ཐོག་མའི་བསམ་འདུན་བརྟན་སྲུང་གིས་འབད་འབུངས་མདུན་སྐྱོད་བྱེད་ཀྱི་ཡིན།
གཟི་བརྗིད་ལྡན་པའི་དུས་འདིར། རང་ཉིད་ལ་སེམས་འགུལ་ཚད་མེད་ཐེབས་ཤིང་སྤོབས་སེམས་ཆེན་པོའང་སྐྱེས་བྱུང་། གུས་པས་རང་སྐྱོང་ལྗོངས་ཏང་ཨུད་དང་སྲིད་གཞུང་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། ཁྱེད་རྣམ་པས་གུས་པའི་འདས་ཟིན་པའི་ལས་ཀར་ཚད་མཐོའི་ཁས་ལེན་དང་གདེང་འཇོག་གནང་བར་ཐུགས་རྗེ་ཆེ་ཞུ་རྒྱུ་ཡིན། མཚན་སྙན་འདི་ནི་རང་ཉིད་ཀྱིས་འབད་བརྩོན་བྱས་པའི་འབྲས་བུ་ཡིན་ལ། ལྷག་པར་དུ། གཞིས་རྩེ་གྲོང་ཁྱེར་ནང་བསྟན་མཐུན་ཚོགས་ཀྱི་ལས་རོགས་ཚང་མས་དཀའ་སྤྱད་འབད་འབུངས་བྱས་པའི་མཉམ་སྡེབ་ཀྱི་གཟི་བརྗིད་མཚན་སྙན་ཞིག་ཀྱང་ཡིན། མཚམས་འདིར། གུས་པས་གཞིས་རྩེ་གྲོང་ཁྱེར་ནང་བསྟན་མཐུན་ཚོགས་ཀྱི་ཚབ་ཞུས་ནས་ང་ཚོར་ཐུགས་ཁུར་དང་། རྒྱབ་སྐྱོར། མཛུབ་སྟོན་བཅས་གནང་མཁན་རིམ་ཁག་དབུ་ཁྲིད་དང་དེ་བཞིན་སྒེར་སེམས་མེད་པར་ལེགས་སྐྱེས་འབུལ་མཁན་ལས་རོགས་ཚང་མར་སྙིང་དབུས་ནས་གུས་འདུད་དང་ཐུགས་རྗེ་ཆེ་ཞུ་རྒྱུ་ཡིན།
འདས་དོན་ལ་ཕྱིར་མིག་བལྟས་ཚེ། གུས་པ་རང་ཉིད་གཞིས་རྩེ་གྲོང་ཁྱེར་ནང་བསྟན་མཐུན་ཚོགས་ལ་ལས་ཀར་སླེབས་ནས་བགྲང་བྱ་བཅོ་ལྔ་ཙམ་སོང་འདུག ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག ང་ཚོས་ཐོག་མཐའ་བར་གསུམ་དུ་དུས་རབས་ཀྱི་རྗེས་སུ་འབྲངས་ཤིང་། ལྟེ་བའི་ལས་དོན་ལ་དམ་པོར་དམིགས་ནས་འགྲན་སློང་སྣ་ཚོགས་ལ་ཁ་གཏད་ཧུར་ཐག་བཅག་སྟེ་གསར་གཏོད་ཀྱི་ལམ་བུ་འཚོལ་ཞིབ་རྒྱུན་ཆད་མེད་པར་བྱས་ཡོད། ལྷག་པར་དུ། ནང་བསྟན་མཐུན་ཚོགས་ཀྱི་འབྲེལ་ཟམ་ལྟ་བུའི་འགན་འཁྲི་དང་། “འདུ་ཤེས་གསུམ”གྱི་སློབ་གསོ་སྒྲོག་འགྲེལ། ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་སོགས་འགག་རྩའི་ཁྱབ་ཁོངས་སུ་ང་ཚོས་ལྷག་བསམ་རྣམ་དག་གིས་དད་ལྡན་མང་ཚོགས་དང་དགོན་སྡེའི་གྲྭ་བཙུན་ལ་ཞབས་འདེགས་ཞུས་པས་གྲུབ་འབྲས་མངོན་གསལ་དོད་པོ་ཐོབ་ཡོད། འགག་སྒྲོལ་ཐེངས་རེ་དང་ཡར་ཐོན་ཐེངས་རེ་བྱུང་བ་ཚང་མར་ཏང་ཨུད་དང་སྲིད་གཞུང་གི་མཁས་མཛངས་ལྡན་པའི་ཐབས་ཇུས་དང་། རྒྱ་ཆེའི་དད་ལྡན་མང་ཚོགས་དང་རྒྱལ་གཅེས་གྲྭ་བཙུན་ཚང་མའི་དཀའ་སྤྱད་འབད་འབུངས་འདུས་ཡོད། གྲུབ་འབྲས་འདི་དག་ལས་ང་ཚོར་གཟི་བརྗིད་དང་སྤོབས་སེམས་ཆེན་པོ་སྐྱེས་བྱུང་།
འབྱུང་འགྱུར་ལ་རྒྱང་ལྟ་བྱས་ཚེ། ང་ཚོའི་ཕྲག་ཐོག་གི་འགན་འཁྲི་སྔར་བས་ལྕི་རུ་ཕྱིན་ཡོད་ལ། ཡིད་ཆེས་དང་རེ་བས་ཀྱང་ཁེངས་ཡོད། མཚམས་འདིར་ངས་ད་ཐེངས་ཀྱི་གདེང་འཇོག་དེ་འགོ་འཛུགས་ས་གསར་པ་ཞིག་ཏུ་བརྩིས་ནས་ཐོག་མའི་བསམ་འདུན་མུ་མཐུད་བརྟན་པོར་བསྲུངས་ཤིང་འབད་འབུངས་མདུན་སྐྱོད་བྱེད་རྒྱུའི་ཁས་ལེན་ནན་ཏན་ཞུ་རྒྱུ་ཡིན། ཚད་གཞི་དེ་བས་མཐོ་བའི་སྒོ་ནས་རང་ཉིད་ལ་རེ་བ་ནན་པོ་བཅོལ་ཞིང་། དེ་བས་སེམས་རྩ་འཁོལ་པོས་ནང་བསྟན་མཐུན་ཚོགས་ཀྱི་ལས་ཀར་གཞོལ་ཏེ་ཏང་ཨུད་དང་སྲིད་གཞུང་གིས་གཏན་འཁེལ་བྱས་པའི་དམིགས་ཚད་མངོན་འགྱུར་བྱེད་ཆེད་རང་ཉིད་ཀྱི་བློ་གྲོས་དང་སྟོབས་ཤུགས་སྐྱེས་སུ་ཕུལ་ནས་ནང་བསྟན་མཐུན་ཚོགས་ཀྱི་ལས་དོན་དེ་མཐོ་ཚད་གསར་པ་ཞིག་ཏུ་སླེབས་པར་སྐུལ་འདེད་གཏོང་རྒྱུ་ཡིན།
དེས་མ་ཟད། ངས་མུ་མཐུད་སློབ་སྦྱོང་ལ་ཤུགས་སྣོན་བརྒྱབ་སྟེ་རང་ཉིད་ཀྱི་འཇོན་ཐང་ཆེ་རུ་ཟམ་མི་ཆད་པར་གཏོང་རྒྱུ་དང་། དུས་རབས་གོང་འཕེལ་གྱི་རྗེས་སུ་དམ་པོར་འབྲངས་ནས་ལས་ཀའི་བྱེད་སྟངས་གསར་གཏོད་དང་ལས་ཕྱོད་ཆེ་རུ་གཏོང་རྒྱུ་ཡིན། དུས་མཚུངས་སུ་ངས་ནང་བསྟན་མཐུན་ཚོགས་ཀྱི་རང་ངོས་འཛུགས་སྐྱོང་ལ་དེ་བས་མཐོང་ཆེན་བྱས་ཐོག མཉམ་སྒྲུབ་མཉམ་ལས་ཀྱི་སྙིང་སྟོབས་ཆེ་རུ་བཏང་ནས་ཏང་དང་སྲིད་གཞུང་གི་བློ་རྩ་བརྟན་པའི་ལས་རོགས་པ་ཞིག་དང་། རྒྱ་ཆེའི་དད་ལྡན་མང་ཚོགས་དང་དགོན་སྡེའི་གྲྭ་བཙུན་རྣམས་ཀྱི་སྙིང་ཉེ་བའི་འབྲེལ་ཟམ་ལྟ་བུ་ཞིག་ཏུ་འགྱུར་བ་བྱ་རྒྱུ་ཡིན།
ང་ཚོའི་སེམས་ནང་གསལ་རྟོགས་ཐུབ་པར། འདས་ཟིན་པའི་གྲུབ་འབྲས་ནི་མདུན་སྐྱོད་ཀྱི་སྒུལ་ཤུགས་ཤིག་ཡིན་མོད། འོན་ཀྱང་འབྱུང་འགྱུར་གྱི་འགྲོ་ལམ་ནི་སྔར་བཞིན་ལས་འགན་ལྕི་ལ་ལམ་ཐག་རིང་བ་ཞིག་ཡོད། ང་ཚོས་ཐེངས་འདིའི་ཚོགས་འདུ་གོ་སྐབས་སུ་བཟུང་ནས་དཀའ་སྤྱད་འབད་བརྩོན་དང་གསར་འབྱེད་གསར་གཏོད་ཀྱི་སྙིང་སྟོབས་མུ་མཐུད་དར་སྤེལ་བཏང་སྟེ་བྱ་སྤྱོད་དངོས་ཀྱི་ཐོག་ནས་ཏང་ཨུད་དང་སྲིད་གཞུང་གི་ཡིད་ཆེས་དང་རེ་བཅོལ་ལ་དྲིན་ལན་འཇལ་རྒྱུ་ཡིན་ལ། རང་སྐྱོང་ལྗོངས་ཀྱི་ལྟེ་བའི་ལས་དོན“དོན་ཆེན་བཞི”དང“མདུན་གྲལ་དུ་སླེབས་པ་བཞི”ཡི་ཆེད་དུ་རང་ཉིད་ཀྱི་སྟོབས་ཤུགས་ཀྱང་འབུལ་གྱི་ཡིན།
མཇུག་ཏུ་གུས་པས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཁས་ལེན་དང་རྒྱབ་སྐྱོར་ལ་ཐུགས་རྗེ་ཆེ་ཡང་ཡང་ཞུ་རྒྱུ་དང་། ལས་རོགས་ཡོངས་ཀྱི་དཀའ་སྤྱད་འབད་བརྩོན་ལ་ལྷག་བསམ་རྣམ་དག་གིས་གུས་འདུད་ཞུ་རྒྱུ་ཡིན། ང་ཚོས་ཕྱར་བ་གྲུ་འདེཌ་ཀྱིས་མདུན་དུ་བསྐྱོད་དེ་མཉམ་དུ་འོད་སྟོང་འབར་བའི་གྲུབ་འབྲས་བཏོད་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་ཀྲུང་གོའི་ཕུགས་འདུན་མངོན་འགྱུར་ཡོང་བ་དང་བོད་ལྗོངས་དར་རྒྱས་གོང་འཕེལ་ཡོང་བར་འབད་བརྩོན་ལྷོད་མེད་བྱེད་ཀྱི་ཡིན།