ཤིན་ཧྭ་གསར་འགྱུར་ཁང་ལྷ་ས་ནས་གློག་འཕྲིན་འབྱོར་གསལ། ཉེ་ཆར་བོད་ལྗོངས་ཁྲེང་ཀོན་ས་མཐོའི་བཞོན་མའི་ཚན་རྩལ་ཁང་ཆུང་ཆུང་གི་སྒོ་བྱང་གི་ཡོལ་བ་ཕྱེ་བའི་མཛད་སྒོ་ལྷ་སར་འཚོགས་པ་དེ་ནི་བོད་ཀྱི་བཞོན་མའི་ཚན་རྩལ་ཁང་ཆུང་ཆུང་ཐོག་མ་དེ་ཡིན་པ་རེད། ངོ་སྤྲོད་བྱས་པར་གཞིགས་ན། བཞོན་མའི་ཚན་རྩལ་ཁང་ཆུང་ཆུང་ནི་དཀར་ཆུའི་ཐོན་ལས་ཀྱི་ཤེས་ལྡན་པ་གསོ་སྐྱོང་དང་། ཚན་རྩལ་གསར་གཏོད། སྤྱི་ཚོགས་ཞབས་ཞུ་བཅས་གཞི་གཅིག་ཏུ་འདུས་པའི་གསར་གཏོད་བྱེད་སྟངས་ཤིག་རེད།

2023ལོ་ནས་བཟུང་ཀྲུང་གོ་ཞིང་ལས་སློབ་ཆེན་གྱིས་ལྷ་ས་གྲོང་ཁྱེར་ཀྲི་ཀྲའོ་བཞོན་མ་གསོ་སྤེལ་ལྟེ་གནས་དང་གར་པ་སྐྱེ་ཁམས་འབྲོག་རར་བཞོན་མའི་བེའུ་བཙའ་ནུས་ལ་ཚད་འཇལ་གཏན་འཁེལ་བྱས་ཏེ། བཞོན་མ་ར་བའི་བཞོན་མ་རྐྱང་པ་དང་ཁྱུ་ཚོགས་ཀྱི་གནས་ཚུལ་ལ་ཚན་རིག་དང་མཐུན་པའི་དཔྱད་དཔོག་བྱས་ནས་བཞོན་མ་ར་ བའི་གསོ་ཚགས་དོ་དམ་ལ་དུས་ཐོག་ཏུ་ལེགས་སྒྲིག་བྱས་ཏེ་བཞོན་མའི་བེའུ་བཙའ་ནུས་ཀྱི་མི་མངོན་པའི་སྟོབས་ཤུགས་འདོན་སྤེལ་གང་ཐུབ་བྱས་ཡོད། 2023ལོའི་ལོ་མཇུག་ཏུ་སློབ་གསོ་པུས་བོད་ལྗོངས་ཁྲེང་ཀོན་ས་མཐོའི་བཞོན་མའི་ཚན་རྩལ་ཁང་ཆུང་ཆུང་འཛུགས་རྒྱུའི་ཆོག་མཆན་དངོས་སུ་སྤྲད་པ་དང་། 2024ལོའི་ཟླ་3པར་ཀྲུང་གོ་ཞིང་ལས་སློབ་ཆེན་གྱི་འབུམ་རམས་པ་ཧྥང་ཆན་ཧའེ་སོགས་ཚན་རྩལ་ཁང་ཆུང་ཆུང་དེར་བཅའ་སྡོད་བྱས་ནས་ལས་དོན་སྤེལ་བ་རེད།