ཡུན་རིང་མ་སོང་གོང་། གཞིས་རྩེ་གྲོང་ཁྱེར་ལེགས་རྩེ་རྒྱལ་མཚམས་འཛུལ་སྒྲོལ་མཐའ་སྲུང་ཞིབ་བཤེར་ས་ཚིགས་ལ་འབྱོར་བའི་ཐུམ་སྒྲིལ་གཉིས་ནི་ཧོ་ནན་ཞིང་ཆེན་ཨན་དབྱང་གྲོང་ཁྱེར་ལུང་ཆོན་གྲོང་རྡལ་ཤིས་ཧུང་ཀོའུ་གྲོང་ཚོ་ནས་ཡིན་པ་རེད།

ཐུམ་སྒྲིལ་ཁ་ཕྱེ་སྐབས་ཁ་དཀྲིས་དམར་པོ་20ཡོད་པ་དེ་དག་ཐོག“ལྷད་མེད་ཀྱི་བརྩེ་བ་ཀྲུང་གོར་འཆང”ཞེས་པའི་ཡི་གེ་དང་ཀྲུང་གོའི་ས་བཀྲ་བཀོད་ཡོད་པ་རེད།

ཐུམ་སྒྲིལ་དེ་སུས་བསྐུར་བ་ཡིན་ནམ། མཐའ་སྲུང་མི་དམངས་ཉེན་རྟོག་པར་བསྐུར་དགོས་དོན་གང་ཡིན་ནམ། ལེགས་རྩེ་མཐའ་སྲུང་ཞིབ་བཤེར་ས་ཚིགས་ཀྱི་ལས་སྒྲུབ་རུ་ཁག་གི་འགན་འཁུར་བ་དབྱང་ཧྥན་གྱིས་མྱུར་སྐྱེལ་བསྐུར་མའི་ཐོག་གི་ཁ་པར་ཨང་གྲངས་དེར་ཁ་པར་བརྒྱབ།

ཁ་པར་བརྒྱབ་པའི་དུས་ཚོད་ཐུང་རུང་དབྱང་ཧྥན་ལ་སེམས་འགུལ་ཚད་མེད་ཐེབས།

ཐུམ་སྒྲིལ་བསྐུར་མཁན་ནི་ལོ་བརྒྱད་ཅུ་ལ་སླེབས་པའི་ཀྲའོ་ཀྲུང་ཕུའུ་དང་ཀྲང་ཨེ་མེ་བཟའ་ཚོ་གཉིས་རེད། ཡུན་རིང་མ་སོང་གོང་གསར་འགྱུར་བརྒྱུད་ཨན་དབྱང་གྲོང་ཁྱེར་དང་བར་ཐག་སྤྱི་ལེ་4000ལྷག་ཙམ་ཡོད་པའི་གཞིས་རྩེ་གྲོང་ཁྱེར་འབྲོང་པ་རྫོང་ལེགས་རྩེ་མཐའ་སྲུང་ཞིབ་བཤེར་ས་ཚིགས་ཀྱི་མི་དམངས་ཉེན་རྟོག་པས། ལོ་ལྟར་ས་བབ་མཐོ་ཚད་སྨི་4772ཡོད་པའི་རྒྱལ་སྒོའི་འཐབ་ས་དང་པོ་བརྟན་སྲུང་བྱས་ནས་མཐའ་མཚམས་ཀྱི་བདེ་འཇགས་དང་མི་སེར་གྱི་བདེ་འཇགས་སྲུང་སྐྱོང་བྱེད་པ་བགྲེས་སོང་གཉིས་པོས་ཤེས་རྟོགས་བྱུང་བས་སེམས་འགུལ་ཆེན་པོ་ཐེབས་ནས་ཁ་དཀྲིས་ཤིག་བསླས་ཏེ་མི་དམངས་ཉེན་རྟོག་པར་བསྐུར་རྒྱུའི་སེམས་ཐག་བཅད།

ཀྲའོ་ཀྲུང་ཕུའུ་ནི་2022ལོ་འཁོར་གྱི་ཀྲུང་གོར་སེམས་འགུལ་ཐེབས་པའི་ལོ་འཁོར་མི་སྣ་ཞིག་རེད། ལོ་མང་རིང་། ཁོང་དང་བཟའ་ཟླ་ཀྲང་ཨེ་མེ་གཉིས་ཀྱིས་ཁ་དཀྲིས་བསླེ་བ་དང་རས་ལྷམ་དང་ལྷམ་གདན་བཟོས་ནས་མཐའ་སྲུང་དཔོན་དམག་དང་མི་དམངས་ཉེན་རྟོག་པར་སྤྲད་ཡོད། ད་བར་ཁ་དཀྲིས་ཁྲི་ཁ་ཤས་བསླས་ནས་འཐག་ཁྲི་དྲུག་སྐྱོན་ཤོར་བ་དང་བལ་སྐུད་ཀྱང་འབོར་ཆེན་བདེ་སྤྱོད་བྱས་ཡོད།

བགྲེས་སོང་ཀྲའོ་ཀྲུང་ཕུའུ་ནི་ཏང་ནང་ཞུགས་ནས་ལོ་70སོང་བའི་ཏང་ཡོན་རྒན་གྲས་ཤིག་ཡིན་པ་ཤེས་རྗེས། ལེགས་རྩེ་མཐའ་སྲུང་ཞིབ་བཤེར་ས་ཚིགས་ཀྱིས་ཆེད་མངགས་བགྲེས་སོང་གདན་དྲངས་ནས་ས་ཚིགས་ཡོངས་ཀྱི་མི་དམངས་ཉེན་རྟོག་པར་བརྙན་ལམ་ཐོག་ནས་ཏང་གི་སློབ་ཚན་འཁྲིད་རོགས་ཞུས། སློབ་ཚན་ཐོག་ཁ་དཀྲིས་དཀྲིས་པའི་མི་དམངས་ཉེན་རྟོག་པ་ཚོའི་ངོ་གདོང་ནས་སྒམ་བརླིང་གཟབ་ནན་གྱི་རྣམ་པ་ཞིག་མངོན།

ཀྲའོ་ཀྲུང་ཕུའུ་ཡི་སྙིང་སྟོབས་རབ་ཏུ་རྒྱས་ཤིང་རི་འགོག་དམག་འཁྲུག་སྐབས་ལོ་ན་ཕྲ་བའི་ཁོང་གིས་ཕའི་རྗེས་སུ་འབྲངས་ནས་ཏང་གིས་འགོ་ཁྲིད་པའི་རི་འགོག་དམག་དཔུང་ལ་འཕྲིན་ཡིག་སྐྱེལ་བ་དང་དེ་བཞིན་འཚོ་བའི་དངོས་ཟོག་དབོར་བའི་ལོ་རྒྱུས་དྲན་གསོ་བྱེད་བཞིན་དུ་མཉམ་སྤྱོད་བྱས་པ་མ་ཟད། ཀྲུང་གོ་གུང་ཁྲན་ཏང་གིས་མི་དམངས་ལ་བདེ་སྐྱིད་དང་མི་རིགས་བསྐྱར་དར་དོན་གཉེར་བྱེད་པའི་གཏམ་རྒྱུད་ཀྱང་བརྗོད་པ་རེད།

རི་འགོག་དམག་འཁྲུག་དང་། བཅིངས་འགྲོལ་དམག་འཁྲུག ཨ་འགོག་ཁྲའོ་རོགས་ཀྱི་དམག་འཁྲུག་གང་ཡིན་རུང་། ཚང་མ་ནི་ང་ཚོའི་གཅེས་པར་འོས་པའི་འཐབ་འཛིང་པ་ཚོས་གཡུལ་ས་མདུན་མར་གདོང་མཆོང་བྱས་ཡོད། དེར་བརྟེན་ང་དང་བཟའ་ཟླས་འཐབ་འཛིང་པ་ཚོར་དཀའ་ངལ་སེལ་རོགས་བྱས་ནས་ཞིང་དལ་སྐབས་ལྷམ་གདན་དང་རས་ལྷམ་བཟོ་བ་དང་ཁ་དཀྲིས་བསླས་ནས་བསྐུར་གྱི་ཡོད། བྱ་བ་དེ་རིགས་བསྒྲུབས་ནས་ད་བར་ལོ་10ལྷག་ཙམ་ཕྱིན་སོང་།

ཁ་དཀྲིས་བསླས་ནས་བྱུང་བའི་དྲོ་སྐྱིད་དང་ནང་དོན་གཏིང་ཟབ་པའི་ཏང་གི་སློབ་ཚན་གྱིས་མཐའ་སྲུང་མི་དམངས་ཉེན་རྟོག་པ་དང་རྒན་རྒོན་གྱི་སེམས་པ་དམ་པོར་སྦྲེལ་བ་མ་ཟད། ན་གཞོན་ཏང་ཡོན་དེ་དག་གིས་ཐོག་མའི་བསམ་འདུན་དང་ལས་འགན་སྔར་བས་རྟོགས་པར་བློ་སྐྱེད་གསར་པ་བྱུང་ཡོད།

ལེགས་རྩེ་མཐའ་སྲུང་ཞིབ་བཤེར་ས་ཚིགས་ཀྱི་མི་དམངས་ཉེན་རྟོག་པ་ཡོངས་ཀྱིས་ངེས་པར་དུ་བརྩེ་སེམས་ཟབ་མོར་གཅེས་སྤྲས་ཡག་པོ་བྱས་ཏེ། སེམས་ཁུར་དང་གཅེས་སྐྱོང་དེ་ཉིད་ལྷག་བསམ་རྣམ་དག་གིས་མཐའ་སྲུང་དང་མཐའ་སྟོབས་མཐའ་བརྟན་གྱི་འཛད་མཐའ་མེད་པའི་སྒུལ་ཤུགས་སུ་བསྒྱུར་ཏེ། བྱ་སྤྱོད་དངོས་ལ་བརྟེན་ནས་མེས་རྒྱལ་གྱི་རྩྭ་རྩི་ཤིང་སྲུང་སྐྱོང་ཡག་པོ་བྱེད་ཀྱི་ཡིན་ཞེས་མགྲིན་གཅིག་ཏུ་བརྗོད་པ་རེད།