ཟླ་9ཚེས་1ཉིན་གྱི་སྔ་དྲོར། “དངུལ་རྩས་དམངས་ཕན་ལེའུ་གསར་གཏོད། ཁེ་དབང་བསྲུངས་ནས་ཉེན་ཁ་འགོག”ཅེས་བརྗོད་དོན་གཙོ་བོར་བྱེད་པའི་བོད་རང་སྐྱོང་ལྗོངས་ཀྱི་2024ལོའི“དངུལ་རྩའི་སློབ་གསོའི་དྲིལ་བསྒྲགས་ཟླ་བའི”འགོ་ཚུགས་མཛད་སྒོ་ལྷ་ས་རྫོང་རྒྱབ་ཀླུ་ཁང་སྤྱི་གླིང་དུ་འཚོགས་པ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་དང་། ལྗོངས་ཏང་ཨུད་དངུལ་རྩ་གཞུང་ལས་ཁང་གི་ཀྲུའུ་རེན། དངུལ་རྩ་ལས་དོན་ཨུ་ལྷན་གྱི་ཧྲུའུ་ཅི་བཅས་ཡིན་པའི་ཝུའེ་ཤིའུ་ཁྲང་འགོ་ཚུགས་མཛད་སྒོར་ཕེབས་ནས་བྱེད་སྒོ་དངོས་སུ་འགོ་ཚུགས་པའི་ཁྱབ་བསྒྲགས་གནང་བ་རེད།

ད་ཐེངས་ཀྱི་བྱེད་སྒོ་དེ་བོད་ལྗོངས་དངུལ་རྩ་ལྟ་འདོམས་ཅུས་དང་། མི་དམངས་དངུལ་ཁང་བོད་ལྗོངས་ཡན་ལག་དངུལ་ཁང་། བོད་ལྗོངས་འཛིན་ལོར་ལྟ་འདོམས་ཅུས་བཅས་ཀྱིས་མཉམ་དུ་གཉེར་བ་ཞིག་ཡིན་ཞིང་། གཙོ་བོ“རྒན་གཅིག་གཞོན་གཅིག་གསར་པ་གཅིག”སོགས་ཉམས་ཞན་ཚོགས་སྤྱིར་དམིགས་ནས་གློག་འཕྲིན་ཁ་བསླུས་དང་ཁྲིམས་འགལ་གྱི་མ་དངུལ་བསྡུ་རུབ་བྱེད་པའི་དངུལ་རྩའི་བྱེད་སྤྱོད་ལ་རྡུང་རྡེག་གཏོང་བ་སོགས་གནད་དོན་སྐོར་ལ་རྒྱུན་རྣམ་ཅན་གྱི་དྲིལ་བསྒྲགས་སློབ་གསོ་བཏང་བ་རེད།