རང་སྐྱོང་ལྗོངས་ཀྱི་2024ལོའི“སྨན་རྫས་བདེ་འཇགས་དྲིལ་བསྒྲགས་གཟའ་འཁོར”གྱི་བྱེད་སྒོ་སྤེལ་འགོ་ཚུགས་པ།
ཚེས་6ཉིན་གྱི་སྔ་དྲོར་རང་སྐྱོང་ལྗོངས་ཀྱི་2024ལོའི“སྨན་རྫས་བདེ་འཇགས་དྲིལ་བསྒྲགས་གཟའ་འཁོར”གྱི་བྱེད་སྒོ་ལྷ་སར་སྤེལ་འགོ་ཚུགས་པ་རེད།
ད་ལོའི“སྨན་རྫས་བདེ་འཇགས་དྲིལ་བསྒྲགས་གཟའ་འཁོར”གྱི་བྱེད་སྒོའི་བརྗོད་དོན་གཙོ་བོ་ནི“སྨན་རྫས་བདེ་འཇགས་ལ་བཅའ་ཁྲིམས་ཀྱིས་སྲུང་སྐྱོང་བྱེད”ཅེས་པ་དེ་རེད། རང་སྐྱོང་ལྗོངས་སྨན་རྫས་ལྟ་འདོམས་ཅུས་ཀྱིས་ཚན་རིག་ཁྱབ་གདལ་དང་དྲིལ་བསྒྲགས་ཀྱི་བརྙན་ཐུང་དང་། དྲིལ་བསྒྲགས་པར་རིས། དྲིལ་བསྒྲགས་རྒྱ་ཁྱབ་བརྡ་སྦྱོར་བཅས་ཁག་མང་པོ་བཟོས་པ་དང་། “བོད་ལྗོངས་སྨན་རྫས་ལྟ་འདོམས”ཀྱི་སྐད་འཕྲིན་སྤྱི་རྟགས་དང་ཁྱུག་དབྱིངས་ཨང་རྟགས་སོགས་ཀྱི་ལས་སྟེགས་བརྒྱུད་བསྟན་ཏེ་དེ་བས་ཐད་ཀར་དང་གོ་བདེའི་ཐབས་ལ་བརྟེན་ནས་སྤྱི་དམངས་ཚོར་སྨན་རྫས་ཡང་དག་སྤྱོད་པའི་འདུ་ཤེས་དང་རང་ངོས་སྲུང་སྐྱོང་གི་འདུ་ཤེས་འཛུགས་རོགས་བྱས་ཏེ་མི་ཚང་མ་ཞུགས་པའི་བདེ་འཇགས་སྨན་སྤྱོད་ཀྱི་ཁོར་ཡུག་གཏོད་རྒྱུ་རེད།
ཤེས་རྟོགས་བྱུང་བར་གཞིགས་ན། རང་སྐྱོང་ལྗོངས་སྨན་རྫས་ལྟ་འདོམས་ཅུས་ཀྱིས་སྨན་རྫས་ཞིབ་དཔྱད་ཚད་ལེན་གྱི་སྤྱི་དམངས་སྒོ་དབྱེའི་ཉིན་མོའི་བྱེད་སྒོ་སྒྲིག་འཛུགས་བྱས་ནས་སྤེལ་བ་མ་ཟད། སློབ་མ་དང་། སྡེ་ཁུལ་གྱི་གྲོང་མི། སྨྱན་སྦྱོར་གསར་འགོད་པ་སོགས་རང་སྐྱོང་ལྗོངས་བཟའ་བཅའ་དང་སྨན་རྫས་ཞིབ་དཔྱད་ཞིབ་འཇུག་ཁང་དུ་ལྟ་སྐོར་བྱེད་པར་གདན་དྲངས་ཏེ། ཚང་མར་སྨན་རྫས་ལ་ལྟ་སྐུལ་ཟུར་བཤེར་དང་བོད་སྨན་དང་མཛེས་རྫས་ཞིབ་དཔྱད་དང་ཞིབ་བཤེར་ཚད་ལེན་སོགས་ཀྱི་ཚན་རིག་ཁྱབ་གདལ་གྱི་ཤེས་བྱར་ཤེས་རྟོགས་གཏིང་ཟབ་བྱེད་རོགས་བྱས་པ་རེད།