2024ལོའི“རྒྱུད་གཅིག་ལམ་གཅིག”གི་གསར་འགོད་པའི་རྩ་འཛུགས་གླེང་སྟེགས་ཟླ་8ཚེས་31ཉིན་ཁྲུང་ཆིང་དུ་གཉེར་བ་རེད། “གོ་སྐབས་ཀྱི་ལམ་བུ་ཇེ་ཡངས་སུ་བཏང་ནས། མཛེས་སྡུག་ལྡན་པའི་འབྱུང་འགྱུར་མཉམ་སྤྱོད་བྱེད”ཅེས་པའི་བརྗོད་དོན་གཙོ་བོར་དམིགས་ཏེ། རྒྱལ་ཁབ་དང་ས་ཁུལ་50ནས་ཡོང་བའི་གསར་འགོད་པའི་རྩ་འཛུགས་ཀྱི་འགན་འཁུར་བ་དང་སྨྱན་སྦྱོར་གྱི་འཐུས་མི་100ཙམ་གྱིས་བགྲོ་གླེང་དང་སྤེལ་རེས་གཏིང་ཟབ་བྱས་པ་རེད།

ད་ཐེངས་ཀྱི་གླེང་སྟེགས་དེ་ཀྲུང་ཧྭ་རྒྱལ་ཡོངས་གསར་འགྱུར་ལས་དོན་པའི་མཐུན་ཚོགས་དང་ཁྲུང་ཆིང་གྲོང་ཨུད་དྲིལ་བསྒྲགས་པུའུ་ཡིས་གཙོ་གཉེར་བྱས་པ་རེད། ཀྲུང་དབྱང་དྲིལ་བསྒྲགས་པུའི་པུའུ་ཀྲང་གཞོན་པ་དང་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གི་ཀྲུའུ་རེན་མུའོ་ཀའོ་དབྱི་གླེང་སྟེགས་ལ་ཞུགས་པ་དང་འབྲེལ་ཤིས་ཚིག་ཀྱང་བསྒྲོན་པ་རེད།

ཀྲུང་གོའི་གསར་འགོད་པའི་མཐུན་ཚོགས་ཀྱི་ཀྲུའུ་ཞི་ཧོ་ཕིང་གིས་གཙོ་དོན་གཏམ་བཤད་གནང་སྐབས། གསར་འགྱུར་སྨྱན་སྦྱོར་དེ་ལོ་རྒྱུས་དོན་རྐྱེན་ཟིན་ཐོར་འགོད་མཁན་དང་ལོ་རྒྱུས་ཡར་ཐོན་ལ་སྐུལ་འདེད་གཏོང་མཁན་ཞིག་ཡིན་པའི་ངོས་ནས་ཞི་བདེ་དང་། འཕེལ་རྒྱས། མཉམ་ལས། གཉིས་ཕན་བཅས་དུས་རབས་ཀྱི་རླབས་རྒྱུན་དང་བསྟུན་ཏེ་དུས་རབས་ཡར་ཐོན་གྱི་གཏན་ཚིགས་ཁོང་དུ་ཆུད་པར་བྱས་ཐོག་འདུ་ཤེས་འཛིན་སྟངས་དང་། སྤྱི་ཚོགས་ལམ་ལུགས། འཕེལ་རྒྱས་ཀྱི་ཆུ་ཚད་བཅས་ལས་བརྒལ་བའི་དོན་བརྗོད་སྒྲོམ་གཞི་གསར་པ་དང་སྐད་ཆ་ཤོད་སྟངས་གསར་པ་ཐུན་མོང་ཐོག་གཏོད་པ་དང་། “མཐུན་ཆ་མཉམ་འདུས་དང་གནམ་འོག་རྩེ་མཐུན”གྱི་འདུ་ཤེས་ཐུན་མོང་ཐོག་དར་སྤེལ་བཏང་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་སྐྱོང་གི་དར་སྤེལ་གཏོང་མཁན་ཧུར་བརྩོན་ཅན་དང་། སེམས་རྩ་འཁོལ་བའི་དྲིལ་བསྒྲགས་བྱེད་མཁན། སྐུལ་འདེད་གཏོང་མཁན་འཇོན་ཐང་ཅན་བཅས་བྱས་ཏེ་ཐུན་མོང་འཕེལ་རྒྱས་དང་མཉམ་སྤྱོད་དར་རྒྱས་ཀྱི་དུས་རབས་ཀྱི་རོལ་དབྱངས་མཉམ་དུ་དཀྲོལ་དགོས་ཞེས་བརྗོད་པ་རེད།

གླེང་སྟེགས་ལ་ཞུགས་མཁན་རྒྱལ་ཁབ་ཁག་གི་གསར་འགོད་པའི་རྩ་འཛུགས་དང་སྨྱན་སྦྱོར་གྱི་འཐུས་མིས་ཡོངས་ཁྱབ་ཏུ་ངོས་འཛིན་བྱས་དོན། སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་གྱིས་འབྲེལ་ཡོད་རྒྱལ་ཁབ་ལ་དངོས་དངོས་རྗེན་རྗེན་གྱི་ཁེ་ཕན་ཐོབ་ལ། ས་གནས་དེ་གའི་དམངས་ཚོགས་ལ་ཐོབ་སྣང་དང་སྐྱིད་སྣང་ཡང་ཆེན་པོ་བྱུང་བས། སྨྱན་སྦྱོར་ལས་དོན་པས་སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་བྱེད་པའི་བདེ་སྐྱིད་ཀྱི་གཏམ་རྒྱུད་མུ་མཐུད་ཡག་པོ་ཤོད་དགོས་པ་དང་ཀྲུང་གོ་དང་འཛམ་གླིང་ཐུན་མོང་འཕེལ་རྒྱས་ཀྱི་གཏམ་རྒྱུད་ཡག་པོ་ཤོད་དགོས། མིག་སྔར་འཛམ་གླིང་དེ་ལོ་རྒྱུས་ཀྱི་ལམ་བཞི་མདོ་ཁར་གནས་ཡོད་པས་རྒྱལ་སྤྱིའི་དུས་བབ་དང་ས་ཁུལ་གྱི་གདོང་ཐུག་ཛ་དྲག་ཏུ་འགྲོ་བཞིན་ཡོད་པར་བརྟེན་གསར་འགྱུར་སྨྱན་སྦྱོར་དང་དེའི་ལས་གཉེར་མི་སྣ་ཚོས་སྔར་གྱི་དུས་གང་ཞིག་ལས་ཀྱང་ཞི་བདེ་འཕེལ་རྒྱས་དང་། ཐུན་མོང་དར་རྒྱས། ཁྱིམ་མཚེས་མཛའ་མཐུན་བཅས་ལ་སྐུལ་འདེད་གཏོང་ཆེད་ཐུན་མོང་ཐོག་འབད་བརྩོན་བྱེད་དགོས། རྒྱལ་ཁབ་ཁག་གི་གསར་འགྱུར་ལས་དོན་པས་མཐུན་སྒྲིལ་བྱས་ཏེ་ལུགས་མཐུན་དང་། དྲང་གཞག དོན་དངོས་བཅས་ཀྱི་གནས་ཚུལ་སྤེལ་བའི་ཐོག་ནས་ཕན་ཚུན་རྒྱུས་ལོན་ལ་སྐུལ་འདེད་གཏོང་བ་དང་། སྤེལ་རེས་དང་མཉམ་ལས་ཟབ་ཏུ་གཏོང་བ། གོ་ནོར་དང་ཕྱོགས་ཞེན་ཉུང་དུ་གཏོང་བ་བཅས་བྱས་ཏེ་འཛམ་གླིང་ཞི་བདེ་དང་། བརྟན་ལྷིང་། དར་རྒྱས་བཅས་ལ་སྐུལ་འདེད་གཏོང་དགོས།

གླེང་སྟེགས་ཐོག་ད་དུང་རྒྱལ་ཁབ་20ལྷག་ཙམ་གྱི་གསར་འགོད་པའི་རྩ་འཛུགས་ལ“རྒྱལ་སྤྱིའི་གསར་འགོད་པའི་ཁྱིམ”གྱི་ལག་ཁྱེར་སྤྲད་པ་དང་ཁྲུང་ཆིང་གྲོང་ཁྱེར་གསར་འགོད་པའི་མཐུན་ཚོགས་ཀྱི“རྒྱུད་གཅིག་ལམ་གཅིག”གི་གསར་འགོད་པའི་ས་ཚིགས་ལ་བྱང་བུ་སྤྲད་པ་རེད།