ནམ་དུས་དབྱར་ཀ་འཆར་སྐབས། གྲོང་མི་མང་ཚོགས་གཅིག་རྗེས་གཉིས་མཐུད་ངང་རང་ཁྱིམ་ནས་ཐོན་ཏེ། ཡིད་དབང་འཕྲོག་པའི་ས་ཆ་ཞིག་ཏུ་གཉེན་ཉེ་དང་མཉམ་དུ་གླིང་ག་བཏང་ནས་སྤྲོ་གསེང་གི་དུས་ཚོད་ལོངས་སུ་སྤྱོད་ཀྱི་ཡོད། ཉེ་བའི་ལོ་ཤས་རིང་བོད་ལྗོངས་རིག་གནས་ཡུལ་སྐོར་བསམ་བཀོད་གླིང་གིས་རྩེར་སོན་གྱི་རྣམ་པ་གསར་པ་དང་། རང་བྱུང་ཁམས་སུ་སྐྱོད་པ། དམངས་སྲོལ་ཉམས་ལེན་བྱེད་པ་བཅས་ཀྱི་གླིང་ག་གཏོང་སྟངས་བཏོད་པར་རྒྱ་ཆེའི་གྲོང་མི་མང་ཚོགས་ཚོས་ཧ་ཅང་དགའ་པོ་བྱེད་ཀྱི་ཡོད་པ་རེད།

ཉེ་ཆར་གསར་འགོད་པ་གྲོང་ཁུལ་ནས་ཐོན་ཏེ་སྐར་མ་བཅུ་ཡང་མ་འགོར་བར་བུམ་པ་རིའི་འབྲོག་རར་སླེབས། འབྲོག་ར་འདི་ནི་རི་འདབས་སུ་ཆགས་པ་དང་ཤིང་ཁང་ཆུང་ཆུང་དང་མི་རིགས་ཀྱི་ཁྱད་ཆོས་ལྡན་པའི་གུར་དཀར་པོ་དེ་དག་སྔོ་ཐིང་ཐིང་གི་རི་བོའི་ཁྲོད་དུ་ཕྲ་བཏབ་པ་ལྟར་ཤིན་ཏུ་མཛེས། ཆུ་ཕྲན་ཤང་ཤང་དུ་རྒྱུག་པ་དང་ཁོ་ར་ཁོར་ཡུག་པད་ཁའི་མེ་ཏོག་གིས་བརྒྱན་ཞིང་། སྦྲ་གུར་དང་རྟ་ར་ལས་ཞིང་འབྲོག་མང་ཚོགས་ཀྱི་འཚོ་བའི་ཉམས་འགྱུར་ཟབ་མོ་མངོན་པ་དང་ཐག་རིང་གི་ཕོ་བྲང་པོ་ཏ་ལ་སྤྲིན་སྨུག་གིས་བརྒྱན་ནས་ལྷག་པར་མཛེས། གྲོང་མི་ཚེ་རིང་གིས“ངའི་གྲོགས་པོས་ངོ་སྤྲོད་བྱས་པ་བརྒྱུད། འདི་གར་གླིང་ག་གཏོང་བར་ཡོང་བ་ཡིན། འདི་གའི་ཡུལ་ལྗོངས་དང་ཁོར་ཡུག་ཚང་མ་ཧ་ཅང་ཡག་པོ་ཡོད་པ་མ་ཟད། ད་དུང་ཕོ་བྲང་པོ་ཏ་ལར་རྒྱང་ལྟ་བྱེད་ཐུབ་པ་དང་གྲོང་གསེབ་ཀྱི་ཉམས་འགྱུར་གསར་པ་མྱོང་རོལ་ཐུབ་ཀྱི་འདུག་པས་ཧ་ཅང་ཡག་པོ་འདུག”ཅེས་བཤད།

བུམ་པ་རི་འབྲོག་ར་ནི་བོད་ལྗོངས་བུམ་པ་རི་བཟའ་བཏུང་རིག་གནས་ཚད་ཡོད་ཀུང་སིས་ཚེ་མཆོག་གླིང་ཁྲོམ་གཞུང་གི་ཚེ་མཆོག་གླིང་གྲོང་ཚོ་དང་འགན་གཙང་གན་རྒྱ་བཞག་ནས་བཙུགས་པའི་རིག་གནས་བསམ་བཀོད་གླིང་གི་ཞིང་འབྲོག་མང་ཚོགས་ཀྱི་འཚོ་བ་དངོས་ཀྱི་ཉམས་ལེན་བྱེད་ས་ཞིག་ཡིན་པ་དང་། འདི་ག་ནི་བོད་རིགས་ས་ཁུལ་གྱི་ཁྱད་ལྡན་འབྲོག་ལས་དང་ཞིང་ལས་རྨོ་འདེབས་ཉམས་ལེན་བྱ་རྒྱུ་གཙོ་བོར་བྱས་ནས་འབྲོག་ར་དང་། གླིང་ག དམངས་སྲོལ་གནས་ཚང་བཅས་གཞི་གཅིག་ཏུ་འདུས་པའི་སྤྲོ་གསེང་བྱ་ཡུལ་ཡག་པོ་ཞིག་རེད། བུམ་པ་རི་འབྲོག་རར་ཞག་སྡོད་དང་གླིང་གའི་བཅད་ཁང་35ཡོད་པ་དང་མང་ཤོས་སུ་ཐེངས་གཅིག་ལ་མི་1000ལྷག་ཙམ་ལ་སྣེ་ལེན་ཞུ་ཐུབ་པ་མ་ཟད། ད་དུང་དེའི་ནང་ཚལ་ཞིང་དང་། སྦྲ་གུར་གྱི་དམངས་སྲོལ་ཉམས་ལེན་ཁུལ། ཆུ་རྐྱལ་རྫིང་བུ། རྟ་ཁྲིད་ཡུལ་སྐོར། མཚན་མོའི་སྒོར་གཞས་སོགས་བཀོད་སྒྲིག་བྱས་ཡོད་པས་ཡུལ་སྐོར་བས་ཞིང་འབྲོག་པའི་འཚོ་བ་ཉམས་ལེན་ཐུབ་པ་མ་ཟད། སློབ་མར་སློབ་སྦྱོང་བྱེད་པའི་སྟེགས་བུ་ཞིག་ཀྱང་མཁོ་འདོན་བྱས་ཡོད་པ་རེད།

བུམ་པ་རི་འབྲོག་རའི་འགན་འཁུར་བ་བསོད་ནམས་མཐར་ཕྱིན་གྱིས“ང་ཚོའི་ཟ་ཁང་དང་འབྲོག་རའི་ལས་མི་ཚང་མ་ས་གནས་འདི་གའི་མང་ཚོགས་ཡིན་པ་དང་འབྲོག་ར་ལས་གཉེར་བྱེད་འགོ་ཚུགས་ཙམ་ཡིན་པས་རྗེས་སུ་བྱ་གཞག་སྔར་བས་ཡག་པ་དང་། ཡུལ་སྐོར་བྱ་གཞག་ལ་སྔར་བས་ལེགས་པའི་ངང་ཞབས་འདེགས་ཞུ་བ། མི་དེ་བས་མང་བ་ལས་ཞུགས་ཐུབ་པ་བཅས་བྱས་ཏེ་འབབ་འཕར་ཡོང་བར་སྐུལ་ཁྲིད་དང་ཐུན་མོང་ཐོག་འཕེལ་རྒྱས་ཡོང་བར་སྐུལ་ཁྲིད་ཐུབ་པའི་རེ་བ་ཡོད”ཅེས་བཤད། འབྲོག་རར་ས་གནས་དེ་གའི་ལས་མི་20ལྷག་ཙམ་བསྡུས་ཡོད་པ་དང་ལོ་མཇུག་ཏུ་ས་ཞིང་གི་བོགས་དངུལ་བགོ་འགྲེམས་ཀྱི་རྣམ་པའི་ཐོག་ནས་མང་ཚོགས་ཚོར་འབབ་འཕར་ཡོང་བར་སྐུལ་ཁྲིད་བྱ་རྒྱུ་རེད། “ང་ནི་ས་གནས་དེ་གའི་གྲོང་མི་ཡིན། འབྲོག་ར་བསྐྲུན་རྗེས་ང་ཚོ་ཕྱིར་གླ་པར་འགྲོ་མི་དགོས་པ་དང་གླ་ཆ་དང་ཐོབ་ཐང་ཡག་པོ་ཡོད་པ་མ་ཟད། ལས་ཀའི་ཁོར་ཡུག་ཀྱང་ཡག་པོ་ཡོད་ལ་ཁྱིམ་དང་ཐག་ཉེ་པོ་འདུག”ཅེས་ལས་མི་ཚེ་རིང་ལྷ་མོས་བཤད།

མིག་སྔར་ཚེ་མཆོག་གླིང་ཁྲོམ་གཞུང་དུ་རྩེར་སོན་རྣམ་པ་དང་། རང་བྱུང་ཁམས་སུ་སྐྱོད་པ། དམངས་སྲོལ་ཉམས་ལེན་བྱེད་པ། དམག་དོན་སྒར་རྒྱག་རྟེན་གཞི་སོགས་གླིང་ག་རིགས་10ལྷག་ཙམ་ཡོད་པ་དང་། ཚེ་མཆོག་གླིང་ཁྲོམ་གཞུང་གིས་གླིང་གའི་དཔལ་འབྱོར་རྒྱུན་ཆད་མེད་པར་བཏོད་ནས་རིག་གནས་ཡུལ་སྐོར་ཐོན་ལས་ལ་སྐུལ་ཁྲིད་བྱས་ཏེ། ཁུལ་ཁོངས་ཡུལ་སྐོར་གཏིང་ཟབ་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་བཏང་ནས་གྲོང་གསེབ་ཡུལ་སྐོར་ལ་བརྟེན་ནས་མང་ཚོགས་ཀྱི་འབབ་འཕར་ལ་སྐུལ་འདེད་བཏང་སྟེ་ལོ་ལྟར་ས་གནས་དེ་གའི་མང་ཚོཌ་ལ་འབབ་འཕར་སྒོར་ཁྲི་100ལྷག་ཙམ་བཏོད་ཡོད་པ་རེད།

ཚེ་མཆོག་གླིང་ཁྲོམ་གཞུང་གི་ལས་དོན་པ་བསྟན་འཛིན་ཕུན་ཚོགས་ཀྱིས“གོམ་སྟབས་རྗེས་མར་ང་ཚོས་ས་གནས་དེ་གའི་ཁོར་ཡུག་གི་ཁྱད་ཆོས་དང་ཟུང་འབྲེལ་བྱས་ཏེ། ཁེ་ལས་བརྒྱུད་ས་གནས་དེ་གའི་གྲོང་ཚོའི་མཉམ་སྡེབ་དཔལ་འབྱོར་གྱི་འབབ་འཕར་ལ་སྐུལ་ཁྲིད་བྱས་ནས། མང་ཚོགས་འབབ་འཕར་ཕྱུག་འགྱུར་ཡོང་བ་བྱས་ཏེ་ཁུལ་ཁོངས་ཡུལ་སྐོར་འཕེལ་རྒྱས་ལ་སྐུལ་འདེད་གཏོང་རོགས་བྱེད་ཀྱི་ཡིན”ཞེས་བཤད།