འདི་ནི་ཁྲུང་ཆིང་པའེ་ཧོ་ལེང་གི་ཆུ་འོག་རྟེན་མཛོད་ཁང་ཡིན་པ། ཤིན་ཧྭ་གསར་འགྱུར་ཁང་གི་གསར་འགོད་པ་ཐང་དབྱིས་པར་བརྒྱབ།

འདི་ནི་ཨེ་ཅིབ་ཀྱི་ལུའོ་ཏ་གླིང་ཕྲན་གྱི་ཉི་ལུའོ་ཆུ་ཁྲེའི་ཕྱི་ངོས་ཀྱི་རྣམ་པ་ཡིན་པ། ཤིན་ཧྭ་གསར་འགྱུར་ཁང་གི་གསར་འགོད་པ་སུའེ་ཤན་ཁའེ་ཡིས་པར་བརྒྱབ།

ཀྲུང་གོའི་ཁྲུང་ཆིང་དུ་འབྲི་ཆུའི་ནང་རིང་ཚད་ལ་སྨི་1600ཙམ་དང་ཆ་སྙོམས་ཞེང་ཚད་ལ་སྨི་15ཙམ་ཡོད་པའི་རྡོ་གདུང་པའེ་ཧོ་ལེང་སྟེང་དུ་བརྐོས་བརྒྱབ་ནས་འབྲི་ཆུའི་ཧྥུའུ་ལིང་དུམ་བུའི་ལོ་ངོ་སྟོང་ལྷག་ཙམ་རིང་གི་ཆུ་འབྲིའི་ཆུ་དཔྱད་དཔྱད་གཞིའི་ཡིག་རིགས་བཀོད་དེ་ཞིང་ལས་ཐོན་སྐྱེད་ལ་མཛུབ་ཁྲིད་བྱེད་པར་སྤྱོད་ཀྱི་ཡོད། ཨེ་ཅིབ་ཀྱི་རྒྱལ་ས་ཁེ་རོར་ཡོད་པའི་ཉི་ལུའོ་གཙང་པོའི་ལུའོ་ཏ་གླིང་ཕྲན་ཐོག་ཆུ་ཁ་མཐོ་དམན་འཇལ་བྱེད་ཉི་ལུའོ་ཆུ་ཁྲེ་ནི་ལོ་ངོ་སྟོང་ཕྲག་ཁ་ཤས་རིང་ཉི་ལུའོ་གཙང་པོའི་འབྲུབ་ཆུ་རྒྱས་དུས་ཀྱི་ཆུ་ཁ་མཐོ་དམན་འཇལ་བྱེད་ཅིག་ཡིན་པ་དང་དེས་ལོ་རེའི་ཞིང་ལས་ཐོན་འབབ་སྔོན་དཔག་བྱེད་ཀྱི་ཡོད། ལེ་དབར་ཁྲི་ཕྲག་གིས་ཆོད་པའི་པའེ་ཧོ་ལེང་རྡོ་བརྐོས་དང་ཉི་ལུའོ་ཆུ་ཁྲེ་གཉིས་ནི་འཛམ་གླིང་གི་ཆུ་བོ་ཆེན་པོ་འབབ་རྒྱུད་ཀྱི་ཆུ་དཔྱད་ཤུལ་བཞག་ཡིན་པས་ཤེས་དཔལ་མི་འདྲ་བར་འདྲ་མཚུངས་ཀྱི་ཆུ་ཁ་མཐོ་དམན་ཚད་འཇལ་གྱི་བློ་གྲོས་ལྡན་པ་མངོན་གྱི་ཡོད།

མིག་སྔར་ཀྲུང་གོ་དང་ཨེ་ཅིབ་ཀྱི་འབྲེལ་ཡོད་ཕྱོགས་ཀྱིས་པའེ་ཧོ་ལེང་རྡོ་བརྐོས་དང་ལུའོ་ཏ་གླིང་ཕྲན་གྱི་ཉི་ལུའོ་ཆུ་ཁྲེ་གཉིས་མཉམ་འབྲེལ་ཐོག་འཛམ་གླིང་རིག་གནས་ཤུལ་བཞག་ལ་འདུན་ཞུ་བྱ་རྒྱུའི་གྲ་སྒྲིག་བྱེད་བཞིན་ཡོད་པ་རེད།

2021ལོར་ཆུ་དཔྱད་ཤུལ་བཞག་མཉམ་འབྲེལ་ཐོག་ཤུལ་བཞག་ལ་འདུན་ཞུ་བྱེད་འཐུས་རང་བཞིན་གྱི་རིགས་པས་ཁུངས་སྐྱེལ་ལས་དོན་སྤེལ་འགོ་ཚུགས་ཚུན། ཀྲུང་གོ་དང་ཨེ་ཅིབ་ཀྱི་ཚོགས་པས་ཕན་ཚུན་རྟོག་ཞིབ་བྱས་ཏེ་མཉམ་འབྲེལ་ཐོག་ཤུལ་བཞག་ལ་འདུན་ཞུ་བྱེད་པའི་ཐབས་ལམ་དང་། ཐབས་ཇུས། བྱ་ཐབས་བཅས་འཚོལ་ཞིབ་ཧུར་ཐག་བྱས་ཡོད། མཉམ་འབྲེལ་ཐོག་ཤུལ་བཞག་ལ་འདུན་ཞུ་བྱེད་པ་དེས《འཛམ་གླིང་ཤུལ་བཞག་མིང་གཞུང》གི་ཆུ་འོག་ཤུལ་བཞག་ཐད་ཀྱི་སྟོང་ཆ་སྐོང་ཐུབ་རེ་ཡོད་པ་མ་ཟད། ཀྲུང་གོ་དང་ཨེ་ཅིབ་ཀྱི་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་རྒྱུར་ཡང་སྔར་བས་སྐུལ་མ་ཐེབས་རྒྱུ་རེད།

ཁྲུང་ཆིང་པའེ་ཧོ་ལེང་ཆུ་འོག་རྟེན་མཛོད་ཁང་གི་ཀོན་ཀྲང་ཅང་རུའེ་ཡིས“ཀྲུང་གོའི་པའེ་ཧོ་ལེང་རྡོ་བརྐོས་དང་ཨེ་ཅིབ་ཀྱི་ལུའོ་ཏ་གླིང་ཕྲན་གྱི་ཉི་ལུའོ་ཆུ་ཁྲེ་གཉིས་ནི་འཛམ་གླིང་གི་ཆུ་བོ་ཆེན་པོ་འབབ་རྒྱུད་ཀྱི་མི་དང་རང་བྱུང་ཁམས་ཞི་མཐུན་མཉམ་གནས་ཀྱི་བློ་གྲོས་ཀྱི་ཉིང་བཅུད་ཡིན་ལ། དེས་གནའ་བོའི་ཤེས་དཔལ་རྒྱུན་འཛིན་བྱས་པའང་མཚོན་གྱི་ཡོད”ཀྲུང་གོ་དང་ཨེ་ཅིབ་རྒྱལ་ཁབ་གཉིས་པོ་ནི་གནའ་བོའི་ཤེས་དཔལ་རྒྱལ་ཁབ་ཡིན་པས་ལོ་རྒྱུས་དང་རིག་གནས་ཤུལ་བཞག་ཕུན་སུམ་ཚོགས་པོ་ཡོད། རྒྱལ་ཁབ་གཉིས་པོས་མཉམ་འབྲེལ་ཐོག་འཛམ་གླིང་རིག་གནས་ཤུལ་བཞག་ལ་འདུན་ཞུ་བྱས་ནས་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་ཤུགས་ཆེ་རུ་བཏང་སྟེ་རྒྱལ་ཁབ་གཉིས་པོའི་སྲོལ་རྒྱུན་རིག་གནས་སྔོག་འདོན་བྱས་པ་དེས་རྒྱལ་ཁབ་གཉིས་པོའི་མི་དམངས་དབར་ཕན་ཚུན་རྒྱུས་མངའ་ལོན་པ་དང་མཛའ་གཅུགས་ཟབ་ཏུ་འགྲོ་བ་མ་ཟད། འཛམ་གླིང་གི་ཤེས་དཔལ་སྣ་མང་ཅན་དུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་ཐུབ”ཅེས་བཤད།

ཨེ་ཅིབ་ཀྱི་ཆེས་མཐོའི་རིག་དངོས་ཨུ་ལྷན་དབྱི་སི་ལམ་དང་ཁོའོ་ཕུའུ་ཐེ་རིག་དངོས་སིའི་སི་ཀྲང་ཅ་མའེ་ལེ·མུའུ་སི་ཐ་ཧྥ་ཡིས། ཀྲུང་གོར་ཆུ་འོག་རིག་གནས་ཤུལ་བཞག་སྲུང་སྐྱོང་གི་ཉམས་མྱོང་ཕུན་སུམ་ཚོགས་པོ་ཡོད་པ་དང་ཤུལ་བཞག་འདུན་ཞུ་བྱེད་མཁན་རིགས་གཅིག་མཁས་ཅན་ཚོགས་པ་ཡག་པོ་ཡོད་པས“མཉམ་འབྲེལ་ཐོག་ཤུལ་བཞག་ལ་འདུན་ཞུ་བྱེད་པ་དེ་ནི་རྒྱལ་ཁབ་གཉིས་པོའི་ཤུལ་བཞག་སྲུང་སྐྱོང་མཉམ་ལས་ཀྱི་འགོ་ཡག་པོ་འཛུགས་པ་ཞིག་ཡིན་པའི”ངོས་འཛིན་བྱས་པ་རེད།

ཨེ་ཅིབ་ཀྱི་ཆེས་མཐོའི་རིག་དངོས་ཨུ་ལྷན་གྱི་དྲུང་ཆེ་མུའུ་ཧན་མོ་ཏེ·དབྱི་སི་མེར·ཧ་ལི་ཏེ་ཡིས། “ཀྲུང་གོ་དང་ཨེ་ཅིབ་གཉིས་ལ་ཧ་ཅང་གལ་འགངས་ཆེ་བའི་གནའ་བོའི་ཤེས་དཔལ་ཡོད་པས། ཕྱོགས་གཉིས་པོའི་འབྱུང་འགྱུར་གྱི་མཉམ་ལས་ལ་རེ་སྒུག་བྱེད་རིན་ཆེན་པོ་ཡོད”པའེ་ཧོ་ལེང་རྡོ་བརྐོས་དང་ཉི་ལུའོ་ཆུ་ཁྲེ་གཉིས་མཉམ་འབྲེལ་ཐོག་ཤུལ་བཞག་ལ་འདུན་ཞུ་བྱ་རྒྱུ་དེ་ནི་ཀྲུང་གོ་དང་ཨེ་ཅིབ་ཀྱི་ཐུན་མོང་གི་ཕུགས་འདུན་ཡིན་པས། ཕྱོགས་གཉིས་པོས་མཉམ་འབྲེལ་ཐོག་ཤུལ་བཞག་ལ་འདུན་ཞུ་བྱེད་པའི་དྲན་ཐོར་མིང་རྟགས་འགོད་རྒྱུར་སྐུལ་འདེད་གཏོང་བའི་རྨང་གཞིའི་ཐོག་ཤུལ་བཞག་འདུན་ཞུར་གྲུབ་འབྲས་ཐོབ་པའི་དམིགས་ཚད་བསྒྲུབ་རྒྱུར་ཐུན་མོང་ཐོག་འབད་བརྩོན་བྱ་རྒྱུའི་རེ་བ་ཡོད་ཅེས་བཤད།