མཉམ་ལས་གཉིས་ཕན་མཐའ་འཁྱོངས་ཀྱིས་དཔལ་འབྱོར་གོ་ལ་ཧྲིལ་པོ་ཅན་ལ་སྐུལ་འདེད་གཏོང་དགོས།
ཧོ་དབྱིན།
ཀྲུང་གོས་ཐོག་མཐའ་བར་གསུམ་དུ་སྒོ་དབྱེར་བརྟེན་ནས་སྒྱུར་བཅོས་ལ་སྐུལ་འདེད་བཏང་སྟེ། རྒྱལ་སྤྱིའི་མཉམ་ལས་རྒྱ་ཆེར་གཏོང་རིང་སྒོ་དབྱེའི་ནུས་པ་ཆེ་རུ་བཏང་ནས་རྒྱལ་ཁབ་ཁག་དང་མཉམ་དུ་འཕེལ་རྒྱས་ཀྱི་གོ་སྐབས་དང་ཁེ་སྤོགས་མཉམ་སྤྱོད་བྱེད་བཞིན་ཡོད། སྒྱུར་བཅོས་སྒོ་དབྱེ་བྱེད་རིང་ཀྲུང་གོར་ད་ཆའི་འཕེལ་རྒྱས་བྱུང་བ་དང་འཛམ་གླིང་དང་མཉམ་འདྲེས་ཐུབ་ཡོད་ལ། ཕྱོགས་ཡོངས་ནས་སྒྱུར་བཅོས་གཏིང་ཟབ་ཏུ་གཏོང་རིང་འབྱུང་འགྱུར་ཕྱོགས་སུ་སྐྱོད་ཐུབ་པ་དང་འཛམ་གླིང་ཡོངས་ལ་ཕན་པ་ཐོབ་ངེས་ཡིན།
དཔལ་འབྱོར་གོ་ལ་ཧྲིལ་པོ་ཅན་གྱི་དུས་རབས་སུ་མཁོ་བ་ནི་ཁ་ཕྲལ་གྱི་འགལ་རྐྱེན་ཆེན་པོ་བཟོ་རྒྱུ་དེ་མ་ཡིན་པར་སྦྲེལ་ཟམ་འཛུགས་རྒྱུ་དེ་ཡིན་པ་དང་། འགྲན་རྒོལ་གྱི་ལྕགས་ཡོལ་ཕྱེ་རྒྱུ་དེ་མ་ཡིན་པར་མཉམ་ལས་ཀྱི་བདེ་ལམ་འདིང་རྒྱུ་དེ་ཡིན། མིག་སྔར། རྒྱལ་སྤྱིའི་དུས་བབ་སྣེ་མང་རྙོག་འཛིང་ཆེ་བ་དང་། གོ་ལ་ཧྲིལ་པོ་ཅན་ལས་ལྡོག་པའི་བསམ་བློའི་རླབས་རྒྱུན་ཐོན་པ། ཕྱོགས་རྐྱང་རིང་ལུགས་དང་སྲུང་སྐྱོང་རིང་ལུགས་མངོན་གསལ་དོད་པོས་མང་དུ་འགྲོ་བ་བཅས་ཡིན་པས། རྒྱལ་ཁབ་ཁག་གིས་མཉམ་ལས་གཉིས་ཕན་གྱི་ནུས་པ་ཆེ་རུ་བཏང་ནས་མཐུན་སྒྲིལ་མཉམ་ལས་ཀྱི་ཡང་དག་པའི་ལམ་བུར་དེ་བས་སྐྱོད་དགོས།
མཉམ་ལས་གཉིས་ཕན་བྱེད་པར་རྒྱལ་ཁབ་ཁག་གི་ཁེ་ཕན་གྱི་མཐུན་ཆ་ཧུར་ཐག་འཚོལ་བ་དང་། རང་སོ་སོའི་ལེགས་ཆ་འདོན་པ། གཉིས་ཕན་མཉམ་ལས་བཅས་བྱས་ཏེ་ཕན་ཚུན་གྲུབ་འབྲས་ཐོབ་པར་བྱེད་དགོས། འཛམ་གླིང་གི་དཔལ་འབྱོར་སྒྲིག་གཞི་ཆེ་གྲས་གཉིས་པ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེ་ཤོས་ཡིན་པའི་ངོས་ནས་ཀྲུང་གོས་ཞི་བདེ་འཕེལ་རྒྱས་དང་། སྒོ་དབྱེ་འཕེལ་རྒྱས། མཉམ་ལས་འཕེལ་རྒྱས། གཉིས་ཕན་འཕེལ་རྒྱས་བཅས་སྔ་ཕྱི་བར་གསུམ་དུ་མཐའ་འཁྱོངས་བྱེད་ཀྱི་ཡོད། ཀྲུའུ་ཞི་ཞི་ཅིན་ཕིང་གིས“ང་ཚོས་ཀུན་ཕན་བསྟུན་མཁས་ཀྱི་དཔལ་འབྱོར་གོ་ལ་ཧྲིལ་པོ་ཅན་དར་སྤེལ་གཏོང་བ་དང་། སྤུས་ཚད་མཐོ་བའི‘རྒྱུད་གཅིག་ལམ་གཅིག’མཉམ་སྐྲུན་ལ་སྐུལ་འདེད་གཏོང་བ། གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་ལག་ལེན་བསྟར་བ་བཅས་ཀྱི་དམིགས་ཡུལ་ནི་འཕར་སྣོན་གོ་སྐབས་ཀུན་ཕན་ཡོང་བར་བྱེད་པ་དང་འཕེལ་རྒྱས་ཀྱི་ལམ་བུའི་བསྟུན་མཁས་ལ་སྐུལ་འདེད་བཏང་ནས། རྒྱལ་ཁབ་ཁག་གི་མི་དམངས་ལ་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཐུབ་པ་དང་། ‘སའི་གོ་ལ་གྲོང་ཚོའི’ནང་གི་རྒྱལ་ཁབ་ཀྱིས་དར་རྒྱས་གོང་འཕེལ་གྱི་ཇུས་གཞི་མཉམ་འགོད། གཉིས་ཕན་གྱི་འདུ་ཤེས་ཐུན་མོང་གི་ངོས་འཛིན་ལ་འགྱུར་བ་བཅས་བྱེད་པ་དེ་ཡིན”ཞེས་གསུངས་ཡོད།
སྒྱུར་བཅོས་སྒོ་དབྱེ་བྱེད་རིང་ཀྲུང་གོར་ད་ལྟའི་འཕེལ་རྒྱས་བྱུང་བ་དང་འཛམ་གླིང་དང་མཉམ་འདྲེས་ཐུབ་ཡོད་ལ། ཕྱོགས་ཡོངས་ནས་སྒྱུར་བཅོས་གཏིང་ཟབ་ཏུ་གཏོང་རིང་འབྱུང་འགྱུར་ཕྱོགས་སུ་སྐྱོད་ཐུབ་པ་དང་འཛམ་གླིང་ཡོངས་ལ་ཕན་པ་ཐོབ་ངེས་ཡིན། ཀྲུང་གོ་གུང་ཁྲན་ཏང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་ཕྱོགས་ཡོངས་ནས་སྒྱུར་བཅོས་སྔར་བས་ཟབ་ཏུ་གཏོང་བ་དང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་བརྗིད་ཆེའི་འཆར་གཞི་བཀོད་ནས་ཆུ་ཚད་མཐོ་བའི་ཕྱི་ཕྱོགས་སྒོ་དབྱེའི་སྒྲིག་སྲོལ་ལམ་སྲོལ་འཐུས་སྒོ་ཚང་དུ་གཏོང་དགོས་པའི་ནན་བཤད་བྱས་ཡོད། འབྱུང་འགྱུར་ཀྲུང་གོས་ལམ་ལུགས་རྣམ་པའི་སྒོ་དབྱེ་རྒྱ་ཆེར་བཏང་སྟེ་ཕྱི་ཕྱོགས་ཚོང་དོན་སྒྲིག་སྲོལ་སྒྱུར་བཅོས་གཏིང་ཟབ་ཏུ་གཏོང་བ་དང་། ཕྱི་རྒྱལ་གྱི་ཚོང་པའི་མ་འཇོག་དང་ཕྱི་ཕྱོགས་མ་འཇོག་གི་དོ་དམ་སྒྲིག་སྲོལ་སྒྱུར་བཅོས་གཏིང་ཟབ་ཏུ་གཏོང་བ། ས་ཁོངས་སྒོ་དབྱེའི་བཀོད་པ་ལེགས་སུ་གཏོང་བ་བཅས་བྱས་ནས་སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་ལ་སྐུལ་འདེད་གཏོང་བའི་ལམ་སྲོལ་འཐུས་སྒོ་ཚང་དུ་གཏོང་གི་ཡིན། ཀྲུང་གོས་འཛམ་གླིང་ཚོང་དོན་རྩ་འཛུགས་ལྟེ་བར་བྱས་པའི་ཕྱོགས་མང་ཚོང་དོན་སྒྲིག་སྲོལ་མུ་མཐུད་སྲུང་སྐྱོང་བརྟན་པོ་བྱས་ནས་གོ་ལ་ཧྲིལ་པོའི་དཔལ་འབྱོར་བཅོས་སྐྱོང་མ་ལག་སྒྱུར་བཅོས་ནང་ཧུར་ཐག་ཞུགས་ཏེ་གོ་ལ་ཧྲིལ་པོའི་སྤྱི་པའི་ཐོན་རྫས་དེ་བས་མང་པོ་མཁོ་འདོན་བྱེད་ཀྱི་ཡིན། ཀྲུང་གོས་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དོན་འཁྱོལ་ལ་མུ་མཐུད་སྐུལ་འདེད་གཏོང་བ་དང་། གོ་ལ་ཧྲིལ་པོའི་འཕེལ་རྒྱས་མཉམ་ལས་ལ་མ་དངུལ་གཏོང་ཤུགས་ཆེ་རུ་གཏོང་བ། རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་རང་བརྟེན་འཕེལ་རྒྱས་ཀྱི་ནུས་པ་ཆེ་རུ་གཏོང་རོགས་བྱེད་པ། དཔལ་འབྱོར་གོ་ལ་ཧྲིལ་པོ་ཅན་གྱི“སྒོ་ངའི་བག་ལེབ”ཐུན་མོང་ཐོག་ཆེ་རུ་གཏོང་བ་དང་འདྲ་མཉམ་ངང་བགོ་བཤའ་ཡག་པོ་རྒྱག་པ། འཕེལ་རྒྱས་གང་ལེགས་དང་དོ་སྙོམས་ཡོང་བ་བཅས་བྱས་ནས་དཔལ་འབྱོར་གོ་ལ་ཧྲིལ་པོ་ཅན་དེ་བས་སྒོ་དབྱེ་དང་། བསྟུན་མཁས། ཀུན་ཕན། དོ་སྙོམས་བཅས་ཀྱི་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་གཏོང་གི་ཡིན། ཀྲུང་གོས་རྒྱལ་ཁབ་ཁག་དང་མཉམ་དུ་དེང་རབས་ཅན་གྱི་འགྲོ་ལམ་ཐོག་གི་ལམ་རོགས་བྱེད་འདོད་ཡོད་ལ། ཕྱོགས་ཁག་ཀྲུང་གོའི་ལུགས་ཀྱི་དེང་རབས་ཅན་གྱི་མྱུར་བགྲོད་མེ་འཁོར་ལ་ཞུགས་པར་དགའ་བསུ་ཞུ་རྒྱུ་ཡིན།
ཀྲུང་གོའི་ཁྱད་ཆོས་ཀྱི་རྒྱལ་ཁབ་ཆེན་པོའི་ཕྱི་འབྲེལ་གྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དང་ལྷག་པར་དུ་ཞི་ཅིན་ཕིང་གི་ཕྱི་འབྲེལ་དགོངས་པ་མཛུབ་ཁྲིད་དུ་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་གྱི་དམིགས་ཚད་ལས་འགན་དང་དཔེ་བསྡུར་དང་། རང་རྟོན་རང་ཚུགས་དང་། སྒོ་དབྱེ་བསྟུན་མཁས། དྲང་གཞག་དྲང་བདེན། མཉམ་ལས་གཉིས་ཕན་བཅས་ཀྱི་མཛད་ཕྱོགས་ཀྱི་རྩ་དོན་མཐའ་འཁྱོངས། རྣམ་པ་གསར་པ་རྒྱུན་ཆད་མེད་པར་གཏོད་པ་བཅས་བྱས་ནས། མིའི་རིགས་ཀྱི་འཕེལ་རྒྱས་ཡར་ཐོན་ལ་ལེགས་སྐྱེས་གསར་པ་རྒྱུན་ཆད་མེད་པར་འབུལ་གྱི་ཡིན།