ཉིན་ཤས་བསྟུད་མར། རྒྱལ་ཡོངས་སྲིད་གྲོས་ཀྱི་རྒྱུན་ཨུ་དང་། ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། ཀྲུང་གོ་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱི་ཚོགས་གཙོ་བཅས་ཡིན་པའི་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོས་ཉིང་ཁྲི་གྲོང་ཁྱེར་གྱི་རྫ་ཡུལ་རྫོང་དང་སྤོ་བོ་རྫོང་དུ་བརྟག་ཞིབ་གནང་བ་དང་ཆོས་ཕྱོགས་ཀྱི་བྱེད་སྒོ་སྤེལ་ནས་བོད་བརྒྱུད་ནང་བསྟན་དང་སྤྱི་ཚོགས་རིང་ལུགས་སྤྱི་ཚོགས་འཚམ་མཐུན་ཡོང་བར་སྐུལ་འདེད་གཏོང་དགོས་ཞེས་གསུངས་པ་རེད།

རྫ་ཡུལ་རྫོང་རྫ་ཡུལ་རོང་སྨད་གྲོང་རྡལ་ཏེང་པ་བའི་གྲོང་གསར་ནི་མི་འབོར་ཅུང་ཉུང་བའི་ཏེང་པ་བ་འདུས་སྡོད་བྱ་ཡུལ་ཞིག་རེད། དུས་རབས་20པའི་ལོ་རབས་60པར། ཏང་དང་སྲིད་གཞུང་གིས་ཏེང་པ་བ་རི་སྟེང་ནགས་ཁྲོད་ནས་ལུང་གཞུང་ཐང་གཤོངས་སུ་གནས་སྤོ་བྱས་པ་རེད། སྒྱུར་བཅོས་སྒོ་དབྱེ་བྱས་ཚུན་དང་ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཏང་དང་སྲིད་གཞུང་གི་སྣེ་ཁྲིད་དང་ཐུགས་ཁུར་འོག ཏེང་པ་བའི་གྲོང་གསར་གྱིས་ཆུ་དང་། གློག ལམ། འཕྲིན་གཏོང་སོགས་རྨང་གཞིའི་སྒྲིག་བཀོད་ལེགས་སུ་ཤུགས་ཆེན་བཏང་བ་དང་། ཇ་ལོ་དང་། མེ་ཏོག “ཏེང་པའི་སྤྲོ་སྐྱིད་ཁང”སོགས་ཁྱད་ལྡན་ཐོན་ལས་གཙོ་གནད་ཐོག་འཕེལ་རྒྱས་བཏང་ནས་གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་བཏང་ཞིང་། མིག་སྔར། ཏེང་པ་བའི་གྲོང་གསར་དུ་ཁྱོན་དུད་ཚང་71དང་མི་གྲངས་301ཡོད་པ་དང་། 2023ལོར་གྲོང་ཚོ་ཡོངས་ལ་དཔལ་འབྱོར་གྱི་ཡོང་འབབ་བསྡོམས་འབོར་སྒོར་ཁྲི་799.69ཟིན་པ་དང་མི་རེར་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་ཁྲི་2.83ལྷག་ཙམ་ཟིན་ནས་གདོད་མའི་འཚོ་བ་ནས་འབྱོར་འབྲིང་གི་འཚོ་བའི་བར་གྱི་མཆོང་སྐྱོད་བྱུང་ཡོད། པཎ་ཆེན་རིན་པོ་ཆེ་ཏེང་པ་བའི་གྲོང་གསར་ལ་ཕེབས་ནས། གྲོང་ཚོ་དེའི་འགན་འཁུར་བའི་ལས་དོན་ངོ་སྤྲོད་ནན་ཏན་ངང་གསན་པ་དང་ཏེང་པ་བའི་ཐོན་སྐྱེད་དང་འཚོ་བའི་གནས་ཚུལ་མཁྱེན་རྟོགས་ཞིབ་ཕྲ་གནང་བ་མ་ཟད། ཚང་མས་མི་རིགས་མཐུན་སྒྲིལ་ལ་ཤུགས་སྣོན་བརྒྱབ་ནས་རང་རྟོགས་ངང་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བ་བཅས་བྱས་ཏེ། མཛེས་སྡུག་ལྡན་པའི་ཁྱིམ་གཞིས་ཧུར་ཐག་བསྐྲུན་པ་དང་བདེ་སྐྱིད་ལྡན་པའི་འཚོ་བ་གཏོད་དགོས་པའི་སྐུལ་ལྕག་གནང་བ་རེད།

ཉེ་བའི་ལོ་ཤས་རིང་། རྫ་ཡུལ་རྫོང་རྫ་ཡུལ་རོང་སྨད་གྲོང་རྡལ་ས་སྐྱོང་གྲོང་ཚོས“ཐུན་མོང་ལྔ་དང་སྲ་བརྟན་ལྔའི”བྱེད་སྒོ་གཏིང་ཟབ་སྤེལ་ནས། གཞི་རིམ་ཏང་རྩ་འཛུགས་འདི་ཉིད་ས་སྲུང་མཐའ་བརྟན་དང་གྲོང་གསེབ་དར་རྒྱས་ཀྱི་དམག་འཐབ་མཁར་རྫོང་ཞིག་ཏུ་བསྐྲུན་པ་དང་མཐའ་མཚམས་ལམ་ཐིག་ཏུ་མི་བཤིག་རྡོ་རྗེ་བྲག་ལྟར་གྱི་ཟངས་གྱང་ལྕགས་རྩིག་བསྐྲུན་ཡོད། རྫ་ཡུལ་རོང་སྨད་གྲོང་རྡལ་ས་སྐྱོང་གྲོང་ཚོར་པཎ་ཆེན་རིན་པོ་ཆེས་མཐའ་བརྟན་དང་། མཐའ་དར། དམངས་ཕྱུག་བཅས་ཀྱི་ལས་དོན་སྤེལ་ཚུལ་ལ་མཁྱེན་རྟོགས་ཞིབ་ཕྲ་གནང་ཞིང་། པཎ་ཆེན་རིན་པོ་ཆེ་གྲོང་ཚོ་དེའི་མང་ཚོགས་བློ་བཀྲ་ཤིས་ཀྱི་ཁྱིམ་དུ་ཕེབས་ནས་ཅི་འཕྲོས་མོལ་འཕྲོས་གནང་བ་དང་། འགྱུར་ལྡོག་དང་འཕེལ་རྒྱས་སྐོར་གླེང་གནང་བ་རེད། བློ་བཀྲ་ཤིས་ཀྱི་ཁྱིམ་ལ་2023ལོར་ཡོང་འབབ་སྒོར་ཁྲི་15དང་མི་རེར་ཆ་སྙོམས་ཡོང་འབབ་སྒོར་ཁྲི་5ཡན་བྱུང་བ་མཁྱེན་རྗེས་པཎ་ཆེན་རིན་པོ་ཆེ་ཐུགས་དགྱེས་ཚོར་ཆེན་པོ་བྱུང་བ་རེད། ཁོང་གིས་བློ་བཀྲ་ཤིས་ཁྱིམ་གྱིས་ཏང་གི་བཀའ་དྲིན་བློ་ལ་བརྟན་པོར་བཅངས་ནས་མི་རིགས་མཐུན་སྒྲིལ་ལ་ཤུགས་སྣོན་རྒྱག་པ་དང་ལས་བརྩོན་ཕྱུག་འགྱུར་བྱས་ཏེ་བླ་ན་མེད་པའི་རྒྱལ་ཁབ་ཀྱི་ས་ཆ་ཡག་པོ་སྲུང་བ་དང་བདེ་སྐྱིད་ལྡན་པའི་ཁྱིམ་གཞིས་འཛུགས་སྐྲུན་ཡག་པོ་བྱེད་དགོས་པའི་སྐུལ་ལྕག་གནང་བ་རེད།

ཡིད་འོང་ཇ་ར་ནི་རང་ལྗོངས་ཀྱི་ལོ་རྒྱུས་ཐོག་གཞི་ཁྱོན་ལྡན་པའི་ཇ་ར་དང་པོ་དེ་རེད། ཉེ་བའི་ལོ་ཤས་རིང་། ཡིད་འོང་ཇ་རས“གངས་ལྗོངས་ས་མཐོའི་ཇ”དང“གསར་བརྗེའི་ཡིད་འོང”གི་མིང་བྱང་གཉིས་ཡག་པོ་བཏོད་ནས་ཇ་རའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བ་རེད། པཎ་ཆེན་རིན་པོ་ཆེ་ཡིད་འོང་ཇ་རའི་ཇ་འདེབས་རྟེན་གཞི་དང་ཇ་ལོ་ལས་སྣོན་བཟོ་གྲྭར་ཕེབས་ནས་ཇ་ལོ་ལས་སྣོན་དང་སྤུས་རྟགས་གཏོད་པ་སོགས་ཀྱི་གནས་ཚུལ་ལ་བརྟག་ཞིབ་གནང་བ་རེད། དམག་དཔོན་ཐོག་ཁང་དུ་ཕེབས་ཏེ་དམག་དཔོན་ཐོག་ཁང་གི་ལོ་རྒྱུས་མདོར་བསྡུས་མཁྱེན་རྟོགས་ཞིབ་ཕྲ་གནང་བ་མ་ཟད། དམག་དཔོན་ཀྲང་གོ་ཧྭ་ཡི་སྐུ་བརྙན་ལ་མཇལ་དར་བསྒྲོན་ནས་གསར་བརྗེའི་སྔོན་བྱོན་པ་ཚོའི་མཛད་རྗེས་རླབས་པོ་ཆེ་དང་བླ་ན་མེད་པའི་ཉམས་འགྱུར་ལ་དྲན་གསོ་ཟབ་མོ་ཞུས་ཤིང་། ཁོང་གིས་ཡིད་འོང་ཇ་རའི་ལས་བྱེད་པ་དང་ལས་བཟོ་ཚོས་ཁྲོམ་ར་རྒྱ་སྐྱེད་ཧུར་ཐག་གཏོང་བ་དང་ཁྲོམ་ར་བཟུང་ཚད་མཐོ་རུ་བཏང་ནས་ས་གནས་དེ་གའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་ལེགས་སྐྱེས་གསར་པ་དེ་བས་ཆེ་བ་འབུལ་དགོས་པའི་སྐུལ་ལྕག་གནང་བ་རེད།

བརྟག་ཞིབ་གནང་རིང་པཎ་ཆེན་རིན་པོ་ཆེ་རྫ་ཡུལ་རྫོང་ཐིགས་འཕགས་དགོན་དུ་ཕེབས་ནས་ཆོས་ཕྱོགས་ཀྱི་མཛད་སྒོ་སྤེལ་བ་རེད། ཐིགས་འཕགས་དགོན་གྱིས་ཆོས་ལུགས་ཀྱི་གུས་སྲོལ་རྒྱས་ཤོས་ཀྱི་ཐོག་ནས་པཎ་ཆེན་རིན་པོ་ཆེར་ཕེབས་བསུ་ཞུས་ཤིང་། པཎ་ཆེན་རིན་པོ་ཆེས་དགེ་འདུན་པ་ཚོར་ཞལ་འདོན་དབུ་སྐུལ་གནང་བ་དང་གནས་གཟིགས་གྲུབ་རྗེས་ཆར་ཆུ་དུས་སུ་འབབ་པ་དང་རྒྱལ་དམངས་བདེ་ལ་འཁོད་པའི་གསོལ་བ་སྨོན་ལམ་བཏབ་གནང་བ་རེད།