ཟླ་9ཚེས་3ཉིན་ཀྲུང་གོ་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ལས་འཛིན་ལྷན་ཚོགས་སྐབས་བཅུ་གཉིས་པའི་ལས་འཛིན་ལྷན་ཚོགས་ཀྱི་ཚོགས་འདུ་ཐེངས་དང་པོའི་ཐོག་པཎ་ཆེན་རིན་པོ་ཆེ་མཆོག་ཚོགས་གཙོར་བདམས་ཐོན་བྱུང་བ་དེར་གུས་པས་ཡོངས་སུ་གོང་བཀུར་དང་མོས་མཐུན་ཞུ་རྒྱུ་མ་ཟད། སྤྲོ་སེམས་འཁོལ་པོས་རྟེན་འབྲེལ་ཡང་ཞུ་རྒྱུ་ཡིན། དེ་རིང་ཧྲུའུ་ཅི་ཝང་ཅུན་ཀྲེང་སྐུ་ངོ་མས་སྐབས་གསར་པའི་ལས་འཛིན་ལྷན་ཚོགས་ཀྱི་ཚན་ཁག་གི་ཁོངས་མིར་མཇལ་འཕྲད་གནང་བ་དེའི་ཐོག་ནས་རང་སྐྱོང་ལྗོངས་ཏང་ཨུད་དང་ཧྲུའུ་ཅི་ཝང་ཅུན་ཀྲེང་གིས་ཆོས་ལུགས་ལས་དོན་དང་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱི་ལས་དོན་ལ་ཚད་མཐོའི་མཐོང་ཆེན་དང་། བོད་བརྒྱུད་ནང་བསྟན་ལས་རིགས་ཀྱི་མི་སྣར་བྱམས་བརྩེའི་ཐུགས་ཁུར་གནང་ལུགས་གང་ལེགས་མཚོན་ཡོད་པས་ལྗོངས་ཡོངས་ཀྱི་བོད་བརྒྱུད་ནང་བསྟན་ལས་རིགས་ཀྱི་མི་སྣ་དང་དགོན་སྡེའི་གྲྭ་བཙུན་རྣམས་ཀྱིས་ཏང་གི་བཀའ་དྲིན་བློ་ལ་བརྟན་པོར་ངེས་པ་དང་བློ་རྩ་བརྟན་པོས་ཏང་གི་རྗེས་སུ་འབྲང་བའི་ཡིད་ཆེས་དང་ཆོད་སེམས་ཆེ་རུ་འགྲོ་ངེས་རེད།

ཚོགས་གཙོ་པཎ་ཆེན་རིན་པོ་ཆེ་མཆོག་ནི་བོད་བརྒྱུད་ནང་བསྟན་གྱི་བླ་སྤྲུལ་ཆེ་ཤོས་ཡིན་ལ་སངས་རྒྱས་འོད་དཔག་མེད་ཀྱི་རྣམ་སྤྲུལ་ཡང་རེད། ཁོང་ལ་ནང་བསྟན་རིག་པའི་མཁྱེན་རྒྱ་ཡངས་པ་དང་། རིག་གནས་ཀྱི་བྱང་ཚད་ཁྱད་དུ་འཕགས་པ། ཆོས་ལུགས་ཀྱི་ཤུགས་རྐྱེན་ཐེབས་རྒྱ་ཆེ་བ་བཅས་ཡོད་པར་བརྟེན། རྒྱ་ཆེའི་དད་ལྡན་མང་ཚོགས་ཚོས་བླ་ན་མེད་པའི་དད་གུས་ཞུ་བའི་བླ་སྤྲུལ་ཆེན་པོ་ཞིག་རེད། ཏང་ཀྲུང་དབྱང་གིས་ང་ཚོར་བོད་བརྒྱུད་ནང་བསྟན་གྱི་དབུ་ཁྲིད་ཡག་པོ་འདི་འདྲ་ཞིག་གསོ་སྐྱོང་གནང་བས་ང་ཚོར་དགའ་སྤྲོ་དཔག་མེད་དང་སྤོབས་སེམས་ཆེན་པོ་སྐྱེས་བྱུང་། དེར་བརྟེན་ཏང་ཀྲུང་དབྱང་དང་རང་སྐྱོང་ལྗོངས་ཏང་ཨུད་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།

འདས་དོན་ལ་ཕྱིར་མིག་བལྟས་ཚེ། ང་ཚོས་རླབས་ཆེན་གྱི་རྒྱལ་གཅེས་རིང་ལུགས་པ་དང་། རྒྱལ་དོན་བྱེད་སྒོ་སྤེལ་མཁན་གྲགས་ཅན། ཀྲུང་གོ་གུང་ཁྲན་ཏང་གི་གྲོགས་པོ་བློས་ཐུབ། ཀྲུང་གོ་བོད་བརྒྱུད་ནང་བསྟན་གྱི་ཕུལ་བྱུང་དབུ་ཁྲིད་བཅས་ཡིན་པའི་པཎ་ཆེན་རིན་པོ་ཆེ་སྐུ་ཕྲེང་བཅུ་པ་མཆོག་ལ་དྲན་གསོ་སྔར་བས་ཟབ་མོ་ཞུ་རྒྱུ་ཡིན། འདི་ལོ་ནི་པཎ་ཆེན་སྐུ་ཕྲེང་བཅུ་པ་མཆོག་དགོངས་པ་ཆོས་དབྱིངས་སུ་ཐིམ་ནས་ལོ་35འཁོར་བའི་ལོ་རེད། པཎ་ཆེན་རིན་པོ་ཆེ་སྐུ་ཕྲེང་བཅུ་པ་མཆོག་ནི་བོད་བརྒྱུད་ནང་བསྟན་ཀྲུང་གོ་ཅན་དུ་འགྱུར་བའི་ཁ་ཕྱོགས་ཀྱི་དར་སྤེལ་གཏོང་མཁན་དང་དོན་གཉེར་བ་ཞིག་ཡིན་པ་མ་ཟད། ནུས་ཤུགས་ཡོད་རྒུས་བོད་བརྒྱུད་ནང་བསྟན་འདི་ཉིད་སྤྱི་ཚོགས་རིང་ལུགས་སྤྱི་ཚོགས་དང་འཚམ་མཐུན་ཡོང་བའི་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་བཏང་གནང་ནས་ང་ཚོ་མུ་མཐུད་མདུན་སྐྱོད་བྱེད་པར་རྨང་གཞི་བརྟན་པོ་ཞིག་བཏིང་ཡོད།

ད་ལྟ་ལ་མྱོང་རོལ་བྱས་ཚེ། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག རང་སྐྱོང་ལྗོངས་ཏང་ཨུད་ཀྱིས་སྤྱི་ཡོངས་སྟངས་འཛིན་དང་ཕྱོགས་ཁག་མཐུན་སྦྱོར་བྱེད་པའི་འགོ་ཁྲིད་ཀྱི་ནུས་པ་འདོན་སྤེལ་བྱས་ཏེ། “དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་བརྒྱབ་པ་དང་། མི་རིགས་ཁག་གི་ལས་བྱེད་པ་དང་མང་ཚོགས་ལ་མཐུན་སྒྲིལ་དང་སྣེ་ཁྲིད་ཀྱིས་སྤྱོད་ཚུལ་ལེགས་བཅོས་དང་དོན་འཁྱོལ་ལ་དམ་འཛིན་བྱས་ནས་བྱ་གཞག་ཁག་ལ་གྲུབ་འབྲས་གསར་པ་ཐོབ་རྒྱུར་སྐུལ་འདེད་བཏང་བར་བརྟེན། ལྗོངས་ཡོངས་སུ་ཆབ་སྲིད་བདེ་འཇགས་དང་། སྤྱི་ཚོགས་བརྟན་ལྷིང་། དཔལ་འབྱོར་འཕེལ་རྒྱས། མི་རིགས་མཐུན་སྒྲིལ། ཆོས་ལུགས་འཆམ་མཐུན། སྐྱེ་ཁམས་ལེགས་པ། མཐའ་སྲུང་སྲ་བརྟན། མི་དམངས་བདེ་སྡོད་ལས་བརྩོན་བཅས་ཡིན་པའི་རྣམ་པ་བཟང་པོ་ཞིག་མངོན་བཞིན་ཡོད། ད་ཐེངས་ཀྱི་ཚོགས་འདུའི་ཐོག་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ལས་འཛིན་ལྷན་ཚོགས་སྐབས་གསར་པའི་ཚན་ཁག་བདམས་ཐོན་བྱུང་བ་དེས་ལས་ཀའི་བརྟན་ལྷིང་རང་བཞིན་དང་རྒྱུན་མཐུད་རང་བཞིན་འགན་ལེན་བྱས་ནས་ལས་དོན་ལ་སྐུལ་འདེད་བརྟན་པོ་གཏོང་བར་རྩ་འཛུགས་ཀྱི་རྨང་གཞི་བརྟན་པོ་ཞིག་བཏིང་ཡོད། ལས་འཛིན་ལྷན་ཚོགས་སྐབས་གསར་པའི་ནང་རང་ལྗོངས་ཀྱི་བོད་བརྒྱུད་ནང་བསྟན་གྱི་གྲུབ་མཐའ་ཁག་གི་སྐུ་ཚབ་མི་སྣ་དང་བླ་མ་སྐྱེས་ཆེན་མང་པོ་འདུས་ཡོད་ཅིང་། ལོ་ནའི་གྲུབ་ཆ་སྔར་བས་ལེགས་སུ་སོང་བ་དང་། མཚོན་བྱེད་རང་བཞིན་དང་རྒྱ་ཁྱབ་རང་བཞིན་སྔར་བས་མངོན་གསལ་བྱུང་བ་མ་ཟད། ཤེས་བྱའི་ཆུ་ཚད་དང་། ནང་བསྟན་རིག་པའི་ཡོན་ཚད། འགན་འཁྲི་སྒྲུབ་ནུས་བཅས་སྔར་བས་ཆེ་རུ་ཕྱིན་པས་རང་ལྗོངས་ཀྱི་བོད་བརྒྱུད་ནང་བསྟན་ལས་རིགས་ཀྱི་རྣམ་པ་བཟང་པོ་གང་ལེགས་མངོན་ཡོད།

འབྱུང་འགྱུར་ལ་རྒྱང་ལྟ་བྱས་ཚེ། རང་སྐྱོང་ལྗོངས་ཏང་ཨུད་ཀྱི་འགྱུར་མེད་སྟོབས་ལྡན་གྱི་འགོ་ཁྲིད་དང་། ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཏང་ཙུའུ་ཡི་ཐད་ཀའི་འགོ་ཁྲིད། ཚོགས་གཙོ་པཎ་ཆེན་རིན་པོ་ཆེ་མཆོག་གི་སྣེ་ཁྲིད་བཅས་ཀྱི་འོག རང་སྐྱོང་ལྗོངས་ཏང་ཨུད་ཀྱི་བཀོད་སྒྲིག་དང་བླང་བྱར་དམིགས་ཏེ། ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱིས་འབྲེལ་ཟམ་ལྟ་བུའི་ནུས་པ་འདོན་སྤེལ་གང་ལེགས་བྱས་ནས་བོད་བརྒྱུད་ནང་བསྟན་ལས་རིགས་ཀྱི་མི་སྣ་དང་དགོན་སྡེའི་གྲྭ་བཙུན་ལ་མཐུན་སྒྲིལ་སྣེ་ཁྲིད་ཀྱིས་སྲོལ་རྒྱུན་བཟང་པོ་དར་སྤེལ་དང་ལྷག་བསམ་རྣམ་དག་གིས་རང་འགན་གཙང་སྒྲུབ་བྱེད་པའི་ཁར། དུས་རབས་གསར་པར་ལག་གདང་དམ་པོར་སྦྲེལ་ནས་གཟི་དཔལ་གསར་པ་བཏོད་དེ་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཡོང་བར་ལེགས་སྐྱེས་གསར་པ་དེ་བས་ཆེ་བ་འབུལ་ཐུབ་པའི་ཡིད་ཆེས་ཡོད།