ཆབ་མདོ་གྲོང་ཁྱེར་གྱིས“སྲིད་གཞུང་དང་ཞིབ་དཔྱོད་མཉམ་འགུལ”གྱི་ལམ་སྲོལ་བཙུགས་ནས་ཁྲིམས་སྐྱོང་སྲིད་གཞུང་འཛུགས་སྐྱོང་ལ་རམ་འདེགས་བྱས་པ།
སྲིད་འཛིན་ལས་ཁུངས་དང་ཞིབ་དཔྱོད་ལས་ཁུངས་ཀྱི་ཕྱོགས་མང་དང་རིམ་པ་མང་བའི་མཉམ་སྒུལ་མཉམ་སྒྲུབ་ལ་སྔར་བས་ཤུགས་སྣོན་རྒྱག་ཆེད། ཉེ་ཆར་ཆབ་མདོ་གྲོང་ཁྱེར་མི་དམངས་སྲིད་གཞུང་དང་ཆབ་མདོ་གྲོང་ཁྱེར་མི་དམངས་ཞིབ་དཔྱོད་ཁང་གིས་མཉམ་འབྲེལ་ཐོག《“སྲིད་གཞུང་དང་ཞིབ་དཔྱོད་མཉམ་འགུལ”གྱི་ལས་ཀའི་ལམ་སྲོལ་འཛུགས་རྒྱུའི་སྐོར་གྱི་བསམ་འཆར》(གཤམ་དུ《བསམ་འཆར》ཞེས་བསྡུ་རྒྱུ)བཀྲམ་པ་རེད། ལེགས་ཆ་གསབ་རེས་དང་མཉམ་འགུལ་བཟང་པོའི“སྲིད་གཞུང་དང་ཞིབ་དཔྱོད་མཉམ་འགུལ”གྱི་ལས་སྟེགས་གསར་པ་བསྐྲུན་ནས་ཆབ་མདོའི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་ཞབས་ཞུ་འགན་ལེན་དང་ལྗོངས་ཡོངས་ཀྱི་ལྟེ་བའི་ཡན་ལག་གྲོང་ཁྱེར་བསྐྲུན་རྒྱུར་ཁྲིམས་སྐྱོང་གི་སྒུལ་ནུས་མཁོ་འདོན་བྱ་རྒྱུ་ཡིན་པ་རེད།
《བསམ་འཆར》ནང་། སྲིད་འཛིན་ལས་ཁུངས་དང་ཞིབ་དཔྱོད་ལས་ཁུངས་ཀྱི་ཁྲིམས་གཏན་འཁེལ་བའི་འགན་འཁྲིར་གཞི་ཚུགས་ཏེ་ཞིབ་དཔྱོད་ལས་ཁུངས་དང་སྲིད་འཛིན་ལས་ཁུངས་ཀྱིས“སྲིད་གཞུང་དང་ཞིབ་དཔྱོད་མཉམ་འགུལ”གྱི་ཐོག་ནས་མཐུན་སྦྱོར་གཞོགས་འདེགས་བྱེད་ཤུགས་ཆེ་རུ་བཏང་སྟེ་ཁྲིམས་ལྟར་རྒྱལ་ཁབ་ཀྱི་བདེ་འཇགས་སྲུང་སྐྱོང་དང་། སྤྱི་ཚོགས་བརྟན་ལྷིང་སྲུང་སྐྱོང་། དཔལ་འབྱོར་བདེ་འཇགས་སྲུང་སྐྱོང་བཅས་བྱ་རྒྱུར་དམིགས་པ་དང་། དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། ཞིབ་དཔྱོད་ལྟ་སྐུལ་དང་སྲིད་འཛིན་ཁྲིམས་སྒྱུར་གྱི་འབྲེལ་མཐུད་ལམ་ལུགས་འཛུགས་པ། “ཁྲིམས་ལྟར་སྲིད་འཛིན་དང་ཞིབ་དཔྱོད་ལྟ་སྐུལ་ཟུང་འབྲེལ”གྱི་སྤྱི་ཚོགས་བཅོས་སྐྱོང་བྱེད་སྟངས་གསར་པ་གཏིང་ཟབ་ཏུ་གཏོང་བ་སོགས་ཞིབ་ཕྲའི་ལས་དོན་ཁག་བཅོ་བརྒྱད་དང་སྦྲེལ་མཐུད་ནུས་ལྡན་དང་མཐུན་སྦྱོར་བྱེད་དགོས་ལུགས་ཁ་གསལ་བཏོན་ཡོད།
《བསམ་འཆར》ནང་ད་དུང་ཆབ་མདོ་གྲོང་ཁྱེར་མི་དམངས་སྲིད་གཞུང་དང་ཆབ་མདོ་གྲོང་ཁྱེར་མི་དམངས་ཞིབ་དཔྱོད་ཁང་གི་དུས་བཀག་མཉམ་འབྲེལ་ཚོགས་འདུའི་ལམ་ལུགས་དང་། རྣམ་པ་སྣ་ཚོགས་ཀྱི་འབྲེལ་གཏུག་མཉམ་སྒྲུབ་ལམ་ལུགས། རྒྱུན་གཏན་རང་བཞིན་གྱི་སྲིད་གཞུང་དང་ཞིབ་དཔྱོད་འབྲེལ་གཏུག་ལམ་ལུགས་བཅས་ལམ་སྲོལ་གསུམ་བཙུགས་ཡོད། འབྲེལ་གཏུག་མི་སྣ་བཀོད་སྒྲིག་བྱེད་པ་དང་སྲིད་གཞུང་དང་ཞིབ་དཔྱོད་མཉམ་འགུལ་ལས་དོན་གཞུང་ལས་ཁང་སོགས་འཁོར་སྐྱོད་སྒྲིག་གཞི་བཙུགས་ཏེ་དུས་བཀག་ལྟར་འབྲེལ་གཏུག་ཚོགས་འདུ་དང་། བརྡ་ཁྱབ་ཚོགས་འདུ། བཞུགས་མོལ་ཚོགས་འདུ། ཞིབ་འཇུག་བརྡར་གཅོད་ཚོགས་འདུ། མཉམ་འབྲེལ་ཚོགས་འདུ་སོགས་འཚོགས་ནས་ལས་ཀའི་གནས་ཚུལ་བརྡ་ཁྱབ་གཏོང་བ་དང་། དོན་ཚན་གལ་ཆེན་ཞིབ་འཇུག་བཀོད་སྒྲིག དམིགས་བསལ་གནད་དོན་གྲོས་མོལ་ཐག་གཅོད་བཅས་བྱས་ཏེ་ཕྱོགས་གཉིས་པོས་མཐུན་སྦྱོར་གོ་རིམ་ལྡན་པ་དང་། གཞོགས་འདེགས་ནུས་ལྡན། ལས་དོན་ནུས་ལྡན་བཅས་ཀྱི་ཐད་མཉམ་ལས་ཀྱི་ཟམ་པ་བསྐྲུན་པ་དང་ལམ་ལུགས་ཀྱི་རྨང་རྡོ་བཏིང་ནས་ལམ་སྲོལ་ལ་སྐུལ་འདེད་ནུས་ལྡན་ཐེབས་པ་དང་དོན་འཁྱོལ་ཐུབ་པའི་འགན་ལེན་བྱས་པ་རེད།