རའི་ཐོབ་སྐལ་གྱིས་རྒྱལ་སྤྱིའི་ཐོབ་སྐལ་གྱི་85%ཡན་བཟུང་ཞིང་། དེའི་ནང་རྒྱལ་ཁབ་ཀྱིས་ཆོག་མཆན་སྤྲད་པའི་ཕྲུ་གུ་དམར་འབྱར་གྱི་བཟའ་བཅའི་ཐད་སྤྱོད་ཆོག་པའི་སྐྱེ་ཕན་ཕྲ་སྲིན་གྱི་སྡོང་རྐང་13ཚང་མ་ཕྱི་རྒྱལ་ནས་ནང་འདྲེན་བྱས་པ་དང་། རྒྱལ་ནང་གི་ཐོན་སྐྱེད་ཁེ་ལས་ཀྱིས་ཕྱི་རྒྱལ་གྱི་ཀུང་སིར་ལོ་ལྟར་ཁེ་བེད་བདག་ཐོབ་ཀྱི་གྲོན་དངུལ་འབོར་ཆེན་སྤྲོད་དགོས་ཀྱི་ཡོད།

རིགས་གཅིག་མཁས་ཅན་ཀྲང་ཞའོ་ལུང་གིས། བཟོ་གྲྭའི་ཇུས་འགོད་ཐད་ཀུང་སིས་འགག་རྩའི་སྒྲིག་ཆས་དེ་རང་རྒྱལ་ནས་ཐོན་པའི་སྒྲིག་ཆས་ཀྱིས་ཚབ་བྱེད་ཐུབ་པ་དང་འཁོར་ཁང་ཧྲིལ་པོར་གྲངས་འཛིན་ཅན་དང་། རིག་ནུས་ཅན། རང་འགུལ་ཅན་བཅས་བརྒྱུད་ལས་རིམ་ཧྲིལ་པོར་རང་འགུལ་ཚོད་འཛིན་དང་། ཡོངས་རྫོགས་བཀག་སྡོམ་རྣམ་པའི་སྐྱེལ་འདྲེན། གྲངས་འཛིན་ཅན་གྱི་དོ་དམ་བཅས་དང་དེ་བཞིན་ལས་མཚམས་ཧྲིལ་པོའི་སྤུས་ཚད་ཁུངས་འདེད་ཐུབ་པ་བཅས་མངོན་འགྱུར་བྱུང་ཡོད་ཅེས་གསར་འགོད་པར་བརྗོད།

བོད་ལྗོངས་ཨན་ཆི་ཇོ་མོ་གླང་མའི་སྐྱེ་དངོས་ཚན་རྩལ་ཚད་ཡོད་ཀུང་སིར་ད་ཆ་ལས་མི་58ཡོད་པའི་ནང་གྲངས་ཉུང་མི་རིགས་37ཡོད། ས་མཐོའི་སྐྱེ་ཕན་ཕྲ་སྲིན་གྱི་རྣམ་གྲངས་བདེ་བླག་ངང་ལས་འགོ་ཚུགས་པ་དང་ཆབས་ཅིག་ཀུང་སིས་ས་གནས་དེ་གའི་མིས་དོ་དམ་པ་བྱེད་པའི་ལས་འགན་རིམ་བཞིན་ལེགས་སྒྲུབ་བྱ་རྒྱུ་དང་འབྲེལ་ས་གནས་དེ་གར་དོ་དམ་དང་། ནོར་དོན། སྒྲིག་ཆས་སོགས་ཀྱི་འབྲེལ་ཡོད་ཆེད་ལས་ཤེས་ལྡན་པ་ཁག་གཅིག་གསོ་སྐྱོང་ཡང་བྱ་རྒྱུ་ཡིན་པ་རེད།