ཟླ་9ཚེས་7དང་ཚེས་8ཉིན་རྒྱལ་ཡོངས་བོད་སྐད་བརྡ་ཆད་ཚད་ལྡན་ཅན་གྱི་ལས་དོན་ཨུ་ལྷན（གཤམ་དུ“བརྡ་ཆད་ཚད་ལྡན་ཨུ་ལྷན”ཞེས་བསྡུ་རྒྱུ）གྱི་སྐབས་བརྗེའི་ཚོགས་འདུ་དང་2023ལོའི་བོད་སྐད་བརྡ་ཆད་ཞུ་དག་གཏན་འབེབས་ཚོགས་འདུ་ལྷ་སར་འཚོགས་པ་རེད།

ཚོགས་འདུའི་ཐོག་རྒྱལ་ཡོངས་བོད་སྐད་བརྡ་ཆད་ཚད་ལྡན་ཅན་གྱི་ལས་དོན་ཨུ་ལྷན་སྐབས་ལྔ་པ་དང་རྒྱལ་ཡོངས་བོད་སྐད་བརྡ་ཆད་གསར་པའི་ཡིག་སྒྱུར་དང་ཞུ་དག་གཏན་འབེབས་ཀྱི་རིགས་གཅིག་མཁས་ཅན་ཨུ་ལྷན་སྐབས་གསུམ་པའི་མིང་ཐོ་སྒྲོག་སྦྱངས་བྱས་ནས་གསར་དུ་བདམས་པའི་ཨུ་ཡོན་དང་འཐུས་མིར་གདན་ཞུའི་ལག་ཁྱེར་སྤྲད་པ་རེད། ཚོགས་འདུ་འཚོགས་རིང་ཚོགས་ཞུགས་ཨུ་ཡོན་གྱིས《རྒྱལ་ཡོངས་ཀྱི་བོད་སྐད་བརྡ་ཆད་ཚད་ལྡན་ཅན་གྱི་ལས་དོན་ཨུ་ལྷན་གྱི་སྒྲིག་ཡིག》དང་། 《2023ལོའི་བོད་ཡིག་ཐ་སྙད་གསར་པ》 《བོད་ཡིག་ཐ་སྙད་གསར་པ་ཚད་ལྡན་གྱི་བརྡ་སྤྲོད་ལམ་སྲོལ》བཅས་ལ་སྔ་རྗེས་སུ་གྲོས་ཞིབ་བྱས་ནས་གྲོས་འཆམ་བྱུང་བ་རེད། བརྡ་ཆད་ཚད་ལྡན་ཅན་ཨུ་ལྷན་གྱི་ཨུ་ཡོན་དང་མཚོ་སྔོན་དགེ་འོས་སློབ་ཆེན་གྱི་དགེ་རྒན་ཆེ་མོ་བ་རྡོ་ལྷས་དེང་གི་བོད་ཡིག་ཆ་འཕྲིན་ཅན་གྱི་ལག་རྩལ་འཕེལ་རྒྱས་གནས་ཚུལ་ངོ་སྤྲོད་བྱས་པ་རེད།

ངོ་སྤྲོད་བྱས་པར་གཞིགས་ན། འདས་ཟིན་པའི་ལོ་5རིང་། བརྡ་ཆད་ཚད་ལྡན་ཅན་ཨུ་ལྷན་སྐབས་བཞི་པས་བོད་སྐད་བརྡ་ཆད་ཚད་གཞི་ཅན་དང་ཚད་ལྡན་ཅན་སོགས་ཀྱི་ལས་དོན་ལ་ཤུཌ་སྣོན་བརྒྱབ་ནས། བོད་སྐད་ཡིག་རྒྱུན་འཛིན་དང་འཕེལ་རྒྱས་ཆེད་ལེགས་སྐྱེས་ཧུར་ཐག་ཕུལ་ཡོད་པ་རེད།

ད་ཐེངས་ཀྱི་ཚོགས་འདུ་བརྡ་ཆད་ཚད་ལྡན་ཅན་ཨུ་ལྷན་གྱིས་གཙོ་གཉེར་བྱས་པ་དང་། ཀྲུང་གོ་བོད་རིག་པ་ཞིབ་འཛུག་ལྟེ་གནས་ཚན་ཞིབ་ལས་སྒོའི་གཞུང་ལས་ཁང་དང་བོད་རང་སྐྱོང་ལྗོངས་བོད་སྐད་ཡིག་ལས་དོན་ཨུ་ལྷན་གཞུང་ལས་ཁང（རྩོམ་སྒྱུར་ཅུས）གིས་གཉེར་འགན་འཁུར་བ་རེད། དུས་ཡུན་རིང་པོར་བོད་སྐད་བརྡ་ཆད་ལས་དོན་ལ་གཞོལ་མཁན་བོད་ལྗོངས་དང་བོད་འབྲེལ་ལས་དོན་གྱི་གཙོ་གནད་ཞིང་ཆེན་གྱི་འབྲེལ་ཡོད་ཚན་པའི་འཐུས་མི་དང་རིགས་གཅིག་མཁས་ཅན་དང་མཁས་དབང་50ལྷག་ཙམ་ཚོགས་འདུར་ཞུགས་ཡོད་པ་རེད།