ཉེ་བའི་ལོ་ཤས་རིང་རང་ལྗོངས་ཀྱིས་ལས་ཞུགས་ཀྱི་རྣམ་པ་གསར་པའི་ངལ་རྩོལ་པའི་ངལ་རྩོལ་ཁེ་དབང་འགན་སྲུང་ལས་དོན་དེ་གནས་བབ་གལ་ཆེན་ལ་བཞག་ནས་ལྗོངས་ཡོངས་ཀྱི་སྤྱི་ཚོགས་འགན་སྲུང་ལམ་ལུགས་སྒྱུར་བཅོས་ལག་བསྟར་ལ་སྐུལ་འདེད་གཏོང་བ་དང་། ལས་ཞུགས་ཀྱི་རྣམ་པ་གསར་པའི་ངལ་རྩོལ་པའི་ལས་རིགས་གནོད་སྐྱོན་ལ་འགན་སྲུང་བྱེད་སྟངས་འཚོལ་ཞིབ་བྱེད་པ། ངལ་རྩོལ་འབྲེལ་བའི་དུས་བབ་ལ་དབྱེ་ཞིབ་བརྡར་གཅོད་དང་ཉེན་ཁ་སྔོན་འགོག་དང་སེལ་བར་ཤུགས་སྣོན་རྒྱག་པ་བཅས་བྱས་ཏེ་ནུས་ཤུགས་ཡོད་རྒུས་ངལ་རྩོལ་པའི་ཁེ་དབང་འགན་སྲུང་བྱས་ཡོད།

འདི་ལོ་ཚུན་དུ་རང་ལྗོངས་ཀྱིས་ལས་ཞུགས་ཀྱི་རྣམ་པ་གསར་པའི་ཁེ་ལས་རྒྱུན་གཏན་གྱི་ལྟ་འདོམས་ཁྱབ་ཁོངས་ནང་བཅུག་ནས་དུས་བཀག་ལྟར་ཆེད་དོན་ཁྲིམས་སྒྱུར་བྱ་སྤྱོད་སྤེལ་ཏེ་ངལ་རྩོལ་ཐོབ་ཆ་འགྱངས་ཆད་བྱེད་པ་དང་། ཁྲིམས་འགལ་ངང་ལས་དུས་འཕར་མ་བྱེད་དུ་འཇུག་པ། ཁྲིམས་ལྟར་སྤྱི་ཚོགས་འགན་བཅོལ་ནང་མི་ཞུགས་པ་སོགས་ཁྲིམས་འགལ་བྱེད་སྤྱོད་ཞིབ་བཤེར་ཐག་གཅོད་ནན་པོ་བྱས་ཏེ་མཉམ་འབྲེལ་ཁྲིམས་སྒྱུར་བྱ་སྤྱོད་ཐེངས་50ལྷག་ཙམ་སྤེལ་བ་དང་། ཉོ་སྐྱེལ་དང་། དྲ་འབོད་རླངས་འཁོར། དྲ་ཐོག་ཐད་གཏོང་སོགས་ལས་རིགས་དང་འབྲེལ་བ་ཡོད་པའི་ཁེ་ལས་ལ་གཙོ་གནད་ཞིབ་བཤེར་བྱས་པ་དང་ལོ་སྟོད་དུ་རིམ་རྩིས་བརྒྱབ་ན། ཁེ་ལས་500ལྷག་ཙམ་ལ་ཞིབ་བཤེར་བྱས་པར་ཁེ་ལས་ཀྱི་ཁྲིམས་འགལ་བྱེད་སྤྱོད་100ལྷག་ཙམ་ཡོ་བསྲང་བྱས་པ། ཆ་རྐྱེན་འཛོམས་པའི་ཁེ་ལས་དང་ལས་ཞུགས་རྣམ་པ་གསར་པའི་ངལ་རྩོལ་པའི་དབར་གློག་རྡུལ་ངལ་རྩོལ་གན་རྒྱ་འཇོག་པར་རྒྱབ་སྐྱོར་དང་སྐུལ་ལྕག་བྱས་པ་དང་ལོ་སྟོད་དུ་གློག་རྡུལ་ངལ་རྩོལ་གན་རྒྱའི་ཞབས་ཞུའི་ལས་སྟེགས་ཐོག་ཁེ་ལས་721ཐོ་འགོད་བྱས་པ་དང་གློག་རྡུལ་ངལ་རྩོལ་གན་རྒྱ་4307བཞག་ཡོད།

དེ་དང་ཆབས་ཅིག་རང་སྐྱོང་ལྗོངས་མི་སྤྱི་ཐིང་སོགས་སྡེ་ཚན་དྲུག་གིས་མཉམ་འབྲེལ་ཐོག《བོད་རང་སྐྱོང་ལྗོངས་ཀྱི་ལས་ཞུགས་རྣམ་པ་གསར་པའི་ངལ་རྩོལ་རྩོད་གཞིའི་གཅིག་འཐུས་རྣམ་པའི་འདུམ་འགྲིག་ལས་དོན་གྱི་ཇུས་གཞི》བཀྲམ་ནས་ལས་ཞུགས་རྣམ་པ་གསར་པའི་ངལ་རྩོལ་རྩོད་གཞིའི་གཅིག་འཐུས་རྣམ་པའི་འདུམ་འགྲིག་ལས་དོན་འཚོལ་ཞིབ་ཧུར་ཐག་བྱས་ནས་སྤེལ་ཡོད། ད་ལོའི་ལོ་སྟོད་དུ་ལྗོངས་ཡོངས་ཀྱི་རིམ་ཁག་འདུམ་གཅོད་ལས་ཁུངས་ཀྱིས་ཁྲིམས་ལྟར་ལས་ཞུགས་རྣམ་པ་གསར་པའི་ངལ་རྩོལ་མི་དོན་རྩོད་གཞིའི་གྱོད་གཞི་9ཞིབ་གཅོད་མཇུག་སྒྲིལ་པ་དང་། ལས་ཞུགས་རྣམ་པ་གསར་པའི་ངལ་རྩོལ་པ་ཁྲི་5.9ཚོགས་པའི་ནང་ཞུགས་པ། བཟོ་ཚོགས་ཀྱི་ས་ཚིགས་465བཙུགས་པ་དེ་དག་ངལ་རྩོལ་པ་ཁྲི་ལྷག་ཙམ་ལ་ཁྱབ་ཡོད་པ་རེད།