འདི་ལོའི་ཟླ་3པར་ནག་ཆུ་གྲོང་ཁྱེར་སོག་རྫོང་དཀར་མོ་ཤང་གི་རྔེའུ་ལར་གངས་ཆེན་པོ་བབས་ནས་འགྲིམ་འགྲུལ་འགག དཀར་མོ་ཤང་མི་དམངས་འཐུས་ཚོགས་ཀྱི་འཐུས་མིའི་རོགས་སྐྱོབ་རུ་ཁག་གིས་འཕྲལ་དུ་ཤང་གི་སྔོག་འཕྲུལ་དང་བླུག་འཁོར་སྤྱད་དེ་ས་བབ་སྨི་5129ཡོད་པའི་རྔེའུ་ལར་བསྟུད་མར་ལས་དོན་བསྒྲུབས་ནས་ཕྱོགས་གཅིག་ནས་གངས་འཁྱགས་གཙང་སེལ་བྱས་པ་དང་ཕྱོགས་གཞན་ཞིག་ནས་འགྲོ་འོང་བྱེད་མཁན་མང་ཚོགས་ཤར་བགྲོད་ཐུབ་པར་ཁྲིད་སྟོན་བྱས་པ་རེད།

མི་དམངས་འཐུས་ཚོགས་ཀྱི་འཐུས་མི་གཞི་རིམ་བཅོས་སྐྱོང་གི་བརྒྱུད་རིམ་ཧྲིལ་པོའི་ནང་ཞུགས་པ་ནི་དུས་སྐབས་གསར་པར་སྤྱི་ཚོགས་རིང་ལུགས་ཀྱི་དམངས་གཙོ་ཆབ་སྲིད་འཕེལ་རྒྱས་གཏོང་བའི་ལྡོག་མེད་ཀྱི་བླང་བྱ་ཞིག་ཡིན་ལ། མི་དམངས་འཐུས་ཚོགས་ཀྱི་ལས་དོན་ལ་སྐྱེ་སྟོབས་དང་གསོན་ཤུགས་རྒྱུན་འཁྱོངས་ཐུབ་པའི་སྟོབས་ཤུགས་ཀྱི་འབྱུང་ཁུངས་ཤིག་ཀྱང་ཡིན། འདི་ལོ་ནས་བཟུང་སོག་རྫོང་དཀར་མོ་ཤང་མི་དམངས་འཐུས་ཚོགས་ཀྱི་ཀྲུའུ་ཞི་ཚོགས་པས་སྔོན་ལ་ལག་བསྟར་དང་སྔོན་ལ་ཚོད་ལྟ་བྱས་ནས་གཞི་རིམ་བཅོས་སྐྱོང་དེང་རབས་ཅན་ལ་སྐུལ་འདེད་གཏོང་བ་དེ་བརྒྱུད་རིམ་ཧྲིལ་པོའི་མི་དམངས་དམངས་གཙོ་འཕེལ་རྒྱས་གཏོང་བའི་དུས་རབས་ཀྱི་རྒྱབ་ལྗོངས་འོག་བཞག་ནས་མི་དམངས་འཐུས་ཚོགས་ཀྱི་འཐུས་མིའི་རོགས་སྐྱོབ་རུ་ཁག་བཙུགས་ཏེ་མི་དམངས་འཐུས་ཚོགས་ཀྱི་འཐུས་མི་གཞི་རིམ་བཅོས་སྐྱོང་གི་བརྒྱུད་རིམ་ཧྲིལ་པོའི་ནང་ཞུགས་པའི་ལག་ལེན་གསར་གཏོད་བྱས་ཡོད།

སོག་རྫོང་གི་ཤར་ལྷོའི་རྒྱུད་དུ་གནས་པའི་དཀར་མོ་ཤང་ལ་ས་བབ་མཐོ་ཚད་སྨི་4100ཡོད་ཅིང་། རྒྱལ་མོ་རྔུལ་ཆུའི་བྱང་ངོགས་རྒྱུད་དུ་ཡོད་པ་དང་རྫོང་གྲོང་དང་བར་ཐག་སྤྱི་ལེ་210ཡོད། འགྲིམ་འགྲུལ་དང་གནམ་གཤིས་ཀྱི་ཚོད་འཛིན་ཕོག་པས། དུས་ཚིགས་ལ་ལྟོས་ནས་རླངས་འཁོར་ཤར་གཏོང་ཐུབ་པའི་ཤང་གི་གྲས་ཤིག་རེད། ལོ་ལྟར་གྱི་ཟླ་11པ་ནས་ཕྱི་ལོའི་ཟླ་4པའི་བར་ས་བབ་མཐོ་ཚད་སྨི་5129ཡོད་པའི་རྔེའུ་ལར་གངས་ཆེན་པོ་འབབ་པའི་དབང་གིས་འགྲོ་ལམ་འགག་པས་ཕྱི་རོལ་དང་འབྲེལ་བ་བྱེད་པར་འགོག་རྐྱེན་བཟོ་གི་ཡོད།

ནམ་ཟླ་དྲོ་རུ་ཕྱིན་པ་དང་བསྟུན་ཆར་ཆུ་དང་ས་དབྱིབས་ཀྱི་ཤུགས་རྐྱེན་ཐེབས་པའི་དབང་གིས་རྡོ་ཧྲུག་ལྷུང་བ་དང་རི་ཉིལ་བ་སོགས་ཀྱི་གནས་ཚུལ་རྟག་ཏུ་ཐོན་ནས་འགྲོ་སྐྱོད་བྱེད་མཁན་རླངས་འཁོར་དང་འགྲུལ་པར་དཀའ་ངལ་མང་པོ་བཟོ་ཡི་ཡོད། དམིགས་བསལ་གྱི་རང་བྱུང་ས་ཁམས་ཁོར་ཡུག་ལས་ས་གནས་དེ་གའི་གཞི་རིམ་གྱི་ཞབས་ཞུ་དང་བཅོས་སྐྱོང་ལ་འགྲན་སློང་ཧ་ཅང་ཆེན་པོ་འཕྲད་ཡོད།

དཀར་མོ་ཤང་མི་དམངས་འཐུས་ཚོགས་ཀྱི་ཀྲུའུ་ཞི་ཚོགས་པས་གནས་ཚུལ་དེར་མཐོང་ཆེན་བྱས་ཏེ་གྲོང་གསེབ་དར་རྒྱས་ཀྱི་བྱ་སྤྱོད་དེ་མི་དམངས་འཐུས་ཚོགས་ཀྱི“ཁོངས་མི་བཅུ་བརྩོན་ལེན་བྱེད་པའི”བྱེད་སྒོ་དང་ཟུང་འབྲེལ་དམ་ཟབ་བྱས་ཏེ་མི་དམངས་འཐུས་ཚོགས་ཀྱི་འཐུས་མི་གཞི་རིམ་བཅོས་སྐྱོང་གི་བརྒྱུད་རིམ་ཧྲིལ་པོའི་ནང་ཞུགས་པའི་དགེ་མཚན་ལྡན་པའི་ལམ་བུར་བསྐྱོད་ཡོད།

2024ལོའི་ཟླ་3པར་དཀར་མོ་ཤང་མི་དམངས་འཐུས་ཚོགས་ཀྱི་ཀྲུའུ་ཞི་ཚོགས་པས་དམངས་འཚོ་ལེགས་སུ་གཏོང་བ་དང་མང་ཚོགས་ལ་ཞབས་འདེགས་ཞུ་རྒྱུ་ཁྲིད་སྟོན་དུ་བྱས་ཏེ་ལས་དོན་བཀོད་སྒྲིག་བྱས་ནས་ས་ཁོངས་ནང་གི་རིམ་ཁག་མི་དམངས་འཐུས་ཚོགས་ཀྱི་འཐུས་མི་ས་གནས་དེ་གའི་གཞི་རིམ་བཅོས་སྐྱོང་མ་ལག་གི་སྒྲོམ་གཞིའི་ནང་བཀོད་སྒྲིག་བྱས་པ་དང་། དཀར་མོ་ཤང་ཏང་ཨུད་ཀྱི་ཧྲུའུ་ཅི་གཞོན་པ་དང་ཤང་ཀྲང་ཚེ་དབང་སྟོབས་རྒྱལ་གྱིས་ཙུའུ་ཀྲང་གཞོན་པའི་འགན་འཁུར་བ་དང་། ཤང་ཏང་ཨུད་ཀྱི་ཧྲུའུ་ཅི་གཞོན་པ་དང་མི་དམངས་འཐུས་ཚོགས་ཀྱི་ཀྲུའུ་ཞི་ཚེ་བརྟན་དབང་ཕྱུག་གིས་ཙུའུ་ཀྲང་གཞོན་པའི་འགན་འཁུར་བ། ཁོངས་གཏོགས་ཁུལ་གྱི་མི་དམངས་འཐུས་ཚོགས་ཀྱི་འཐུས་མི་13གྱིས་ཁོངས་མི་བྱས་པའི་མི་དམངས་འཐུས་ཚོགས་ཀྱི་འཐུས་མིའི་རོགས་སྐྱོབ་རུ་ཁག་བཙུགས་ནས་འགྲོ་ལམ་ཤར་གཏོང་དང་མྱུར་སྐྱོབ་ལས་དོན་གྱི་འགན་འཁུར་ཡོད།

འདི་ལོའི་ཟླ་5པར། གནམ་གཤིས་དྲོ་རུ་སོང་བ་དང་གངས་གསོག་བཞུར་བ་དང་ཆར་པ་བསྟུད་མར་བབས་པའི་དབང་གིས་རྔེའུ་ལའི་ལམ་དུམ་དུ་རྡོ་མང་པོ་ལྷུངས་བ་དང་། དེ་དུས་དབྱར་རྩྭ་དགུན་འབུ་བརྐོ་བའི་དུས་ཚིགས་དང་ཏག་ཏག་འཁེལ་བས་འགྲོ་འོང་བྱེད་མཁན་ཅུང་མང་སྟབས་མང་ཚོགས་ཀྱི་འགྲོ་སྐྱོད་ལ་བདེ་འཇགས་ཀྱི་མངོན་མེད་རྐྱེན་ངན་ཚབས་ཆེ་ཙམ་བཟོས་ཡོད།

འགག་རྩའི་དུས་སུ་དཀར་མོ་ཤང་མི་དམངས་འཐུས་ཚོགས་ཀྱིས་འཕྲལ་དུ་མྱུར་སྐྱོབ་རུ་ཁག་བཏང་ཞིང་། ཚེ་དབང་སྟོབས་རྒྱལ་དང་། ཚེ་བརྟན་དབང་ཕྱུག འཕྲིན་ལས་བཀྲ་ཤིས་སོགས་འཐུས་མིའི་སྒྲིག་འཛུགས་དང་སྐུལ་སློང་འོག་མུར་སྐྱོབ་རུ་ཁག་གི་འཐུས་མི་13གྱིས་རང་འགུལ་ངང་ཉིན་གང་འབད་འཐབ་ལྷོད་མེད་བྱས་པ་བརྒྱུད་རྔེའུ་ལའི་ལམ་དུམ་བཤངས་ཐུབ་ནས་མང་ཚོགས་ཀྱི་འགྲོ་སྐྱོད་བདེ་འཇགས་འགན་སྲུང་ནུས་ལྡན་ཐུབ་ཡོད།

རུ་ཁག་བཙུགས་པ་ནས་བཟུང་། དཀར་མོ་ཤང་མི་དམངས་འཐུས་ཚོགས་ཀྱི་འཐུས་མིའི་མྱུར་སྐྱོབ་རུ་ཁག་གིས་དོན་རྐྱེན་དང་གནོད་འཚེའི་རོགས་སྐྱོབ་ནང་ཐེངས་3ཞུགས་པ་དང་། ཉེན་ཁའི་གནས་སུ་གྱར་བའི་མི་4བསྐྱབས་པ། གཞུང་ལམ་ཤར་གཏོང་གི་ལས་དོན་ནང་ཐེངས་35ཞུགས་ཏེ། མང་ཚོགས་ཀྱི་ཚེ་སྲོག་རྒྱུ་ནོར་གྱི་བདེ་འཇགས་ལ་འགན་སྲུང་ནུས་ལྡན་བྱས་ཡོད།

ཚེ་དབང་སྟོབས་རྒྱལ་དང་། ཚེ་བརྟན་དབང་ཕྱུག འཕྲིན་ལས་བཀྲ་ཤིས་དང་འདྲ་བའི་འཐུས་མི་ད་དུང་མང་པོ་ཡོད་ཅིང་། ཁོང་ཚོ་ནི་དཀར་མོ་ཤང་གི་རིམ་ཁག་མི་དམངས་འཐུས་ཚོགས་ཀྱི་འཐུས་མི་44ཡི་མཚོན་བྱེད་དང་། དཀར་མོ་ཤང་མི་དམངས་འཐུས་ཚོགས་འཐུས་མིས“རྨང་གཞིའི་སྒྲིག་བཀོད་ལ་སྐུལ་འདེད་གཏོང་མཁན”དང“མཛེས་སྡུག་ལྡན་པའི་གྲོང་གསེབ་འཛུགས་སྐྲུན་པ”བརྩོན་ལེན་ཧུར་ཐག་བྱེད་པའི་གསོན་ཉམས་དོད་པའི་ལག་ལེན། མི་དམངས་འཐུས་ཚོགས་ཀྱི་འཐུས་མིས་ནུས་པ་འདོན་པ་དང་གཞི་རིམ་བཅོས་སྐྱོང་ལ་སྐུལ་འདེད་གཏིང་ཟབ་གཏོང་བའི་ཞིབ་ཕྲའི་མཚོན་ཚུལ་བཅས་ཡིན་པ་དང་ཁོང་ཚོས་མྱུར་སྐྱོབ་ལས་དོན་ཧུར་ཐག་བསྒྲུབས་ཏེ་སྤྱིར་བཏང་གི་ལས་གནས་སུ་སྐད་གྲགས་མེད་པར་རང་ཉིད་ཀྱི་སྟོབས་ཤུགས་སྐྱེས་སུ་འབུལ་བཞིན་ཡོད།