འདི་ནི་ཀྲུང་ཨེ·ཐའེ་ཏ་སུའུ་དབྱི་ཧྲི་དཔལ་འབྱོར་ཚོང་དོན་མཉམ་ལས་ཁུལ་གྱི་གཞུང་སྒོ་ཡིན་པ།

འདི་ནི་ཙན་པི་ཡའི་ཆན་པི་ཤིས་ཟངས་གཏེར་དུ་ཙན་པི་ཡ་ཕྱོགས་ཀྱི་ལས་མིས་ཁྲོན་པའི་འོག་གི་གཏེར་འདོན་སྒྲིག་ཆས་རྒྱང་ནས་ཚོད་འཛིན་གྱིས་ཐོན་སྐྱེད་བྱེད་བཞིན་པ། ཀྲུང་གོ་མདོག་ལྡན་གཏེར་ལས་ཨ་ཧྥེ་རི་ཁ་གཏེར་ལས་ཚད་ཡོད་ཀུང་སིས་པར་རིས་མཁོ་འདོན་བྱས་པ། (ཤིན་ཧྭ་གསར་འགྱུར་ཁང་ནས་སྤེལ་གཏོང་བྱས་པ)

2015ལོའི་ཀྲུང་ཧྥེའི་མཉམ་ལས་གླེང་སྟེགས་གཡོད་ཧན་ནེ་སི་པའོ་དབུ་ཚོགས་ནས་2018ལོའི་ཀྲུང་ཧྥེའི་མཉམ་ལས་གླེང་སྟེགས་པེ་ཅིང་དབུ་ཚོགས་བར་དང་། 2021ལོའི་ཀྲུང་ཧྥེའི་མཉམ་ལས་གླེང་སྟེགས་སྐབས་བརྒྱད་པའི་པུའུ་ཀྲང་རིམ་པའི་ཚོགས་འདུ་ནས་2023ལོའི་ཀྲུང་ཧྥེའི་འགོ་ཁྲིད་པའི་གླེང་མོལ་ཚོགས་འདུའི་བར་ལ། ཨ་ཧྥེ་རི་ཁའི་བཟོ་ལས་ཅན་ལ་རྒྱབ་སྐྱོར་དང་ལག་གདང་སྦྲེལ་ནས་དེང་རབས་ཅན་གྱི་ལམ་བུར་སྐྱོད་པ་ནི་ཀྲུང་ཧྥེའི་མཉམ་ལས་ཀྱི་དམིགས་ཚད་དང་ཁ་ཕྱོགས་གལ་ཆེན་ཞིག་རེད།

ཀྲུང་ཧྥེའི་མཉམ་ལས་གླེང་སྟེགས་བཙུགས་པ་ནས་བཟུང་ཀྲུང་གོའི་ཁེ་ལས་ཀྱིས་ཨ་ཧྥེ་རི་ཁར་ལྕགས་ལམ་སྤྱི་ལེ་ཁྲི་1ལྷག་ཙམ་དང་། གཞུང་ལམ་སྤྱི་ལེ་ཁྲི་10ཙམ། ཟམ་པ་1000ཙམ། གྲུ་ཁ་100ཙམ། གློག་འདྲེན་གློག་སྐུད་སྤྱི་ལེ་ཁྲི་6.6 འཕྲིན་གཏོང་རྐང་འཛིན་དྲ་བ་སྤྱི་ལེ་ཁྲི་15བཅས་གསར་བཟོ་དང་རིམ་སྤོར་བྱས་ཤིང་། དྲ་རྒྱའི་ཞབས་ཞུ་སྤྱོད་མཁན་དུང་ཕྱུར་7ཙམ་ལ་ཁྱབ་ཡོད།

རྒྱ་མཚོ་དམར་པོའི་འགྲམ་ངོགས་དང་སུའུ་དབྱི་ཧྲི་མིས་བཟོས་གཙང་པོའི་ལྷོ་ཕྱོགས་སུ་ཀྲུང་ཨེ·ཐའེ་ཏ་སུའུ་དབྱི་ཧྲི་དཔལ་འབྱོར་ཚོང་དོན་མཉམ་ལས་ཁུལ་དུ་སྐྱེ་སྟོབས་ཀྱི་དཔལ་འབར་བཞིན་ཡོད། དེ་ནི་ཨེ་ཅིབ་ཀྱི་ཕྱོགས་བསྡུས་ཁོར་ཡུག་ཡག་ཤོས་དང་། མ་འཇོག་འདུས་ཚད་མཐོ་ཤོས། རྩིས་གཞིའི་ཐོན་འབོར་མང་ཤོས། ཀྲུང་གོས་མ་འཇོག་བྱས་པའི་ཁེ་ལས་གཅིག་སྡུད་ཆེ་ཤོས་བཅས་ཀྱི་བཟོ་ལས་ཁུལ་ཞིག་རེད། ཁེ་ལས་140ལྷག་ཙམ་དེ་གར་རྩ་བ་ཚུགས་ཤིང་། རིམ་རྩིས་བྱས་ན་ཕྱིར་ཚོང་བྱེད་ཚད་ཨ་སྒོར་དུང་ཕྱུར་37ལས་བརྒལ་བ་དང་། འཇལ་བའི་ཁྲལ་དངུལ་ཨ་སྒོར་དུང་ཕྱུར་2ལས་བརྒལ་བ། མི་6000ཙམ་ཐད་ཀར་ལས་ཞུགས་ཐུབ་པ། མི་ཁྲི་5ཙམ་ལས་ཞུགས་ཡོང་བར་སྐུལ་ཁྲིད་ཐུབ་ཡོད།

གྲངས་གཞི་ལས་མངོན་པར། 2023ལོའི་ལོ་མཇུག་བར་ཀྲུང་གོས་ཨ་ཧྥེ་རི་ཁར་ཐད་ཀར་མ་འཇོག་བྱེད་ཚད་ཨ་སྒོར་དུང་ཕྱུར་400ལྷག་ཙམ་ཟིན་པ་ནི་ཨ་ཧྥེ་རི་ཁའི་ཕྱི་དངུལ་ཡོང་ཁུངས་ཀྱི་རྒྱལ་ཁབ་གཙོ་ཆེ་ཤོས་ཀྱི་གྲས་ཤིག་རེད། འདས་ཟིན་པའི་ལོ་གསུམ་ནང་ཀྲུང་གོའི་ཁེ་ལས་ཀྱིས་ས་གནས་དེ་གར་ལས་ཞུགས་ལས་གནས་ཁྲི་110ལྷག་ཙམ་མཁོ་འདོན་བྱས་ཤིང་། མ་དངུལ་བཏང་ནས་བསྐྲུན་པའི་དཔལ་འབྱོར་ཚོང་དོན་མཉམ་ལས་ཁུལ་གྱི་གྲས་སུ་ཞིང་ལས་དང་། ལས་སྣོན་བཟོ་སྐྲུན། ཚོང་དོན་ཟོག་འགྲེམས་སོགས་ལས་རིགས་ཡོད་པ་དག་གིས་ཁེ་ལས་ཆིག་སྟོང་ལྷག་ཙམ་ཁུལ་དུ་ཞུགས་རྒྱུའི་ཡིད་དབང་བཀུག་ཡོད་པས། ས་གནས་དེ་གའི་ཁྲལ་འཇལ་འབབ་འཕར་དང་ཕྱིར་གཏོང་གི་ཕྱི་དངུལ་གཙང་ལེན་ཐད་ལེགས་སྐྱེས་གལ་ཆེན་ཕུལ་ཡོད།

ཀྲུང་གོས་ཨ་ཧྥེ་རི་ཁའི་རྒྱལ་ཁབ་15དང་ཐོན་ནུས་མཉམ་ལས་ཀྱི་ལམ་སྲོལ་བཙུགས་པ་དང་ཨ་ཧྥེ་རི་ཁའི་རྒྱལ་ཁབ་དང་མཉམ་ལས་བྱས་ནས་བཟོ་ལས་ཐོན་ལས་ཁུལ་20ལྷག་ཙམ་བསྐྲུན་ཡོད། ཀྲུང་གོ་ཕྱོགས་མ་འཇོག་ནང་ཞུགས་པའི་མཉམ་ལས་ཁུལ་གྱིས “ཚང་སྐྲུན་བྱ་འགུག”བྱས་ཏེ་ཐོན་ལས་ཁྱུ་ཚོགས་ཀྱི་ཡིད་དབང་མགྱོགས་མྱུར་བཀུག་པ་དང་གཞི་ཁྱོན་གྱི་ལེགས་ཆ་ཆགས་པར་བྱས་ནས། ཨ་ཧྥེ་རི་ཁའི་རྒྱལ་ཁབ་ཀྱི་བཟོ་སྐྲུན་ལས་རིགས་འཕེལ་རྒྱས་ལ་སྐུལ་ཁྲིད་བྱས་པ་དང་ས་གནས་དེ་གའི་བཟོ་ལས་ཅན་གྱི་འཕེལ་རིམ་མགྱོགས་སུ་བཏང་ཡོད།

ཙན་པི་ཡའི་ཆན་པི་ཤིས་ཟངས་གཏེར་གྱི་གཏེར་གདོས་ཤར་ལྷོའི་ཐོན་སྐྱེད་གྲངས་འཛིན་དོ་དམ་ཚོད་འཛིན་ལྟེ་གནས་ཀྱི་བརྙན་ཤེལ་ཆེན་པོ་ནས་གཏེར་ཁ་རྐོ་བ་དང་། སྔོག་པ། འདོན་པ། འདྲེན་པ་སོགས་ཀྱི་ཐོན་སྐྱེད་ལྷུ་ཚིགས་ཁག་གི་གནས་ཚུལ་གསལ་པོར་མཐོང་ཐུབ་ཅིང་། ཁྲོན་པའི་ནང་དུ་མ་འཛུལ་ནའང་ས་ངོས་ཀྱི་ལས་དོན་པས་ཁྲོན་པའི་ནང་གི་གནས་ཚུལ་གསལ་པོ་ཤེས་ཀྱི་ཡོད།

ཆན་པི་ཤིས་ཟངས་གཏེར་གྱི་གྲངས་འཛིན་ཅན་གྱི་ཕྱོགས་སྒྱུར་དེ་ནི་ཀྲུང་ཧྥེའི་མཉམ་ལས་ཀྱི་མངོན་མེད་སྟོབས་ཤུགས་སྔོག་འདོན་དང་བཟོ་ལས་ཅན་གྱི་ནུས་པ་སྐྱེད་པའི་གསོན་ཉམས་ལྡན་པའི་མཚོན་ཚུལ་ཞིག་རེད། ཉེ་བའི་ལོ་ཤས་རིང་ཀྲུང་ཧྥེ་ཕྱོགས་གཉིས་པོའི་མཉམ་ལས་དེ་གྲངས་འཛིན་དང་། ལྗང་མདོག མཁའ་འགྲུལ་དང་འཇིག་རྟེན་འཕུར་སྐྱོད། དངུལ་རྩ་སོགས་གསར་དར་ཁྱབ་ཁོངས་སུ་ཁྱབ་ནས། ཨ་ཧྥེ་རི་ཁའི་བཟོ་ལས་ཅན་གྱི་འཕེལ་རིམ་དང་དཔལ་འབྱོར་སྣེ་མང་ཅན་གྱི་འཕེལ་རྒྱས་ལ་སྐུལ་འདེད་གཏོང་བར་སྒུལ་ཤུགས་གསར་པ་སྣོན་ཐུབ་ཡོད།

སི་ར་ལ་ཨོང་མཱ་ཁོ་ཉི་སློབ་ཆེན་ཀྲུང་ཧྥེའི་ཞིབ་འཇུག་ཁང་གི་ཡོན་ཀྲང་ཨར་ཧྥ·མོ་ཧན་མོ་ཏེ·ཅཱ་ལུའོ་ཡིས། ཀྲུང་གོའི་ལུགས་ཀྱི་དེང་རབས་ཅན་གྱིས་རྒྱུན་མཐུད་སྐུལ་འདེད་གཏོང་བ་དང་ཨ་ཧྥེ་རི་ཁ་འཕེལ་རྒྱས་མགྱོགས་སུ་ཕྱིན་པའི་རྒྱབ་ལྗོངས་འོག་ཨ་ཧྥེ་རི་ཁ་དང་ཀྲུང་གོའི་མཉམ་ལས་ནི་མ་བྱས་ཐབས་མེད་ཅིག་རེད། ཧྥེ་ཀྲུང་གི་རོགས་ཟླའི་འབྲེལ་བ་ལས་དཔལ་འབྱོར་འཕར་བར་སྐུལ་འདེད་ཐེབས་པ་དང་དབུལ་པོ་ཉུང་དུ་སོང་ནས་ཨ་ཧྥེ་རི་ཁའི་དམངས་ཚོགས་ཀྱི་འཚོ་བའི་ཆུ་ཚད་མཐོ་རུ་གཏོང་ཐུབ་རྒྱུ་རེད་ཅེས་བཤད།