འདི་ནི་གཞིས་རྩེ་གྲོང་ཁྱེར་ཕྱུག་པོ་གཞུང་ཤང་རྐང་བཞི་གྲོང་ཚོའི་རྣམ་པ་ཡིན་པ།

འདི་ནི་གཞིས་རྩེ་གྲོང་ཁྱེར་ཕྱུག་པོ་གཞུང་ཤང་རྐང་བཞི་གྲོང་ཚོའི་ཏང་ཀྲི་པུའུ་ཧྲུའུ་ཅི་བསྟན་དར་གྱིས་བ་ཕྱུགས་གསོ་ཚགས་ར་བའི་སྐོར་ངོ་སྤྲོད་བྱེད་བཞིན་པ།

དབྱར་དུས་ཀྱི་གཞིས་རྩེར་གནམ་གཤིས་ཚ་དྲོད་ཅུང་ཆེ་ཡང་། ཡངས་ཤིང་རྒྱ་ཆེ་བའི་གཞུང་ལམ་གྱི་གཡས་གཡོན་གང་སར་བུད་མེད་ཀྱི་སྐྲ་ལོ་ཐུར་དུ་འཕྱངས་པ་ལྟ་བུའི་རྒྱ་ལྕང་སོགས་སྔོ་ལྗང་ལྗོན་ཤིང་གིས་ཁེངས་པས། བསིལ་རླུང་ལྡང་ཐེངས་རེར་མགོ་ལྕོག་ལྡེམ་ལྡེམ་གཡོ་བཞིན་པ་དེ་ནི་ཐག་རིང་གི་སྐུ་མགྲོན་ལ་བསུ་བ་ཞུ་བ་ལྟར་སྣང་། གསར་འགོད་པ་རླངས་འཁོར་ལ་བསྡད་དེ་གཞིས་རྩེ་གྲོང་ཁྱེར་དང་བར་ཐག་སྤྱི་ལེ་13ཙམ་ཡོད་པའི་ཕྱུག་པོ་གཞུང་ཤང་རྐང་བཞི་གྲོང་ཚོར་འབྱོར་སྐབས། གྲོང་ཚོའི་ཏང་ཀྲི་པུའུ་ཧྲུའུ་ཅི་བསྟན་དར་གྱིས་ང་ཚོ་བསྒུགས་ནས་ཡོད་ཅིང་། རྒྱ་སྐད་དང་བོད་སྐད་གཉིས་ཀར་བྱང་བའི་ཁོང་གིས་ཧ་ཅང་རྒྱུས་མངའ་ཆེན་པོས་ང་ཚོར་རྐང་བཞི་གྲོང་ཚོའི་རྟ་ར་གསོ་ཚགས་ཞིང་པའི་ཆེད་ལས་མཉམ་ལས་ཁང་གི་སྐོར་ངོ་སྤྲོད་བྱས།

རྒྱུས་ལོན་བྱས་པ་ལྟར་ན། རྐང་བཞི་གྲོང་ཚོར་དེ་སྔོན་དུད་ཚང་རྐང་བཞི་ལས་མེད་པས། མིང་ལའང་རྐང་བཞི་གྲོང་ཚོ་ཞེས་ཐོགས་པ་དང་། ད་ཆ་གྲོང་ཚོར་ཁྱོན་དུད་ཚང་73བར་མང་དུ་ཕྱིན་ཡོད་པ་རེད། རྟ་ར་གསོ་ཚགས་ཞིང་པའི་ཆེད་ལས་མཉམ་ལས་ཁང་དུ་འབྱོར་སྐབས། མིག་ལམ་དུ་འཆར་བ་ནི་གཟུགས་བོང་གཅིག་ལ་གཅིག་འགྲན་གྱི་བཞོན་མའི་ཚོགས་དང་། སྤ་ཆ་ཐང་ལ་ཡི་གར་འོང་བའི་བེའུའི་ཚོགས་ཡིན་ཞིང་། ཁོང་ཚོས་ཡང་ན་བག་ཕེབས་ངང་ཕར་འགྲོ་ཚུར་འོང་བྱེད་པའམ། ཡང་ན་ཁྱུ་དང་ཁྱུ་བྱས་ནས་ཕན་ཚུན་དེད་རེས་བྱེད། བསྟན་དར་གྱིས། “2014ལོར་གྲོང་ཚོའི་ཡུལ་མི་མིག་དམར་བཀྲ་ཤིས་ཀྱིས་གྲོང་ཚོར་མཉམ་ལས་ཁངཐོག་མར་བཙུགས་ཏེ་བ་ཕྱུགས་གསོས་ཤིང་། ཉིན་ལྟར་འོ་མ་བཞོས་ནས་གཞིས་རྩེ་གྲོང་ཁྱེར་དུ་འཚོང་བར་འགྲོ་གི་ཡོད། ཡིན་ནའང་སྐབས་དེ་དུས་མཉམ་ལས་ཁང་གི་གཞི་ཁྱོན་ཆུང་ལ་མ་རྐང་ནང་ཞུགས་མཁན་དུད་ཚང་ལྔ་ལས་མེད་སྟབས་འཕེལ་རྒྱས་དེ་ཙམ་བྱུང་མེད”ཅེས་ངོ་སྤྲོད་བྱས།

ཉེ་བའི་ལོ་ཤས་རིང་། བོད་ཀྱི་གྲོང་ཚོ་ཁག་ཏུ་རང་རང་སོ་སོའི་ས་བབ་ཀྱི་ལེགས་ཆ་དང་། ཐོན་ལས་ཀྱི་ཁྱད་ཆོས་ལ་གཞིགས་པའི་གྲོང་ཚོའི་མཉམ་ལས་ཁང་མང་པོ་མཐོང་རྒྱུ་ཡོད་ཅིང་། མཉམ་ལས་ཁང་ཁག་གིས་ཁྱད་ལྡན་ཐོན་ལས་ཤིག་ཀ་རྟེན་དུ་བྱས་ཏེ། ཡུལ་མིར་འབབ་འཕར་གྱི་ལམ་བུ་གསར་པ་ཞིག་བཏོད་ཡོད། 2020ལོའི་ཟླ་4པར་གྲོང་སྡོད་ལས་དོན་རུ་ཁག་དང་གྲོང་ཚོའི་ཏང་ཀྲི་པུས་སྣེ་ཁྲིད་དེ། རྐང་བཞི་གྲོང་ཚོས་སྔོན་མའི་མཉམ་ལས་ཁང་གི་རྨང་གཞིའི་ཐོག་རྟ་ར་གསོ་ཚགས་ཞིང་པའི་ཆེད་ལས་མཉམ་ལས་ཁང་དངོས་སུ་བཙུགས། འོན་ཀྱང་། དང་ཐོག་གྲོང་ཚོའི་ཡུལ་མི་མང་པོས“དེ་སྔའང་མཉམ་ལས་ཁང་ཡག་པོ་གཉེར་ཐུབ་མེད་པས་ད་ལྟའང་ཁག་པོ་རེད”ཅེས་བཤད་དེ། མཉམ་ལས་ཁང་ལ་མ་རྐང་འཇོག་འདོད་མེད་ལ་དེར་ཡིད་ཆེས་ཀྱང་ཆེན་པོ་བྱེད་ཀྱི་མེད་པས། མང་ཚོགས་ལ་བསམ་བློའི་སློབ་གསོ་ཇི་ལྟར་རྒྱག་མིན་དང་། མང་ཚོགས་མཉམ་ལས་ཁང་དུ་ཇི་ལྟར་ཞུགས་སུ་འཇུག་མིན་ནི་བསྟན་དར་གྱིས་བསམ་གཞིག་བྱེད་མང་ཤོས་སུ་གྱུར། གནད་དོན་གང་འདྲ་ཞིག་ཕྲད་རུང་། དེ་ལ་དེ་བསྟུན་གྱི་ཐག་གཅོད་བྱེད་ཐབས་རེ་ཡོད་པ་ཁོང་གིས་ཡིད་ཆེས་ཆེན་པོ་བྱེད་ཀྱི་ཡོད། བསམ་བློ་དྲུག་གསུམ་བཅོ་བརྒྱད་བཏང་བ་དང་། གྲོང་ཚོ་གཞན་པའི་ཉམས་མྱོང་ལ་དཔེ་བལྟས་པ་བརྒྱུད། གྲོང་ཚོའི་ཏང་ཀྲི་པུའུ་ཧྲུའུ་ཅི་ཡིན་པའི་ཁོང་གིས་ཐོག་མར་རང་གི་ཁྱིམ་ཚང་ནས་འགོ་བཙུགས་ཏེ། དངུལ་སྨར་སྒོར་ཁྲི་10དང་། བ་ཕྱུགས་མགོ་གྲངས་5 རྩྭ་ར་མུའུ་14.4བཅས་བཏོན་ནས་མཉམ་ལས་ཁང་དུ་མ་རྐང་བཞག་སྟེ་རང་དཔེ་གཞན་སྟོན་བྱས་པ་དང་། དེ་རྗེས་གྲོང་ཚོའི་ཨུ་ལྷན་གཉིས་ཚན་ཁག་གི་ཁོངས་མི་སྔོན་ལ་མཉམ་ལས་ཁང་དུ་ཞུགས་སུ་བཅུག་པ། རིམ་པས་ཏང་ཡོན་རྣམས་སྐུལ་སློང་བྱས་ཏེ་མཉམ་ལས་ཁང་ལ་ཞུགས་སུ་བཅུག་པས། གྲོང་ཚོའི་ཨུ་ལྷན་གཉིས་ཚན་ཁག་དང་ཏང་ཡོན་བཅས་མཉམ་ལས་ཁང་དུ་ཞུགས་ཚད་བརྒྱ་ཆ་བརྒྱ་ཟིན་ཡོད། རིམ་གྱིས་གྲོང་སྡོད་ལས་དོན་རུ་ཁག་དང་གྲོང་ཚོའི་ཨུ་ལྷན་གཉིས་ཀྱི་ཚན་ཁག་གི་ཁོངས་མིས་མང་ཚོགས་མི་རེ་ངོ་རེའི་ཁྱིམ་དུ་བསྐྱོད་དེ་མཉམ་ལས་ཁང་དང་འབྲེལ་བའི་གཟིགས་སྐྱོང་སྲིད་ཇུས་རབ་དང་རིམ་པ་སྒྲོག་འགྲེལ་དང་། དེ་རྗེས་གྲོང་ཚོའི་ཚོགས་འདུ་འཚོགས་ནས་ཡུལ་མིའི་བསམ་འཆར་བསྡུ་ལེན་བྱས་པ་བརྒྱུད། མཐར་གྲོང་ཚོའི་དུད་ཚང་73ཚང་མས་མ་རྐང་ནང་ཞུགས་པར་མགྲིན་གཅིག་ཏུ་མོས་མཐུན་བྱས། མང་ཚོགས་ཀྱིས་སོ་སོའི་ཁྱིམ་ཚང་གི་འབྱོར་འཁོས་ལ་གཞིགས་ནས་མ་དངུལ་དང་། རྩྭ་ར། བཞོན་མ་སོགས་མཉམ་ལས་ཁང་དུ་མ་རྐང་ལ་བཞག་པར། མཉམ་ལས་ཁང་དངོས་སུ་འཛུགས་སྐབས། ཁྱོན་དངུལ་སྨར་སྒོར་ཁྲི་98.4དང་། བཞོན་མ་མགོ་གྲངས་170 རྩྭ་ར་མུའུ་794.4བཅས་ཟིན་ཏེ། རིམ་གྱིས་ཐོན་ཁུངས་མ་རྩར་གྱུར་པ་དང་། མ་དངུལ་མ་རྐང་ལ་གྱུར་པ། ཡུལ་མི་མ་རྐང་འཇོག་མཁན་ལ་གྱུར་ཏེ། གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་དང་ཞིང་པ་འབབ་འཕར་ཕྱུག་འགྱུར་ཡོང་བར་རྨང་གཞི་བརྟན་པོ་ཞིག་བཏིང་པ་རེད།

2020ལོའི་ཟླ་8པར་གྲོང་ཚོའི་ཡུལ་མི་ཚང་མས་ཚ་ཚ་འུར་འུར་ངང་མཉམ་ལས་ཁང་གི་བ་ཚང་དང་། མཛོད་ཁང་། ལོག་བཀར་ཁུལ། ར་བ་སོགས་རྨང་གཞིའི་སྒྲིག་བཀོད་ཀྱི་འཛུགས་སྐྲུན་ནང་ཞུགས་ཤིང་། འཛུགས་སྐྲུན་བྱེད་རིང་མང་ཚོགས་ཀྱིས་མ་སྐུལ་དང་བླངས་ངང་ཁྲོམ་རའི་རིན་གོང་ལས་དམའ་བའི་གླ་ཆའི་ཐོག་ནས་ངལ་རྩོལ་ལ་ཞུགས་ཡོད། ལོ་དེའི་ཟླ་9པའི་ཟླ་མཇུག་ནས་བཟུང་རྒྱ་ཁྱོན་མུའུ་42ཟིན་པའི་མཉམ་ལས་ཁང་དངོས་སུ་གཉེར་འགོ་ཚུགས་པ་རེད།

ལས་ཀ་གང་ཞིག་གཉེར་ཡང་། འགོ་འཛུགས་སྐབས་དཀའ་ལས་མེད་པ་མེད་པས། རྟ་ར་གསོ་ཚགས་ཞིང་པའི་ཆེད་ལས་མཉམ་ལས་ཁང་ལའང་ལོ་དང་པོ་དང་གཉིས་པར་ཡོང་འབབ་དེ་ཙམ་བྱུང་མེད། བཞོན་མ་ཚང་མ་གྲོང་ཚོ་དེ་གའི་ཡིན་དུས། གཟུགས་བོང་དང་། ཤ་ཤེད། འོ་མའི་སྤུས་ཚད་དང་འབབ་ཚད་ཀྱང་དེང་གི་རྒྱུད་བཟང་བ་ཕྱུགས་དང་བསྡུར་ཐབས་མེད་པས། ཆེད་མངགས་མི་མངགས་ནས་འོ་མ་དང་མར་སོགས་གཞིས་རྩེ་གྲོང་ཁུལ་དུ་འཚོང་བར་ཕྱིན་ཡང་ཡོང་འབབ་དེ་ཙམ་རག་མེད། དུས་རབས་གསར་པའི་འཕེལ་རྒྱས་ཀྱི་ཁྱད་ཆོས་དང་འཚམ་པའི་བོད་ཀྱི་སྲོལ་རྒྱུན་བཞོན་མ་གསོ་ཚགས་བྱེད་སྟངས་ལ་འགྱུར་བ་གཏོང་ཆེད། ཉི་རི་གཞུང་ཤང་རྒྱལ་ཆེན་རྩེ་གྲོང་ཚོ་ནས་རྒྱུད་བཟང་བཞོན་མ་མགོ་གྲངས་180ཉོས་ཏེ་ས་གནས་དེ་གའི་བ་ཕྱུགས་ཀྱི་ཤ་ཤེད་ཞན་པ་དང་འོ་མ་ཐོན་ཚད་ཉུང་བའི་ཞན་ཆ་བསལ་བར། རྒྱུད་བཟང་བ་ཕྱུགས་ཀྱི་ཁྱབ་ཚད་རིམ་བཞིན་མང་དུ་ཕྱིན་པ་དང་བསྟུན་གསོ་ཚགས་ར་བའི་དཔལ་འབྱོར་གྱི་ཕན་འབྲས་དང་། ཁྲོམ་རའི་ཕན་འབྲས། སྤྱི་ཚོགས་ཀྱི་ཕན་འབྲས་བཅས་མངོན་གསལ་དོད་པོས་ཆེ་རུ་ཕྱིན་ཡོད། བསྟན་དར་གྱིས“དེ་སྔ་མཉམ་ལས་ཁང་གསར་པ་བཙུགས་མ་ཐག་ང་ཚོས་མུ་མཐུད་དེ་མར་དང་འོ་མ་ལ་སོགས་བཙོངས་ནས་ཡོང་འབབ་གསོག་གི་ཡོད། འོན་ཀྱང་དེ་ཁོ་ནར་བརྟེན་ན་འཕེལ་རྒྱས་ཡོང་ཐབས་བྲལ་བས། ང་ཚོས་ཕྱིས་སུ་ད་དུང་རྒྱུད་བཟང་བ་ཕྱུགས་དུས་ཐུང་སྡོམ་གསོ་བྱས་ཏེ་བཙོངས་པར་ཤ་ཤེད་བཟང་བའི་བ་མོ་གཅིག་ལ་སྒོར་7000ནས་སྒོར་8000བར་རག་བྱུང་། གཞན་ད་དུང་ནག་ཆུ་དང་ལྷོ་ཁ་སོགས་ཀྱི་མི་མང་པོ་འདི་གར་ཆེད་མངགས་བཞོན་མ་དང་བེའུ་ཉོ་བར་ཡོང་གི་ཡོད”ཅེས་བརྗོད།

གསོ་ཚགས་ར་བའི་གཞི་ཁྱོན་ཟམ་མི་ཆད་པར་ཆེ་རུ་ཕྱིན་པ་དང་བསྟུན་ཏེ། 2020ལོ་ནས་བཟུང་མཉམ་ལས་ཁང་གིས་ཉེ་འཁོར་གྱི་ཀླུ་ཆུ་གྲོང་ཚོ་དང་། གཉེར་ཁང་གྲོང་ཚོ། བྲག་ནུབ་གྲོང་ཚོ། སྤེལ་དམར་གྲོང་ཚོ་བཅས་དང་གན་རྒྱ་བཞག་ནས་རྩྭ་ར་མུའུ་900ལྷག་ཙམ་ཉོ་བསྡུ་བྱས་ཏེ་གཟན་རྩྭ་མཁོ་སྤྲོད་འགན་ལེན་ཐུབ་པ་དང་། ཐོན་སྐྱེད་མ་གནས་དམའ་རུ་གཏོང་བ། ཞིང་ལས་ཐོན་རྫས་ཀྱི་སྤུས་ཀར་འགན་ལེན་བཅས་བྱས་ཡོད།

མིག་སྔར་རྟ་ར་གསོ་ཚགས་ཞིང་པའི་ཆེད་ལས་མཉམ་ལས་ཁང་གིས་གཙོ་བོ་བེའུ་འཚོང་བཞིན་ཡོད་ཅིང་། རྒྱུད་བཟང་བ་ཕྱུགས་མགོ་གྲངས་220ཟིན་པའི་ནང་བེའུ་70ལྷག་ཙམ་ཡོད་པ་དང་། གཞན་ཡང་། མཉམ་ལས་ཁང་གིས་ད་དུང་ཡིག་ཚགས་དང་གཱ་བཟོས་པའི་དུད་ཚང་4ཡི་ཡུལ་མིར་ལས་ཀ་བཀོད་སྒྲིག་བྱས་ནས། ཟླ་བ་མི་རེ་ངོ་རེར་གླ་ཕོགས་སྒོར་3000སྤྲོད་ཀྱི་ཡོད་པར་ཁོང་ཚོ་ཁྱིམ་གྱི་སྒོ་རྩར་ལས་ཞུགས་ཐུབ་ཡོད་པ་རེད།

ཤེས་རྟོགས་བྱུང་བར་གཞིགས་ན། 2020ལོར་རྟ་ར་གསོ་ཚགས་ཞིང་པའི་ཆེད་ལས་མཉམ་ལས་ཁང་ལ་ཡོང་འབབ་བསྡོམས་འབོར་སྒོར་ཁྲི་63ཟིན་པའི་ནང་ཡོང་འབབ་ཁེ་གཙང་སྒོར་ཁྲི་38ཟིན་པ་དང་། མང་ཚོགས་ལ་ཁེ་འབབ་སྒོར་ཁྲི་24.4བགོས་པ་རེད། 2021ལོར་ཡོང་འབབ་སྒོར་ཁྲི་106.92ཟིན་པའི་ནང་ཡོང་འབབ་ཁེ་གཙང་སྒོར་ཁྲི་71ཟིན་པ་དང་། མང་ཚོགས་ལ་སྒོར་ཁྲི་57.7587བགོ་འགྲེམས་བྱས་པ་རེད། བསྟན་དར་གྱིས“མིག་སྔའི་འཆར་གཞི་ལྟར་ན་བེའུ་100ལྷག་ཙམ་བཙོངས་ནས་མང་ཚོགས་ལ་བགོ་འགྲེམས་དེ་བས་མང་བ་རག་ཐུབ་པའི་སེམས་ཤུགས་ཡོད”ཅེས་བརྗོད།

ཏང་དང་རྒྱལ་ཁབ་ཀྱི་དམངས་ཕན་སྲིད་ཇུས་ཀྱི་རྒྱབ་སྐྱོར་འོག ད་ཆ་མཉམ་ལས་ཁང་འཕེལ་རྒྱས་བརྟན་པོ་དང་། གྲོང་ཚོའི་མཉམ་སྡེབ་དཔལ་འབྱོར་གྱི་ཡོང་འབབ་བརྟན་པོ་འཕར་བ་དང་ཆབས་ཅིག ཡུལ་མི་མང་པོ་རང་ཁྱིམ་གྱི་སྒོ་འགྲམ་དུ་ལས་ཞུགས་ཐུབ་པའི་འདུན་པ་ཡང་མངོན་འགྱུར་བྱུང་ཡོད་ལ། མང་ཚོགས་ཀྱི་ཡོང་འབབ་མང་དུ་ཕྱིན་པ་དང་བསྟུན་ནས་ཁོང་ཚོའི་ཐོབ་སྣང་དང་སྐྱིད་སྣང་ཡང་དེ་བས་ཇེ་ཆེར་ཕྱིན་ཡོད་པས། རྐང་བཞི་གྲོང་ཚོ་ནི་ཕྱུག་པོ་གཞུང་ཤང་ཙམ་མ་ཟད་བསམ་གྲུབ་རྩེ་ཆུས་ཁོངས་ཀྱི་གྲོང་གསེབ་དར་རྒྱས་གཏོང་བའི་ལམ་བུའི་ཐོག་གི་དཔེ་མཚོན་ཞིག་ཏུ་གྱུར་ཡོད།