འདི་ནི་ཀྲུང་གོའི་ཞིང་ལས་རིགས་གཅིག་མཁས་ཅན་ལུང་ཝུན་ཅིང（གཡས）གིས་ཝུ་ཀན་ཏའི་ལག་རྩལ་པར་འབྲུ་རིགས་ཀྱི་སྣ་ཁ་གསར་པ་གསར་སྤེལ་གྱི་ལས་དོན་ལ་མཛུབ་ཁྲིད་བྱེད་བཞིན་པ།

འདི་ནི་ཝུ་ཀན་ཏའི་ཞིང་པ་དང་ཀྲུང་གོའི་ཞིང་ལས་རིགས་གཅིག་མཁས་ཅན་ཞིང་ནང་དུ་སྤེལ་རེས་བྱེད་བཞིན་པ།

འདི་ནི་ཀྲུང་གོའི་ཞིང་ལས་རིགས་གཅིག་མཁས་ཅན་གྱིས་ཝུ་ཀན་ཏའི་ཞིང་པར་བཙས་མ་རྔ་སྟངས་མཛུབ་ཁྲིད་བྱེད་བཞིན་པ།

འདི་ནི་ཀྲུང་གོའི་རིགས་གཅིག་མཁས་ཅན་གྱིས་རུ་ཝང་ཏའི་གྲོང་ཚོ་ཞིག་ལ་ཁྲོན་པ་འདྲུ་བཞིན་པ།

འདི་ནི་རུ་ཝང་ཏའི་ཤར་ཕྱོགས་ཞིང་ཆེན་ཁ་ཡུང་ཀྲའི་ཆུས་ཞི་ཁ་གྲོང་ཚོར་གྲོང་མི་ཚོས་དགའ་དགའ་སྤྲོ་སྤྲོའི་ངང་ཁྲོན་པའི་ཆུ་འཐུང་བཞིན་པ།

འདི་ནི་ཨེ་ཙེ་ཨོ་ཕི་ཡར་རོགས་སྐྱོར་བྱེད་མཁན་ཀྲུང་གོའི་རིགས་གཅིག་མཁས་ཅན་གྱིས་ས་གནས་དེ་གའི་སློབ་མར་སློབ་ཁྲིད་བྱེད་བཞིན་པ། གོང་གི་པར་ཚང་མ་ནི་འདི་ག་ཚགས་པར་གྱི་གསར་འགོད་པ་ཧོང་ཕེ་ཀྲའོ་ཡིས་བླངས།

ཆུ་འབྲས་ཚོད་འདེབས་བྱས་པ།

“པུའུ་ཐ་ལའེ་ཅ་ས་ཁུལ་ཝུ་ཀན་ཏའི‘ཉ་དང་འབྲུ་རིགས་ཐོན་ཁུངས་ཁུལ’དུ་འགྱུར་བར་བྱས་པ”

ལུའོ་པོ་ཐེ་ནི་ཝུ་ཀན་ཏའི་དབུས་རྒྱུད་ཀྱི་པུའུ་ཐ་ལའེ་ཅ་ས་ཁུལ་གྱི་ཆུ་འབྲས་འདེབས་མཁན་དུད་ཚང་ཞིག་ནས་ཡིན། ཁོང་གིས་ཚོད་འདེབས་བྱས་པའི་ཀྲུང་གོའི་ཆུ་འབྲས་ལ་ཉེ་ཆར་ལོ་ལེགས་བྱུང་ཡོད། “ངས་ལོ་20ལྷག་ཙམ་རིང་ཆུ་འབྲས་བཏབ་པ་ཡིན། ཐོན་འབབ་ཡག་པོ་འདི་འདྲ་བྱུང་ཐེངས་དང་པོ་ཡིན། ཀྲུང་གོའི་ཞིང་ལས་ལག་རྩལ་གྱི་རིགས་གཅིག་མཁས་ཅན་གྱིས་མཛུབ་ཁྲིད་གནང་བར་ཐུགས་རྗེ་ཆེ་ཞུ་གི་ཡིན”ཞེས་ལུའོ་པོ་ཐེ་ཡིས་བཤད།

ཝུ་ཀན་ཏར་ཚ་གྲང་སྙོམས་ལ་ཆར་ཆུ་འབེལ་བས། མི་འབོར་70%ཡན་སོ་ནམ་ལ་བརྟེན་ནས་འཚོ་བ་སྐྱེལ་གྱི་ཡོད། དུས་རབས་20པའི་ལོ་རབས་70པའི་དུས་དཀྱིལ་དང་དུས་མཇུག་ནས་བཟུང་ཀྲུང་གོས་ཞིང་ལས་རིགས་གཅིག་མཁས་ཅན་པུའུ་ཐ་ལའེ་ཅ་ས་ཁུལ་གཅིག་རྗེས་གཉིས་མཐུད་དུ་མངགས་ནས་ས་གནས་དེ་གའི་ཆུ་འདྲེན་མ་ལག་འཛུགས་སྐྲུན་དང་ཆུ་འབྲས་ཀྱི་སྣ་ཁ་གསར་པ་ནང་འདྲེན་བྱེད་རོགས་བྱས་པ་མ་ཟད། ཞིང་དུད་ལ་འདེབས་འཛུགས་ལག་རྩལ་གྱི་གསོ་སྦྱོང་ཡང་བྱས་ཡོད། 2012ལོ་ནས་བཟུང་ཀྲུང་གོས་མཉམ་འབྲེལ་རྒྱལ་ཚོགས་འབྲུ་རིགས་དང་ཞིང་ལས་རྩ་འཛུགས་ཀྱི་ལྷོ་ལྷོ་མཉམ་ལས་སྒྲོམ་གཞིའི་འོག་ཝུ་ཀན་ཏར་ཞིང་ལས་རིགས་གཅིག་མཁས་ཅན་དང་ལག་རྩལ་མི་སྣ་མངགས་ནས་ས་གནས་དེ་གའི་ཞིང་པར་ལག་རྩལ་གསར་པ་མཉམ་སྤྱོད་བྱས་པ་དང་། དེ་གའི་ཞིང་ལས་ཐོན་ནུས་ཆེ་རུ་འགྲོ་བར་རམ་འདེགས་བྱས་ཡོད། མིག་སྔར་རྣམ་གྲངས་དེ་དུས་ཐེངས་གསུམ་པའི་བར་ལག་བསྟར་བྱས་ཟིན་པ་དང་། ཀྲུང་གོས་ཞིང་ལས་རིགས་གཅིག་མཁས་ཅན་60ཙམ་མངགས་ནས་ཝུ་ཀན་ཏའི་ཞིང་ལས་ཐོན་སྐྱེད་འཕེལ་རྒྱས་གཏོང་རོགས་བྱས་ཏེ་ས་གནས་དེ་གའི་ཞིང་པར་དབུལ་སྒྲོལ་འབབ་འཕར་གྱི་ཐབས་ལམ་གསར་པ་བཏོད་ཡོད།

ཁྲོན་པ་འདྲུ་རོགས་བྱས་པ།

“ད་ཆ་ཚང་མར་ཆུ་གཙང་མ་འཐུང་རྒྱུ་བྱུང་ཡོད”

རུ་ཝང་ཏའི་རྒྱལ་ས་ཁི་ཀ་ལི་ནས་རླངས་འཁོར་བཏང་སྟེ་ཤར་ཕྱོགས་སུ་ཆུ་ཚོད་གཉིས་ཙམ་བསྐྱོད་རྗེས་གསར་འགོད་པ་རྒྱལ་ཁབ་དེ་གའི་ཤར་ཕྱོགས་ཞིང་ཆེན་ཁ་ཡུང་ཀྲའི་ཆུས་ཞི་ཁ་གྲོང་ཚོར་སླེབས། གྲོང་ཚོའི་ནང་གི“རེ་སྨོན་སློབ་ཆུང”དུ་དགེ་རྒན་དང་སློབ་མ་ཚོ་ཆུ་ལེན་བཞིན་ཡོད་པ་དང་། སྟེམ་སྒོ་ཕྱེ་མ་ཐག་ཆུ་ཀ་ལ་ནས་དྭངས་ཤིང་གཙང་བའི་ཆུ་ཤར་རེར་དོན་ཡོང་།

དེ་ནི་ཀྲུང་གོས་རུ་ཝང་ཏར་རོགས་སྐྱོར་བྱས་པའི་ཁྲོན་པ་200ཡི་རྣམ་གྲངས་གྲས་ཤིག་ཡིན་པ་དང་། རྣམ་གྲངས་དེ་ཀྲུང་གོ་ས་གཤིས་ལས་གྲྭ་ཚོགས་པ་ཚད་ཡོད་ཀུང་སི་དབུས་ཤར་རྒྱུད་ཀྱི་ཨ་ཧྥེ་རི་ཁ་ཡན་ལག་ཀུང་སིས་སྐྲུན་འགན་འཁུར་ཡོད། “ཀྲུང་གོས་འདྲུ་རོགས་བྱས་པའི་ཁྲོན་པས་འཐུང་ཆུའི་དཀའ་ངལ་བསལ་སོང་། ད་ཆ་ཚང་མས་ཆུ་གཙང་མ་འཐུང་རྒྱུ་བྱུང་ཡོད”ཅེས་ཞི་ཁ་གྲོང་ཚོའི་གྲོང་མི་པཱ་ལ་ཤིན་ཡིའུ་ཀྲ་ཡིས་བཤད།

ཉེ་བའི་ལོ་ཤས་རིང་། ཀྲུང་གོ་དང་རུ་ཝང་ཏའི་དབར་ཞིང་ལས་མཉམ་ལས་བྱེད་ཟབ་ཏུ་བཏང་ཞིང་། ཀྲུང་གོའི་ཁེ་ལས་ཀྱིས་ཞིང་ནང་ཆུ་བེད་ཆུ་འདྲེན་རྣམ་གྲངས་མང་པོ་གཉེར་འགན་ཁུར་ནས་རུ་ཝང་ཏའི་ཐང་རྒོད་དག་གཤིན་སར་སྒྱུར་རོགས་བྱས་པ་དང་ཆབས་ཅིག་ད་དུང་ཡུལ་དེ་གར་ཆུ་དཀོན་པའི་གནད་དོན་ཐག་གཅོད་ཧུར་ཐག་བྱས་ཡོད། ཀྲུང་གོས་རུ་ཝང་ཏར་ཁྲོན་པ་200འདྲུ་རོགས་བྱེད་པའི་རྣམ་གྲངས་ལས་རུ་ཝང་ཏའི་ཤར་ཕྱོགས་ཞིང་ཆེན་དང་ལྷོ་ཕྱོགས་ཞིང་ཆེན་གྱི་ས་ཁུལ་11ལ་གནོན་ཁྲོན་17དང་། ལྟ་ཞིབ་ཚད་ལེན་གྱི་ཁྲོན་པ་20 ཉི་ནུས་ཆུ་འཐེན་ཁྲོན་པ་10བཅས་བསྐྲུན་པའི་ཁར། རུ་ཝང་ཏར་ཆུ་སྤུས་ཀྱི་ཞིབ་བཤེར་ཚད་ལེན་དང་མི་སྣ་གསོ་སྦྱོང་སོགས་ལག་རྩལ་ཞབས་ཞུའི་རྒྱབ་སྐྱོར་ཡང་བྱས་ཡོད།

ལག་རྩལ་མཉམ་ལས་བྱས་པ།

“རྒྱལ་ཁབ་གཉིས་པོའི་ཞིང་ལས་ཤེས་ལྡན་པའི་སྤེལ་རེས་དང་གསོ་སྐྱོང་ལ་རྒྱུན་ཆད་མེད་པར་སྐུལ་འདེད་བཏང་བ”

ཨེ་ཙེ་ཨོ་ཕི་ཡའི་ཨའོ་ལུའོ་སྨི་ཡ་ཀྲོའུ་ཧུའོ་ལེ་ཐ་ལས་རིགས་སློབ་གསོ་སློབ་གླིང་གི་ཞིང་ལས་ཚོད་ལྟའི་ཞིང་ནང་གི་སྐྱེ་འཚར་ཡག་ལ་སྔོ་ཐིང་ཐིང་གི་མ་རྨོས་ལོ་ཏོག་ཀུན་གྱིས་དོ་སྣང་ཆེན་པོ་བྱ་ཡུལ་དུ་གྱུར་ཡོད། ཧུའོ་ལེ་ཐ་ལས་རིགས་སློབ་གསོ་སློབ་གླིང་གི་ཡོན་ཀྲང་མུའུ་ནུའུ་ཀེ་ཐ་ཡིས། མ་རྨོས་ལོ་ཏོག་ལ་མཛུབ་མོ་བཙུགས་ནས“གཟིགས་དང་། འདི་ནི་ཀྲུང་གོའི་ཞིང་ལས་རིགས་གཅིག་མཁས་ཅན་གྱིས་ང་ཚོའི་སྣེ་ཁྲིད་དེ་འདེབས་གསོ་བྱས་པ་ཞིག་རེད། ཀྲུང་གོ་ནས་ཐོན་པའི་མ་རྨོས་ལོ་ཏོག་གི་སྣ་ཁ་གསར་པ་འདི་རིགས་ལ་ཐོན་འབབ་མཐོ་བ་དང་། སྤུས་ཚད་ལེགས་པ། ནད་དང་འབུའི་གནོད་ཚེ་འགོག་ཤུགས་ཆེ་བ་སོགས་ཀྱི་ལེགས་ཆ་མངོན་གསལ་དོད་པོ་ལྡན་ཡོད”ཅེས་བཤད།

མུའུ་ནུའུ་ཀེ་ཐ་ཡིས། ཀྲུང་གོས་ཨེ་ཙེ་ཨོ་ཕི་ཡར་རོགས་སྐྱོར་གྱི་ཞིང་ལས་ལས་རིགས་སློབ་གསོའི་རྣམ་གྲངས་ལག་བསྟར་བྱས་པ་བརྒྱུད། ཀྲུང་གོའི་རིགས་གཅིག་མཁས་ཅན་གྱིས་ཀྲུང་གོའི་རྒྱལ་ནང་ལ་གསར་དུ་འདེབས་གསོ་བྱས་པའི་མ་རྨོས་ལོ་ཏོག་གི་སྣ་ཁ་6ས་གནས་འདི་གར་ནང་འདྲེན་བྱས་ཤིང་། ཕྱོགས་གཉིས་པོའི་རིགས་གཅིག་མཁས་ཅན་གྱིས་ཐུན་མོང་ཐོག་འབད་བརྩོན་བྱས་པ་བརྒྱུད་ཚོད་འདེབས་ལས་དོན་ལེགས་གྲུབ་བྱུང་ཡོད། མིག་སྔར། ཨེ་ཙེ་ཨོ་ཕི་ཡ་ཞིང་ལས་པུས་རྒྱ་ཁྱོན་ཆེ་བའི་དཔེ་སྟོན་དང་འདེབས་འཛུགས་ཁྱབ་གདལ་སོགས་ཀྱི་ལས་དོན་ལ་སྐུལ་འདེད་གཏོང་བཞིན་ཡོད་ཅེས་ངོ་སྤྲོད་བྱས་པ་རེད།

ཀྲུང་གོས་ཨེ་ཙེ་ཨོ་ཕི་ཡར་རོགས་སྐྱོར་གྱི་ཞིང་ལས་ལས་རིགས་སློབ་གསོའི་རྣམ་གྲངས་ཀྱི་སྤྱི་ཁྱབ་འགན་འཁུར་བ་ཕེང་ཏཱ་ཅུན་གྱིས། རྣམ་གྲངས་ལག་བསྟར་བྱས་ནས་ལོ་20ལྷག་ཙམ་སོང་རིང་། ཀྲུང་གོས་རིམ་རྩིས་བྱས་ན་ཞིང་ལས་རིགས་གཅིག་མཁས་ཅན་མི་ཐེངས་524ཨེ་ཙེ་ཨོ་ཕི་ཡར་སློབ་ཁྲིད་བྱེད་པར་མངགས་ནས་ས་གནས་དེ་གའི་དགེ་རྒན་དང་། སློབ་མ། ཞིང་ལས་ལག་རྩལ་པ་བཅས་མི་ཐེངས་ཁྲི་10ཙམ་གསོ་སྐྱོང་བྱས་ཡོད། “རྣམ་གྲངས་དེས་ས་གནས་འདི་གར་ཞིང་ལས་ལག་རྩལ་ཤེས་ལྡན་པ་འབོར་ཆེན་གསོ་སྐྱོང་བྱས་ཡོད། ད་ཆ་སློབ་མ་མང་པོ་ཞིག་ཨེ་ཙེ་ཨོ་ཕི་ཡའི་ཞིང་ལས་ཁྱབ་ཁོངས་སུ་ལས་ཀ་བྱེད་བཞིན་ཡོད། མ་འོངས་པར། ང་ཚོས་ཀྲུང་གོའི་ཞིང་ལས་ཐོན་སྐྱེད་ཀྱི་སྣ་ཁ་གསར་པ་དང་། ལག་རྩལ་གསར་པ། སྒྲིག་བཀོད་གསར་པ་བཅས་ཨེ་ཙེ་ཨོ་ཕི་ཡར་མུ་མཐུད་ནང་འདྲེན་བྱས་ནས། རྒྱལ་ཁབ་གཉིས་པོའི་ཞིང་ལས་ཤེས་ལྡན་པའི་སྤེལ་རེས་དང་གསོ་སྐྱོང་ལ་རྒྱུན་ཆད་མེད་པར་སྐུལ་འདེད་གཏོང་གི་ཡིན”ཞེས་བརྗོད་པ་རེད།