ལྗོངས་ཏང་ཨུད་རྩ་འཛུགས་པུས།
ཁ་གཏད་བོད་སྐྱོར་ལས་དོན་གྱི་ཚོགས་འདུ་ཐེངས་བཞི་པའི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་པ།
ཟླ་8ཚེས་30ཉིན་ལྗོངས་ཏང་ཨུད་རྩ་འཛུགས་པུས་ཆེད་དོན་ཚོགས་འདུ་འཚོགས་ཏེ། ཁ་གཏད་བོད་སྐྱོར་ལས་དོན་གྱི་ཚོགས་འདུ་ཐེངས་བཞི་པའི་དགོངས་དོན་བརྒྱུད་བསྒྲགས་དང་སློབ་སྦྱོང་བྱས་པ་དང་འབྲེལ། ལག་བསྟར་དོན་འཁྱོལ་བྱེད་ཐབས་ལ་ཞིབ་འཇུག་ཀྱང་བྱས་པ་རེད། ལྗོངས་ཏང་ཨུད་ཀྱི་རྒྱུན་ཨུ་རྩ་འཛུགས་པུའི་པུའུ་ཀྲང་ལའེ་ཅའོ་ཡིས་ཚོགས་འདུ་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་བ་རེད།
ལའེ་ཅའོ་ཡིས་ལྗོངས་ཡོངས་ཀྱི་རིམ་ཁག་རྩ་འཛུགས་སྡེ་ཚན་དང་བོད་སྐྱོར་ལས་དོན་རུ་ཁག(ཚོགས་ཆུང)ལ་ཁ་གཏད་བོད་སྐྱོར་ལས་དོན་གྱི་ཚོགས་འདུ་ཐེངས་བཞི་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱ་རྒྱུ་དེ་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་བྱ་རྒྱུ་དང་ཟུང་འབྲེལ་དང་། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སློབ་སྦྱོང་དང་ལག་བསྟར་བྱ་རྒྱུ་དང་ཟུང་འབྲེལ་གྱིས“དོན་ཆེན་བཞིར”དམིགས་ནས“འཛུགས་གཏོད་བཞིར”ཤུགས་བརྒྱབ་སྟེ་ཁ་གཏད་བོད་སྐྱོར་གྱི་ཐུན་མོང་མ་ཡིན་པའི་ལེགས་ཆ་དང་འབྲེལ་ཟམ་གྱི་ནུས་པ་སྔར་བས་བེད་སྤྱོད་ཡག་པོ་དང་འདོན་སྤེལ་ཡག་པོ་བྱེད་དགོས་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་གཙོ་རྐང་ཁོང་དུ་བརྟན་པོར་ཆུད་པ་དང་། མི་དམངས་ལྟེ་བར་འཛིན་པའི་རྩ་བའི་ལངས་ཕྱོགས་ཁོང་དུ་ཆུད་པ། སྤུས་ཚད་མཐོ་བའི་འཕེལ་རྒྱས་ཀྱི་འགན་འཁྲི་ཨང་དང་པོ་ཁོང་དུ་ཆུད་པ། རྒྱལ་ཁབ་བདེ་འཇགས་ཀྱི་སྲུང་ཡོལ་ལྟ་བུ་ཡིན་པའི་བོད་ཀྱི་མཐའ་མཚམས་ས་ཁུལ་གྱི་གནས་ཚུལ་ཁོང་དུ་ཆུད་པ་བཅས་བྱས་ཏེ། བོད་སྐྱོར་གྱི་ཚོང་འགུགས་མ་འདྲེན་དང་ཤེས་ལྡན་པ་དང་བློ་རིག་འདྲེན་འགུགས་ཀྱི“གཉིས་འགུགས་གཉིས་འདྲེན”མུ་མཐུད་ཟབ་ཏུ་གཏོང་བ་དང་། ཁ་གཏད་བོད་སྐྱོར་ལས་དོན་གྱི་སྒྲིག་སྲོལ་ལམ་སྲོལ་ནུས་ཤུགས་ཡོད་རྒུས་ལེགས་སུ་དང་འཐུས་སྒོ་ཚང་དུ་གཏོང་བ། བོད་སྐྱོར་ལས་བྱེད་ཤེས་ལྡན་པར་ཞབས་འདེགས་ཞུ་བ་དང་དོ་དམ་བྱེད་པའི་ལས་དོན་བློ་རྩ་གཅིག་ཏུ་བསྒྲིམས་ནས་སྒྲུབ་པ་བཅས་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་གྱི་བོད་ཀྱི་ལེའུ་རྩོམ་པར་བོད་སྐྱོར་སྟོབས་ཤུགས་གཅིག་སྡུད་དང་འགན་ལེན་ནུས་ལྡན་བྱེད་དགོས་པའི་ནན་བཤད་གནང་བ་རེད།