ཉེ་ཆར། མལ་གྲོ་གུང་དཀར་རྫོང་ཡིག་འབུལ་ཞུ་བཅར་སྣེ་ལེན་ཁང་དང་ཅུས་ལུང་གཏེར་ཁུལ་གྱི“གཅིག་འཐུས་རྣམ་པའི”ཕྱོགས་བསྡུས་ཞབས་ཞུ་ལྟེ་གནས་ཀྱི་སྒོ་བྱང་དངོས་སུ་བཀལ་བ་རེད། ལྟེ་གནས་དེས་གཏེར་འདོན་ཁེ་ལས་ཀྱི་ཚོང་གཉེར་ཁོར་ཡུག་ལེགས་སུ་གཏོང་བ་དང་། རླངས་འཁོར་རུ་ཁག་གི་སྐྱེལ་འདྲེན་ཐད་ཀྱི་འགལ་ཟླ་སེལ་བ། འབྲེལ་གཏུག་ཐབས་ལམ་ཤར་གཏོང་སོགས་ཀྱི་གནད་དོན་ཐག་གཅོད་བྱེད་པར་གཞོལ་ནས“ས་གནས་དང་ཁེ་ལས་མཉམ་སྐྲུན”གྱི་གཞི་རིམ་བཅོས་སྐྱོང་གི་གཞི་རྟེན་གསར་པ་འཚོལ་ཞིབ་བྱས་ནས་ལག་ལེན་བསྟར་ཡོད།

ཉེ་བའི་ལོ་ཤས་རིང་། ཅུས་ལུང་ཟངས་ལས་ཚད་ཡོད་ཀུང་སིས་གཞི་ཁྱོན་ཅན་གྱི་མ་འཇོག་དང་། གསར་གཏོད་ཅན་གྱི་དོ་དམ། ཕན་ནུས་ཆེ་བའི་གཉེར་སྐྱོང་བཅས་བྱས་པ་བརྒྱུད། མལ་གྲོ་གུང་དཀར་རྫོང་དང་ཐ་ན་ལྷ་ས་གྲོང་ཁྱེར་དང་ལྗོངས་ཡོངས་ཀྱི་དཔལ་འབྱོར་འཕེལ་རྒྱས་མགྱོགས་མྱུར་འགྲོ་བར་ལེགས་སྐྱེས་གལ་ཆེན་ཕུལ་མོད། འོན་ཀྱང་ཐོན་སྐྱེད་བསྐྱར་མ་རྒྱ་ཆེར་གཏོང་བར་སྐུལ་འདེད་མགྱོགས་མྱུར་གཏོང་བ་དང་ཆབས་ཅིག གཏེར་ཁུལ་དུ་ངལ་ལས་རྩོད་གཞི་དང་འཕྲུལ་ཆས་བོགས་གཏོང་སོགས་ཀྱི་ཡིག་འབུལ་ཞུ་བཅར་གྱི་གྱོད་གཞི་ཐོན་གྱི་ཡོད། ཁེ་ལས་འཕེལ་རྒྱས་གཏོང་རིང་འཕྲད་པའི་མངོན་གསལ་དོད་པའི་གནད་དོན་ཐག་གཅོད་ཧུར་ཐག་བྱ་ཆེད། མལ་གྲོ་གུང་དཀར་རྫོང་གིས་ཅུས་ལུང་གཏེར་ཁུལ་དུ“གཅིག་འཐུས་རྣམ་པའི”ཕྱོགས་བསྡུས་ཞབས་ཞུའི་ལྟེ་གནས་བཙུགས་ནས་གཏེར་ཁུལ་གྱི་ཡིག་འབུལ་ཞུ་བཅར་གྱི་གནད་དོན“གཅིག་འཐུས་བདག་སྤྲོད་དང་། སྡེབ་གཅིག་འདུམ་འགྲིག་ཐག་གཅོད། འཁོར་འབྲེལ་ཧྲིལ་པོ་ཐག་གཅོད”བཅས་ཐུབ་པར་བྱས་ཡོད།

མལ་གྲོ་གུང་དཀར་རྫོང་ཡིག་འབུལ་ཞུ་བཅར་སྣེ་ལེན་ཁང་དང་ཅུས་ལུང་གཏེར་ཁུལ་གྱི“གཅིག་འཐུས་རྣམ་པའི”ཕྱོགས་བསྡུས་ཞབས་ཞུ་ལྟེ་གནས་སུ་ཡིག་འབུལ་ཞུ་བཅར་སྣེ་ལེན་ཁང་དང་། བཅའ་ཁྲིམས་བློ་འདྲི་རོགས་སྐྱོར་ཁང་། འགལ་ཟླ་དང་རྩོད་གཞི་འདུམ་འགྲིག་ཁང་། ཏང་དམངས་ཀྱི་ཞབས་ཞུའི་ལྟེ་གནས། སྤྱི་ཚོགས་བདེ་འཇགས་ཕྱོགས་བསྡུས་བཅོས་སྐྱོང་ལྟེ་གནས། བཟོ་ཚོགས་ཀྱི་ཁེ་དབང་སྲུང་སྐྱོང་ལྟེ་གནས་སོགས“ཁང་གསུམ་དང་ལྟེ་གནས་གསུམ”བཙུགས་པར་བརྟན་ལྷིང་སྲུང་སྐྱོང་དང་། ཕྱོགས་བསྡུས་བཅོས་སྐྱོང་། འགལ་ཟླ་འདུམ་འགྲིག་བཅས་ཀྱི་ནུས་པ་གཞི་གཅིག་ཏུ་འདུས་ཡོད། དེས་རྒྱ་ཆེའི་ལས་ཞུགས་མང་ཚོགས་ལ་གནས་སྐབས་སྡོད་གནས་ཐོ་འགོད་དང་། ངལ་རྩོལ་འགན་ལེན། རྩོད་གཞི་འདུམ་འགྲིག ཡིག་འབུལ་ཞུ་བཅར་སྣེ་ལེན། ཞུ་གཏུག་ཁེ་དབང་སྲུང་སྐྱོང་། བཅའ་ཁྲིམས་རོགས་སྐྱོར་སོགས་དམངས་ཕན་ཞབས་འདེགས་རབ་དང་རིམ་པ་ཞུ་བ་དང་། མང་ཚོགས་ཀྱི་རེ་ཞུ་དང་ཁེ་ཕན་མཐུན་སྦྱོར་བྱེད་ཐབས་ཕྱོགས་ཡོངས་ནས་ཤར་གཏོང་བྱེད་པ། གཏེར་ཁུལ་གྱི་བཅོས་སྐྱོང་ཆུ་ཚད་ཕྱོགས་ཡོངས་ནས་མཐོ་རུ་གཏོང་བ། གཏེར་ཁུལ་གྱི་ལས་བཟོའི་ཁྲིམས་མཐུན་ཁེ་དབང་ལ་འགན་ལེན་ཏན་ཏིག་བྱེད་པ་བཅས་ཀྱི་ཐོག་ནས“གནད་དོན་ལ་འགན་འཁུར་མཁན་དང་ཐག་གཅོད་བྱེད་མཁན་ཡོད་པ་དང་། ཁེ་ཕན་ལ་སྲུང་སྐྱོང་བྱེད་མཁན་ཡོད་པ”བཅས་ཀྱི་རྣམ་པ་ཡག་པོ་ཞིག་བཏོད་ཡོད།

“ཡིག་འབུལ་ཞུ་བཅར་སྣེ་ལེན་ཁང་དང་ཅུས་ལུང་གཏེར་ཁུལ་གྱི‘གཅིག་འཐུས་རྣམ་པའི’ཕྱོགས་བསྡུས་ཞབས་ཞུའི་ལྟེ་གནས་བཙུགས་པ་བརྒྱུད། ཚང་མའི་བསམ་ཚུལ་ཉན་ནས་འབྲེལ་ཡོད་བཅའ་ཁྲིམས་དང་ཁྲིམས་སྲོལ་ལྟར་ཁོང་ཚོར་རོགས་རམ་གང་ཐུབ་བྱེད་ཀྱི་ཡོད། ལྟེ་གནས་བརྒྱུད་ཡིག་འབུལ་ཞུ་བཅར་བྱས་པའི་གྱོད་གཞི་དུས་ཐོག་ཏུ་གཞི་རིམ་དུ་ཐག་གཅོད་བྱས་པ་མ་ཟད། དེ་བས་ཞི་མཐུན་དང་བདེ་འཇགས་ཀྱི་ལས་ཀའི་ཁོར་ཡུག་ཅིག་ཀྱང་བཏོད་པ་ལས་ཚང་མ་བློ་བདེ་པོ་བྱུང་སོང”ཞེས་ཅུས་ལུང་ཟངས་ལས་ཚད་ཡོད་ཀུང་སིའི་སྡེ་ཁུལ་ལས་དོན་ཁྲུའི་བདེ་སྲུང་ཁོའོ་ཡི་ཁོའོ་ཀྲང་གཞོན་པ་ལེའོ་ཧོན་གྱིས་བཤད།