ཉེ་བའི་ལོ་ཤས་རིང་། ལྷ་ས་གྲོང་ཁྱེར་གྱིས་འགྲིམ་འགྲུལ་སྐྱེལ་འདྲེན་གྱི་ལྗང་མདོག་འཕེལ་རྒྱས་ལ་ཚད་མཐོའི་མཐོང་ཆེན་དང་རྒྱུན་མཐུད་ཆོག་པའི་འཕེལ་རྒྱས་ཀྱི་འདུ་ཤེས་མཐའ་འཁྱོངས་བྱས་ཏེ་དབྱང་གཉིས་ཐཱན་འགྱུར་འབུད་ཚད་རྒྱུན་ཆད་མེད་པར་ཉུང་དུ་བཏང་བས་ནུས་རྒྱུ་གྲོན་ཆུང་དང་བཙོག་འབུད་ཉུང་གཏོང་གི་ལས་དོན་ལ་ཕན་འབྲས་མངོན་གསལ་དོད་པོ་ཐོན་ཡོད། 2020ལོ་ནས་བཟུང་ལྷ་ས་གྲོང་ཁྱེར་གྱིས་ནུས་རྒྱུ་གསར་པའི་སྤྱི་སྤྱོད་རླངས་འཁོར་100%ཁྱོན་ཡོངས་ནས་གཉེར་སྐྱོང་བྱས་པ་དང་། མིག་སྔར་གྲོང་ཁྱེར་ཡོངས་སུ་ནུས་རྒྱུ་གསར་པའི་སྤྱི་སྤྱོད་རླངས་འཁོར་563ཟིན་ཡོད་པ་རེད།

ལྷ་ས་གྲོང་ཁྱེར་སྤྱི་སྤྱོད་རླངས་འཁོར་གཉེར་སྐྱོང་ཚད་ཡོད་ཀུང་སིའི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན། ནུས་རྒྱུ་གསར་པའི་སྤྱི་སྤྱོད་རླངས་འཁོར་དེ་སྲོལ་རྒྱུན་གྱི་སྤྱི་སྤྱོད་རླངས་འཁོར་དང་བསྡུར་ན་འགྲུལ་པ་དེ་བས་མང་བ་དབོར་ཐུབ་པ་མ་ཟད། ནུས་རྒྱུ་ཟད་གྲོན་དང་མཇུག་རླངས་འབུད་ཚད་ཀྱང་ཅུང་ཉུང་བ་ཡོད། ཚོད་རྩིས་བྱས་པ་བརྒྱུད། གློག་སྒུལ་རྐྱང་པའི་སྤྱི་སྤྱོད་རླངས་འཁོར་ལ་སྤྱི་ལེ་བརྒྱ་ལ་གློག་ཏུའུ་96ཟད་པ་དེ་སྲོལ་རྒྱུན་གྱི་སྤྱི་སྤྱོད་རླངས་འཁོར་དང་བསྡུར་ན་ནུས་རྒྱུ་ཟད་ཚད་71%ཆག་ཡོད་པ་དང་། གློག་རླངས་མཉམ་སྒུལ་སྤྱི་སྤྱོད་རླངས་འཁོར་ལ་སྤྱི་ལེ་བརྒྱ་ལ་སོལ་རླངས་ངོས་གྲུ་29ཟད་པ་དེ་སྲོལ་རྒྱུན་གྱི་སྤྱི་སྤྱོད་རླངས་འཁོར་དང་བསྡུར་ན་ནུས་རྒྱུ་ཟད་ཚད་30%ཆག་ནས་ནུས་རྒྱུ་གྲོན་ཆུང་གི་ཕན་འབྲས་མངོན་གསལ་དོད་པོ་ཡོད་པ་རེད། འཛེར་སྒྲ་དང་མཇུག་རླངས་འབུད་པའི་ཐད་སྲོལ་རྒྱུན་གྱི་སྤྱི་སྤྱོད་རླངས་འཁོར་དང་བསྡུར་ན་གློག་སྒུལ་རྐྱང་པའི་སྤྱི་སྤྱོད་རླངས་འཁོར་གྱི་འཛེར་སྒྲ་90%ཆག་པ་དང་། མཇུག་རླངས་འབུད་ཚད་ཀླད་ཀོར་ཡིན་པ། གློག་རླངས་མཉམ་སྒུལ་སྤྱི་སྤྱོད་རླངས་འཁོར་གྱི་འཛེར་སྒྲ་40%ཆག་པ། མཇུག་རླངས་འབུད་ཚད་90%ཆག་པ་བཅས་ལས་ལྷ་ས་གྲོང་ཁྱེར་གྱི་མཁའ་རླུང་སྤུས་ཚད་ལེགས་སུ་འགྲོ་བ་དང་རླུང་ཁམས་ཆེན་པོའི་སྦགས་བཙོག་སྔོན་འགོག་བྱེད་པར་དོན་སྙིང་གལ་ཆེན་ལྡན་ཡོད་པ་རེད།

མིག་སྔར། ལྷ་ས་གྲོང་ཁྱེར་དུ་ནུས་རྒྱུ་གསར་པའི་སྤྱི་སྤྱོད་རླངས་འཁོར་100%ཁྱབ་པ་དང་། འདི་ལོ་2015ལོར་སྤྱོད་འགོ་ཚུགས་པའི་རླངས་འཁོར་49དང་2016ལོར་སྤྱོད་འགོ་ཚུགས་པའི་རླངས་འཁོར་35གསར་པ་བརྗེ་རྩིས་ཡོད་པ་རེད།