དབྱི་རག་ནི་ཀྲུང་གོ་གསར་པ་དང་ཕྱི་འབྲེལ་འཛུགས་སྔ་ཤོས་ཀྱི་ཨ་རབ་རྒྱལ་ཁབ་ཀྱི་གྲས་ཤིག་རེད་ལ། ཀྲུང་གོས་ཨེ་ཤེ་ཡ་ནུབ་མ་དང་ཨ་ཧྥེ་རི་ཁ་བྱང་མའི་ས་ཁུལ་དུ“རྒྱུད་གཅིག་ལམ་གཅིག”མཉམ་སྐྲུན་བྱེད་པའི་མཉམ་ལས་རོགས་ཟླ་གལ་ཆེན་ཞིག་ཀྱང་རེད། ཉེ་བའི་ལོ་ཤས་རིང་། མིའི་རིགས་ཀྱི་ལས་དབང་གཅིག་མཐུན་ཚོགས་པ་གཏོད་པའི་འོད་སྟོང་འཕྲོ་བའི་དར་ཆའི་འོག་ཀྲུང་དབྱིའི་འབྲེལ་བ་འཕེལ་རྒྱས་བརྟན་པོ་ཕྱིན་ཏེ་ཀྲུང་དབྱིའི་སྲོལ་རྒྱུན་མཛའ་གྲོགས་ཀྱི་ལེའུ་གསར་པ་བརྩམས་ཡོད།

2018ལོར་ཀྲུའུ་ཞི་ཞི་ཅིན་ཕིང་གིས་དབྱི་རག་གི་སྐབས་དེ་དུས་ཀྱི་ཙུང་ཐུང་མཱ་སུའུ་མུའུ་དང་ལྷན་དུ་ཀྲུང་དབྱིའི་དབར་ཕྱི་འབྲེལ་བཙུགས་ནས་ལོ་60འཁོར་བར་་རྟེན་འབྲེལ་གློག་འཕྲིན་གཏོང་རེས་གནང་སྟེ། རྒྱལ་ཁབ་གཉིས་པོའི་དབར་ཕྱི་འབྲེལ་བཙུགས་ནས་ལོ་60འཁོར་བ་གོ་སྐབས་སུ་བྱས་ཏེ“རྒྱུད་གཅིག་ལམ་གཅིག”མཉམ་སྐྲུན་གྱི་སྒྲོམ་གཞིའི་འོག་ཏུ་འཕེལ་རྒྱས་ཀྱི་འཐབ་ཇུས་འབྲེལ་མཐུད་ལ་ཤུགས་སྣོན་དང་གཉིས་ཕན་མཉམ་ལས་བྱེད་པ་དང་། རྒྱལ་ཁབ་གཉིས་པོའི་འཐབ་ཇུས་རོགས་ཟླའི་འབྲེལ་བ་གཏིང་ཟབ་ཏུ་བཏང་ནས་རྒྱལ་ཁབ་གཉིས་པོ་དང་རྒྱལ་ཁབ་གཉིས་པོའི་མི་དམངས་ལ་བདེ་སྐྱིད་དེ་བ་ཆེ་བ་བསྐྲུན་དགོས་པའི་ནན་བཤད་གནང་བ་རེད། 2022ལོར་ཀྲུའུ་ཞི་ཞི་ཅིན་ཕིང་གིས་དབྱི་རག་གི་ཙུང་ལི་སུའུ་ཏ་ཉི་དང་མཇལ་འཛོམས་གནང་སྐབས། ཀྲུང་གོ་ཕྱོགས་ཀྱིས་དབྱི་རག་ཕྱོགས་དང་མཉམ་དུ་འབད་བརྩོན་བྱས་ཏེ། ཀྲུང་དབྱིའི་འཐབ་ཇུས་རོགས་ཟླའི་འབྲེལ་བ་ཟམ་མི་ཆད་པར་གཏིང་ཟབ་ཏུ་གཏོང་འདོད་ཡོད་ཅེས་ནན་བཤད་གནང་བ་དང་། ཀྲུའུ་ཞི་ཞི་ཅིན་ཕིང་གི་འབོད་སྐུལ་དང་བཞེད་ཚུལ་ལ་དབྱི་རག་གི་འགོ་ཁྲིད་མི་སྣའི་ཚད་མཐོའི་ཁས་ལེན་ཐོབ་ཡོད། དབྱི་རག་གི་ཙུང་ཐུང་ལཱ་ཤིས་ཏེ་ཡིས“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོར་རྒྱབ་སྐྱོར་ཞུས་པ་མ་ཟད། ཀྲུང་གོའི་འཕེལ་རྒྱས་ཀྱི་འདུ་ཤེས་ལ་བསྔགས་བརྗོད་ཀྱང་གནང་ཡོད། ཙུང་ལི་སུའུ་ཏ་ཉི་ཡིས་ཀྲུང་གོ་ནི་དབྱི་རག་གི་གྲོགས་པོ་དམིགས་བསལ་ཞིག་ཡིན་པས། དབྱི་རག་ནས་ཀྲུང་གོས“རྒྱུད་གཅིག་ལམ་གཅིག”མཉམ་སྐྲུན་ལ་སྐུལ་འདེད་གཏོང་བའི་རོགས་ཟླ་གལ་ཆེན་བྱེད་འདོད་ཡོད་ཅེས་ནན་བཤད་གནང་བ་རེད།

ཀྲུང་དབྱིས“རྒྱུད་གཅིག་ལམ་གཅིག”མཉམ་སྐྲུན་བྱེད་པ་དེ་ནི་མིའི་རིགས་ཀྱི་ལས་དབང་གཅིག་མཐུན་ཚོགས་པ་མཉམ་སྐྲུན་བྱེད་པའི་གསོན་ཉམས་དོད་པའི་ལག་ལེན་ལ་གྱུར་ཡོད། ཀྲུང་གོ་ནི་དབྱི་རག་གི་དཔལ་འབྱོར་བསྐྱར་སྐྲུན་ནང་ཞུགས་སྔ་ཤོས་དང་། ཞུགས་ཡུན་རིང་ཤོས། རྣམ་གྲངས་ཁྱབ་རྒྱ་ཆེ་ཤོས། ཁྱབ་ཁོངས་མང་ཤོས་བཅས་ཀྱི་རྒྱལ་ཁབ་རེད། ཀྲུང་གོའི་ཁེ་ལས་ཀྱིས་དབྱི་རག་སྣུམ་ཞིང་ཁྲོད་ཀྱི་རང་བྱུང་སོལ་རླངས་གཙང་གསིང་བཟོ་གྲྭ་དང་པོ་དང་རང་བྱུང་སོལ་རླངས་ཕྱོགས་བསྡུས་བེད་སྤྱོད་ཐུབ་པའི་རྣམ་གྲངས་དང་པོའི་སྐྲུན་འགན་འཁུར་བ་དང་། ཕྱོགས་ཡོངས་ནས་སྤྱོད་འགོ་ཚུགས་རྗེས་ལོ་ལྟར་དབྱང་གཉིས་ལིའུ་འགྱུར་ཏུན་ཁྲི་3ཙམ་འབུད་ཚད་ཉུང་དུ་གཏོང་ཐུབ་ཀྱི་ཡོད། ཀྲུང་གོའི་ཁེ་ལས་ཀྱིས་སྐྲུན་འགན་འཁུར་བའི་གློག་ཁང་གིས་དབྱི་རག་རྒྱལ་ཡོངས་ཀྱི་གློག་ཤུགས་ཕྱེད་ཀ་མཁོ་འདོན་བྱས་ཡོད། ཀྲུང་གོའི་ཁེ་ལས་ཀྱིས་སྐྲུན་འགན་འཁུར་བའི་དཔེ་སྟོན་སློབ་གྲྭའི་རྣམ་གྲངས་ཁག་དང་པོས་དབྱི་རག་གི་སློབ་ཁྲིད་ཆ་རྐྱེན་ལེགས་སུ་གཏོང་རོགས་བྱས་ཏེ། སློབ་མ་ཁྲི་43གྱི་སློབ་གྲྭ་འགྲིམ་པའི་གནད་དོན་ཐག་གཅོད་ཐུབ་རྒྱུ་རེད། ཀྲུང་གོ་ཕྱོགས་ཀྱིས་ཡུལ་དེའི་ལག་རྩལ་ཤེས་ལྡན་པ་གསོ་སྐྱོང་ལ་སྣང་ཆེན་དང་མཉམ་ལས་གྲུབ་འབྲས་མཉམ་སྤྱོད་བྱས་ཏེ་བྱ་སྤྱོད་དངོས་ལ་བརྟེན་ནས་ཡུལ་དེའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རམ་འདེགས་བྱེད་ཀྱི་ཡོད།

(རྩོམ་པ་པོ་ནི་དབྱི་རག་ཏུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཡིན)