ཉེ་ཆར། ཆར་ཞོད་ཆེ་བས་ལྷ་ས་གྲོང་ཁྱེར་ཁྲེང་ཀོན་ཆུས་བརྒྱད་གཅིག་ཁྲོམ་གཞུང་བརྒྱད་གཅིག་སྡེ་ཁུལ་ཁོངས་གཏོགས་ཁུལ་གྱི་འགྲོ་ལམ་ཁག་གཅིག་ལ་ཆུ་འཁྱིལ་ནས་གྲོང་མིའི་འཚོ་བར་སྟབས་མི་བདེ་བ་བཟོས་ཡོད། གྲོང་མི་བདེ་འཇགས་ངང་ཕྱིར་སྐྱོད་ཐུབ་པར་འགན་ལེན་བྱ་ཆེད། བརྒྱད་གཅིག་སྡེ་ཁུལ་གྱིས་གནད་དོན་དུས་ཐོག་ཏུ་ཐག་གཅོད་བྱས་ནས་གྲོང་མི་རྒྱུན་གཏན་ལྟར་ཕྱིར་སྐྱོད་ཐུབ་པར་སྟབས་བདེ་བསྐྲུན་ཡོད། བརྒྱད་གཅིག་སྡེ་ཁུལ་གྱི་དྲ་མིག་ལས་དོན་པས་ཁོངས་གཏོགས་ཁུལ་གྱི་ཆུ་འབུད་མ་ལག་དང་། ས་འོག་རླངས་འཁོར་འཇོག་ས། གཞུང་ལམ་ཨ་མ་སོགས་གཙོ་གནད་ས་ཁོངས་ཚང་མར་རིམ་པ་བཞིན་སྐོར་ཞིབ་བྱས་པ་མ་ཟད། ཆུ་འབུད་ཡག་པོ་མེད་པའི་ལམ་ངོས་ཁག་གཅིག་ལ་དུས་ཐོག་ཏུ་འཕྲལ་སྡོམ་བྱ་ཐབས་སྤྱད་དེ་ས་འོག་ཆུ་ལམ་ཡག་པོ་བཤངས་ནས་བདེ་འཇགས་ཀྱི་མངོན་མེད་རྐྱེན་ངན་བསལ་ཡོད། བརྒྱད་གཅིག་སྡེ་ཁུལ་གྱི་དྲ་མིག་ལས་དོན་པས་བཙོག་ཆུ་གཙང་གསིང་བྱེད་པ་དང་དུས་མཚུངས། དུད་ཚང་དུ་བསྐྱོད་དེ་གྲོང་མི་མང་ཚོགས་ལ་ཆར་དུས་ཀྱི་བདེ་འཇགས་རྒྱུན་ཤེས་དྲིལ་བསྒྲགས་ཧུར་ཐག་བྱས་པ་དང་ཆབས་ཅིག གྲོང་མིར་གློག་སྤྱོད་བདེ་འཇགས་ལ་དོ་སྣང་བྱེད་དགོས་པའི་དྲན་སྐུལ་ཡང་བྱས་ནས། བསམ་ཡུལ་ལས་འདས་པའི་དོན་རྐྱེན་མི་ཐོན་སྔོན་འགོག་དང་ཁོང་ཚོའི་བདེ་འཇགས་ལ་དོགས་ཟོན་གྱི་འདུ་ཤེས་ཟབ་ཏུ་བཏང་བ་རེད།