ཉེ་བའི་ལོ་ཤས་རིང་། འབྲེལ་ཡོད་ལག་རྩལ་མཐོ་རུ་ཕྱིན་པ་དང་བསྟུན་ནས་ནུས་རྒྱུ་གསར་པའི་རླངས་འཁོར་གྱི་བྱེད་ནུས་དང་འགྲོ་སྐྱོད་ལམ་ཐག་སོགས་མངོན་གསལ་དོད་པོས་རིང་དུ་ཕྱིན་པ་དང་ནུས་རྒྱུ་གསར་པའི་རླངས་འཁོར་ཉོ་མཁན་འཛད་སྤྱོད་པ་རྒྱུན་ཆད་མེད་པར་མང་དུ་ཕྱིན་པ་མ་ཟད། ལྷག་པར་དུ་ནུས་རྒྱུ་གསར་པའི་རླངས་འཁོར་ལ་ཁ་གསབ་བྱེད་ཤུགས་ཆེ་རུ་གཏོང་བ་དང་གློག་གསོག་གི་རྨང་གཞིའི་སྒྲིག་བཀོད་སྐྲུན་མགྱོགས་སུ་གཏོང་བ་སོགས་ནུས་རྒྱུ་གསར་པའི་རླངས་འཁོར་འཛད་སྤྱོད་ལ་སྐུལ་འདེད་གཏོང་བའི་སྲིད་ཇུས་རབ་དང་རིམ་པ་བཏོན་ནས། ནུས་རྒྱུ་གསར་པའི་རླངས་འཁོར་ཁྲོམ་རར་ཁྱབ་གདལ་གཏོང་བར་ཆ་རྐྱེན་བསྐྲུན་པས་ལྗོངས་ཡོངས་སུ་ནུས་རྒྱུ་གསར་པའི་རླངས་འཁོར་ཁྲོམ་ར་འཕེལ་རྒྱས་ཀྱི་མགྱོགས་ལམ་དུ་རིམ་པས་སྐྱོད་བཞིན་ཡོད་པ་རེད།

གསར་འགོད་པས་རང་སྐྱོང་ལྗོངས་ཚོང་དོན་ཐིང་ནས་ཤེས་རྟོགས་བྱས་པར། མིག་སྔར་རང་ལྗོངས་ཀྱི་ནུས་རྒྱུ་གསར་པའི་རླངས་འཁོར་ཕྱིར་ཚོང་བྱེད་ཚད་མངོན་གསལ་དོད་པོས་འཕར་བའི་རྣམ་པ་མངོན་ཡོད། ནུས་རྒྱུ་གསར་པའི་རླངས་འཁོར་ཉོ་སྒྲུབ་ཀྱི་དཔྱ་ཁྲལ་ཆག་ཡང་དང་རྩ་ཆག་གཏོང་རྒྱུའི་སྐོར་གྱི་རྒྱལ་ཁབ་ཀྱི་སྲིད་ཇུས་ཁ་གསལ་བཟོས་ནས་ཉོ་སྒྲུབ་དུས་ཚོད་2024ལོའི་ཟླ་1ཚེས་1ཉིན་ནས་2025ལོའི་ཟླ་12ཚེས་31ཉིན་བར་ཉོས་པའི་ནུས་རྒྱུ་གསར་པའི་རླངས་འཁོར་ལ་དཔྱ་ཁྲལ་སྤྲོད་དགོས་མེད་པ་རེད། དེའི་ནང་ནུས་རྒྱུ་གསར་པའི་རླངས་འཁོར་རེར་དཔྱ་ཁྲལ་རྩ་ཆག་གཏོང་བའི་དངུལ་གྲངས་སྒོར་ཁྲི་3ནས་བརྒལ་མི་ཆོག་པ་དང་། 2026ལོའི་ཟླ་1ཚེས་1ཉིན་ནས་2027ལོའི་ཟླ་12ཚེས་31ཉིན་བར་ཉོས་པའི་ནུས་རྒྱུ་གསར་པའི་རླངས་འཁོར་ལ་ཉོ་སྒྲུབ་དཔྱ་ཁྲལ་ཕྱེད་ཀ་གཅོག་རྒྱུ་རེད། དེའི་ནང་ནུས་རྒྱུ་གསར་པའི་རླངས་འཁོར་རེར་དཔྱ་ཁྲལ་ཆག་ཡང་གཏོང་བའི་དངུལ་གྲངས་སྒོར་ཁྲི་1.5མི་བརྒལ་མི་ཆོག ཉོ་སྒྲུབ་དཔྱ་ཁྲལ་ཆག་ཡང་དང་རྩ་ཆག་གཏོང་བ་དང་རླངས་འཁོར་རྙིང་པ་གསར་བརྗེས་ཁ་གསབ་སོགས་ཀྱི་སྲིད་ཇུས་ཕུད། རང་ལྗོངས་ཀྱི་རླངས་འཁོར་བརྒྱུད་ཚོང་ཚོང་པ་ཆེ་གྲས་ཁག་གིས་ཀྱང་གཅིག་རྗེས་གཉིས་མཐུད་ངང་བྲིན་ཚོང་གི་བྱེད་ཐབས་སྣ་ཚོགས་སྤྱད་པས་འཛད་སྤྱོད་པའི་རླངས་འཁོར་ཉོ་བའི་སེམས་ཤུགས་ཆེ་རུ་ཕྱིན་ཡོད། ཉེ་དུས་གྲོང་ཁྱེར་དང་ས་ཁུལ་ཁག་གི་རླངས་འཁོར་རྙིང་པ་གསར་པར་བརྗེ་བའི་བྱེད་སྒོ་གཅིག་རྗེས་གཉིས་མཐུད་ངང་སྤེལ་འགོ་ཚུགས་ཡོད།

སྤྱི་བདེ་འགྲིམ་འགྲུལ་དོ་དམ་ཕྱོགས་བསྡུས་བཀོལ་སྤྱོད་ལས་སྟེགས་ཀྱི་གྲངས་གཞི་ལས་མངོན་པར། ཟླ་དྲུག་པའི་ཟླ་མཇུག་བར་ལྗོངས་ཡོངས་སུ་ནུས་རྒྱུ་གསར་པའི་རླངས་འཁོར་10799ཟིན་ནས་ཐེངས་དང་པོར་ཁྲི་ལྷག་ཙམ་ཟིན་ཡོད། ཟླ་དང་པོ་ནས་དྲུག་པའི་བར་ལྗོངས་ཡོངས་སུ་གསར་དུ་ཐོ་འགོད་བྱས་པའི་འཕྲུལ་སྒུལ་འཁོར་རིགས་63222ཟིན་ནས་དུས་མཚུངས་ལས་4.6%འཕར་བ་དང་འཕར་ཚད་དུས་ཚིགས་དང་པོ་ལས་བརྒྱ་ཆའི་གྲངས་6.5འཕར་ཡོད། དེའི་ནང་གསར་དུ་ཐོ་འགོད་བྱས་པའི་ནུས་རྒྱུ་གསར་པའི་རླངས་འཁོར་4682ཟིན་ནས་དུས་མཚུངས་ལས་263.23%འཕར་ཡོད།

རང་སྐྱོང་ལྗོངས་ཚོང་དོན་ཐིང་འཛད་སྤྱོད་སྐུལ་འདེད་ཁྲུའུ་ཡི་ཁྲུའུ་ཀྲང་གཞོན་པ་དབྱང་ཀྲན་ཧུའེ་ཡིས་རང་ལྗོངས་ཀྱི་ནུས་རྒྱུ་གསར་པའི་རླངས་འཁོར་ཁྲོམ་ར་བདག་ཚད་2021ལོའི་2.3%ནས་24.4%བར་འཕར་ཡོད། མིག་སྔར་ལྗོངས་ཡོངས་སུ་རླངས་འཁོར་བྲིན་ཚོང་གི་ཨང་རིམ་དང་པོ་ནས་གསུམ་པའི་བར་གྱི་རླངས་འཁོར་ཚང་མ་ནི་ནུས་རྒྱུ་གསར་པའི་རླངས་འཁོར་ཡིན་པ་དང་ནུས་རྒྱུ་གསར་པའི་རླངས་འཁོར་དེ་རང་ལྗོངས་ཀྱི་རླངས་འཁོར་འཛད་སྤྱོད་འཕར་རྒྱུར་སྐུལ་ཁྲིད་བྱེད་པའི་སྒུལ་ཤུགས་གལ་ཆེན་ཞིག་ཏུ་གྱུར་ཡོད་ཅེས་ངོ་སྤྲོད་བྱས།

རང་རྒྱལ་གྱིས་ཐོན་སྐྱེད་བྱས་པའི་ནུས་རྒྱུ་གསར་པའི་རླངས་འཁོར་ལ་རྒྱལ་ནང་དུ་དགའ་བསུ་ཐོབ་པ་མ་ཟད། ཕྱི་རྒྱལ་གྱི་ཁྲོམ་རར་ཡང་བྲིན་ཁ་རྒྱུག་པོ་ཡོད། 2023ལོར་ནུས་རྒྱུ་གསར་པའི་རླངས་འཁོར་4867རང་ལྗོངས་ཀྱི་འགག་སྒོ་ནས་ནེ་པ་ལར་ཕྱིར་གཏོང་བྱས་པ་དང་། 2024ལོའི་དུས་ཚིགས་དང་པོར་རང་ལྗོངས་ཀྱི་འགག་སྒོ་ནས་ནེ་པ་ལར་རླངས་འཁོར་1623ཕྱིར་གཏོང་བྱས་ནས་དུས་མཚུངས་ལས་ལྡབ་6འཕར་ཡོད། རང་ལྗོངས་ཀྱི་འགག་སྒོ་ནས་ཕྱིར་གཏོང་བྱས་པའི་ནུས་རྒྱུ་གསར་པའི་རླངས་འཁོར་གཙོ་བོ་ནི་འཇིབ་ཆུང་རླངས་འཁོར་དང་། འགྲུལ་སྐྱེལ་རླངས་འཁོར་ཆུང་གྲས། ཟོག་འདྲེན་རླངས་འཁོར་ཆུང་གྲས། འགྲུལ་སྐྱེལ་རླངས་འཁོར་ཆེ་འབྲིང་བཅས་ཡིན་པ་དེའི་ནང་འཇིབ་ཆུང་རླངས་འཁོར་དང་འགྲུལ་སྐྱེལ་རླངས་འཁོར་ཆུང་གྲས་ཀྱིས་བཟུང་བའི་བསྡུར་ཚད་90%ཡན་ཟིན་ཡོད།

འདི་ལོའི་ཟླ་4ཚེས་26ཉིན་ཚོང་དོན་པུའུ་དང་ནོར་སྲིད་པུའུ་སོགས་སྡེ་ཚན་7གྱིས་མཉམ་དུ་བཀྲམ་པའི《རླངས་འཁོར་རྙིང་པ་གསར་པར་བརྗེ་བའི་ཁ་གསབ་ལག་བསྟར་ཞིབ་སྲོལ》ཕྱི་ཕྱོགས་སུ་ཁྱབ་བསྒྲགས་བྱས་ནས་རླངས་འཁོར་རྙིང་པ་གསར་པར་བརྗེ་བའི་མ་དངུལ་གྱི་ཁ་གསབ་སྲིད་ཇུས་ཁ་གསལ་བཏོན་ཡོད་པ་རེད། 《ཞིབ་སྲོལ》བཀྲམ་པའི་ཉིན་ནས་2024ལོའི་ཟླ་12ཚེས་31ཉིན་བར། རྒྱལ་ཁབ་ཀྱི་ཚད་གཞི་གསུམ་པ་དང་དེ་བཞིན་དེ་མན་གྱི་འབུད་སྐྱུར་ཚད་གཞིའི་སྣུམ་བླུག་རླངས་འཁོར་རམ་ཡང་ན་2018ལོའི་ཟླ་4ཚེས་30ཉིན་གོང་ཐོ་འགོད་བྱས་པའི་ནུས་རྒྱུ་གསར་པའི་རླངས་འཁོར་དང་དེ་བཞིན་ནུས་རྒྱུ་གྲོན་ཆུང་གི་བླང་བྱ་དང་མཐུན་པའི་རླངས་འཁོར་གསར་པ་ཉོ་མཁན་མི་སྒེར་གྱིས་ཐེངས་གཅིག་ལ་གྲངས་འབོར་ངེས་ཅན་གྱི་ཁ་གསབ་ལོངས་སུ་སྤྱོད་ཆོག་གི་ཡོད།

2023ལོར་ལྗོངས་ཡོངས་སུ་རླངས་འཁོར་རྙིང་པ་ཉོ་ཚོང་བྱེད་ཚད་50154ཟིན་པ་དེ་2022ལོ་དང་2021ལོ་ལས་41.7%དང་12.7%སོ་སོར་འཕར་ཡོད། ལྗོངས་ཡོངས་ཀྱི་རླངས་འཁོར་བདག་ཚད་མུ་མཐུད་འཕར་བ་མ་ཟད། མཁོ་མེད་དུ་བཏང་བའི་རླངས་འཁོར་གྱི་གྲངས་འབོར་ཡང་མངོན་གསལ་དོད་པོས་མང་དུ་འགྲོ་བའི་རྣམ་པ་མངོན་ཡོད།

དབྱང་ཀྲན་ཧུའེ་ཡིས་གོམ་སྟབས་རྗེས་མར་རང་ལྗོངས་ཀྱི་ཚོང་དོན་སྡེ་ཚན་གྱིས་སྐུལ་འདེད་ཀྱི་སྲིད་ཇུས་འདོན་པ་དང་རླངས་འཁོར་ཉོ་སྒྲུབ་ཀྱི་ཁ་གསབ་སྤྲོད་པ་སོགས་བྱས་ནས། རླངས་འཁོར་འཛད་སྤྱོད་དང་ལྷག་པར་དུ་ནུས་རྒྱུ་གསར་པའི་རླངས་འཁོར་འཛད་སྤྱོད་ལ་སྐུལ་འདེད་བཏང་སྟེ་མི་དམངས་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་དེ་བས་ཆེ་རུ་གཏོང་རྒྱུ་ཡིན། འཛད་རྫས་རྙིང་པ་གསར་པར་བརྗེ་བའི་སྲིད་ཇུས་ལག་བསྟར་གཏིང་ཟབ་བྱས་པ་དང་ཆབས་ཅིག་ལྗོངས་ཡོངས་ཀྱི་རླངས་འཁོར་ཁྲོམ་ར་དང་ལྷག་པར་དུ་ནུས་རྒྱུ་གསར་པའི་རླངས་འཁོར་ཁྲོམ་ར་དེ“མྱུར་བགྲོད་ལམ་བུར”དེ་བས་བརྟན་པོའི་ངང་བསྐྱོད་ནས་ལྗོངས་ཡོངས་ཀྱི་རླངས་འཁོར་འཛད་སྤྱོད་མུ་མཐུད་མགྱོགས་མྱུར་འཕར་རྒྱུར་སྐུལ་མ་ཐེབས་རྒྱུ་རེད་ཅེས་ངོ་སྤྲོད་བྱས།