སློབ་གསོ་ཡག་པོ་གཉེར་རྒྱུ་ནི་འཕེལ་རྒྱས་ཀྱི་རྩ་བ་དང་དམངས་འཚོའི་རྨང་གཞི་ཡིན།

སློབ་གསོའི་བྱ་གཞག་སྔོན་ལ་འཕེལ་རྒྱས་གཏོང་རྒྱུ་ནི་ཧྲན་ཏུང་ཞིང་ཆེན་ཆིང་ཏའོ་གྲོང་ཁྱེར་གྱིས་གཞིས་རྩེ་གྲོང་ཁྱེར་བསམ་གྲུབ་རྩེ་ཆུས་ལ་ཐོག་མཐའ་བར་གསུམ་དུ་ཁ་གཏད་རོགས་སྐྱོར་བྱེད་པའི་ལས་དོན་ཁྲོད་ཀྱི་གལ་ཆེའི་ནང་གི་འགངས་ཆེན་ཞིག་ཡིན།

ལོ་མང་རིང་། ཆིང་ཏའོ་བོད་སྐྱོར་ལས་དོན་ཚོགས་ཆུང་གིས་བོད་སྐྱོར་མ་དངུལ་30%སློབ་གསོའི་ལས་དོན་ལ་གཏོང་རྒྱུ་མཐའ་འཁྱོངས་བྱས་པ་དང་། ཕྱོགས་མང་བརྩོན་ལེན་དང་མཐུན་སྦྱོར་ཧུར་ཐག་བྱས་ཏེ་སློབ་གསོའི་སྒྲིག་བཀོད་དང་སློབ་གཉེར་ཆ་རྐྱེན་ལེགས་སུ་གཏོང་རྒྱུར་ཤུགས་སྣོན་བརྒྱབ་པ་མ་ཟད། འོས་འགན་སློབ་གསོ་སྤུས་ལེགས་དང་དོ་སྙོམས་འཕེལ་རྒྱས་ལ་སྐུལ་འདེད་ཏན་ཏིག་གཏོང་བ་དང་། སློབ་གསོ་སྒྱུར་བཅོས་ཟམ་མི་ཆད་པར་གཏིང་ཟབ་ཏུ་གཏོང་བ། བསམ་གྲུབ་རྩེ་ཆུས་ཀྱི་སློབ་གསོའི་སྤུས་ཚད་མཐོ་རུ་གཏོང་བ་བཅས་བྱས་ནས་མི་དམངས་བློ་ཡིད་ཚིམ་པའི་སློབ་གསོ་ཡག་པོ་གཉེར་བ་དང“སློབ་གྲྭར་འགྲོ་ཐུབ་པ”ནས“སློབ་གྲྭར་ཡག་པོ་འགྲོ་བའི”བར་རྩ་བའི་རང་བཞིན་གྱི་འགྱུར་ལྡོག་བྱུང་ཡོད། རོགས་སྐྱོར་བྱེད་མཁན་དང་དང་ལེན་བྱེད་མཁན་ས་ཁུལ་གཉིས་ཀྱི་ཐུན་མོང་འབད་བརྩོན་འོག་བསམ་གྲུབ་རྩེ་ཆུས་ཀྱི་རིམ་པ་ཁག་དང་རིགས་ཁག་གི་སློབ་གྲྭར་དགེ་རྒན་དཔུང་ཁག་འཛུགས་སྐྱོང་དང་། སློབ་གསོ་ཞིབ་འཇུག་དང་སྒྱུར་བཅོས། སློབ་ཞུགས་གོང་གི་སློབ་གསོ། བྱང་ཚད་སློབ་གསོ། སློབ་གཉེར་ཆ་རྐྱེན་སོགས་ཐད་འཕེལ་རྒྱས་མྱུར་པོ་བྱུང་ཡོད། 2015ལོར་སྐར་མ་མཐོ་པོས་རྒྱལ་ཁབ་ཀྱི་འོས་འགན་སློབ་གསོ་དོ་སྙོམས་འཕེལ་རྒྱས་ཀྱི་དཔྱད་དཔོག་ལོན་པ་དང་། 2018ལོར་རང་སྐྱོང་ལྗོངས་ཀྱི་བྱང་ཚད་སློབ་གསོའི་དཔྱད་ཞིབ་དཔྱད་དཔོག་ལོན་པ། 2021ལོར་བོད་དུ་སྔོན་ལ་གྲོང་ཚོ་དང་སྡོད་གནས་ཚད་ལྡན་ཅན་གྱི་བུ་བཅོལ་ཁང་ཚང་མར་ཁྱབ་པ། 2023ལོར་རྫོང་ཁོངས་ཀྱི་སློབ་ཞུགས་གོང་གི་སློབ་གསོའི་རྒྱལ་ཁབ་ཀྱི་ཞིབ་བཤེར་གཏན་འཁེལ་ལོན་ཡོད།

རྨང་གཞི་བརྟན་གཏོང་དང་ཞན་ཆ་བསལ་བ།

སློབ་གསོའི་རྨང་གཞིའི་སྒྲིག་བཀོད་འཛུགས་སྐྲུན་དང་ཆ་འགྲིག་ཞབས་ཞུ་མུ་མཐུད་འཐུས་སྒོ་ཚང་དུ་བཏང་བ།

གཞིས་རྩེ་གྲོང་ཁྱེར་ནས་ཐོན་ཏེ་ནུབ་བྱང་ཕྱོགས་སུ་རྒྱལ་ལམ་349བརྒྱུད་ཚེ་བསམ་གྲུབ་རྩེ་ཆུས་གདོང་དཀར་ཤང་བརྩེ་བའི་ཕུགས་རེའི་སློབ་ཆུང་དུ་སླེབས་ཀྱི་ཡོད།

“སྐབས་དེ་དུས་དེ་གར་གཞི་ཁྱོན་ཅུང་ཆེ་ཙམ་གྱི་གྲོང་ཚོ་རིམ་པའི་སློབ་ཁྲིད་ས་ཚིགས་ཤིག་རེད་འདུག སྒྲོག་རྩེ་རྐུབ་སྟེགས་མེད་པར་བརྟེན་སློབ་མ་ཚོ་ས་སྟེང་དུ་བསྡད་ནས་སློབ་ཚན་ཉན་གྱི་ཡོད། གནས་ཚུལ་དེ་ལོ་རབས་བདུན་ཅུ་བརྒྱད་ཅུའི་ཆིང་ཏའོ་ཡི་གྲོང་གསེབ་འགའ་ཞིག་དང་འདྲ་པོ་འདུག”ཅེས་ཆིང་ཏའོ་གྲོང་ཁྱེར་གྱི་ཁག་དང་པོའི་བོད་སྐྱོར་ལས་བྱེད་པ་ཧུའུ་ཞའོ་ཕིང་གིས་དྲན་གསོ་བྱེད་བཞིན་དུ་བཤད། ཁོང་གིས“ཆིང་ཏའོ་གྲོང་ཨུད་དང་གྲོང་ཁྱེར་སྲིད་གཞུང་གིས་གནས་ཚུལ་དེ་ཤེས་རྟོགས་བྱུང་རྗེས་མ་དངུལ་བཏང་ནས་ས་གནས་དེ་གའི་སློབ་ཁྲིད་ཆ་རྐྱེན་ལེགས་སུ་གཏོང་རྒྱུའི་ཐག་བཅད་སོང”ཞེས་བཤད།

དུས་དེ་ནས་བཟུང་གདོང་དཀར་ཤང་མཚོན་བྱེད་དུ་བྱས་པའི“རྐུབ་ས་ལ་འཛུགས་མི་དགོས་པའི”ལས་གྲྭ་དངོས་སུ་ལག་བསྟར་བྱེད་འགོ་ཚུགས།

1996ལོའི་ཟླ་5པར། ཆིང་ཏའོ་བོད་སྐྱོར་ལས་དོན་ཚོགས་ཆུང་གིས་ཕྱོགས་མང་པོ་ནས་མ་དངུལ་སྒོར་ཁྲི་50གྲབས་གསོག་བྱས་ཏེ་སློབ་གྲྭའི་སྒོ་དང་སྒེའུ་ཁུང་རྙིང་པ་ཉམས་གསོ་བྱས་པ་དང་། སྒྲོག་ཙེ་དང་རྐུབ་སྟེགས་གསར་པ་ཉོས་པ། སློབ་ཁྲིད་ཡོ་བྱད་ཆ་ཚང་པོ་ཉོས་པ། ཁང་པ་27གསར་སྐྲུན་བྱས་ནས་སློབ་ཁང་དང་གཞུང་དོན་ཁང་བཅས་བྱས་ཏེ་ཕྲུ་གུ་ཚོ་ས་སྟེང་དུ་བསྡད་ནས་སློབ་སྦྱོང་བྱེད་པའི་གནད་དོན་རྩ་བའི་ཆ་ནས་ཐག་གཅོད་བྱས་ཡོད། འགྱུར་ལྡོག་དེར་དྲན་གསོ་བྱ་ཆེད་སློབ་གྲྭའི་མིང་ལ“ཆིང་ཏའོ་ཕུགས་རེའི་སློབ་ཆུང”ཞེས་བཏགས།

ཕྱིས་སུ་སློབ་གྲྭ་དེ་2008ལོར་བསྐྱར་སྐྲུན་བྱས་པ་དང་འབྲེལ“བརྩེ་བའི་ཕུགས་རེའི་སློབ་ཆུང”དུ་མིང་བསྒྱུར། 2020ལོར་སླར་ཡང་སློབ་ཁྲིད་ཐོག་ཁང་གཉིས་པ་དང་སློབ་མའི་ཉལ་ཁང་གསར་སྐྲུན་བྱས། དུས་དེ་ནས་བཟུང་བརྩེ་བའི་ཕུགས་རེའི་སློབ་ཆུང་དེ་ནུས་པ་ཆ་ཚང་བ་དང་སྒྲིག་ཆས་ཆ་ཚང་བའི་ཨར་འདམ་ལས་གྲུབ་པའི་སློབ་གྲྭ་གསར་པ་ཞིག་ཏུ་གྱུར།

“ང་དུས་རབས་འདིར་སྐྱེས་པར་བསོད་བདེ་རེད་བསམ་གྱི་འདུག”ཅེས་པ་སངས་བུ་ཁྲིད་ཀྱིས་བཤད། ཁོང་ནི་1996ལོར་སློབ་གྲྭ་བསྐྱར་སྐྲུན་བྱས་རྗེས་ཀྱི་སློབ་ཐོན་སློབ་མ་ཁག་དང་པོ་ཡིན་པ་དང་ད་ཆ་སློབ་གྲྭའི་རྒྱབ་ཕྱོགས་མཁོ་སྒྲུབ་ཀྱི་ལས་ཀ་བྱེད་བཞིན་ཡོད། ཁོང་གིས“ད་ལྟའི་ཕྲུ་གུ་ཚོ་དངོས་གནས་སྐྱིད་པོ་རེད། སློབ་ཁང་རྒྱ་ཆེ་ལ་དཀར་ཆ་དོད་པ་མ་ཟད། སློབ་ཕྱིའི་བྱེད་སྒོ་ཕུན་སུམ་ཚོགས་པོ་ཡོད།‘འགན་ལེན་གསུམ’གྱི་སྲིད་ཇུས་ཡོད་པས་ཁོང་ཚོས་དེང་གི་དུས་འདིར་གཅེས་སྤྲས་དང་སློབ་སྦྱོང་ཧུར་ཐག་བྱས་ཏེ་མེས་རྒྱལ་གྱི་དྲིན་ལན་འཇལ་རྒྱུའི་རེ་བ་ཡོད”ཅེས་བཤད།

བརྩེ་བའི་ཕུགས་རེའི་སློབ་ཆུང་གི་སློབ་སྤྱི་མིག་མཚམས་ཀྱིས་ཉེ་བའི་ལོ་ཤས་རིང་རྒྱལ་ཁབ་ཀྱི་སྲིད་ཇུས་ཀྱི་རྒྱབ་སྐྱོར་དང་བོད་སྐྱོར་རོགས་སྐྱོར་ལ་བརྟེན་ནས་སློབ་གྲྭས་དོན་དངོས་དང་ཟུང་འབྲེལ་བྱས་ཏེ། སྔ་རྗེས་སུ་ལྷ་མོ་དང་། ཡིག་གཟུགས། སྒྲ་སྙན། རྡོ་བརྐོས་རི་མོ། རྐང་རྩེད་སྤོ་ལོ། ལན་ཆིའུ་སྤོ་ལོ། ཚན་རྩལ་སོགས་ཚོགས་པ་22བཙུགས་ནས་དོ་སྙོམས་འཕེལ་རྒྱས་ལ་སྐུལ་འདེད་བཏང་བས། གྲོང་ཁྱེར་དང་གྲོང་གསེབ་དབར་གྱི་སློབ་མའི་ཕྱོགས་བསྡུས་ནུས་པ་འཕེལ་རྒྱས་ཀྱི་ཧེ་བག་ཆུང་དུ་ཕྱིན་ནས་སློབ་གྲྭར་དགེ་རྒན་གནས་ཐུབ་པ་དང་སློབ་མའི་ཡིད་དབང་འགུག་ཐུབ་པ་མ་ཟད། ཁྱིམ་བདག་གིས་ཀྱང་སློབ་གསོར་སྔར་བས་མཐོང་ཆེན་བྱེད་ཀྱི་ཡོད་ཅེས་ངོ་སྤྲོད་བྱས།

“ཇི་ལྟར་དབུལ་ཡང་སློབ་གསོ་དབུལ་མི་རུང་། ཇི་ལྟར་དཀའ་ནའང་ཕྲུ་གུ་དཀའ་མི་རུང”ཞེས་པ་ནི་ཁས་ལེན་ཞིག་ཡིན་ལ་འགན་འཁྲི་ཞིག་དེ་བས་ཡིན། 1996ལོ་ནས་2014ལོའི་ཟླ་11བར། ཆིང་ཏའོ་དང་འབྲེལ་ཡོད་རང་སྐྱོང་ལྗོངས་དང་གྲོང་ཁྱེར་དང་གཅེས་སེམས་ཁེ་ལས་ཀྱིས་རིམ་རྩིས་བརྒྱབ་ན། བོད་སྐྱོར་མ་དངུལ་སྒོར་ཁྲི་3300ལྷག་ཙམ་བཏང་ནས་བསམ་གྲུབ་རྩེ་ཆུས་ལ་ཕུགས་རེའི་སློབ་ཆུང་16སྐྲུན་རོགས་བྱས་པས། སློབ་གྲྭ་ནི་ས་གནས་དེ་གའི་ཆ་རྐྱེན་ཡག་ཤོས་དང་དཀར་ཆ་དོད་ཤོས་ཀྱི་ས་ཆ་ཞིག་ཏུ་གྱུར་ཡོད། རིན་མེད་སློབ་འཁོར་དང“དྲ་སྦྲེལ་+དྲ་ཐོག་སློབ་ཁྲིད”སོགས་དེ་སྔ“ཁྱད་མཚར་ཅན”གྱི་བྱ་དངོས་རྣམས་ཕྲུ་གུ་ཚོའི་སློབ་སྦྱོང་དང་འཚོ་བའི་ནང་ས་ཁྱབ་རྡོ་ཁྱབ་ཏུ་གྱུར་ཡོད།

གསོ་སྦྱོང་ལ་མཐོང་ཆེན་དང་མཛུབ་སྟོན་ལ་ཤུགས་སྣོན་བརྒྱབ་པ།

དགེ་རྒན་དཔུང་ཁག་འཛུགས་སྐྱོང་སྤུས་ཚད་མཐོ་བའི་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་བཏང་བ།

ཧྲན་ཏུང་གི་སྔོན་ཐོན་སློབ་གསོའི་འདུ་ཤེས་དང་། སྤུས་ལེགས་སློབ་གསོའི་ཐོན་ཁུངས། དེང་རབས་སློབ་གསོའི་བྱེད་སྟངས་བཅས་ཇི་ལྟར་བྱས་ནས་བསམ་གྲུབ་ཆུས་ལ་ཁྱབ་འདལ་གཏོང་རྒྱུ་ནི་ཐོག་མཐའ་བར་གསུམ་དུ་ཆིང་ཏའོ་བོད་སྐྱོར་ལས་དོན་ཚོགས་ཆུང་གིས་བསམ་བཞིན་སྒྲུབ་པའི་བྱ་བ་ཞིག་རེད།

བསམ་གྲུབ་རྩེ་ཆུས་ལ་སློབ་གསོ་ཤེས་ལྡན་པ་མི་འདང་བའི་གནད་དོན་ལ་གཞིགས་ཏེ་ས་གནས་ས་ཐོག་ཏུ་བཅར་འདྲི་བརྟག་ཞིབ་བྱས་པ་དང་བསམ་གྲུབ་རྩེ་ཆུས་ཀྱི་འདོད་མོས་དགོས་མཁོ་དང་ཟུང་འབྲེལ་གྱིས། 2004ལོ་ནས་བཟུང་ཆིང་ཏའོ་གྲོང་ཁྱེར་གྱིས་ཆེད་མངགས་སློབ་གསོའི་ཁོངས་གཏོགས་ཀྱི་ལས་བྱེད་ཤེས་ལྡན་པར་བོད་དུ་་ལས་ཀ་བཀོད་སྒྲིག་བྱས་པ་རེད།

2011ལོ་ནས་བཟུང་ཆིང་ཏའོ་བོད་སྐྱོར་ལས་དོན་ཚོགས་ཆུང་གིས་གཅིག་སྡུད་སློབ་ཁྲིད་དང་། འཛིན་གྲྭ་དང་མཉམ་དུ་སློབ་སྦྱོང་། ལྟ་སྐོར་གསོ་སྦྱོང་སོགས་ཀྱི་བྱེད་ཐབས་སྤྱད་དེ་བསམ་གྲུབ་རྩེ་ཆུས་ཀྱི་སློབ་གྲྭ་འབྲིང་ཆུང་གི་ལས་བྱེད་པ་དང་དགེ་རྒན་ཆིང་ཏའོ་རུ་གསོ་སྦྱོང་བྱེད་པའི་ཕུགས་ཕན་ལམ་སྲོལ་རིམ་བཞིན་བཟོས་ཤིང་། སྔ་རྗེས་སུ་ཁག་ཐེངས་22ཀྱི་དགེ་རྒན་མི་ཐེངས་450ཙམ་ཆིང་ཏའོ་དང་ཤར་ཕྱོགས་མཚོ་རྒྱུད་ས་ཁུལ་དུ་གསོ་སྦྱོང་ལ་བཏང་བ་རེད།

2016ལོར་སློབ་གསོ་ཤེས་ལྡན་པའི“ཚོགས་སྒྲིག་རྣམ་པའི”བོད་སྐྱོར་ལས་དོན་ཕྱོགས་ཡོངས་ནས་དོན་འཁྱོལ་བྱས་ཤིང་། ཧྲན་ཏུང་ཞིང་ཆེན་གྱི“ཚོགས་སྒྲིག་རྣམ་པའི”སློབ་གསོའི་བོད་སྐྱོར་ལ་ཞུགས་མཁན་ཆིང་ཏའོ་ཡི་དགེ་རྒན་གྱིས“ཕབས་རྩིའི”ནུས་པ་བཏོན་ནས་གཞིས་རྩེ་གྲོང་ཁྱེར་གྱི་རོགས་སྐྱོར་ཐོབ་པའི་མཐོ་རིམ་སློབ་འབྲིང་ཁག་གི་འཕེལ་རྒྱས་ལ་སྐྱེ་སྟོབས་དང་གསོན་ཤུགས་བསྣན་ཡོད།

སྙིང་རུས་གཏན་འཁྱོངས་དང་འབད་བརྩོན་ལྷོད་མེད་བྱས་ཏེ་དངོས་སྒྲུབ་ཀྱི་བྱེད་ཐབས་རེ་རེ་བཞིན་དོན་འཁྱོལ་བྱས་པས། བསམ་གྲུབ་རྩེ་ཆུས་ཀྱི་དགེ་རྒན་གྱི་དཔུང་ཁག་འཛུགས་སྐྱོང་ལ་དུས་མཚམས་རང་བཞིན་གྱི་ཕན་འབྲས་ཐོན་རྒྱུར་སྐུལ་འདེད་བཏང་ཡོད།

བསམ་གྲུབ་རྩེ་ཆུས་ཆི་ལུའུ་བུ་བཅོལ་ཁང་གི་ཡོན་ཀྲང་མིག་སྒྲོན་2015ལོ་དང་2016ལོར་བསྟུད་མར་རང་སྐྱོང་ལྗོངས་རིམ་པའི་བུ་བཅོལ་ཁང་གི་ཡོན་ཀྲང་གྲགས་ཅན་ལ་བདམས་ཤིང་། ཁོང་གིས“ངའི་འཚར་ལོངས་ནི་རྩ་འཛུགས་ཀྱི་གསོ་སྐྱོང་དང་བོད་སྐྱོར་གྱི་གསོ་སྦྱོང་དང་ཁ་འབྲལ་ཐབས་མེད”ཅེས་བཤད།

2010ལོའི་ཟླ་8པར། བསམ་གྲུབ་རྩེ་ཆུས་ཀྱི་གཞུང་བཙུགས་བུ་བཅོལ་ཁང་དང་པོ་སྟེ་དྲོ་སྐྱིད་བུ་བཅོལ་ཁང་དངོས་སུ་སྤྱོད་འགོ་ཚུགས་ཤིང་། མིག་སྒྲོན་བུ་བཅོལ་ཁང་གི་ཡོན་ཀྲང་ལ་བསྐོས། དེ་སྔོན་ཁོང་གིས་དམའ་རིམ་སློབ་འབྲིང་དང་མཐོ་རིམ་སློབ་འབྲིང་དུ་དགེ་རྒན་དང་སློབ་གསོ་ཅུས་ཀྱི་བརྟག་ཞིབ་པའི་འགན་ཁུར་མྱོང་ཡོད་ཀྱང་། སློབ་ཞུགས་གོང་གི་སློབ་གསོའི་ལས་དོན་བསྒྲུབས་མྱོང་མེད། མིག་སྒྲོན་གྱིས“ལས་ཀའི་ཁྱད་པར་ཆེ་བས་ང་ལ་དཀའ་ངལ་མང་པོ་འཕྲད་པའི་སྣང་བ་སྐྱེས་བྱུང་། ཕྱིས་སུ་ངས་ཆིང་ཏའོ་ཚོད་ལྟའི་བུ་བཅོལ་ཁང་དུ་སློབ་སྦྱོང་བྱས་པ་དང་། དེ་བཞིན་ཞིང་ཆེན་དང་གྲོང་ཁྱེར་གཞན་དུ་གསོ་སྦྱོང་དུ་བསྐྱོད་ནས་སྔོན་ཐོན་གྱི་སློབ་གསོའི་འདུ་ཤེས་དང་སློབ་ཁྲིད་བྱེད་སྟངས་མང་པོ་སྦྱོང་རྒྱུ་བྱུང་བས་ལས་དོན་དེ་བས་ཡག་པོ་སྒྲུབ་ཆེད་རྨང་གཞི་བཏིང་ཐུབ་སོང་”ཞེས་བཤད།

2015ལོའི་ཟླ་11པར། ཆི་ལུའུ་བུ་བཅོལ་ཁང་ལས་མཇུག་འགྲིལ་ནས་བེད་སྤྱོད་གཏོང་རྒྱུར་རྩིས་སྤྲད་པ་དང་། དོ་དམ་གྱི་ཉམས་མྱོང་ཕུན་སུམ་ཚོགས་ཤིང་ལས་ཀའི་འཇོན་ཐང་གཟེངས་སུ་ཐོན་པས། མིག་སྒྲོན་དེ་གར་ལས་སྒྱུར་བྱས་ནས་ད་བར་ཧྲུའུ་ཅི་དང་བུ་བཅོལ་ཁང་གི་ཡོན་ཀྲང་བྱས།

“ས་གནས་གཉིས་ཀྱིས་མཉམ་དུ་རྒྱུན་རྣམ་ཅན་གྱི་སློབ་སྦྱོང་གསོ་སྦྱོང་བྱས་པ་བརྒྱུད། ས་མཐོར་སྤུས་ལེགས་སློབ་གསོའི་ཐོན་ཁུངས་རྒྱུན་མཐུད་ནང་འདྲེན་བྱས་ཏེ་ས་གནས་གཉིས་དབར་གྱི་འགྲོ་འོང་དང་། སྤེལ་རེས། མཉམ་འདྲེས་བཅས་ཀྱི་ཐབས་ལམ་རྒྱ་ཆེར་བཏང་ནས་སློབ་གསོའི་ཁོངས་གཏོགས་ཀྱི་ལེགས་ཆ་གསབ་རེས་དང་མཉམ་ལས་འཕེལ་རྒྱས་ཀྱི་ལེའུ་གསར་པར་སྐུལ་འདེད་གཏོང་གི་ཡོད”ཅེས་བསམ་གྲུབ་རྩེ་ཆུས་སློབ་གསོ་ཅུས་ཏང་ཨུད་ཀྱི་ཧྲུའུ་ཅི་ཅུས་ཀྲང་ལྷག་པ་ཚེ་རིང་གིས་བཤད།

ལེགས་ཆ་སྤེལ་ནས་སྤུས་འབྲས་ཆེ་རུ་བཏང་བ།

སློབ་གསོའི་བྱ་གཞག་གི“འཇམ་ཤུགས་འཛུགས་སྐྱོང”རྒྱུན་ཆད་མེད་པར་ལེགས་སུ་བཏང་བ།

ཉེ་བའི་ལོ་ཤས་རིང་། བསམ་གྲུབ་རྩེ་ཆུས་ཀྱི་སློབ་གྲྭ་འབྲིང་ཆུང་གི་སློབ་མར་བྱེད་སྒོ་མང་དུ་ཕྱིན་པ་དང་ནང་དོན་སྔར་བས་ཕུན་སུམ་ཚོགས་སུ་གྱུར་པའི་ཚོར་སྣང་ཟབ་མོ་བྱུང་ཡོད།

ཆིང་ཏའོ་བོད་སྐྱོར་ལས་དོན་ཚོགས་ཆུང་གི་མཐུན་སྦྱོར་སྐུལ་འདེད་འོག ལའེ་ཞི་གྲོང་ཁྱེར་དང་ཐེན་ཅིན་སློབ་ཆེན་གྱིས་བསམ་གྲུབ་རྩེ་ཆུས་ཀྱི་འབྲེལ་ཡོད་ཚན་པ་དང་སློབ་གྲྭའི་དབར་ཡུན་རིང་མཉམ་ལས་ཀྱི་འབྲེལ་བ་བཙུགས་ནས་རྐང་རྩེད་སྤོ་ལོ་མཁས་པའི་སློབ་མ་23ཆིང་ཏའོ་རྐང་རྩེད་སྤོ་ལོའི་དབྱར་སྒར་དུ་ཞུགས་ནས་ཆེད་ལས་ཀྱི་སྦྱོང་བརྡར་བྱས་པ་རེད།

སློབ་གསོའི་བྱ་གཞག་སྤུས་ཚད་མཐོ་བའི་འཕེལ་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་བའི་དུས་མཚམས་གསར་པར་སླེབས་པ་དང་ཆབས་ཅིག་ཆིང་ཏའོ་བོད་སྐྱོར་ལས་དོན་ཚོགས་ཆུང་གིས་སློབ་གསོའི་བོད་སྐྱོར་ལས་དོན་ལའང་བསམ་གཞིག་དེ་བས་གཏིང་ཟབ་བྱས་ཡོད།

མ་དངུལ་སྒོར་ཁྲི་7300བཏང་ནས་གཞིས་རྩེ་གྲོང་ཁྱེར་དུ་བོད་ཀྱི་གཞོན་ནུ་ལོ་ཆུང་གི་ཚན་རིག་ཁང་ཐོག་མ་བསྐྲུན་ནས“སློབ་གསོའི་ལྟེ་གནས་དྲུག”བཙུགས་པའི་ནང་ཀྲུང་ཧྭའི་སྲོལ་རྒྱུན་རིག་གནས་དང་། ཚན་རྩལ་གསར་གཏོད་སློབ་གསོ། ངལ་རྩོལ་སློབ་གསོ། རྒྱལ་སྲུང་སློབ་གསོ། སྐྱེ་ཁམས་ཁོར་ཡུག་སྲུང་སྐྱོང་སློབ་གསོ། རྒྱ་མཚོའི་ཚན་རིག་ཁྱབ་གདལ་སློབ་གསོ། ཚེ་སྲོག་སློབ་གསོ་སོགས་ཐད་ཀྱི་བྱང་ཚད་སློབ་གསོའི་སློབ་ཚན་ཚུད་ཡོད།

2023ལོའི་ཟླ་7པར། 2022ནས་2023ལོ་འཁོར་གྱི་གོ་ལ་ཧྲིལ་པོའི་གསར་གཏོད་ཚོགས་ཆེན་གྱི་ཀྲུང་གོ་ཁུལ་གྱི་རྒྱལ་ཡོངས་མཐའ་བསྡུར་ལ་བསམ་གྲུབ་རྩེ་ཆུས་སློབ་ཆུང་གསུམ་པ་དང་བསམ་གྲུབ་རྩེ་ཆུས་སློབ་འབྲིང་དང་པོར་ཟངས་ཀྱི་བྱ་དགའ་ཐོབ་ཡོད།

འགྲན་བསྡུར་ལ་ཞུགས་ཐེངས་དང་པོར་བྱ་དགའ་ཐོབ་པའི་གཏམ་བཟང་ཁྱབ་པས་མི་སེམས་ལ་སྐུལ་མ་ཐེབས་ཤིང་། ཀྲོའུ་ཅེ་ཡིས“གྲུབ་འབྲས་ཐོབ་པ་ནི་སློབ་གསོའི་ལས་དོན་པ་མི་རབས་རེ་རེས་དཀའ་སྤྱད་འབད་བརྩོན་བྱས་པའི་འབྲས་བུ་ཡིན་ལ། ཆིང་ཏའོ་ཡི་སློབ་གསོའི་བོད་སྐྱོར་རྒྱུན་ཆད་མེད་པར་ཟབ་ཏུ་བཏང་བའི་མཚོན་ཚུལ་ཞིག་དེ་བས་ཀྱང་རེད། སླད་ཕྱིན་ཆིང་ཏའོ་བོད་སྐྱོར་ལས་དོན་ཚོགས་ཆུང་གིས་མི་བཟང་གསོ་སྐྱོང་གི་རྩ་བའི་ལས་འགན་ལ་དམིགས་པ་དང་བསམ་གྲུབ་རྩེའི་སློབ་གསོའི་ཞན་ཆར་གཞིགས་ནས་སློབ་གསོའི་བོད་སྐྱོར་གྱི་ཁྱབ་རྒྱ་ཟམ་མི་ཆད་པར་ཕུན་སུམ་ཚོགས་སུ་གཏོང་བ་དང་། ཕྱོགས་ཡོངས་དང་རིམ་པ་མང་བའི་སློབ་གསོའི་ཁ་གཏད་རོགས་སྐྱོར་ལས་དོན་གྱི་རྣམ་པ་བཏོད་དེ་ཀུན་སྤྱོད་དང་། ཤེས་རིག ལུས་རྩལ། མཛེས་རྩལ། ངལ་རྩོལ་བཅས་ཕྱོགས་ཡོངས་ནས་འཕེལ་རྒྱས་གཏོང་བའི་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་དེ་བས་མང་བ་གསོ་སྐྱོང་བྱེད་ཀྱི་ཡིན”ཞེས་བཤད།