འདི་ནི་པེ་ནི་ནར་རོགས་སྐྱོར་བྱེད་མཁན་ཀྲུང་གོའི་སྲིང་བལ་ལག་རྩལ་རོགས་སྐྱོར་རྣམ་གྲངས་ཚོགས་ཆུང་གིས་བསྐྲུན་པའི་རྐང་རྩེད་སྤོ་ལོའི་ཐང(མི་མེད་གནམ་གྲུས་པར་བླངས་པ)ཡིན་པ། ཤིན་ཧྭ་གསར་འགྱུར་ཁང་གི་གསར་འགོད་པ། ལི་ཡ་ཧུའེ་ཡིས་པར་བླངས།

འདི་ནི་ས་གནས་དེ་གའི་མང་ཚོགས་ཀྱིས་ནེ་རོ་པིའི་མེ་འཁོར་བབས་ཚུགས་སུ་ཀྲུང་ཧྥེའི“རྒྱུད་གཅིག་ལམ་གཅིག”མཉམ་སྐྲུན་གྱི་དངོས་སྒྲུབ་མཉམ་ལས་ཀྱི་པར་རིས་འགྲེམས་སྟོན་ལ་ལྟ་བཞིན་པ། ཤིན་ཧྭ་གསར་འགྱུར་ཁང་གི་གསར་འགོད་པ། ཧན་ཤུས་ཀྱིས་པར་བླངས།

འདི་ནི་པེ་ནི་ནའི་གྲོང་མིའི་རྐང་རྩེད་སྤོ་ལོའི་འགྲན་བསྡུར་བྱེད་བཞིན་པ།འདི་ག་ཚགས་པར་གྱི་གསར་འགོད་པ། ཧོང་ཕེ་ཀྲའོ་ཡིས་པར་བླངས།

འདི་ནི་ཁོང་ཀོ་ཞིང་ལས་འདེབས་འཛུགས་གསོ་སྦྱོང་དཔེ་སྟོན་རྟེན་གཞིའི་འགན་འཁུར་བ་ཝང་ཀང(གཡས་ཀྱི་དང་པོ)གིས་ས་གནས་དེ་གའི་གྲོང་མི་ཚོར་སྔོ་ཚལ་འདེབས་གསོ་བྱེད་སྟངས་ངོ་སྤྲོད་བྱེད་བཞིན་པ། བྱང་ཕྱོགས་གཏེར་ལས་ལཱ་སྨི་ཁཱ་ཀུང་སིས་པར་རིས་མཁོ་འདོན་བྱས་པ།

འདི་ནི་ཁོང་ཀོ་ཞིང་ལས་འདེབས་འཛུགས་གསོ་སྦྱོང་དཔེ་སྟོན་རྟེན་གཞིར་ས་གནས་དེ་གའི་སློབ་མས་སྔོ་ཚལ་ལ་ཆུ་རྒྱག་བཞིན་པ། བྱང་ཕྱོགས་གཏེར་ལས་ལཱ་སྨི་ཁཱ་ཀུང་སིས་པར་རིས་མཁོ་འདོན་བྱས་པ།

འདི་ནི་2023ལོའི་ཟླ་10ཚེས་6ཉིན་ཁེན་ནི་ཡར་བཅའ་སྡོད་རྒྱལ་ཁབ་མང་པོའི་གཞུང་ཚབ་པས་ཁེན་ནི་ཡའི་ནེ་རོ་པིའི་མོང་པ་ས་ནས་ནེ་རོ་པི་བར་གྱི་ལྕགས་ལམ་བཀོད་གཏོང་ལྟེ་གནས་སུ་ལྟ་སྐོར་བྱེད་བཞིན་པ། ཤིན་ཧྭ་གསར་འགྱུར་ཁང་གི་གསར་འགོད་པ། ཝང་ཀོན་སེན་གྱིས་པར་བླངས།

“ང་ཚོར་ཚལ་དཀོན་པའི་གནད་དོན་ཐག་གཅོད་བྱས་བྱུང”

“ཀྲུང་གོའི་ཁེ་ལས་ཀྱི་ཞིང་ལས་རྟེན་གཞི་ནས་ངས་སྔོ་ཚལ་འདེབས་འཛུགས་ཀྱི་ལག་རྩལ་ཤེས་བྱུང་བས་ཐུགས་རྗེ་ཆེ་ཞུ་རྒྱུ་ཡིན” ཁོང་ཀོའི་ལུའུ་ཨ་ལ་པ་ཞིང་ཆེན་ཁོ་ལུའུ་ཝུའེ་ཆི་གྲོང་ཁྱེར་ལུའུ་པུའུ་ཏི་སྲིད་འཛིན་ཁུལ་གྱི་ཕང་པི་གྲོང་ཚོར་གྲོང་མི་སྨི་ལུང་ཀོ་ཉིན་ལྟར་ཞོགས་པར་རང་ཁྱིམ་གྱི་ཚལ་ཞིང་ནང་བྲེལ་བཞིན་ཡོད། ཁོང་གི་གཡོག་བྱེད་འོག་ཚལ་ཞིང་ནང་གི་སྔོ་ཚལ་སྣ་ཚོགས་སྐྱེ་འཚར་ཡག་པོ་ཡོད་པ་དང་། དེ་གར་ཡུལ་དེ་གའི་སྔོ་ཚལ་རིགས་ཡོད་པ་མ་ཟད། ད་དུང་པད་ཚལ་སོགས་ཀྲུང་གོའི་སྔོ་ཚལ་རིགས་ཀྱང་ཡོད། “ཞིང་ལས་རྟེན་གཞིས་ང་ཚོར་སྔོ་ཚལ་དཀོན་པའི་གནད་དོན་ཐག་གཅོད་བྱས་བྱུང”ཞེས་སྨི་ལུང་ཀེས་བཤད།

སྨི་ལུང་ཀེས་བཤད་པའི“ཞིང་ལས་རྟེན་གཞི”ནི་བྱང་ཕྱོགས་གཏེར་ལས་ཁོང་ཀོ་ལཱ་སྨི་ཁཱ་ཀུང་སིའི་ཕང་པི་ཟངས་ཁོབ་གཏེར་ཁའི་རྣམ་གྲངས་ཚོགས་པས་བསྐྲུན་པའི་ཞིང་ལས་འདེབས་འཛུགས་གསོ་སྦྱོང་དཔེ་སྟོན་རྟེན་གཞི་རེད། རྟེན་གཞིའི་འགན་འཁུར་བ་ཝང་ཀང་གིས་དྲན་གསོ་བྱས་པར། 2020ལོར་རྣམ་གྲངས་ཚོགས་པས་ལས་བཟོའི་བཟའ་བཏུང་གི་དགོས་མཁོ་སྐོང་ཆེད། ས་ཞིང་སྦོལ་ནས་སྣ་ཁ་མི་འདྲ་བའི་སྔོ་ཚལ་འདེབས་འགོ་བཙུགས། ས་གནས་དེ་གའི་གྲོང་མི་བསྡུས་ནས་སྔོ་ཚལ་འདེབས་འཛུགས་རྒྱ་ཁྱོན་ཆེ་རུ་གཏོང་རིང་ཁོང་ཚོས་ཕང་པི་གྲོང་ཚོའི་ཞིང་ལས་ཀྱི་རྨང་གཞི་དང་སྔོ་ཚལ་འདེབས་འཛུགས་ལག་རྩལ་ཞན་པ་ཤེས་ནས་ཞིང་ལས་རྟེན་གཞི་དེ་བསྐྲུན་ཏེ་ས་གནས་དེ་གའི་གྲོང་མིར་ཞིང་ལས་ལག་རྩལ་གསོ་སྦྱོང་བྱེད་པའི་སེམས་ཐག་བཅད།

2022ལོའི་ལོ་མཇུག་ཏུ། ཕང་པི་གྲོང་ཚོའི་གྲོང་མིའི་དང་ལེན་ཧུར་ཐག་དང་རྒྱབ་སྐྱོར་ཤུགས་ཆེན་འོག ས་ཆ་བཟུང་ཚད་མུའུ་10ལྷག་ཟིན་པའི་ཞིང་ལས་རྟེན་གཞིའི་དུས་ཐེངས་དང་པོའི་རྣམ་གྲངས་དངོས་སུ་སློབ་འགོ་ཚུགས། ལོ་ཏོག་རིགས་གཅིག་འདེབས་པ་ནས་བསྡུ་བའི་བར་དུས་འཁོར་གཅིག་ཏུ་བརྩི་བ་དང་དུས་འཁོར་རེར་གྲོང་མི་20ནས་30བར་གསོ་སྦྱོང་ནང་ཞུགས་པའི་སྒྲིག་འཛུགས་བྱེད་ཀྱི་ཡོད། གསོ་སྦྱོང་ལ་མཁོ་བའི་ས་བོན་དང་། ཞིང་ལུད། ཞིང་ལས་འཕྲུལ་ཆས། ལག་རྩལ་མཛུབ་ཁྲིད་སོགས་ཚང་མ་རྣམ་གྲངས་ཚོགས་པས་མཁོ་འདོན་བྱེད་ཀྱི་ཡོད་པ་དང་འདེབས་འཛུགས་ལོ་ཏོག་ཕྱིར་ཚོང་གི་ཡོང་འབབ་ཚང་མ་གསོ་སྦྱོང་ནང་ཞུགས་མཁན་གྲོང་མིར་རག་གི་ཡོད། 2024ལོའི་ཟླ་6པའི་ཟླ་མཇུག་བར། ཞིང་ལས་རྟེན་གཞིས་རིམ་རྩིས་བྱས་ན་མི་ཐེངས་800ལྷག་ཙམ་གསོ་སྦྱོང་བྱས་ཡོད་པ་རེད།

“ང་ཚོའི་རོལ་རྩེད་འཚོ་བ་ཕུན་སུམ་ཚོགས་སུ་ཕྱིན་སོང”

རྐང་རྩེད་སྤོ་ལོ་ནི་པེ་ནི་ནར་དགའ་ཤོས་བྱེད་པའི་ལུས་རྩལ་གྱི་གྲས་ཤིག་རེད། མཛའ་གྲོགས་རྐང་རྩེད་སྤོ་ལོའི་ཐང་ནི་པེ་ནི་ནར་རོགས་སྐྱོར་བྱེད་མཁན་ཀྲུང་གོའི་སྲིང་བལ་ལག་རྩལ་རོགས་སྐྱོར་རྣམ་གྲངས་ཚོགས་ཆུང་གིས་བསྐྲུན་པ་ཞིག་རེད། “ང་ཚོའི་གྲོང་ཚོའི་སྔོན་མའི་རྐང་རྩེད་སྤོ་ལོ་ཐང་ཐེབས་ཆག་ཅིག་ལས་མེད་ལ་ས་ངོས་སྙོམས་པོ་མེད་པའི་ཐོག་སྤོ་ལོའི་སྒོ་ནི་རྒྱུག་པས་གནས་སྐབས་བཟོས་པ་ཞིག་རེད། ཀྲུང་གོའི་རོགས་པས་ང་ཚོར་སྤོ་ལོའི་ཐང་གསར་པ་བསྐྲུན་རོགས་བྱས་པར་ཐུགས་རྗེ་ཆེ་ཞུ་གི་ཡིན། ང་ཚོ་ཧ་ཅང་དགའ་པོ་བྱུང”ཞེས་པེ་ནི་ན་ཕ་ལ་ཁུའུ་གྲོང་ཁྱེར་མེ་ལི་ཁྲེང་གྲོང་ཚོའི་གྲོང་མི་པ་ཏུའུ·སྨི་ཞི་མ་ཧུའུ་ཡིས་བཤད་པ་དང་། ཁོང་གིས“གྲོང་མིའི་རྐང་རྩེད་སྤོ་ལོའི་འགྲན་བསྡུར་གཉེར་བ་ལས་གྲོང་ཚོ་ཡོངས་ཀྱི་མི་རྣམས་ཧ་ཅང་དགའ་པོ་བྱུང་སོང་། ང་ཚོས་གྲོགས་པོ་དེ་བས་མང་པོ་ངོ་ཤེས་པ་མ་ཟད། མཐའ་འཁོར་གྲོང་སྡེའི་གྲོང་མི་དང་སྤེལ་རེས་ཐུབ་ནས་བརྩེ་བ་ཟབ་ཏུ་ཕྱིན་སོང”ཞེས་བཤད།

“གྲོང་མིའི་རྐང་རྩེད་སྤོ་ལོའི་འགྲན་བསྡུར་གཉེར་བ་ལས་རྐང་རྩེད་སྤོ་ལོ་རྒྱག་རྒྱུར་དགའ་བའི་ས་གནས་དེ་གའི་གཞོན་ནུ་ལོ་ཆུང་ལ་རང་ཉིད་ཀྱི་འཇོན་ཐང་ངོམ་སའི་ལས་སྟེགས་ཤིག་རག་པས། ཁོང་ཚོས་ལུས་རྩལ་ལས་བྱུང་བའི་སྤྲོ་སྣང་ལོངས་སུ་སྤྱོད་ཐུབ་ཡོད”ཅེས་པེ་ནི་ནར་རོགས་སྐྱོར་བྱེད་མཁན་ཀྲུང་གོའི་སྲིང་བལ་ལག་རྩལ་རྣམ་གྲངས་ཚོགས་ཆུང་གསུམ་པའི་ཙུའུ་ཀྲང་དང་གྲོང་མིའི་རྐང་རྩེད་སྤོ་ལོའི་འགྲན་བསྡུར་སྤེལ་བའི་གྲོས་འགོ་འདོན་མཁན་ཧྲོའུ་ཞའོ་ཡུང་གིས་བཤད་པ་དང་། ཁོང་གིས་པེ་ནི་ནར་རོགས་སྐྱོར་བྱེད་མཁན་ཀྲུང་གོའི་སྲིང་བལ་ལག་རྩལ་རོགས་སྐྱོར་རྣམ་གྲངས་ཕ་ལ་ཁུའུ་གྲོང་ཁྱེར་དུ་ལོ་10ལྷག་ཙམ་སྤེལ་ནས་སྔར་ནས་བཟུང་ས་གནས་དེ་གར་སྲིང་བལ་འདེབས་འཛུགས་ལག་རྩལ་ཁྱབ་གདལ་གཏོང་བ་དང་། ཞིང་ལས་འཕྲུལ་ཆས་ལག་རྩལ་མཛུབ་ཁྲིད་བྱེད་པ། ཞིང་ལས་ལག་རྩལ་མི་སྣ་གསོ་སྦྱོང་བྱེད་པ་སོགས་བྱེད་ཀྱི་ཡོད་ཅེས་ངོ་སྤྲོད་བྱས།

སྨི་ཞི་མ་ཧུའུ་ཡིས་འགྲན་བསྡུར་བྱེད་ཐེངས་རེར་ཧ་ལམ་གྲོང་ཚོ་ཡོངས་ཀྱི་མི་ཚང་མ་ཡོང་ནས་གྲོང་ཚོ་དེ་གའི་སྤོ་ལོ་རུ་ཁག་ལ་ཤུགས་རྒྱག་རོགས་བྱེད་ཀྱི་ཡོད། “ཀྲུང་གོའི་རྣམ་གྲངས་ཚོགས་ཆུང་ལ་ངས་ལྷག་པར་དུ་ཐུགས་རྗེ་ཆེ་ཞུ་གི་ཡིན། ཁོང་ཚོས་ང་ཚོར་འདྲུད་འཐེན་འཁོར་ལོ་མཁོ་འདོན་བྱས་ནས་ཞིང་རྨོ་རོགས་བྱས་པ་དང་ང་ཚོར་སྲིང་བལ་འདེབས་སྟངས་བསླབས་པ་མ་ཟད། སྒྲིག་འཛུགས་བྱས་པའི་རྐང་རྩེད་སྤོ་ལོའི་འགྲན་བསྡུར་ལས་ཀྱང་ང་ཚོའི་རོལ་རྩེད་འཚོ་བ་ཕུན་སུམ་ཚོགས་སུ་ཕྱིན་སོང”ཞེས་བཤད།

“ང་ཚོར་མི་ཚེའི་རིན་ཐང་མངོན་འགྱུར་བྱེད་པར་རོགས་རམ་བྱས་བྱུང”

“ཀྲུང་གོར་སློབ་སྦྱོང་བྱེད་སྐབས་ནི་དུས་སྐབས་ཡག་ཤོས་ཤིག་ཡིན། ངས་ཤེས་བྱ་དང་རྩལ་ནུས་མང་པོ་སྦྱངས་པ་ལས་ངའི་ལས་རིགས་འཆར་འགོད་དང་ཞིབ་ཕྲའི་ལས་ཀར་རོགས་རམ་ཆེན་པོ་བྱུང” ཁེན་ནི་ཡ་ལྕགས་ལམ་ཅུས་ཀྱི་ལས་རོགས་ལག་རྩལ་ཆེ་མོ་བ་ཨའེ་ཧྥུའུ་ལིན·མུའུ་ཀེན་ཡ་2017ལོར་མཐོ་རིམ་སློབ་འབྲིང་ཐོན་རྗེས། ཀྲུང་གོའི་ཁེ་ལས་ཀྱི་ཤེས་ལྡན་པའི་མཉམ་འབྲེལ་གསོ་སྐྱོང་རྣམ་གྲངས་བརྒྱུད་པེ་ཅིང་འགྲིམ་འགྲུལ་སློབ་ཆེན་དུ་དངོས་གཞིའི་ཚན་ཁག་སློབ་སྦྱོང་བྱེད་པར་ཡོང་། 2021ལོར་སློབ་གྲྭ་ཐོན་རྗེས་ཁོང་ཁེན་ནི་ཡར་ལོག་པ་དང་། མིག་སྔར་མོང་པ་ས་ནས་ནེ་རོ་པི་བར་གྱི་ལྕགས་ལམ་དུ་ལས་ཀ་བྱས་ནས་ལོ་3འདས།

2016ལོར་ཀྲུང་གོའི་འགྲིམ་འགྲུལ་འཛུགས་སྐྲུན་མ་རྐང་ཚད་ཡོད་ཀུང་སི་དང་ཀྲུང་གོའི་ལམ་ཟམ་བཟོ་སྐྲུན་ཚད་ཡོད་འགན་འཁྲི་ཀུང་སིས་པེ་ཅིང་འགྲིམ་འགྲུལ་སློབ་ཆེན་དང་མཉམ་དུ“རྒྱུད་གཅིག་ལམ་གཅིག”གི་རྒྱལ་སྤྱིའི་ཤེས་ལྡན་པའི་མཉམ་འབྲེལ་གསོ་སྐྱོང་གི་ཁེན་ནི་ཡའི་རྣམ་གྲངས་གཉེར་ཡོད། ཕྱིས་སུ་ཁེན་ནི་ཡའི་ཕྱི་སྦྱོང་སློབ་མ་100ཙམ་རྣམ་གྲངས་དེའི་མ་དངུལ་རོགས་སྐྱོར་འོག་ཁག་ཐེངས་དབྱེ་ནས་པེ་ཅིང་འགྲིམ་འགྲུལ་སློབ་ཆེན་དུ་སློབ་སྦྱོང་བྱེད་པར་བསྐྱོད་པ་དང་། ད་ཆ་ཁོང་ཚོའི་ཁྲོད་ཀྱི་མང་ཆེ་བ་སློབ་གྲྭ་ཐོན་ནས་ཕྱིར་ལོག་སྟེ་ཁེན་ནི་ཡའི་རྒྱལ་ཁབ་འཛུགས་སྐྲུན་གྱི་ཤེས་ལྡན་པ་གལ་ཆེན་དུ་གྱུར་ཡོད།

ཀྲུང་གོར་སློབ་སྦྱོང་བྱེད་པར་བསྐྱོད་མཁན་སློབ་མ་ཁག་ཐེངས་གཉིས་པ་ཡིན་པའི་མུའུ་ཀེན་ཡས་སྦྱངས་པ་ནི་འཕྲིན་གཏོང་བཟོ་སྐྲུན་ཆེད་ལས་ཡིན་ཞིང་། ཁོང་གིས་དྲན་གསོ་བྱས་པར། ཀྲུང་གོའི་དགེ་རྒན་དང་ལས་རོགས་དགེ་རྒན་གྱི་ངང་རྒྱུད་རིང་པོས་མཛུབ་ཁྲིད་བྱས་པ་ལས། ངས་སློབ་ཁང་ནང་ནས་སྤྱོད་གོ་ཆེ་བའི་ཤེས་བྱ་དང་རྩལ་ནུས་མང་པོ་ཤེས་པ་མ་ཟད། ཀྲུང་གོ་བའི་སྙིང་རུས་ཆེ་བ་དང་གཟབ་ནན་སོགས་ཀྱི་ཕུལ་བྱུང་གཤིས་རྒྱུད་ཀྱང་རྟོགས་བྱུང་། “‘རྒྱུད་གཅིག་ལམ་གཅིག'མཉམ་སྐྲུན་ལས་ང་ཚོ་ཀྲུང་གོར་སློབ་སྦྱོང་བྱེད་པར་འགྲོ་རྒྱུ་བྱུང་བ་མ་ཟད་སྦྱངས་པ་གོ་ཆོད་ཀྱང་བྱུང་ནས་ང་ཚོའི་མི་ཚེའི་རིན་ཐང་མངོན་འགྱུར་ཐུབ་སོང”