2024ལོའི་ཟླ་8ཚེས་16ཉིན་རྫ་ཆུ་དང་མེ་ཀུང་གཙང་པོའི་མཉམ་ལས་ཀྱི་ཕྱི་འབྲེལ་པུའུ་ཀྲང་ཚོགས་འདུ་ཐེངས་དགུ་པ་ཐེ་ལན་གྱི་ཆིང་མའེ་རུ་འཚོགས་པ་རེད། ང་ཚོ་རྫ་ཆུ་དང་མེ་ཀུང་གཙང་པོའི་རྒྱལ་ཁབ་དྲུག་གི་འཐུས་མི་ཚོགས་པའི་ཚོགས་གཙོས་ཕྱོགས་ཁག་གིས《རྫ་ཆུ་དང་མེ་ཀུང་གཙང་པོའི་མཉམ་ལས་ཀྱི་འགོ་ཁྲིད་པའི་ཚོགས་འདུ་ཐེངས་བཞི་པའི་ནེ་ཏུའུ་པི་བསྒྲགས་གཏམ》དང《རྫ་ཆུ་དང་མེ་ཀུང་གཙང་པོའི་མཉམ་ལས་ཀྱི་ལོ་ལྔའི་བྱ་སྤྱོད་འཆར་གཞི(2023ལོ་ནས་2027)》ནང་རྒྱལ་མཚམས་སྒྲོལ་བའི་ཉེས་གསོག་ལ་རྡུང་རྡེག་གཏོང་རྒྱུའི་ཐད་གྲུབ་པའི་ཐུན་མོང་གི་ངོས་འཛིན་དང་ཆོད་སེམས་ལ་དྲན་གསོ་བྱས་ནས་གསལ་བསྒྲགས་སྤེལ་བ་གཤམ་གསལ།

གཅིག མིག་སྔར་རྒྱལ་མཚམས་སྒྲོལ་བའི་དྲ་ཐོག་རྒྱན་འགྱེད་དང་། གློག་འཕྲིན་ཁ་བསླུས། དུག་རྫས་ལྐོག་འཚོང་། མི་འབོར་འདྲེན་ཚོང་། འཇིགས་སྐུལ་རིང་ལུགས། དྲ་ཐོག་ཉེས་གསོག མཚོན་ཆ་ལྐོག་འདྲེན་སོགས་རྒྱལ་མཚམས་སྒྲོལ་བའི་ཉེས་གསོག་བྱེད་སྤྱོད་ཀྱི་ཚབས་ཆེན་རང་བཞིན་དང་དེས་བཟོས་པའི་འཇིགས་སྐུལ་མུ་མཐུད་ཆེ་རུ་ཕྱིན་ནས་རྫ་ཆུ་དང་མེ་ཀུང་གཙང་པོའི་ས་ཁུལ་གྱི་བདེ་འཇགས་བརྟན་ལྷིང་དང་མི་དམངས་ཀྱི་བདེ་འཇགས་བདེ་སྐྱིད་ལ་གནོད་འཚེ་ཕོག་པར་ང་ཚོས་དོ་ཁུར་བྱེད་ཀྱི་ཡོད།

གཉིས། ང་ཚོས་རྒྱལ་མཚམས་སྒྲོལ་བའི་ཉེས་གསོག་ལ་རྡུང་རྡེག་མཐའ་གཅིག་ཏུ་བཏང་ནས་སྤྱི་པའི་བདེ་འཇགས་དང་། ས་ཁོངས་བརྟན་ལྷིང་། མི་དམངས་ཀྱི་ཚེ་སྲོག་དང་རྒྱུ་ནོར་བདེ་འཇགས་བཅས་ལ་འགན་ལེན་བྱ་རྒྱུ་བསྐྱར་བསྒྲགས་བྱེད་པ་དང་། ཕྱོགས་ཁག་གིས་དེའི་ཐད་མུ་མཐུད་འབད་བརྩོན་བྱས་པར་བསྔགས་བརྗོད་བྱ་རྒྱུ་ཡིན། ང་ཚོས་རྒྱལ་ཁབ་ཀྱི་བདག་དབང་དང་། རྒྱལ་སྤྱིའི་བཅའ་ཁྲིམས་དང་དེ་བཞིན་ཁོངས་མིའི་རྒྱལ་ཁབ་ཀྱི་བཅའ་ཁྲིམས་སྒྲོམ་གཞི་བཅས་ལ་བརྩི་འཇོག་བྱེད་པའི་རྨང་གཞིའི་ཐོག་རིམ་པ་ཁག་གི་མཉམ་ལས་དམ་ཟབ་དང་གོ་ལ་ཧྲིལ་པོའི་བདེ་འཇགས་གྲོས་འགོ་སོགས་འབྲེལ་ཡོད་གྲོས་འགོ་དང་འབྲེལ་མཐུད་བྱ་རྒྱུར་ཤུགས་སྣོན་བརྒྱབ་སྟེ། སྤྱི་ཚོགས་བརྟན་ལྷིང་དང་། མི་དམངས་ཀྱི་ཚེ་སྲོག་བདེ་འཇགས། ས་ཁུལ་དར་རྒྱས་གོང་འཕེལ་བཅས་ལ་སྲུང་སྐྱོང་བྱ་རྒྱུའི་རེ་སྒུག་བྱེད་ཀྱི་ཡོད།

གསུམ། ང་ཚོས་ཁོངས་མིའི་རྒྱལ་ཁབ་ཀྱིས་དུག་རྫས་ལྐོག་འདྲེན་དང་། གློག་འཕྲིན་དྲ་རྒྱའི་ཁ་བསླུས་དང་དེ་བཞིན་རྣམ་པ་སྣ་ཚོགས་ཀྱི་དྲ་རྒྱའི་རྒྱན་འགྱེད་ཉེས་གསོག་ལ་རྡུང་རྡེག་གཏོང་རྒྱུ་དེ་སྔོན་ལ་མཉམ་ལས་བྱེད་པའི་བྱ་བ་ཞིག་ཏུ་བརྩིས་ཏེ། རྒྱལ་ཁབ་དྲུག་པོའི་ཁྲིམས་སྒྱུར་དང་བདེ་འཇགས་སྡེ་ཚན་གྱིས་དེའི་ཐད་གཞོགས་འདེགས་དམ་ཟབ་བྱ་རྒྱུར་ལྕག་སྐུལ་བྱེད་པ་དང་ཆ་འཕྲིན་མཉམ་སྤྱོད་ལ་སྐུལ་འདེད་གཏོང་བ་དང་མཐའ་མཚམས་དོ་དམ་ཚོད་འཛིན་ལ་ཤུགས་སྣོན་རྒྱག་དགོས་པའི་འདོད་ཚུལ་འཛིན་གྱི་ཡོད། ཕྱོགས་ཁག་གིས“དུས་བདེའི་རྫ་ཆུ་དང་མེ་ཀུང་གཙང་པོའི”བྱ་སྤྱོད་དང་རྫ་ཆུ་དང་མེ་ཀུང་གཙང་པོའི་ཕྱོགས་བསྡུས་ཁྲིམས་སྒྱུར་བདེ་འཇགས་མཉམ་ལས་ལྟེ་གནས་ཀྱི་སྒྲོམ་གཞིའི་ནང་རང་མོས་མཉམ་ལས་བྱ་རྒྱུར་ང་ཚོས་དགའ་བསུ་ཞུ་རྒྱུ་ཡིན།

བཞི། རྒྱལ་ཁབ་དྲུག་པོའི་རྒྱལ་མཚམས་སྒྲོལ་བའི་ཉེས་གསོག་ལ་རྡུང་རྡེག་གཏོང་བའི་མཉམ་ལས་ཀྱི་དགོས་གཏུག་རང་བཞིན་ཆེ་རུ་གཏོང་རྒྱུའི་ངོས་འཛིན་ཐུབ་པ་དང་། 2024ལོའི་ལོ་མཇུག་གོང་ངམ་ཡང་ན་དུས་ཚོད་སྔ་ཙམ་ནང་རྫ་ཆུ་དང་མེ་ཀུང་གཙང་པོའི་ཁྲིམས་སྒྱུར་དང་སྲོལ་རྒྱུན་མིན་པའི་བདེ་འཇགས་མཉམ་ལས་ཀྱི་པུའུ་ཀྲང་རིམ་པའི་ཚོགས་འདུ་འཚོག་རྒྱུར་ནུས་ཤུགས་ཡོད་རྒུས་རྒྱབ་སྐྱོར་བྱས་ཏེ་རྒྱལ་མཚམས་སྒྲོལ་བའི་ཉེས་གསོག་ལ་རྡུང་རྡེག་གཏོང་བའི་མཉམ་ལས་ལ་གྲུབ་འབྲས་ཞིབ་ཕྲ་ཐོབ་རྒྱུར་སྐུལ་འདེད་གཏོང་རྒྱུ་ཡིན།