ནུས་གསོག་སྟོབས་འཕེལ་གྱིས་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།
རང་སྐྱོང་ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སློབ་སྦྱོང་དང་ལག་བསྟར་སྐོར་གྱི་གླེང་ཐེངས་གསུམ་པ།
སྤུས་ཚད་མཐོ་བའི་འཕེལ་རྒྱས་ནི་ཀྲུང་གོའི་ལུགས་ཀྱི་དེང་རབས་ཅན་གྱི་ངོ་བོའི་བླང་བྱ་དང་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་སྐྲུན་པའི་ལས་འགན་ཨང་དང་པོ་རེད། ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་ཐོག་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱས་ཏེ་རང་ལྗོངས་ཀྱི་དཔལ་འབྱོར་བཅོས་སྐྱོང་མ་ལག་འཐུས་སྒོ་ཚང་དུ་གཏོང་བ་དང་། དཔལ་འབྱོར་སྒྲིག་སྲོལ་སྒྱུར་བཅོས་ལ་སྐུལ་འདེད་གཏོང་བ། དེང་རབས་ཅན་གྱི་དཔལ་འབྱོར་མ་ལག་མགྱོགས་མྱུར་སྐྲུན་པ། ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་ཐད་བརྒྱུད་རིམ་ལྡན་པའི་བཀོད་སྒྲིག་བྱས་ཡོད།
ལྗོངས་ཏང་ཨུད་སྐབས་བཅུ་པའི་ཚང་འཛོམས་གྲོས་ཚོགས་ཐེངས་དྲུག་པའི་ཐོག་གི་བཀོད་སྒྲིག་གལ་ཆེན་རབ་དང་རིམ་པ་སྤུས་ཚད་མཐོ་བའི་འཕེལ་རྒྱས་ཀྱི་ཕྱོགས་གང་ཅིའི་ཐད་ཁྱབ་ནས། ལྗོངས་ཏང་ཨུད་ཀྱིས་ཐོན་སྐྱེད་ནུས་ཤུགས་དང་ཐོན་སྐྱེད་འབྲེལ་བ་དང་། སྟེང་གི་བཀོད་པ་དང་དཔལ་འབྱོར་རྨང་གཞི། རྒྱལ་ཁབ་བཅོས་སྐྱོང་དང་སྤྱི་ཚོགས་འཕེལ་རྒྱས་བཅས་ཀྱི་འབྲེལ་བར་སྟངས་འཛིན་གཏིང་ཟབ་ཐུབ་པ་མཚོན་པ་མ་ཟད། ཕྱོགས་ཡོངས་ནས་སྒྱུར་བཅོས་སྔར་བས་ཟབ་གཏོང་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བརྡ་རྟགས་དྲག་པོ་བཏང་ཡོད།
ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་དུས་ཐུང་གི་དམིགས་ཚད་དང་ཕུགས་ཀྱི་དམིགས་ཚད་བར་གྱི་འབྲེལ་བ་ཐག་གཅོད་ཡག་པོ་བྱས་ཏེ་གཞི་ཁྱོན་དང་སྤྱི་འབོར་རྒྱུན་མཐུད་ངང་རྒྱ་ཆེར་གཏོང་བའི་ཐད་ཤུགས་རྒྱག་དགོས། དུས་ཐུང་གི་དམིགས་ཚད་དང་ཕུགས་ཀྱི་དམིགས་ཚད་ནི་རྩོད་སྒྲུབ་ཀྱི་གཅིག་འདུའི་ཕུང་པོ་ཞིག་ཡིན་པས་ཕྱོགས་གཅིག་ལ་དམ་འཛིན་བྱེད་དྲགས་ན། ཕྱོགས་གཞན་དེ་ཉམས་ཞན་དུ་གྱུར་ཏེ་དཔལ་འབྱོར་འཕེལ་རྒྱས་ལ་དཔོག་དཀའ་བའི་གྱོང་གུན་བཟོ་སྲིད། བོད་ཀྱི་ལྗོངས་བབ་དང་འཕེལ་རྒྱས་དུས་མཚམས་ལ་བལྟས་ན། མ་འཇོག་ནི་སྔར་བཞིན་དཔལ་འབྱོར་འཕེལ་རྒྱས་ལ་སྐུལ་ཁྲིད་བྱེད་པའི་སྟོབས་ཤུགས་གལ་ཆེན་ཞིག་ཡིན་པ་དང་རྣམ་གྲངས་འཛུགས་སྐྲུན་ནི་སྔར་བཞིན་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་འདེགས་སྐྱོར་གལ་ཆེན་ཞིག་རེད།
“རྣམ་གྲངས་དམ་འཛིན་བྱེད་པ་ནི་འཕེལ་རྒྱས་དམ་འཛིན་བྱེད་པ་དང་། འཕེལ་རྒྱས་དམ་འཛིན་བྱེད་དགོས་ན་ངེས་པར་དུ་རྣམ་གྲངས་ལ་དམ་འཛིན་བྱེད་དགོས་པའི”འདུ་ཤེས་བརྟན་པོ་བཙུགས་ནས་དཔལ་འབྱོར་གྱི་འདུ་ཤེས་ཟབ་ཏུ་གཏོང་སྐབས་ཕྱོགས་གཅིག་ནས་རྣམ་གྲངས་དང་རྒྱུ་རྐྱེན་གཙོ་བོ་འགན་ལེན་གྱི་སྙོམ་སྒྲིག་རྩིས་རྒྱག་པ་དང་ཕྱོགས་གཞན་ཞིག་ནས་གཏོང་ཆ་དང་ཐོན་ཤུགས་ཀྱི་ཁེ་སྤོགས་རྩིས་བརྒྱབ་ནས་དཔལ་འབྱོར་འཕེལ་རྒྱས་མིག་སྔར་གསོན་ཤུགས་ལྡན་པ་དང་འབྱུང་འགྱུར་མི་མངོན་པའི་སྟོབས་ཤུགས་ལྡན་པའི་འགན་ལེན་བྱེད་དགོས།
ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་ལེགས་ཆ་འདོན་སྤེལ་དང་ཞན་ཆ་སེལ་བའི་འབྲེལ་བ་ཐག་གཅོད་ཡག་པོ་བྱས་ཏེ་སྤུས་ཚད་ལེགས་སུ་དང་ཕན་འབྲས་ཆེ་རུ་གཏོང་བར་རྒྱུན་མཐུད་ཤུགས་རྒྱག་དགོས། མིག་སྔར་ང་ཚོར་སྔར་བཞིན་རྙོག་འཛིང་ཆེ་ལ་འགྱུར་ལྡོག་མང་བའི་རྒྱལ་ཁབ་ཕྱི་ནང་གི་དུས་བབ་འཕྲད་ཡོད། རང་ལྗོངས་ཀྱི་དོན་དངོས་ནས་བལྟས་ན། བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་འགྲན་སློང་དང་གོ་སྐབས་མཉམ་དུ་གནས་ཡོད། སྤྱི་ཡོངས་ནས་བལྟས་ན། གོ་སྐབས་འགྲན་སློང་ལས་མང་བ་དང་ལེགས་ཆ་ཞན་ཆ་ལས་ཆེ་བ་ཡོད། དགེ་སྐྱོན་གསབ་རེས་དང་ལེགས་ཆ་འདོན་སྤེལ་བྱས་ཏེ་ནུས་ཤུགས་ཡོད་རྒུས་སྤྱི་ཁོག་ནས་ཐོན་ལས་འཕེལ་རྒྱས་ཀྱི་སྲིད་ཇུས་དང་། འཕེལ་ཕྱོགས། ཐོན་ལས་ཀྱི་བཀོད་པ། ཁྲོམ་རའི་སྤྲོད་མཁོ། ཐོན་ལས་ཀྱི་འཁོར་འབྲེལ་སོགས་གསལ་པོ་ཤེས་རྟོགས་དང་བྱེ་བྲག་ནས་གཉེར་སྐྱོང་བྱེད་པོའི་འཕེལ་རྒྱས་ཀྱི་དགོས་མཁོ་དང་ཐོན་སྐྱེད་འཛུགས་སྐྲུན་གྱི་མ་གནས་སོགས་ཤེས་རྟོགས་གསལ་པོ་བྱས་ཏེ་རྒྱལ་ཁབ་ཀྱི་དགོས་མཁོ་དང་། བོད་ཀྱི་འཇོན་ནུས། མང་ཚོགས་ཀྱི་རེ་སྒུག འབྱུང་འགྱུར་གྱི་ཁ་ཕྱོགས་བཅས་ཟུང་འབྲེལ་དམ་ཚགས་བྱས་ནས་ཚན་རྩལ་གསར་གཏོད་དང་ཐོན་ལས་གསར་གཏོད་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་དགོས།
ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་སྲིད་གཞུང་དང་ཁྲོམ་རའི་འབྲེལ་བ་ཐག་གཅོད་ཡག་པོ་བྱས་ཏེ་འཕེལ་རྒྱས་ཀྱི་ཁོར་ཡུག་རྒྱུན་མཐུད་ལེགས་སུ་གཏོང་བར་ཤུགས་རྒྱག་དགོས། སྲིད་གཞུང་དང་ཁྲོམ་རའི་བར་གྱི་འབྲེལ་བ་ནི་དཔལ་འབྱོར་སྒྲིག་སྲོལ་སྒྱུར་བཅོས་བྱེད་པའི་ལྟེ་བའི་གནད་དོན་ཡིན། སྲིད་གཞུང་དང་ཁྲོམ་རའི“ལག་གཉིས”ཀྱི་ནུས་པ་གང་ལེགས་འདོན་པ་དང་། ཁྲོམ་རའི་དཔལ་འབྱོར་གྱི་ཆོས་ཉིད་དང་སྲིད་འཛིན་དོ་དམ་ཟུང་འབྲེལ་དམ་ཚགས་བྱེད་པ། དེ་བས་དྲང་གཞག་དང་དེ་བས་གསོན་ཤུགས་ལྡན་པའི་ཁྲོམ་རའི་ཁོར་ཡུག་ཧུར་ཐག་སྐྲུན་པ་བཅས་བྱས་ཏེ། “གློད་ཐུབ་པ”དང“དོ་དམ་བྱེད་ཐུབ་པའི”འགན་ལེན་ཏན་ཏིག་བྱེད་དགོས། ཚོང་གཉེར་ཁོར་ཡུག་ལེགས་སུ་གཏོང་བའི་སྲོལ་ཡིག་མགྱོགས་མྱུར་འདོན་པ་དང་། “གཉིས་འགུགས་གཉིས་འདྲེན”ལ་མུ་མཐུད་སྐུལ་འདེད་བཏང་སྟེ་ཉེ་གཙང་གི་སྲིད་ཚོང་འབྲེལ་བ་གཏོད་པ། ཁྲིམས་ལྟར་ཚོང་འགུགས་མ་འདྲེན་གྱི་སྲིད་ཇུས་དང་བྱ་སྤྱོད་ཚད་ལྡན་དུ་གཏོང་བ་བཅས་བྱས་ཏེ་གཉེར་སྐྱོང་བྱེད་པོ་སྣ་ཚོགས་ལ་མ་འཇོག་བྱེད་པར་བློ་བདེ་བ་དང་། ལས་རིགས་དར་སྤེལ་གཏོང་བར་བློ་བདེ་བ། ལས་གཏོད་བདེ་བ། འཚོ་བ་སྐྱིད་པ་བཅས་ཡོང་བ་བྱེད་དགོས།
ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་ནང་ཁོངས་འཁོར་རྒྱུག་དང་ཕྱི་ཁོངས་འཁོར་རྒྱུག་དབར་གྱི་འབྲེལ་བ་ཐག་གཅོད་ཡག་པོ་བྱས་ཏེ་སྒོ་དབྱེའི་གསོན་ཤུགས་རྒྱུན་མཐུད་ཆེ་རུ་གཏོང་བར་ཤུགས་རྒྱག་དགོས། སྒོ་དབྱེ་ནི་ཁྲོམ་རའི་དཔལ་འབྱོར་གྱི་ངོ་བོའི་ཁྱད་ཆོས་ཡིན་པ་དང་། སྒོ་དབྱེའི་ས་ཁུལ་ལ་གསོན་ཤུགས་ཆེ་ཤོས་ལྡན་པ། སྒོ་དབྱེའི་དཔལ་འབྱོར་ལ་འགྲན་རྩོད་ཀྱི་ནུས་པ་ཆེ་ཤོས་ལྡན་ཡོད། བོད་ནི་ཨེ་ཤེ་ཡ་ལྷོ་མར་སྒོ་མོ་འབྱེད་པའི་འགྲོ་ལམ་གལ་ཆེན་ཡིན་པའི་འཐབ་ཇུས་ངེས་གནས་ལ་གཞི་ཚུགས་ཏེ་མི་སྣ་དང་དངོས་ཟོག་སྤེལ་རེས་འགྲོ་འོང་བྱེད་ཤུགས་ཆེ་རུ་གཏོང་བ་དང་། ཚོང་དོན་འགྲོ་ལམ་གྱི་ནུས་རིམ་མཐོ་རུ་གཏོང་བ། ལྷ་སའི་ཕྱོགས་བསྡུས་སྒོ་ཁྲལ་མེད་ཁུལ་སྐྲུན་མགྱོགས་སུ་གཏོང་བ། གཞིས་རྩེའི་རྒྱལ་སྤྱིའི་སྐམ་སའི་གྲུ་ཁ་དང་སྐྱིད་གྲོང་གཙོ་གནད་གསར་སྤེལ་སྒོ་དབྱེ་ཚོད་ལྟ་ཁུལ་བསྐྲུན་པར་སྐུལ་འདེད་གཏོང་བ། རྒྱལ་མཚམས་འཛུལ་སྒྲོལ་གྱི་ཚོང་ཟོག་ཉོ་ཚོང་བསྡུ་འགྲེམས་ལྟེ་གནས་གཏོད་པ། མཐའ་མཚམས་རྒྱུད་ཀྱི་འགག་སྒོའི་གྲོང་ཁྱེར་གཙོ་བོ་དང་ལྷ་སའི་དབར་གྱི་མཐུན་སྦྱོར་མཉམ་འགུལ་དང་འཕེལ་རྒྱས་ལ་ཤུགས་སྣོན་རྒྱག་པ་བཅས་བྱས་ནས“རྒྱུད་གཅིག་ལམ་གཅིག”ལ་ཞབས་འདེགས་ཞུ་བ་དང་མཉམ་འདྲེས་དེ་བས་ཡག་པོ་ཡོང་བ་བྱེད་དགོས།