ཟླ་8ཚེས་16ཉིན་ལྟ་སྐོར་བ་རྣམས་གོ་རིམ་ལྡན་པའི་ངང་རང་སྐྱོང་ལྗོངས་འགྲེམས་ཚོགས་ལྟེ་གནས་ཀྱི་འགྲེམས་ཁང་དང་པོར་བསྐྱོད་པ་དང་། “རྒྱལ་ཡོངས་ཀྱི་ཁ་གཏད་བོད་སྐྱོར་བྱས་ནས་ལོ་30འཁོར་བའི་གྲུབ་འབྲས་འགྲེམས་སྟོན”དེ་གར་གཟབ་རྒྱས་ངང་སྤེལ་བ་རེད།

གྲུབ་འབྲས་འགྲེམས་སྟོན་གྱི་འགྲེམས་སྟོན་ཁུལ་གཙོ་བོར་ཁྱམས་རིམ་དང་། ཀྲུང་དབྱང་གི་ཐུགས་ཁུར། བརྟན་ལྷིང་ལ་དམིགས་པ། འཕེལ་རྒྱས་ལ་དམིགས་པ། སྐྱེ་ཁམས་ལ་དམིགས་པ། མཐའ་སྟོབས་ལ་དམིགས་པ། “ཚོགས་སྒྲིག་རྣམ་པའི”བོད་སྐྱོར་གྱི་གསར་གཏོད་དང་ལག་ལེན་བཅས་ཁག་7ཚུད་ཡོད་པ་རེད།

བོད་ལ་ཁ་གཏད་རོགས་སྐྱོར་བྱེད་པ་ནི་ཏང་ཀྲུང་དབྱང་གིས་ཏང་དང་རྒྱལ་ཁབ་ཀྱི་ལས་དོན་སྤྱི་ཡོངས་ལ་གཞིགས་ནས་བཏོན་པའི་ཐབས་ཇུས་དང་བཀོད་སྒྲིག་གལ་ཆེན་ཞིག་ཡིན་ལ། མེས་རྒྱལ་གཅིག་གྱུར་སྲུང་སྐྱོང་དང་། མི་རིགས་མཐུན་སྒྲིལ་ལ་ཤུགས་སྣོན། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་བ་བཅས་ཀྱི་ཐབས་ཇུས་གལ་ཆེན་ཞིག་ཀྱང་ཡིན། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་གསུམ་པ་ནས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་བར་གྱི་རྩ་ཆེའི་འདྲ་པར་དང་ཞིབ་ཕྲའི་དཔྱད་གཞིའི་ཡིག་རིགས་རེ་རེ་ཀྲུང་དབྱང་གི་ཐུགས་ཁུར་འགྲེམས་ཁང་དུ་བཤམས་སྟོན་བྱས་ནས་ཏང་ཀྲུང་དབྱང་གིས་བོད་ཀྱི་ལས་དོན་ལ་ཚད་མཐོའི་མཐོང་ཆེན་དང་ཐུགས་ཁུར་ཟབ་མོ་གནང་ལུགས་གསོན་ཉམས་དོད་པོས་མཚོན་ཡོད།

མུ་མཐུད་ལྟ་སྐོར་བྱས་པ་དང་བསྟུན་ནས་བརྟན་ལྷིང་དང་། འཕེལ་རྒྱས། སྐྱེ་ཁམས། མཐའ་སྟོབས་བཅས་ལ་དམིགས་པའི་འགྲེམས་ཁུལ་བཞི་རིམ་བཞིན་མངོན་ལ། འགྲེམས་ཁུལ་རེ་རེ་གསོན་ཉམས་དོད་པའི་དངོས་མཚོན་པར་གཞིའི་གློག་བརྙན་ཞིག་དང་འདྲ་བར་འདས་ཟིན་པའི་ལོ་30ཡི་ཁ་གཏད་བོད་སྐྱོར་ལས་དོན་གྱི་གྲུབ་འབྲས་ཡོངས་སུ་མངོན་འོང་། རྨང་གཞིའི་སྒྲིག་བཀོད་འཛུགས་སྐྲུན་ནས་ཁྱད་ལྡན་ཐོན་ལས་སྐྱེད་སྲིང་བར་དང་མཐའ་མཚམས་བདེ་འཇགས་སྲ་བརྟན་དུ་གཏོང་བ་ནས་སྐྱེ་ཁམས་ཁོར་ཡུག་སྲུང་སྐྱོང་བར་གྱི་འཕེལ་རྒྱས་ཚང་མར་བོད་སྐྱོར་ལས་བྱེད་པ་དང་ཤེས་ལྡན་པའི་སེམས་ཤུགས་དང་རྔུལ་ཆུ་འདུས་ཡོད།

གྲོང་མི་དངོས་གྲུབ་ཀྱིས་འཕེལ་རྒྱས་ལ་དམིགས་པའི་འགྲེམས་ཁུལ་གྱི་འགྲིམ་འགྲུལ་སྒྲིག་བཀོད་འཕེལ་རྒྱས་འགྲེམས་པང་ལ་ཞིབ་པར་བལྟས་ཤིང་། “ང་རང་ཆུང་དུས་ནས་ས་ཆ་འདི་གར་འཚོ་བ་སྐྱེལ་གྱི་ཡོད། ལོ་འདི་དག་རིང་བོད་ལ་འགྱུར་ལྡོག་ཧ་ཅང་ཆེན་པོ་བྱུང་བ་དངོས་སུ་མཐོང་བྱུང་། དེ་སྔའི་འདམ་རྫབ་ཀྱི་ལམ་ཆུང་དེ་ད་ཆ་ཕྱོགས་བཞི་མཚམས་བརྒྱད་དུ་བསྲིངས་པའི་འགྲིམ་འགྲུལ་ལམ་དྲར་འཕེལ་རྒྱས་ཕྱིན་ལ། དེ་དག་ཚང་མ་ཁ་གཏད་བོད་སྐྱོར་སྲིད་ཇུས་ལག་བསྟར་གཏིང་ཟབ་བྱས་པ་དང་རྒྱལ་ཡོངས་མི་དམངས་ཀྱིས་རྒྱབ་སྐྱོར་ཤུགས་ཆེན་ལས་བྱུང་བ་དང་ལྷག་པར་དུ་བོད་སྐྱོར་ལས་བྱེད་པས་བློ་གྲོས་དང་རྔུལ་ཆུ་བཏོན་པ་ལས་བྱུང་བ་རེད”ཅེས་བཤད།

ཨན་ཧུའེ་འགྲེམས་ཁང་དུ་སྐྱོད་སྐབས་གྱང་སྟེང་གི་པར་རིས་ལས་2002ལོ་ནས་བཟུང་ཨན་ཧུའེ་ཞིང་ཆེན་གྱིས་སྔ་རྗེས་སུ་མངགས་པའི་བོད་སྐྱོར་ལས་དོན་རུ་ཁག་ཁག་8དང་བོད་སྐྱོར་ལས་བྱེད་པ་དང་ཤེས་ལྡན་པ་1036གིས་བོད་ཀྱི་འཕེལ་རྒྱས་ལ་རོགས་རམ་ཧུར་ཐག་བྱས་པ་མཚོན་ཡོད། “འདི་ནི་ང་ཚོ་ཨན་ཧུའེ་ཡི་སྤོབས་པ་ཡིན། ཏང་ཀྲུང་དབྱང་གིས་ཁ་གཏད་བོད་སྐྱོར་གྱི་ཐབས་ཇུས་བཀོད་སྒྲིག་གནང་བ་ནི་བོད་དར་རྒྱས་གོང་འཕེལ་ལ་སྐུལ་འདེད་གཏོང་བའི་རླབས་ཆེན་གྱི་གསར་གཏོད་ཅིག་རེད། ལོ་30ཡི་རིང་བོད་སྐྱོར་ཐད་མ་དངུལ་འབོར་ཆེན་བཏང་བ་དང་། དེའི་ནང་ཞུགས་མཁན་མང་བ། ཁྱབ་རྒྱ་ཆེ་བ་བཅས་ལས་སྤྱི་ཚོགས་རིང་ལུགས་ལམ་ལུགས་ཀྱི་ཁྱད་འཕགས་རང་བཞིན་གང་ལེགས་མཚོན་ཡོད། དུས་རབས་གསར་པའི་བོད་སྐྱོར་ལས་བྱེད་པ་ཞིག་ཡིན་པའི་ང་ཚོས་ངེས་པར་དུ་ལོ་རྒྱུས་ཀྱི་ལས་འགན་གསར་པ་ཕྲག་ཏུ་འཁུར་བ་དང་། དུས་རབས་གསར་པར་ཏང་གི་བོད་སྐྱོང་མཛད་ཇུས་ཕྱོགས་ཡོངས་ནས་ལག་བསྟར་དོན་འཁྱོལ། མུ་མཐུད་འབད་འཐབ་དང་འབད་འབུངས་མདུན་སྐྱོད་བཅས་བྱེད་དགོས”ཞེས་ཨན་ཧུའེ་ཞིང་ཆེན་གྱི་ཁག་བརྒྱད་པའི་བོད་སྐྱོར་ལས་བྱེད་པ་ལྷོ་ཁ་གྲོང་ཁྱེར་འཕེལ་སྒྱུར་ཨུ་ལྷན་གྱི་ཀྲུའུ་རེན་གཞོན་པ་ཧྥང་ཁྲེན་གྱིས་སེམས་འགུལ་ཆེན་པོ་ཐེབས་བཞིན་དུ་བཤད།

“རྒྱལ་ཡོངས་ཀྱི་ཁ་གཏད་བོད་སྐྱོར་བྱས་ནས་ལོ་30འཁོར་བའི་གྲུབ་འབྲས་འགྲེམས་སྟོན”བོད་རང་སྐྱོང་ལྗོངས་ཏང་ཨུད་ཀྱིས་གཙོ་གཉེར་བྱས་པ་དང་རང་སྐྱོང་ལྗོངས་ཏང་ཨུད་རྩ་འཛུགས་པུའུ་ཡིས་གཉེར་འགན་འཁུར་ཡོད། ཕྱིས་སུ་གྲུབ་འབྲས་འགྲེམས་སྟོན་དེ་འཆར་གཞི་ཡོད་པའི་སྒོ་ནས་རིམ་བཞིན་ཕྱི་ཕྱོགས་ལ་སྒོ་མོ་འབྱེད་རྒྱུ་ཡིན་པ་རེད།