འདི་ནི་ཧོ་པེ་ཞིང་ཆེན་ཁྲེང་ཏེ་གྲོང་ཁྱེར་དུ་གནས་པའི་རྒྱལ་ཁབ་གློག་དྲ་ཤིན་ཡོན་ཧོ་པེ་ཧྥུང་ཉིང་ཆུ་འཐེན་ནུས་གསོག་གློག་ཁང་གི་ས་འོག་བཟོ་ཁང་གི་ཆུ་འཐེན་འཕྲུལ་འཁོར་གྱི་གློག་གཏོང་འཕྲུལ་ཚན་ཡིན་པ། ཤིན་ཧྭ་གསར་འགྱུར་ཁང་གི་གསར་འགོད་པ་ལི་ཧོས་པར་བརྒྱབ།

ཀྲུང་གོས་ལྗང་མདོག་ནུས་རྒྱུ་འཕེལ་རྒྱས་ཤུགས་ཆེན་གཏོང་བའི་སྐབས་སུ་ཀྲུང་གོ་རྒྱལ་ཁབ་གློག་དྲ་ཚད་ཡོད་ཀུང་སིས་བསྐྲུན་པའི་འཛམ་གླིང་ཐོག་གི་གློག་འདོན་ཤུགས་ཆེ་ཤོས་ཀྱི་ཆུ་འཐེན་ནུས་གསོག་གློག་ཁང་སྟེ། རྒྱལ་ཁབ་གློག་དྲ་ཤིན་ཡོན་ཧོ་པེ་ཧྥུང་ཉིང་ཆུ་འཐེན་ནུས་གསོག་གློག་ཁང་གི་འཕྲུལ་ཚན་12པ་ཉེ་ཆར་དངོས་སུ་སྤྱད་ནས་གློག་གཏོང་འགོ་ཚུགས་པ་རེད། འཕྲུལ་ཚན་12ཀྱི་ཁྲོད་ནས་གཉིས་ནི་ཀྲུང་གོའི་རྒྱལ་ནང་དུ་ཐོག་མར་སྤྱད་པའི་མགྱོགས་ཚད་སྒྱུར་བའི་འཕྲུལ་ཚན་ཡིན་ཞིང་། དེས་ཆུ་འཐེན་ནུས་གསོག་གློག་ཁང་གིས་གློག་དྲའི་ཐེག་ཚད་འཁྱོག་པའི་མཉེན་གཤིས་སྙོམས་སྒྲིག་ནུས་པ་ཆེ་རུ་གཏོང་ཐུབ་ཀྱི་ཡོད་པ་རེད། ཧྥེང་ཉིང་གློག་ཁང་གི་བཟོ་སྐྲུན་མ་གནས་མི་དམངས་ཤོག་སྒོར་དུང་ཕྱུར་190དང་གློག་འདོན་འཕྲུལ་འཁོར་ནས་གློག་འདོན་ཚད་ཆན་ཝ་ཁྲི་360ཟིན་པ་དེ་ནི་2022ལོའི་པེ་ཅིང་དགུན་དུས་ཨོ་རྩལ་འགྲན་ཚོགས་ཀྱི་ལེ་ལག་ཚང་བའི་ལྗང་མདོག་ནུས་རྒྱུའི་གཙོ་གནད་ལས་གྲྭ་ཞིག་རེད། ཧྥེང་ཉིང་གློག་ཁང་དེ་ད་ཆ་ཨ་རིའི་པ་སི་རྫོང་གློག་ཁང་ལས་བརྒལ་ནས་འཛམ་གླིང་ཐོག་གི་ཆུ་འཐེན་ནུས་གསོག་གློག་ཁང་ཆེ་ཤོས་སུ་གྱུར་ཡོད།

ཀྲུང་གོའི་རྒྱལ་ཁབ་ནུས་རྒྱུ་ཅུས་ཀྱིས་ཀྲུང་གོའི་དམིགས་ཚད་ནི་2030ལོར་སླེབས་སྐབས་ཆུ་འཐེན་ནུས་གསོག་གློག་འདོན་འཕྲུལ་འཁོར་ནས་གློག་འདོན་ཚད་ཆན་ཝ་དུང་ཕྱུར་1.2བར་མཐོ་རུ་གཏོང་རྒྱུ་དེ་ཡིན་ཞེས་བཤད་པ་རེད། རྒྱལ་ཁབ་ནུས་རྒྱུ་ཅུས་ཀྱི་གྲངས་གཞི་ལས་མངོན་པར། འདི་ལོའི་ཟླ་6པའི་བར་ཀྲུང་གོའི་ཆུ་འཐེན་ནུས་གསོག་གློག་འདོན་འཕྲུལ་འཁོར་ནས་གློག་འདོན་ཚད་ཆན་ཝ་ཁྲི་5500ཟིན་ཡོད་པ་རེད།

ནུས་གསོག་ལག་རྩལ་གྱིས་ཀྲུང་གོའི་ལྗང་མདོག་ཕྱོགས་སྒྱུར་ཁྲོད་འགག་རྩའི་ནུས་པ་འདོན་ཐུབ་ལ། དེས་རླུང་ནུས་དང་ཉི་ནུས་ཀྱིས་གློག་རྒྱུན་མཐུད་གཏོང་མི་ཐུབ་པའི་གནད་དོན་ཐག་གཅོད་ཐུབ་རྒྱུར་ཕན་ཐོགས་ཡོད་པ་མ་ཟད། དུས་དང་རྣམ་པ་ཀུན་ཏུ་གློག་མཁོ་འདོན་ཐུབ་རྒྱུ་རེད། ཀྲུང་གོའི་རྒྱལ་ཁབ་གློག་དྲ་དང་ལྷོ་ཕྱོགས་གློག་དྲས་ཁྱབ་ཁོངས་དེའི་མ་འཇོག་ཁྲོད་གནས་བབ་གཙོ་བོ་བཟུང་ཡོད།

—— ཨ་རིའི་ཕེང་པོ་གསར་འགྱུར་ཁང་གི་དྲ་ཚུགས་ཐོག་གནས་ཚུལ་སྤེལ་བ་གཞིར་བཟུང་།