རང་སྐྱོང་ལྗོངས་ཀྱི་འགོ་ཁྲིད་ཀྱིས་ལྷ་ས་གྲོང་ཁྱེར་དུ་བཟོ་སྐྲུན་གད་སྙིགས་གཙང་སེལ་བཅོས་སྒྲིག་ལས་དོན་ལ་བརྟག་ཞིབ་གནང་བ།
ཚེས་16ཉིན་གྱི་སྔ་དྲོར། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཀྲང་ལིས་རུ་སྣེ་ཁྲིད་པའི་བརྟག་ཞིབ་ཚོགས་ཆུང་ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་དང་། སྟག་རྩེ་ཆུས། ཆུ་ཤུར་རྫོང་བཅས་སུ་བསྐྱོད་དེ་ལྷ་ས་གྲོང་ཁྱེར་གྱི་བཟོ་སྐྲུན་གད་སྙིགས་གཙང་སེལ་བཅོས་སྒྲིག་ལས་དོན་དོན་འཁྱོལ་དང་བཟོ་སྐྲུན་གད་སྙིགས་ཐོན་ཁུངས་ཅན་བེད་སྤྱོད་གནས་ཚུལ་ལ་བརྟག་ཞིབ་བྱས་པ་མ་ཟད། ལས་དོན་སྙན་ཞུ་ཡང་གསན་པ་རེད།
བརྟག་ཞིབ་ཚོགས་ཆུང་དང་བཅས་པ་སྔ་རྗེས་སུ་གངས་རི་ཉི་ཤར་བཟོ་སྐྲུན་གད་སྙིགས་ཚུར་བསྡུ་སོ་ཕག་བཟོ་གྲྭ་དང་། སྟོད་ལུང་བདེ་ཆེན་ཆུས་གནས་ཆུང་ཁྲོམ་གཞུང་། ལྷ་ས་གྲོང་ཁྱེར་བཟོ་སྐྲུན་གད་སྙིགས་ཐོན་ཁུངས་ཅན་བེད་སྤྱོད་གཙང་སེལ་ལྟེ་གནས་བཅས་སུ་ཕེབས་ཏེ་ས་གནས་ས་ཐོག་ཏུ་ལྟ་ཞིབ་དང་། སྙན་ཞུ་གསན་པ། འདྲི་རྟོགས་སྤེལ་རེས་སོགས་ཀྱི་བྱེད་ཐབས་ལ་བརྟེན་ནས་བཟོ་སྐྲུན་གད་སྙིགས་འབྱུང་རྩ་ནས་ཉུང་གཏོང་དང་། རིགས་ཕྱེ་ནས་གཡུག་པ། བར་སྣེའི་བསྡུ་འདྲེན། མཐའ་སྣེའི་གཙང་སེལ་བཅས་ཀྱི་གནས་ཚུལ་སོགས་ཤེས་རྟོགས་ཞིབ་ཕྲ་བྱས་ཡོད།
བརྟག་ཞིབ་ཚོགས་ཆུང་གིས་ནན་བཤད་བྱས་དོན། བཟོ་སྐྲུན་གད་སྙིགས་བརྒྱུད་རིམ་ཧྲིལ་པོའི་དོ་དམ་ལ་དམ་འཛིན་ནན་པོ་བྱས་ཏེ་སྡེ་ཚན་མཉམ་འགུལ་དང་ཆ་འཕྲིན་མཉམ་སྤྱོད་བྱེད་ཤུགས་ཆེ་རུ་བཏང་སྟེ་ལྟ་འདོམས་ཀྱི་མཉམ་ཤུགས་ཤིག་ཆགས་པར་བྱས་ནས་ལྟ་འདོམས་བྱ་ཐབས་ལག་བསྟར་དོན་འཁྱོལ་ནུས་ལྡན་ཐུབ་པའི་འགན་ལེན་ཏན་ཏིག་བྱེད་དགོས། ཆ་འཕྲིན་ཅན་གྱི་དོ་དམ་ཆུ་ཚད་སྔར་བས་མཐོ་རུ་བཏང་ནས་བཟོ་སྐྲུན་གད་སྙིགས་ཐོན་ཁུངས་ཅན་བརྒྱུད་བཤུག་ལས་སྟེགས་བསྐྲུན་ཐོག་བཟོ་སྐྲུན་གད་སྙིགས་ཐོན་ཁུངས་དྲ་ཐོག་ནས་མཉམ་འབྲེལ་དང་ཉོ་ཚོང་བྱས་ནས་ཐོན་ཁུངས་བཀོད་སྒྲིག་གི་ཕན་འབྲས་དང་དོ་དམ་ཆུ་ཚད་མཐོ་རུ་གཏོང་དགོས།