ལོ་30ཡི་རིང་། ཀོང་ཏུང་ཞིང་ཆེན་བོད་སྐྱོར་ལས་དོན་རུ་ཁག་གིས་ཐོག་མཐའ་བར་གསུམ་དུ་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཕྱོགས་ཡོངས་ནས་ལག་བསྟར་དོན་འཁྱོལ་བྱས་ཏེ། དམངས་འཚོ་དང་། ཐོན་ལས། ཤེས་ལྡན་པ། ལག་རྩལ། ལས་སྟེགས་བཅས་ཀྱི་རོགས་སྐྱོར་ལས་དོན་ལ་སྐུལ་འདེད་ཏན་ཏིག་བཏང་ནས། ཉིང་ཁྲིའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་ལེགས་སྐྱེས་ཧུར་ཐག་ཕུལ་ཡོད་པ་རེད།

ས་མཐོའི་ཉ་ལས་ཐོན་ལས་ལ་མེད་པ་ནས་ཡོད་པ་བར་གྱི་ཚད་བརྒལ་གསར་པ་བྱུང་བ།

2024ལོའི་ཟླ་བདུན་པར། ཀོང་ཏུང་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པའི་སྨན་གླིང་གྲོང་ཁྱེར་ལས་དོན་ཚོགས་ཆུང་གི་རོགས་སྐྱོར་ཤུགས་ཆེན་དང་འཆར་འགོད་ཞིབ་ཚགས་འོག ཉིང་ཁྲི་ས་རྒོད་གསར་སྦོལ་ཀརྨ་ཞིང་ལས་ཚད་ཡོད་ཀུང་སིས་ས་གནས་དེ་གར་གསོ་སྤེལ་བྱས་པའི་མེ་གླིང་ལྷོ་མའི་ཤ་སྨི་དཀར་པོ་བདེ་བླག་ངང་ཕྱིར་ཚོང་ཐུབ་ཡོད་པ་རེད།

ཉིང་ཁྲི་ས་རྒོད་གསར་སྦོལ་ཀརྨ་ཞིང་ལས་ཚད་ཡོད་ཀུང་སིའི་ཏང་ཨུད་ཀྱི་ཧྲུའུ་ཅི་གཞོན་པ་དང་སྤྱི་ཁྱབ་ཅིང་ལི་ཕེང་ཆང་གིས། ཐོན་ལས་དང་པོའི་ཉ་ལས་ནི་རང་ལྗོངས་ཀྱི་ཞན་ཆ་ཞིག་རེད། ཀུང་སིས་དུས་འགོའི་བརྟག་ཞིབ་ཁྲོད་ཤེས་རྟོགས་བྱུང་བར་གཞིགས་ན། བོད་ཀྱི་ཆུའི་ཐོན་རྫས་ཀྱི་འཛད་སྤྱོད་ཁྲོམ་ར་གཙོ་བོ་ལྷ་ས་དང་། ལྷོ་ཁ། གཞིས་རྩེ། ཉིང་ཁྲི་བཅས་ཡིན་པ་དེ་དག་གིས་ལོ་རེར་ཆུའི་ཐོན་རྫས་འཛད་སྤྱོད་བྱེད་ཚད་ཏུན་4000ནས་5000ཙམ་ཟིན་གྱི་ཡོད། འོན་ཀྱང་རང་སར་ཆུའི་ཐོན་རྫས་ཐོན་སྐྱེད་བྱེད་ཚད་ཏུན་100ཡང་ཟིན་གྱི་མེད་པ་རེད། “སྔོན་ཆད་ང་ཚོའི་ཁྲོམ་རའི་ཐོག་གི་ཉ་དང་ཤ་སྨི་ཚང་མ་ལྗོངས་ཕྱི་ནས་དབོར་གྱི་ཡོད་པས་རིན་གོང་མཐོ་ཞིང་སྣ་ཁ་ཉུང་བ་མ་ཟད་སོས་པ་ཡང་དེ་ཙམ་མེད། ད་ཆ་ང་ཚོས་རང་ཉིད་ཀྱི་ཉ་ལས་འཕེལ་རྒྱས་བཏང་བས་མང་ཚོགས་ཀྱིས་རང་ཡུལ་ནས་ཐོན་པའི་རིན་གོང་ཁེ་ལ་སོས་པ་ཡིན་པའི་ཉ་དང་ཤ་སྨི་ཟ་ཐུབ་པ་བྱུང་ཡོད”ཅེས་ངོ་སྤྲོད་བྱས་པ་རེད།

ལག་རྩལ་ནང་འདྲེན་དང་ཤེས་ལྡན་པ་གསོ་སྐྱོང་ལས་ཐོན་ལས་དར་རྒྱས་ཕྱིན་པ།

2022ལོའི་ཟླ་བ་བདུན་པ་ནས་བཟུང་། ཀོང་ཏུང་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པའི་སྨན་གླིང་གྲོང་ཁྱེར་ལས་དོན་ཚོགས་ཆུང་གིས་བོད་སྐྱོར་ཆུ་ཐོན་རིགས་གཅིག་མཁས་ཅན་གྱི་ལྟེ་བའི་ལེགས་ཆ་འདོན་སྤེལ་གྱིས་ལོ་གཅིག་རིང་བརྟག་ཞིབ་དང་དབྱེ་ཞིབ་གཏིང་ཟབ་བྱས་ནས་ས་མཐོའི་ཉ་ལས་འཕེལ་རྒྱས་ལ་འཚམ་པའི་ལམ་བུ་འཚོལ་ཞིབ་ཧུར་ཐག་བྱས་པ་རེད། ཀུང་སིས་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་བྱས་ཏེ་ས་མུའུ་120ཡི་ཐོག་ཀོང་ཏུང་དང་ཉིང་ཁྲིའི་ས་མཐོའི་ཉ་ལས་ཚན་རྩལ་གླིང་བསྐྲུན་ནས་ས་མཐོའི་ཉ་ལས་ཀྱི“གསོ་ཐུབ་མིན”དང་། “ཇི་ལྟར་གསོ་བ” “ཅི་ཞིག་གསོ་བ” “ཐོན་ལས་ཅན་དུ་ཇི་ལྟར་བསྒྱུར་བ”སོགས་ཀྱི་གནད་དོན་རེ་རེ་བཞིན་ཐག་གཅོད་བྱས་པ་རེད།

ལག་རྩལ“ཁྱེར་ཡོང་བ”ཕུད། ཉིང་ཁྲིར“ནམ་ཡང་གནས་ཐུབ་པའི”དཔུང་ཁག་ཅིག་གསོ་སྐྱོང་ཇི་ལྟར་བྱ་རྒྱུ་དེ་ཡང་བོད་སྐྱོར་ལས་དོན་རུ་ཁག་གི་ལས་འགན་ཡིན་པ་རེད།

ཕེང་ཆང་གིས་ངོ་སྤྲོད་བྱས་པར་གཞིགས་ན། ཀོང་ཏུང་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པའི་རྒྱབ་སྐྱོར་དང་འབྲེལ་མཐུད་འོག ཀུང་སིས་ཀྲུང་ཧྲན་སློབ་ཆེན་དང་། ཀྲུང་གོ་ཆུ་ཐོན་ཚན་རིག་ཁང་ལྷོ་རྒྱ་མཚོའི་ཆུ་ཐོན་སུའོ། ཀྲུང་གོ་ཆུ་ཐོན་ཚན་རིག་ཁང་ཀྲུའུ་ཅང་ཆུ་ཐོན་སུའོ། ཀྲུའུ་ཧའེ་གྲོང་ཁྱེར་དེང་རབས་ཅན་ཞིང་ལས་འཕེལ་རྒྱས་ལྟེ་གནས། བོད་རང་སྐྱོང་ལྗོངས་ཞིང་འབྲོག་སློབ་གླིང་ཆུ་ཐོན་ཞིབ་འཇུག་སུའོ་སོགས་ཀྱི་རྒྱབ་སྐྱོར་ལ་བརྟེན་ནས་ས་མཐོའི་ཉ་ལས་གསར་གཏོད་ལག་རྩལ་ཚོགས་པ་བཙུགས་པ་དང་ཆབས་ཅིག་ཀུང་སིའི་ནང་ནས་སློབ་ཆེན་སློབ་མ་3བདམས་ནས“བརྒྱུད་རོགས་ཁྲིད་གསུམ”རྣམ་པའི་གསོ་སྐྱོང་བྱས་ཏེ་ཁོང་ཚོས་རང་རྐྱ་འཕེར་བའི་ངང་ལས་དོན་སྤེལ་ཐུབ་པར་བྱས་པ་རེད།

བོད་སྐྱོར་བགྲང་བྱ་སུམ་ཅུའི་རིང་ཐོན་ལས་བོད་སྐྱོར་གྱི་གྲུབ་འབྲས་གཡུར་དུ་ཟ་བ།

2023ལོར་ཉིང་ཁྲི་གྲོང་ཁྱེར་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་235.66དང་མི་རེའི་ཆ་སྙོམས་ཐོན་སྐྱེད་རིན་ཐང་བསྡོམས་འབོར་སྒོར་ཁྲི་9.86ལྷག་དང་། གྲོང་གསེབ་ཀྱི་ཡུལ་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་ཁྲི་2.54ལྷག་བཅས་ཟིན་པ་དང་། ལྷག་པར་དུ་ཉིང་ཁྲི་གྲོང་ཁྱེར་གྱི་ཞིང་ལས་ཐོན་རྫས་རིན་ཐང་བསྡོམས་འབོར་1994ལོའི་སྒོར་དུང་ཕྱུར་2.4ནས་2023ལོའི་སྒོར་དུང་ཕྱུར་20.4བར་འཕར་ཡོད་པ་རེད།

གྲུབ་འབྲས་གཡུར་དུ་ཟ་བ་ཐོབ་པ་འདི་ཀོང་ཏུང་ཞིང་ཆེན་གྱིས་ཐོན་ལས་བོད་སྐྱོར་ཤུགས་ཆེན་བྱས་པ་དང་ཁ་འབྲལ་ཐབས་མེད། ལོ་30ཡི་རིང་། ཀོང་ཏུང་ཞིང་ཆེན་གྱིས་ཁྱད་ལྡན་ཞིང་འབྲོག་ལས་ཀྱི་ལེགས་ལྡན་ཐོན་ལས་ཀྱི་རྒྱ་སྟོབས་ཆེ་རུ་གཏོང་རྒྱུར་དམ་པོར་དམིགས་ནས་ཉིང་ཁྲི་གྲོང་ཁྱེར་ལ་ཞིང་ལས་དང་འབྲེལ་བའི་རིགས་གཅིག་མཁས་ཅན་དང་ཤེས་ལྡན་པ་400ཙམ་བཏང་བ་མ་ཟད། ད་དུང་ཉིང་ཁྲི་གྲོང་ཁྱེར་ཞིང་ལས་ཁོངས་གཏོགས་ཀྱི་ཤེས་ལྡན་ལས་བྱེད་པ་300ལྷག་སྒྲིག་འཛུགས་བྱས་ནས་ཀོང་ཏུང་དུ་སྤེལ་རེས་བྱེད་པར་བསྐྱོད་པ་རེད།

ཀོང་ཏུང་གི་བོད་སྐྱོར་འོག ཉིང་ཁྲི་གྲོང་ཁྱེར་གྱིས་རྒྱལ་ཁབ་ཀྱི་ལེགས་ལྡན་ཐོན་ལས་ཁྱུ་ཚོགས་1དང་། རྒྱལ་ཁབ་དེང་རབས་ཞིང་ལས་ཐོན་ལས་གླིང་2 ཐོན་ལས་སྟོབས་ཆེན་གྲོང་རྡལ་6བཅས་འཛུགས་གཏོད་བྱས་པ་དང་། གྲོང་ཁྱེར་ཡོངས་ཀྱི་གོ་ཆོད་དུས་ཡུན་གྱི“རྫས་གསུམ་རྟགས་གཅིག”གི་ཞིང་ལས་ཐོན་རྫས་ཁས་ལེན་དཔང་འདོན་ཐུབ་ཚད་140ལྷག་ཟིན་ནས་བོད་ཀྱི་ཨང་དང་པོར་བསླེབས་ཡོད། “དྲོད་སྲུང་གསོ་སྤེལ”གྱི་ལག་རྩལ་མ་ལག་ཆ་ཚང་དང་འདྲ་བཟོ་ཆོག་པའི་གསོ་སྤེལ་བྱེད་སྟངས་བཏོད་ནས་ས་མཐོར་ཉ་ལས་མེད་པ་ནས་ཡོད་པའི་བར་འཕེལ་རྒྱས་བཏང་ཡོད། གཞན་ཡང་སྤོ་བོ་རྫོང་དང་། རྫ་ཡུལ་རྫོང། མེ་ཏོག་རྫོང་བཅས་ཀྱི་ཇ་ལོའི་སྣ་ཁ་མང་དུ་བཏང་ནས“ཐོན་ལས་ཆེན་པོར”བསྒྱུར་ཡོད།