གཞི་རིམ་བཅོས་སྐྱོང་གི་ཆུ་ཚད་མཐོ་རུ་གཏོང་བ་དང་གོམས་སྲོལ་བསྒྱུར་བར་སྐུལ་འདེད་བཏང་ནས་ཁྱིམ་སྲོལ་བཟང་པོ་དང་། བབ་ཆགས་པའི་དམངས་སྲོལ། ཡ་རབས་ལྡན་པའི་སྲོལ་གསར་བཅས་ཆགས་པར་བྱ་ཆེད། 2018ལོ་ཚུན་དུ། ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་མཐོང་དགའ་སྡེ་ཁུལ་གྱིས་མི་དམངས་ལྟེ་བར་འཛིན་རྒྱུ་མཐའ་འཁྱོངས་ཀྱིས་དེ་སྔའི་གྲོང་སྲོལ་དམངས་ཆིངས་ཀྱི་རྨང་གཞིའི་ཐོག་ནང་དོན་སྔར་བས་འཐུས་སྒོ་ཚང་དུ་བཏང་ནས་དམངས་ཀྱི་འདོད་བློ་དང་མཐུན་པའི་གྲོང་མིའི་སྤྱི་ཆིངས་བཟོས་ནས་དེ་ཉིད་གཞི་རིམ་བཅོས་སྐྱོང་ལས་དོན་འཚོལ་ཞིབ་བྱེད་པའི་དམ་འཛིན་བྱ་གཞི་ནུས་ལྡན་ཞིག་ཏུ་བརྩིས་ཏེ་གྲོང་མི་མང་ཚོགས་ཀྱི་རང་སྐྱོང་མཉམ་བཅོས་ལ་ཁྲིད་སྟོན་བྱས་ནས་ཁོངས་གཏོགས་ཁུལ་གྱི་གཞི་རིམ་བཅོས་སྐྱོང་དེང་རབས་ཅན་གྱི་འཕེལ་རིམ་ལ་སྐུལ་འདེད་ནུས་ལྡན་བཏང་བ་རེད།

མཐོང་དགའ་སྡེ་ཁུལ་གྱིས་མང་ཚོགས་ཀྱི་ཁས་ལེན་གཞིར་བཟུང་མང་ཚོགས་ཀྱི་བྱ་སྤྱོད་ལ་གཅུན་འདོམས་བྱ་རྒྱུ་མཐའ་འཁྱོངས་ཀྱིས་གྲོང་མི་བཅོས་སྐྱོང་ལས་དོན་ནང་ཞུགས་པའི་རང་སྟོབས་ཀྱི་ནུས་པ་གང་ལེགས་བཏོན་ཏེ“མཐོང་དགའ་སྡེ་ཁུལ་གྱི་ཁྱད་ཆོས”མངོན་པར་བྱ་ཆེད། གྲོང་མིའི་སྤྱི་ཆིངས་བཟོས་མ་ཐག་པའི་སྐབས་སུ་སྡེ་ཁུལ་གྲོང་མི་ཨུ་ལྷན་གྱིས“གྲོང་མིའི་སྤྱི་ཆིངས་ལ་བསམ་འཆར་བསྡུ་ལེན”གྱི་བྱེད་སྒོ་རྒྱ་ཁྱབ་ངང་སྤེལ་བ་དང་། མང་ཚོགས་ཀྱིས་དོ་ཁུར་བྱེད་པའི་དོན་དག་ཆུང་ཙག་དང་། སྡེ་ཁུལ་འཕེལ་རྒྱས་དང་འབྲེལ་བ་དབ་ཟབ་ཡོད་པའི་ཕུགས་ཀྱི་དོན་ཆེན། ཆུས་དང་གྲོང་ཁྱེར་གྱིས་བཀོད་སྒྲིག་བྱས་པའི་ལྟེ་བའི་ལས་དོན་བཅས་ལ་དམིགས་ནས་གྲོང་མིའི་སྤྱི་ཆིངས་ཐད་གྲོང་མིར་བསམ་འཆར་འདོན་དུ་བཅུག་ནས་བསམ་འཆར་སྣ་ཚོགས་500ལྷག་ཙམ་བསྡུ་ལེན་བྱས་ཤིང་། བསམ་འཆར་100ལྷག་ཙམ་ལེགས་སྒྲིག་ཞིབ་ཚགས་བྱས་ཏེ་སྤྱི་ཆིངས་ནང་བཅུག་པ་རེད། དེ་དང་ཆབས་ཅིག ཁྲོམ་གཞུང་གི་སྡེ་ཁུལ་འགན་གཙང་ལེན་མཁན་འགོ་ཁྲིད་དང་། སྡེ་ཁུལ་གྱི་ཏང་ཡོན་མང་ཚོགས་ཀྱི་འཐུས་མི། “རྒན་གྲས་གསུམ”གྱི་འཐུས་མི། སྡེ་ཁུལ་གྱི་རོགས་སྐྱོར་ཁྲིམས་རྩོད་པའི་འཐུས་མི་བཅས་གདན་དྲངས་ནས་ལུགས་མཐུན་རང་བཞིན་དང་ཁྲིམས་མཐུན་རང་བཞིན་ལ་ཞིབ་བཤེར་བྱས་པ་དང་། གྲོང་མིའི་འཐུས་མི་ཚོགས་ཆེན་འཚོགས་ནས་གྲོས་བསྡུར་བྱས་པ་མ་ཟད། དུས་ཐོག་ཏུ་ཡོངས་བསྒྲགས་བྱས་ཏེ་ཁྲོམ་གཞུང་ལ་ཐོ་འགོད་སྙན་སེང་ཞུས་པས། མཐར་ཁྱིམ་མཚེས་དབར་གྱི་རྩོད་གཞི་དང་། གཉེན་སྒྲིག་འགལ་ཟླ། ས་ཞིང་དོ་དམ། སྐྱེ་ཁམས་ཁོར་ཡུག་སོགས་ཕྱོགས་མང་པོའི་ཐད་ཀྱི་དམངས་ཀྱི་བྲོ་གྲོས་བསྡུ་རུབ་དང་དམངས་ཀྱི་འདོད་བློ་མངོན་པའི་གྲོང་མིའི་སྤྱི་ཆིངས་ཤིག་ཆགས་པ་རེད།

གྲོང་མིའི་སྤྱི་ཆིངས་ཡོད་པས་གནད་དོན་འཕྲད་ཚེ་གྲོང་མིའི་སྤྱི་ཆིངས་ལྟར་སྒྲུབ་པ་དེ་མཐོང་དགའ་སྡེ་ཁུལ་གྱི་ལས་བྱེད་པ་དང་མང་ཚོགས་དབར་གྱི་མ་གྲོས་གཅིག་མཐུན་ཞིག་ཏུ་གྱུར་ཡོད། གྲོང་ཁྱེར་ཡོངས་སུ་སྤེལ་བའི་གྲོང་ཁྱེར་དང་གྲོང་གསེབ་ཀྱི་ཁོར་ཡུག་ཕྱོགས་བསྡུས་བཅོས་སྒྲིག་གི་བྱ་སྤྱོད་ཆེན་པོར་དམིགས་ཏེ། མཐོང་དགའ་སྡེ་ཁུལ་གྱི་གྲོང་མིས་སྤྱི་ཆིངས་ཀྱི་གཏན་འབེབས་ལྟར་རང་རང་སོ་སོའི་ཁང་པའི་མཐའ་འཁོར་གྱི་ས་ཁོངས་ལ་གད་བདར་གཙང་མ་བྱེད་པ་མ་ཟད། ཕན་ཚུན་ལྟ་སྐུལ་བྱས་ནས་ཁོངས་གཏོགས་ཁུལ་དུ་གད་སྙིགས་གང་བྱུང་དུ་དབྱུགས་པ་དང་ཁོར་ཡུག་འཕྲོད་བསྟེན་ལ་སྦགས་བཙོག་བཟོ་བའི་བྱེད་སྤྱོད་ཐོན་འཕྲལ་གྲོང་མི་ཨུ་ལྷན་ལ་སྙན་སེང་ཞུ་གི་ཡོད། གྲོང་མིའི་དབར་འགལ་ཟླ་དང་རྩོད་གཞི་ཐོན་ཚེ་ཕྱོགས་གཉིས་པོས་འཕྲལ་དུ་གྲོས་མོལ་བྱེད་པའམ་ཡང་ན་དྲ་མིག་པ་བཙལ་ནས་འདུམ་འགྲིག་བྱེད་དུ་བཅུག་ནས་འགལ་ཟླ་ཚབས་ཇེ་ཆེར་མི་འགྲོ་བར་བྱེད་ཀྱི་ཡོད།

ཁོངས་གཏོགས་ཁུལ་གྱི་སྐྱེ་ཁམས་ཁོར་ཡུག་ལེགས་སུ་གཏོང་ཆེད། མཐོང་དགའ་སྡེ་ཁུལ་གྱི་གྲོང་མིས་སྤྱི་ཆིངས་ཀྱི་གཏན་འབེབས་ལྟར་ལོ་ལྟར་ཤིང་འཛུགས་ནགས་བཟོ་བྱེད་ཀྱི་ཡོད། མཐོང་དགའ་སྡེ་ཁུལ་གྱི་བྱང་ཕྱོགས་སུ་གནས་པའི་ལྷ་རི་ནགས་བཟོ་ས་ཚིགས་སྔོ་ལྗང་གོས་ཀྱིས་བརྒྱན། མཐོང་དགའ་སྡེ་ཁུལ་ཏང་སྤྱི་ཁྱབ་ཀྲི་པུའི་ཧྲུའུ་ཅི་ཨ་ནུའུ་ཡིས“ལྗོན་ཤིང་དེ་དག་ལས་འགའ་ཞིག་ལོ་ལྔའི་གོང་དུ་བཙུགས་པ་དང་། ལ་ལ་ལོ་གཅིག་གོང་བཙུགས་པ་རེད། མ་ཟད་ད་ལོ་གསར་བཙུགས་བྱས་པའང་ཡོད། གྲོང་མི་ཚོས་ཆུ་དུས་ཐོག་ཏུ་བརྒྱབ་ནས་བདག་སྐྱོང་ཡག་པོ་བྱེད་ཀྱི་འདུག”ཅེས་བཤད།

གྲོང་མིའི་སྤྱི་ཆིངས་ལ་བརྟེན་ནས་མཐོང་དགའ་སྡེ་ཁུལ་གྱི་སྡོད་གནས་ཁོར་ཡུག་དང་། སྐྱེ་ཁམས་ཁོར་ཡུག གྲོང་མིའི་འཚོ་བའི་ཆུ་ཚད་བཅས་རྒྱུན་ཆད་མེད་པར་ལེགས་སུ་ཕྱིན་པས་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་བརྟན་པོའི་ངང་ཆེ་རུ་འགྲོ་བཞིན་ཡོད།