ཉེ་ཆར་ལྷ་ས་གྲོང་ཁྱེར་ཁྲེང་ཀོན་ཆུས་རྗེ་འབུམ་སྒང་ཁྲོམ་གཞུང་ར་མོ་ཆེ་སྡེ་ཁུལ་དུ། འདེམས་དམངས་ཀྱི་བསམ་འདུན་ཉན་ནས་གནད་དོན་དངོས་ཐག་གཅོད་བྱ་རྒྱུ་དམིགས་ཡུལ་དུ་བྱས་པའི་འདེམས་དམངས་སྣེ་ལེན་བྱེད་སྒོ་ཚ་ཚ་འུར་འུར་ངང་སྤེལ་བཞིན་ཡོད་པ་རེད། གསར་འགོད་པ་ས་གནས་ས་ཐོག་ཏུ་ཡོང་ནས་བརྩེ་སེམས་དང་འགན་འཁྲི་ཡིས་ཕྱུག་པའི་དུས་སྐབས་དེ་དངོས་སུ་མྱོང་རོལ་བྱས་པ་རེད།

བྱེད་སྒོ་སྤེལ་ཡུལ་དུ་ལྷ་ས་གྲོང་ཁྱེར་རྗེ་འབུམ་སྒང་ཁྲོམ་གཞུང་ཏང་ལས་དོན་ཨུ་ལྷན་གྱི་ཧྲུའུ་ཅི་གཞོན་པ་མི་དམངས་འཐུས་ཚོགས་ལས་དོན་ཨུ་ལྷན་གྱི་ཀྲུའུ་རེན་ཚེ་རིང་གཡང་འཛོམས་དང་ར་མོ་ཆེ་འདེམས་ཁུལ་མི་དམངས་འཐུས་ཚོགས་ཀྱི་འཐུས་མིས་ཚ་ཚ་འུར་འུར་དང་གོ་རིམ་ལྡན་པའི་ངང་བྱེད་སྒོ་སྒྲིག་འཛུགས་བྱེད་བཞིན་ཡོད་པ་དང་། ཁོངས་གཏོགས་དེའི་འདེམས་དམངས་ཀྱི་འཐུས་མི་8སྤྲོ་སེམས་རབ་ཏུ་འཁོལ་བའི་ངང་དེའི་ནང་ཞུགས་ཤིང་། ས་གནས་ས་ཐོག་གི་རྣམ་པ་སྤྲོ་སེམས་འཁོལ་ལ་འཆམ་མཐུན་དང་ལྡན་པ་ཞིག་ཡོད།

མི་དམངས་འཐུས་ཚོགས་ཀྱི་འཐུས་མིས་འདེམས་དམངས་ཀྱིས་ཡར་ཞུ་བྱས་པའི་གནད་དོན་ནན་ཏན་ངང་ཉན་ཞིང་ཟིན་བྲིས་སུ་བཏབ་རྗེས། གནད་དོན་དེ་དག་གི་ཞིབ་ཕྲའི་གནས་ཚུལ་སྔར་བས་ཐད་ཀར་ཤེས་རྟོགས་ཐུབ་ཆེད། འདེམས་དམངས་ཀྱི་འཐུས་མིའི་སྣེ་ཁྲིད་འོག ཚང་མ་ས་གནས་ས་ཐོག་ཏུ་བསྐྱོད་དེ་ཞིབ་བཤེར་བྱས་པ་རེད། མི་དམངས་འཐུས་ཚོགས་ཀྱི་འཐུས་མིས་ཆུ་ཁང་གི་སྒྲིག་བཀོད་དང་། ས་འོག་ཆུ་ལམ་གྱི་གནས་ཚུལ། གློག་སྐུད་སྐུད་ལམ་གྱི་རྐང་གསུམ། ཆུ་སྤྱོད་མདོང་ལམ་སོགས་ལ་དངོས་སུ་ཞིབ་བཤེར་བྱས་ནས་ལས་དོན་མི་སྣ་དང་མཉམ་དུ་གནད་དོན་གྱི་འབྱུང་རྩར་དབྱེ་ཞིབ་ཞིབ་ཕྲ་བྱས་པ་མ་ཟད། ད་དུང་ས་གནས་ས་ཐོག་ནས་དཔང་རྟགས་བསྡུ་ལེན་བྱས་ཏེ་ལག་ལེན་དུ་འཁྱོལ་ཐུབ་ངེས་ཀྱི་ཐག་གཅོད་ཇུས་གཞི་ཞིབ་ཕྲ་ཡང་བཟོས་པ་རེད།

གསར་འགོད་པས་བཅར་འདྲི་བྱེད་སྐབས་རྒན་པོ་ཆུང་བདག་གིས་མཐེ་བོང་བསྒྲེངས་ནས“དེ་རིང་གི་འདེམས་དམངས་སྣེ་ལེན་ཚོགས་འདུ་ནི་ཧ་ཅང་དོན་སྙིང་ལྡན་པའི་བྱེད་སྒོ་ཞིག་རེད། རང་ཉིད་འདེམས་དམངས་ཀྱི་འཐུས་མི་ཞིག་ཡིན་པའི་ངོས་ནས་མང་ཚོགས་ཀྱི་བདེ་རྩར་ཐུག་པའི་ཁེ་ཕན་དང་འབྲེལ་བའི་གནད་དོན་ཇི་མ་ཇི་བཞིན་ཡར་ཞུ་བྱས་པར་འབྲེལ་ཡོད་འགན་འཁུར་བ་ས་གནས་ས་ཐོག་ཏུ་ཞིབ་བཤེར་བྱེད་པར་ཡོང་བ་མ་ཟད། ད་དུང་ཐག་གཅོད་བྱ་རྒྱུའི་ཁས་ལེན་ཡང་བྱས་བྱུང་བས་ལས་ཕྱོད་ཆེས་ཆེར་མཐོ་རུ་ཕྱིན་འདུག ངས་ཁོངས་གཏོགས་ཀྱི་ཡུལ་མི་མང་ཚོགས་ཀྱི་ཚབ་ཞུས་ནས་གོང་རིམ་སྡེ་ཚན་གྱི་ལས་ཀའི་སྤྱོད་ཚུལ་ལ་མོས་བསྟོད་བྱ་རྒྱུ་ཡིན”ཞེས་བཤད།