ཉིང་ཁྲི་གྲོང་ཁྱེར་ཀོང་པོ་རྒྱ་མདའ་རྫོང་རྒྱ་མདའ་ཤང་ཐའེ་ཀྲའོ་གྲོང་ཚོར་སྐྱོད་སྐབས“ཇ་རྟ་གནའ་ལམ”གྱི་བྱང་བུ་གང་སར་མཐོང་རྒྱུ་ཡོད་པ་དང་ཐའེ་ཀྲའོ་གནའ་གྲོང་དུ་བསྡད་ཚེ་དེ་གའི་ལོ་རྒྱུས་དང་འཕེལ་རྒྱས་ཀྱི་འགྱུར་ལྡོག་མིག་ལམ་དུ་གསལ་ལེར་འཆར་ཐུབ། ཐའེ་ཀྲའོ་གྲོང་ཚོའི་ཏང་ཀྲི་པུའི་ཧྲུའུ་ཅི་འཇམ་དབྱངས་ཆོས་གྲགས་ཀྱིས“ཐའེ་ཀྲའོ་གནའ་གྲོང་ནི་དེ་སྔའི་རྒྱ་མདའ་རྫོང་གི་གནས་རྙིང་རེད། གནའ་དུས་བོད་དུ་སྐྱོད་སའི་ལམ་བཞི་ཡོད་པ་སྟེ། མཚོ་བོད་དབུས་ལམ་དང་། མཚོ་བོད་ཤར་ལམ། མཚོ་བོད་ནུབ་ལམ། ཁྲོན་བོད་རྟ་ལམ་བཅས་ཡིན། མཚོ་བོད་ནུབ་ལམ་ཕུད་ལམ་གཞན་གསུམ་ངེས་པར་དུ་ཐའེ་ཀྲའོ་གནའ་གྲོང་བརྒྱུད་དགོས་ཀྱི་ཡོད་པས་ཐའེ་ཀྲའོ་ནི་ཐང་བོད་གནའ་ལམ་གྱི་ས་ཚུགས་གལ་ཆེན་ཞིག་རེད”ཅེས་ངོ་སྤྲོད་བྱས།

ད་ཆའི་ཐའེ་ཀྲའོ་གྲོང་ཚོའི་གྲལ་སྟར་འགྲིག་པའི་བོད་བཟོའི་སྡོད་ཁང་དག་སྔོ་ལྗང་གི་གནའ་སྡོང་ཁྲོད་གནས་པ་དང་དགུང་སྔོན་སྤྲིན་དཀར་དང་ཕན་ཚུན་གཅིག་ལ་གཅིག་འགྲན་ལྟར་སྣང་། ལོ་ངོ་སྟོང་གི་ལོ་རྒྱུས་ལྡན་པའི་གནའ་གྲོང་དེར་མི་རིགས་མཐུན་སྒྲིལ་གྱི་དགའ་སྤྲོའི་གླུ་དབྱངས་ལྷང་ལྷང་དུ་གྲགས། “ད་ཆའི་བར་ཐའེ་ཀྲའོ་གྲོང་ཚོ་ནི་སྔར་བཞིན་མི་རིགས་མཐུན་སྒྲིལ་གྱི་ཁྱིམ་ཚང་ཆེ་མོ་ཞིག་ཡིན་པས་ཚང་མ་མཉམ་དུ་དགའ་དགའ་སྤྲོ་སྤྲོའི་ངང་འཚོ་བ་སྐྱེལ་བཞིན་ཡོད”ཅེས་འཇམ་དབྱངས་ཆོས་གྲགས་ཀྱིས་བཤད།

2004ལོར་ཀན་སུའུ་ནས་ཡིན་པའི་ཕོ་གཞོན་ཧྲན་ཅིན་ཤང་རྒྱལ་ལམ་318འཛུགས་སྐྲུན་ནང་ཞུགས་པས་མཁའ་ལམ་དེའི་དཔང་པོ་བྱེད་ཐུབ། དེ་རྗེས་ཐའེ་ཀྲའོ་ཟམ་པ་དང་པོ་བསྐྲུན་ས་ནས་ཁོང་ལ་བོད་རིགས་བུ་མོ་འཆི་མེད་ངོ་ཤེས་ཏེ་འབྲེལ་བ་ཇེ་ཟབ་ཏུ་ཕྱིན་ནས་མཐར་དྲོ་སྐྱིད་ལྡན་པའི་མི་རིགས་མཐུན་སྒྲིལ་གྱི་ཁྱིམ་ཚང་ཞིག་བཙུགས། “ང་འཆི་མེད་ཀྱི་ཁྱིམ་དུ་མག་པར་ཕྱིན་པ་ཡིན། ཐོག་མར་སྐད་བརྡ་མ་འཕྲོད་པའི་རྐྱེན་གྱིས་གྲོང་མི་ཚོ་དང་སྐད་ཆ་ཤོད་ཉུང་ཉུང་ཡིན། འོན་ཀྱང་ལོ་20ཕྱིན་རྗེས་དེ་གའི་ཡུལ་སྐད་གོ་གི་འདུག”ཅེས་བཤད། ཧྲན་ཅིན་ཤང་ད་ཆ་ཇ་བསྲུབས་མ་དང་རྩམ་པ་ཚུད་པའི་དེ་གའི་ལྟོ་ཆས་དང་ཡུལ་སྲོལ་གོམས་གཤིས་ཚང་མར་དགའ་པོ་ཡོད།

ཧྲན་ཅིན་ཤང་གི་གཟེངས་སུ་ཐོན་པའི་ལྡེབས་ཞལ་གྱི་ལག་ཤེས་ཤང་ནང་སྐད་གྲགས་ཆོད་ཅིང་། གྲོང་ཚོར་གསང་སྤྱོད་གསར་རྒྱག་གམ་ཡང་ན་ཁང་པ་རྒྱག་སྐབས་ཚང་མས་ཁོང་གླ་གི་ཡོད།

ཐའེ་ཀྲའོ་གྲོང་ཚོའི་གྲོང་མིས་དུས་ཚིགས་རང་བཞིན་གྱི་དབྱར་རྩྭ་དགུན་འབུ་དང་བེ་ཤ་བཏུས་ནས་འཚོ་ཐབས་བྱེད་ཀྱི་ཡོད། མིག་སྔའི་གནས་ཚུལ་ལ་དམིགས་ནས་ཧྲན་ཅིན་ཤང་གིས་རང་འགུལ་ངང་དགེ་ཕྲུག་དྲུག་བསྡུས་ཏེ་ངང་རྒྱུད་རིང་པོས་ཁོ་ཚོར་ལག་ཤེས་བསླབས། “ངས་རང་ཉིད་ཀྱི་འབད་བརྩོན་ལ་བརྟེན་ནས་ཁོ་ཚོས་ལག་ཤེས་སྣ་རེ་ཁོང་དུ་ཆུད་པར་བྱས་ཏེ་དབྱར་རྩྭ་དགུན་འབུ་དང་བེ་ཤ་འཐུ་བ་ཕུད་པའི་དུས་ཚོད་ནང་རང་ཉིད་ཀྱི་ལག་གཉིས་ལ་བརྟེན་ནས་ཡོང་འབབ་བསགས་ཏེ་འཚོ་བ་དེ་བས་ཡག་པ་སྐྱེལ་ཐུབ་པའི་རེ་བ་བྱེད་ཀྱི་ཡོད”ཅེས་ཧྲན་ཅིན་ཤང་གིས་བཤད།

2023ལོའི་ཟླ་9ཚེས་25ཉིན། ཐའེ་ཀྲའོ་གནའ་གྲོང་གི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་ཆེད་དོན་འགྲེམས་ཁང་ཕྱི་ཕྱོགས་སུ་སྒོ་མོ་ཕྱེ་བ་རེད། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་གཙོ་རྐང་དུ་བྱ་རྒྱུ་འགྲེམས་སྟོན་གྱི་ནང་དོན་བྱས་པ་དང་། རླབས་ཆེན་མེས་རྒྱལ་ཁྱིམ་ཚང་ཆེ་མོའི་ནང་བོད་ཀྱི་མི་རིགས་ཁག་གི་མི་དམངས་དང་རྒྱལ་ཡོངས་མི་རིགས་ཁག་གི་མི་དམངས་དབར་འགྲོ་འོང་དང་། སྤེལ་རེས། མཉམ་འདྲེས་བཅས་བྱས་ནས་ཐུན་མོང་ཐོག་བོད་ལྗོངས་འཛུགས་སྐྲུན་བྱེད་པའི་ལོ་རྒྱུས་ཀྱི་རྣམ་པ་ཕྱོགས་ཡོངས་ནས་མངོན་པར་བྱས་པ་རེད།

འཇམ་དབྱངས་ཆོས་གྲགས་ཀྱིས“གྲོང་ཚོར་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་འགྲེམས་ཁང་ཡོད་པ་དེ་ཐའེ་ཀྲའོ་གྲོང་ཚོའི་མི་སེར་གྱི་ངོས་ནས་བརྗོད་ན་བྱ་བཟང་ཞིག་རེད། དེས་མི་རིགས་མཐུན་སྒྲིལ་ལ་སྔར་བས་སྐུལ་འདེད་གཏོང་ཐུབ་པ་མ་ཟད། གྲོང་ཚོར་འགྲུལ་བཞུད་བྱེད་མཁན་མང་པོ་ཡོང་ནས་གྲོང་ཚོའི་ཐོན་ལས་འཕེལ་རྒྱས་ལ་སྐུལ་ཁྲིད་ཀྱང་བྱེད་ཐུབ”ཅེས་བཤད།

ད་ཆ་མི་རབས་ནས་མི་རབས་བར་དེ་གར་འཚོ་སྡོད་བྱེད་པའི་བོད་རིགས་སྤུན་ཟླའམ་ཡང་ན་ཕྱིས་སུ་དེ་གར་སྤོས་པའི་མི་རིགས་ཁག་གི་མང་ཚོགས་སུ་ཞིག་ཡིན་རུང་ཐའེ་ཀྲའོ་ཡི་ས་ཆ་དེའི་ཐོག་ཚང་མས་མཉམ་དུ་མི་རིགས་མཐུན་སྒྲིལ་གྱི་ལེའུ་གསར་པ་བརྩམས་དང་རྩོམ་མུས་རེད།