འདི་ནི་ཁེན་ནི་ཡའི་སུའོ་ཤིས་ཨན་ས་འོག་ཚ་ནུས་གློག་འདོན་ས་ཚིགས་རྣམ་གྲངས་ཀྱི་གློག་གཏོང་འཕྲུལ་ཚན་ཨང་3པའི་ཟུར་ཞིག་ཡིན་པ།

ཨ་ཧྥེ་རི་ཁ་ཤར་མའི་རོང་ས་ཆེན་པོ་འདི་ཉིད་ཁེན་ནི་ཡའི་ལྷོ་བྱང་ཡོངས་སུ་ཁྱབ་ནས་ས་གནས་དེ་གར་ཕུན་སུམ་ཚོགས་པའི་ས་འོག་ཚ་ནུས་ཐོན་ཁུངས་བྱུང་ཡོད། རྒྱལ་ཁབ་དེའི་མེ་རིའི་ཁ་ཆེ་ཤོས་ཡིན་པའི་མེ་ནེན་ཅ་དབྱི་མེ་རིའི་ཁ་དེ་ཁེན་ནི་ཡའི་གྲོང་ཁྱེར་ཆེ་གྲས་བཞི་པ་ན་ཁུའུ་ལུའུ་ཡི་བྱང་ཕྱོགས་ཀྱི་སྤྱི་ལེ་10ཡི་སར་ཡོད། 2021ལོར་མེ་ནེན་ཅ་དབྱིའི་ས་འོག་ཚ་ནུས་གསར་སྤེལ་རྣམ་གྲངས་དངོས་སུ་ལག་ལེན་བསྟར་འགོ་ཚུགས་ཤིང་། དུས་ཐེངས་དང་པོར་འཆར་འགོད་བྱས་པའི་གློག་གཏོང་འཕྲུལ་འཁོར་ནས་གློག་གཏོང་ཚད་ཀྲའོ་ཝ་105ཟིན་པའི་ནང་ཀྲེ་ཅང་ཁའེ་ཧྲན་ཚོགས་པ(ཁའེ་ཧྲན་ཚོགས་པ)ཡིས་འགན་ཡོངས་སུ་བླངས་པའི་ཀྲའོ་ཝ་35ཟིན་པའི་ས་འོག་ཚ་ནུས་གློག་འདོན་ས་ཚིགས་སྟེ། སུའོ་ཤིས་ཨན་ས་འོག་ཚ་ནུས་གློག་འདོན་ས་ཚིགས་ནས་ན་ནིང་ཟླ་6པའི་ཟླ་མཇུག་ཏུ་གློག་གཏོང་འགོ་བཙུགས་ཡོད། དེ་ནི་ཇུས་འགོད་ནས་འཛུགས་སྐྲུན་བར་དང་དེ་ནས་སྙོམས་སྒྲིག་ཚོད་ལྟ་བར་ཀྲུང་གོའི་ཁེ་ལས་གཅིག་པུས་ལེགས་སྒྲུབ་བྱས་པའི་ཨ་ཧྥེ་རི་ཁའི་ས་འོག་ཚ་ནུས་གློག་འདོན་ས་ཚིགས་དང་པོ་དེ་རེད།

“དེ་ནི་དུས་གཅིག་ཏུ་འཆར་འགོད་བྱས་པའི་ནང་ལས་མཇུག་འགྲིལ་སྔ་ཤོས་དང་སྤྱོད་འགོ་ཚུགས་སྔ་ཤོས་ཀྱི་གློག་ཁང་རེད”དོ་བདག་ཕྱོགས་ཏེ་ཁེན་ནི་ཡ་སུའོ་ཤིས་ཨན་ནུས་རྒྱུ་ཚད་ཡོད་ཀུང་སིའི་རྣམ་གྲངས་ཀྱི་ཅིང་ལི་མའོ་ཤིས·ལུའོ་ཏི་ཆིས་འགན་ཡོངས་སུ་བླངས་པའི་འོས་ཐོབ་རག་པ་ནས་ཇུས་འགོད་ཇུས་གཞི་གཏན་འཁེལ་བར་དང་། དེ་ནས་འཛུགས་སྐྲུན་འགོ་ཚུགས་པ་དང་། སྒྲིག་ཆས་སྙོམས་སྒྲིག་ཚོད་ལྟ། གློག་གཏོང་འགོ་ཚུགས་པ་བཅས་ཀྱི་བར་ཁའེ་ཧྲན་ཚོགས་པས་ཐོག་མཐའ་བར་གསུམ་དུ་ལས་ཕྱོད་ཧ་ཅང་ཆེན་པོ་རྒྱུན་འཁྱོངས་བྱས་ཡོད། “ཀྲུང་གོའི་ཁེ་ལས་ཀྱི་ལས་དོན་མི་སྣའི་ལས་བཀུར་སྙིང་སྟོབས་དེ་གུས་བཀུར་ཡི་རང་བྱེད་འོས་པ་ཞིག་འདུག”ཅེས་གསར་འགོད་པར་བཤད།

ཀྲུང་གོའི་ལག་རྩལ་དང་སྒྲིག་ཆས་ལའང་དགེ་མཚན་མངོན་གསལ་དོད་པོ་ལྡན་ཡོད། ཁའེ་ཧྲན་ཚོགས་པའི་ཁེན་ནི་ཡའི་རྣམ་གྲངས་ཀྱི་འགན་འཁུར་བ་ལི་ཧའེ་ཐའོ་ཡིས། རྒྱལ་ཁབ་གཞན་གྱི་ཁེ་ལས་ཀྱི་སྒྲིག་ཆས་དང་བསྡུར་ན་ཁའེ་ཧྲན་ཚོགས་པའི་སྒྲིག་ཆས་ལ་ལོ་ལྟར་སྤྱོད་མཚམས་བཞག་ནས་ཞིབ་བཤེར་ཉམས་གསོ་བྱེད་དགོས་པའི་དུས་ཚོད་དེ་བས་ཐུང་བ་དང་ལོ་ཧྲིལ་པོའི་གློག་གཏོང་དུས་ཡུན་གྱི་བསྡོམས་འབོར་ཆུ་ཚོད་8000ལས་བརྒལ་ནས་འཛམ་གླིང་གི་སྔོན་ཐོན་ཆུ་ཚད་དུ་སླེབས་ཡོད། “སྲོལ་རྒྱུན་ལག་རྩལ་སྤྱད་པའི་ས་འོག་ཚ་ནུས་གློག་གཏོང་རྣམ་གྲངས་ཀྱི་འཛུགས་སྐྲུན་དུས་ཡུན་རིང་བ་དང་། མ་གནས་མཐོ་བ། ཆ་སྙོམས་འཁོར་རྒྱུག་དུས་ཚོད་ལ་ཚད་བཀག་ཡོད་མོད། འོན་ཀྱང་ང་ཚོས་རང་བརྟེན་གསར་སྤེལ་བྱས་པའི་ས་འོག་ཚ་ནུས་ཁྲོན་ཁའི་དཔེ་དུམ་གློག་འདོན་ས་ཚིགས་ལག་རྩལ་གྱིས་གནད་དོན་དེ་དག་ཐག་གཅོད་ཡག་པོ་བྱས་ཡོད”ཅེས་ལི་ཧའེ་ཐའོ་ཡིས་བཤད།

ཁེན་ནི་ཡས་བཀོད་པའི“2030ལོའི་རེ་འདོད”ཞེས་པའི་ནང་། རྒྱལ་ཁབ་དེས་2030ལོའི་གོང་དུ་ས་འོག་ཚ་ནུས་གློག་གཏོང་གིས་གློག་གཏོང་བསྡོམས་འབོར་གྱི་60%ཟིན་རྒྱུའི་དམིགས་ཚད་མངོན་འགྱུར་བྱ་རྒྱུ་ཡིན་ཞེས་བཏོན་ཡོད། ལུའོ་ཏི་ཆིས“ང་ཚོས་ས་འོག་ཚ་ནུས་ཐོན་ཁུངས་གསར་སྤེལ་བྱེད་པར་ཀྲུང་གོའི་ཁེ་ལས་ཀྱིས་ལག་རྩལ་གསར་རྐྱང་མཁོ་འདོན་བྱས་བྱུང་། སུའོ་ཤིས་ཨན་ས་འོག་ཚ་ནུས་གློག་འདོན་ས་ཚིགས་ཀྱི་སྒྲིག་ཆས་བརྟན་པོ་དང་ནུས་ཆེའི་ངང་འཁོར་རྒྱུག་ཐུབ་པ་དེ་ཐོག་ནས་ཀྲུང་གོའི་ལག་རྩལ་ནི་ཡིད་ཆེས་བྱེད་འོས་པ་ཞིག་ཡིན་པ་གསལ་བཤད་གང་ལེགས་ཐུབ་ཀྱི་འདུག ཀྲུང་གོའི་ལག་རྩལ་གྱིས་ཁེན་ནི་ཡའི་ས་འོག་ཚ་ནུས་ཐོན་ཁུངས་གསར་སྤེལ་མགྱོགས་སུ་གཏོང་རྒྱུར་མུ་མཐུད་རམ་འདེགས་བྱས་ནས་ཁེན་ནི་ཡའི་ནུས་རྒྱུ་ཕྱོགས་སྒྱུར་དང་ལྗང་མདོག་འཕེལ་རྒྱས་ལ་སྐུལ་འདེད་གཏོང་ཐུབ་རྒྱུ་རེད”ཅེས་བཤད།

རྣམ་གྲངས་འཛུགས་སྐྲུན་བྱེད་རིང་ཀྲུང་གོའི་ཁེ་ལས་ཀྱིས་ས་གནས་དེ་གར་ལག་རྩལ་ཤེས་ལྡན་པ་ཁག་གཅིག་གསོ་སྐྱོང་བྱེད་རོགས་བྱས་པ་དང་ཨར་ལས་མང་བའི་དུས་སུ་ས་གནས་དེ་གའི་ལས་མི་500ཙམ་བསྡུས་ཡོད། རྣམ་གྲངས་ཀྱི་ཨར་ལས་བྱ་ཡུལ་དུ་སྐྲུན་འགན་འཁུར་མཁན་ཀྲུང་གོ་གློག་ཤུགས་འཛུགས་སྐྲུན་ཚོགས་པ་ཧྥུའུ་ཅན་ལས་གྲྭ་ཚད་ཡོད་ཀུང་སི(ཧྥུའུ་ཅན་གློག་ཤུགས་འཛུགས་སྐྲུན)ཡི་ཨར་ལས་བཟོ་བཀོད་པ་ཝ་ཆི་ལ·ཏན་ཉི་སིས“འདི་ནི་ངས་ནུས་རྒྱུ་གསར་སྤེལ་ཁྱབ་ཁོངས་ཀྱི་ལས་ཀ་བྱེད་ཐེངས་དང་པོ་ཡིན། ཀྲུང་གོའི་ལས་རོགས་ཀྱི་རོགས་རམ་འོག་ངས་ལག་རྩལ་མང་པོ་ཤེས་བྱུང་ལ། རྣམ་གྲངས་དོ་དམ་གྱི་ཉམས་མྱོང་མི་ཉུང་བའང་གསོག་ཐུབ་བྱུང་། དེ་ལས་སླད་ཕྱིན་འབྲེལ་ཡོད་ལས་དོན་ནང་མུ་མཐུད་ཞུགས་པར་ཕན་ཐོགས་ཆེན་པོ་ཡོང་རྒྱུ་རེད”ཅེས་བཤད།