ཉེ་ཆར།　གསར་འགོད་པར་གཞིས་རྩེ་གྲོང་ཁྱེར་ས་དགའ་རྫོང་རིག་གནས་ཡུལ་སྐོར་ཅུས་ནས་ཤེས་རྟོགས་བྱུང་བར།　རྒྱལ་ཡོངས་རིག་དངོས་ཡོངས་བཤེར་ལས་དོན་ཐེངས་བཞི་པ་གཏིང་ཟབ་སྤེལ་བ་དང་བསྟུན་ནས།　ས་དགའ་རྫོང་རིག་དངོས་ཡོངས་བཤེར་རུ་ཁག་གིས་རྫོང་ཁོངས་སུ་མཆོད་རྟེན་མང་པོའི་རྗེས་ཤུལ་རྙེད་པ་ལས་བཟོ་རྩལ་ཐུན་མོང་མ་ཡིན་པའི་ཚ་ཚ་9380ཡོད་པ་འདི་དག་ནི་ས་གནས་དེ་གའི་ཆོས་ལུགས་རིག་གནས་དང་སྒྱུ་རྩལ་འཕེལ་རྒྱས།　དེ་བཞིན་ལོ་རྒྱུས་ཀྱི་འཕོ་འགྱུར་བཅས་ལ་ཞིབ་འཇུག་བྱེད་པར་དོན་སྙིང་གལ་ཆེན་ལྡན་པ་ཞིག་རེད།

ཚ་ཚ་འདི་དག་གི་གལ་ཆེའི་རང་བཞིན་དང་མིག་སྔའི་ཁོར་ཡུག་ལ་དམིགས་ནས།　ས་དགའ་རྫོང་རིག་དངོས་ཡོངས་བཤེར་རུ་ཁག་གིས་ཆེད་ལས་དཔུང་ཁག་སྒྲིག་འཛུགས་བྱས་ནས་ཛ་དྲག་མྱུར་སྐྱོབ་རང་བཞིན་གྱི་སྲུང་སྐྱོང་ལས་དོན་སྤེལ་འགོ་བཙུགས་ཡོད།　མིག་སྔར།　རྩད་ཞིབ་དང་།　འཚོལ་བསྡུ།　གཙང་བཤེར།　ལེགས་སྒྲིག་བཅས་རགས་ཙམ་བྱས་པ་བརྒྱུད།　ཚ་ཚ་འདི་དག་ཁོར་ཡུག་དང་འཚམ་པ་དང་ཉར་ཚགས་ཆ་རྐྱེན་འཛོམས་པའི་བཀྲ་ཤིས་ལྷུན་པོ་དགོན་པར་བདེ་འཇགས་ངང་དབོར་ནས་རྗེས་མཐུད་ཞིབ་འཇུག་དེ་བས་གཏིང་ཟབ་བྱ་རྒྱུ་ཡིན་པ་རེད།

རང་སྐྱོང་ལྗོངས་ཀྱི་རྒྱལ་ཡོངས་རིག་དངོས་ཡོངས་བཤེར་ཐེངས་བཞི་པའི་སྐོར་སྐྱོད་རུ་ཁག་གི་རིགས་གཅིག་མཁས་ཅན་སྐལ་བཟང་དབང་འདུས་ཀྱིས་གསལ་འབྱེད་བྱས་པ་བརྒྱུད།　ཚ་ཚ་འདི་དག་ལོ་རྒྱུས་རིང་ཞིང་གྲངས་འབོར་མང་ལ་སྣ་ཁ་ཡང་མང་པོ་ཡོད་པས་ལོ་རྒྱུས་དང་།　སྒྱུ་རྩལ།　རིག་གཞུང་བཅས་ཞིབ་འཇུག་གི་རིན་ཐང་ཧ་ཅང་ཆེན་པོ་ལྡན་པ་དང་རིམ་པ་གསུམ་པའི་རིག་དངོས་ཞིབ་དཔྱད་གཏན་འཁེལ་གྱི་ཚད་གཞི་དང་མཐུན་ཡོད་པ་རེད།