ཉེ་ཆར། ཉིང་ཁྲི་གྲོང་ཁྱེར་མཐོ་རིམ་ལག་ཤེས་སློབ་གྲྭའི་འབུར་རིས་སྒྱུ་རྩལ་གསོ་སྦྱོང་སློབ་ཚན་ཐོག་ཧྭ་ནན་ཞིང་ལས་སློབ་ཆེན་ནས་ཡོང་བའི་དགེ་རྒན་གྱིས་ཚང་མར་འབུར་རིས་ཀྱི་འབྲེལ་ཡོད་ཤེས་བྱ་འགྲེལ་བཤད་ནན་ཏན་བརྒྱབ་ཅིང་། དགེ་རྒན་གྱི་མཛུབ་ཁྲིད་འོག་སློབ་མ་ཚོས་བློ་རྩེ་གཅིག་སྒྲིམས་ཀྱིས་དཔེ་འཛར་འབུར་རིས་མ་དང་སྟེགས་སྒྲོན་སོགས་བཟོས་པ་རེད།

“ཉེ་བའི་ལོ་ཤས་རིང་། ང་ཚོའི་སློབ་གྲྭས་ལྗོངས་ཡོངས་ཀྱི་ཐོན་ལས་འཕེལ་རྒྱས་ཀྱི་དགོས་མཁོར་དམ་པོར་དམིགས་ནས་ལྕགས་ལམ་འགྲུལ་སྐྱེལ་ཞབས་ཞུ་དང་། ལྕགས་ལམ་ཨར་ལས་དང་བདག་སྐྱོང་། རྩིས་འཁོར་བརྡ་ཁྱབ་བཟོ་སྐྲུན། དྲ་ཐོག་ཚོང་དོན་སོགས་ཆེད་ལས་ཆེ་གྲས་8བཙུགས་པས་འགྲིམ་འགྲུལ་རྨང་གཞིའི་འཛུགས་སྐྲུན་རིགས་ཀྱི་ཆེད་ལས་གཙོ་བོར་བྱེད་པ་དང་ཡུལ་སྐོར་རིག་གནས་དང་དེང་རབས་ཞབས་ཞུའི་ཆེད་ལས་གཤོག་ཟུང་དུ་བྱེད་པའི་ཆེད་ལས་ཀྱི་རྣམ་པ་ཞིག་ཆགས་ཏེ། སློབ་ཡུན་སློབ་གསོ་དང་རྩལ་ནུས་གསོ་སྦྱོང་རེས་འཁོར་གཉིས་ཀྱི་སྐུལ་འདེད་མཐའ་འཁྱོངས་ཀྱིས་སློབ་གྲྭ་དང་ཁེ་ལས་དབར་གྱི་མཉམ་ལས་ཟབ་ཏུ་བཏང་ནས་བོད་ལྗོངས་ལག་ཤེས་སློབ་གསོ་གསར་གཏོད་འཕེལ་རྒྱས་ཀྱི་སློབ་གྲྭ་དང‘ས་མཐོའི་བཟོ་བོ’གསོ་སྐྱོང་དཔེ་སྟོན་སློབ་གྲྭ་གཏོད་རྒྱུར་གཞོལ་ཡོད”ཅེས་ཉིང་ཁྲི་གྲོང་ཁྱེར་མཐོ་རིམ་ལག་ཤེས་སློབ་གྲྭའི་སློབ་སྤྱི་ཀྲོའུ་ཁྲའོ་ཡིས་ངོ་སྤྲོད་བྱས།

2024ལོ་ནས་བཟུང་། ཉིང་ཁྲི་གྲོང་ཁྱེར་མཐོ་རིམ་ལག་ཤེས་སློབ་གྲྭས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དགོས་མཁོར་དམ་པོར་དམིགས་ནས་རྩལ་ནུས་གསོ་སྦྱོང་གཞི་རྟེན་དུ་བྱས་ཏེ། ལས་རིགས་རྩལ་ནུས་གསོ་སྦྱོང་དེ་ལས་གནས་བརྟན་པོར་ལས་ཞུགས་དང་གྲོང་གསེབ་དར་རྒྱས་ལ་རམ་འདེགས་བྱེད་པའི་དམ་འཛིན་བྱ་གཞི་གཙོ་བོར་བརྩིས་པ་དང་། རྩལ་ནུས་ཁོང་དུ་ཆུད་པ་དང་འབབ་འཕར་ཕྱུག་འགྱུར་བྱེད་པ་དེ་ལས་རིགས་རྩལ་ནུས་གསོ་སྦྱོང་གི་འགོ་འཛུགས་ས་དང་དོན་ལ་བབས་སར་བརྩིས་ནས་སྤུས་ཚད་མཐོ་བའི་རྩལ་ནུས་གསོ་སྦྱོང་བརྒྱུད། གྲོང་ཁྱེར་ཡོངས་དང་ལྗོངས་ཡོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ལག་རྩལ་ཤེས་པ་དང་གནས་ཐུབ་པའི་རྩལ་ནུས་ཤེས་ལྡན་པ་གསོ་སྐྱོང་བྱས་ཡོད། “སློབ་གྲྭ་བཙུགས་པ་ནས་བཟུང་གྲོང་ཁྱེར་དང་གྲོང་གསེབ་ཀྱི་ངལ་རྩོལ་པ་དང་ལས་ཞུགས་ཐུབ་མེད་པའི་མཐོ་སློབ་སློབ་ཐོན་སློབ་མར་ཕྱོགས་ནས་ལས་རིགས་རྩལ་ནུས་གསོ་སྦྱོང་སྣ་ཚོགས་ཐེངས་23བྱས་ཏེ་སློབ་མ་མི་ཐེངས་1361ལ་གསོ་སྦྱོང་བྱས་ཡོད”ཅེས་ཉིང་ཁྲི་གྲོང་ཁྱེར་མཐོ་རིམ་ལག་ཤེས་སློབ་གྲྭའི་སློབ་བསྡུ་ལས་ཞུགས་དང་གསོ་སྦྱོང་ཁོའོ་ཡི་འགན་འཁུར་བ་ཕེང་ཤིན་གཡོད་ཀྱིས་ངོ་སྤྲོད་བྱས།

སློབ་གྲྭའི་དགེ་སློབ་ཚོའི་ཆེད་ལས་ཀྱི་རྩལ་ནུས་དང་ལག་ལེན་གྱི་ནུས་པ་དང་མཐོང་རྒྱ་སྔར་བས་ཆེ་རུ་གཏོང་ཆེད། ཉིང་ཁྲི་གྲོང་ཁྱེར་མཐོ་རིམ་ལག་ཤེས་སློབ་གྲྭས་ཀོང་ཏུང་གི་རྩལ་ནུས་བོད་སྐྱོར་གྱི་ལེགས་ཆར་བརྟེན་ནས་ཆེད་ལས་དགེ་རྒན་2དང་སློབ་མ་30སྒྲིག་འཛུགས་བྱས་ཏེ་ཀོང་ཀྲོའུ་རུ་བསྐྱོད་ནས“ཀོང་བོད་ཀྱི་ལག་ཤེས་སློབ་གསོའི་སྤེལ་རེས་བྱེད་སྒོ”སྤེལ་ཞིང་། དགེ་སློབ་ཚོས་ཀོང་ཀྲོའུ་གྲོང་ཁྱེར་བཟོ་ཚོང་ལག་ཤེས་པའི་སློབ་གླིང་དང་ཀོང་ཏུང་ཞིང་ཆེན་ལས་རྨས་ལུས་གསོ་ལྟེ་གནས་སུ་དུས་ཡུན་ཉིན་30ཡི་གསོ་སྦྱོང་དང་སློབ་སྦྱོང་བྱས་ནས་ཆེད་ལས་རྩལ་ནུས་ཤེས་བྱ་སྦྱངས་པ་མ་ཟད། ཚང་མས་རང་སོ་སོའི་སྲོལ་རྒྱུན་རིག་གནས་དང་ཡུལ་སྲོལ་གོམས་གཤིས་སྐོར་སྤེལ་རེས་བྱས་ནས་མི་རིགས་མཐུན་སྒྲིལ་དང་འགྲོ་འོང་སྤེལ་རེས་མཉམ་འདྲེས་ལ་སྐུལ་འདེད་བཏང་བ་དང་ཉིང་ཁྲི་དང་ཀོང་ཏུང་ས་གནས་གཉིས་ཀྱི་མཛའ་གྲོགས་ཟབ་ཏུ་བཏང་བ་རེད།

ལས་ཐོག་དངོས་སྦྱོང་དང་སློབ་མའི་ལས་ཞུགས་ལས་དོན་ལ་སྐུལ་འདེད་ཏན་ཏིག་གཏོང་བར་སློབ་གྲྭ་དང་འབྲེལ་ཡོད་ཁེ་ལས་མང་པོ་འབྲེལ་མཐུད་ཧུར་ཐག་བྱས་ཡོད། འདི་ལོའི་ཟླ་6པ་ནས་བཟུང་2021ལོའི་གཞུང་ལམ་ཨར་ལས་དང་བདག་སྐྱོང་དང་། དྲ་ཐོག་ཚོང་དོན། གསོལ་མགྲོན་ཁང་དོ་དམ་དང་ཡུལ་སྐོར། དེ་བཞིན་ལྕགས་ལམ་འགྲུལ་སྐྱེལ་ཞབས་ཞུ་བཅས་ཆེད་ལས་ཀྱི་སློབ་མ་115ཡི་ཁྲོད་ལས་ཐོག་དངོས་སྦྱོང་བྱེད་མཁན་སློབ་མ་98ཡོད་པས་ལས་ཐོག་དངོས་སྦྱོང་བྱེད་ཚད་85%ཙམ་ཟིན་ཡོད་པ་དང་། 2022ལོའི་སློབ་མ་358ཀྱི་ནང་ནས་163ལས་ཐོག་དངོས་སྦྱོང་བྱས་ཟིན་པ་རེད། དེ་དང་ཆབས་ཅིག་2023ལོའི་ཟླ་6པ་ནས་བཟུང་2021ལོའི་ཆེད་ལས་4ཡི་སློབ་མ་115སྔ་རྗེས་སུ་ལས་ཞུགས་ཐུབ་པ་དང་མིག་སྔའི་བར་ལས་ཞུགས་ཐུབ་པའི་སློབ་མ་ཁྱོན་98ཡོད་པ་དང་ལས་ཞུགས་ཐུབ་ཚད་85%ཐོག་མར་ཟིན་ཡོད་པ་རེད། སློབ་མའི་ཆེད་ལས་རྩལ་ནུས་སྔར་བས་ཆེ་རུ་གཏོང་བ་དང་ལས་ཞུགས་ཐུབ་ཚད་མཐོ་རུ་གཏོང་ཆེད། སློབ་གྲྭས་ད་ཆ་ཀོང་ཀྲོའུ་གྲོང་ཁྱེར་གྱི་ཡང་བའི་བཟོ་ལས་ལག་ཤེས་པའི་སློབ་གླིང་དང་ཀོང་ཀྲོའུ་གྲོང་ཁྱེར་གྱི་བཟོ་ཚོང་ལག་ཤེས་པའི་སློབ་གླིང་དང་སློབ་གྲྭ་དང་སློབ་གྲྭའི་དབར་མཉམ་ལས་ཀྱི་གྲོས་མཐུན་བཞག་པ་དང་། བོད་ལྗོངས་ཀོང་ཀྲོའུ་སྨན་རྫས་ཧན་ཧྥང་ཀོ་ཤ་ཐོན་ལས་ཚད་ཡོད་ཀུང་སི་དང་སློབ་གྲྭ་དང་ཁེ་ལས་དབར་གྱི་མཉམ་ལས་ཀྱི་གྲོས་མཐུན་བཞག་པ་རེད།

ཀྲོའུ་ཁྲའོ་ཡིས“སློབ་གྲྭར་ད་ཆ་དྲ་ཐོག་ཚོང་དོན་དང་། འཕྲུལ་ཆས་སྒྲིག་ཆས་ཉམས་གསོ། མགྲོན་ཁང་ཞབས་ཞུ། བདེ་ཐང་ལྟ་སྐྱོང་སོགས་དངོས་སྦྱོང་ཁང་16བཙུགས་ཡོད། 2024ལོའི་སྟོན་དུས་སུ་དེ་སྔའི་ཆེད་ལས་ཀྱི་རྨང་གཞིའི་ཐོག་གྲངས་འཛིན་སྨྱན་སྦྱོར་ལག་རྩལ་བཀོལ་སྤྱོད་དང་། མི་མེད་གནམ་གྲུ་བཀོལ་སྤྱོད་ལག་རྩལ། འཕྲུལ་གློག་གཞི་གཅིག་ཅན། རླངས་འཁོར་ཉམས་བཟོའི་ཆེད་ལས་བཅས་གསར་དུ་བཙུགས་ནས་སློབ་མ་520བསྡུ་རྩིས་ཡོད་པ་རེད། གོམ་སྟབས་རྗེས་མར་ང་ཚོས་མུ་མཐུད་འབད་བརྩོན་བྱས་ནས་ཆེད་ལས་རྩལ་ནུས་ཤེས་ལྡན་པ་དེ་བས་མང་བ་གསོ་སྐྱོང་བྱེད་ཀྱི་ཡིན”ཞེས་བཤད།