“ལེགས་པོ་རོང་ནི་ངའི་ཕ་ཡུལ་གཉིས་པ་ཡིན”མཚོ་སྣ་གྲོང་ཁྱེར་ཞིང་ལས་གྲོང་གསེབ་ཅུས་ཀྱི་ཞིབ་འཇུག་པ་ལིའུ་ཧྲུའུ་ཧྥུང་ལེགས་པོ་རོང་དུ་འབྱོར་རྗེས་གང་ས་ནས་ནགས་ཚལ་དང་དལ་གྱིས་རྒྱུག་པའི་ཆུ་བོ་དང་རྦབ་ཆུ་མཐོང་སྐབས། ཕ་ཡུལ་ཨན་ཧུའེ་ཞིང་ཆེན་གྱི་ལྟ་ན་སྡུག་པའི་ཧོང་ཧྲན་དང་ཏ་པེ་ཧྲན་རི་བོར་སླེབས་པ་ལྟ་བུའི་ཚོར་སྣང་ཞིག་ཡོང་གི་འདུག་ཅེས་བཤད།

2016ལོར་ཨན་ཧུའེ་ཞིང་ཆེན་བོད་སྐྱོར་ལས་དོན་རུ་ཁག་ཐེངས་དྲུག་པའི་རུ་མི་ཞིག་ཡིན་པའི་ལིའུ་ཧྲུའུ་ཧྥུང་ལྷོ་ཁར་ཡོང་ཞིང་། སྐབས་དེར་ལེགས་པོ་རོང་གི་ཇ་རར་འབྱོར་སྐབས་རང་ཉིད་ཀྱི་འབད་བརྩོན་ཁ་ཕྱོགས་གཏན་འཁེལ་བྱས།

འདྲི་རྟོགས་བྱེད་པར་བསྐྱོད་ནས་བརྟག་ཞིབ་གཏིང་ཟབ་བྱས་པ་བརྒྱུད། ལིའུ་ཧྲུའུ་ཧྥུང་གིས་རྒྱུ་རྐྱེན་སྣ་ཚོགས་ཀྱི་རྐྱེན་པས་ས་གནས་དེ་གའི་ཇ་རའི་རྒྱ་ཁྱོན་ཆུང་བ་དང་། ཐོན་ཚད་དམའ་བ། ལས་སྣོན་བཟོ་རྩལ་རྗེས་ལུས་ཡིན་པ། ཚོང་ལམ་ཡག་པོ་མེད་པ། ཐོན་རྫས་ཀྱི་ཟུར་སྣོན་རིན་ཐང་མཐོ་པོ་མེད་པ། ཇའི་ཐོན་ལས་འཕེལ་རྒྱས་འགྲོ་འགོར་བ་སོགས་ཀྱི་གནས་ཚུལ་ཤེས་རྟོགས་བྱུང་།

མཚོ་སྣ་གྲོང་ཁྱེར་གྱི་ཇའི་ཐོན་ལས་ཀྱི་རྒྱ་སྟོབས་སྔར་བས་ཆེ་རུ་དང་ཐོན་ལས་ཀྱི་ཟུར་སྣོན་རིན་ཐང་མཐོ་རུ་བཏང་སྟེ་མང་ཚོགས་ལ་ཡོང་འབབ་འཕར་བར་སྐུལ་ཁྲིད་བྱ་ཆེད། ལིའུ་ཧྲུའུ་ཧྥུང་གིས་བློ་ཐག་ཆོད་པོས་ལས་འགན་ལྕི་པོ་དང་དུ་བླངས་ནས་ཇ་རྭ“ལྟ་སྲུང་བ”ཞིག་བྱེད་འགོ་བརྩམས།

ཚན་རྩལ་གྱི་འདེགས་སྐྱོར་བྱེད་ཤུགས་ཆེ་རུ་གཏོང་ཆེད། ལིའུ་ཧྲུའུ་ཧྥུང་གིས་ཨན་ཧུའེ་ཞིང་ཆེན་བོད་སྐྱོར་ལས་དོན་རུ་ཁག་བརྒྱུད། ཨན་ཧུའེ་ཞིང་ལས་སློབ་ཆེན་ཇ་དང་བཟའ་བཅའི་ཚན་རྩལ་སློབ་གླིང་དང་ཨན་ཧུའེ་ཞིང་ལས་ཚན་རིག་ཁང་ཇ་ལོ་ཞིབ་འཇུག་སུའོ་སོགས་ཚན་པ་དང་འབྲེལ་གཏུག་བྱས་ནས་ལག་རྩལ་ཐད་ཀྱི་རྒྱབ་སྐྱོར་ཐོབ་ཐབས་བྱས་པ་དང་། མ་དངུལ་གྱི་གནད་དོན་ཐག་གཅོད་བྱ་ཆེད། ལིའུ་ཧྲུའུ་ཧྥུང་གིས་རང་འགུལ་ངང་གོང་རིམ་ཚན་རྩལ་སྡེ་ཚན་དང་འབྲེལ་གཏུག་བྱས་ཏེ། ཇའི་སྡོང་པོ་ནང་འདྲེན་དང་ཇའི་ཐོན་ལས་མཐོར་གཏོང་གི་རང་སྐྱོང་ལྗོངས་ཀྱི་གཙོ་གནད་ཞིབ་འཇུག་གསར་སྤེལ་དང་གཞན་སྒྱུར་རིགས་ཀྱི་རྣམ་གྲངས་གཉིས་སྔ་རྗེས་སུ་རེ་ཞུ་བརྩོན་ལེན་བྱས་པར་རྣམ་གྲངས་ལ་གྲོན་དངུལ་སྒོར་ཁྲི་390རག་ཡོད།

མཚོ་སྣའི་ཇའི་ཐོན་ལས་འཕེལ་རྒྱས་ཡོང་འགོ་ཚུགས་པའི་སྐབས་སུ་ལིའུ་ཧྲུའུ་ཧྥུང་གི་ལོ་གསུམ་གྱི་བོད་སྐྱོར་དུས་ཚོད་ཀྱང་ཐིམ་ལ་ཉེ། “ཐོག་མའི་ལོ་གསུམ་ནང་ཐོབ་པའི་གྲུབ་འབྲས་མང་ཆེ་བ་ནི་ཚན་ཞིབ་གྲུབ་འབྲས་རེད། ལག་ལེན་བསྟར་ཤུགས་མུ་མཐུད་ཆེ་རུ་བཏང་ཚེ་གཞི་ནས་ཐོན་སྐྱེད་ནུས་ཤུགས་ངོ་མ་ཆགས་ཐུབ”ཅེས་ལིའུ་ཧྲུའུ་ཧྥུང་གིས་བཤད།

མཚོ་སྣའི་ཇའི་ཐོན་ལས་དར་རྒྱས་གཏོང་རྒྱུ་དེ་ས་གནས་དེ་གའི་ཇ་འདེབས་ཞིང་པའི་བདེ་རྩར་ཐུག་པ་ཞིག་རེད། ལིའུ་ཧྲུའུ་ཧྥུང་གིས་ལོ་གསུམ་རིང་འབད་བརྩོན་བྱས་པ་སྟོང་ཟད་དུ་གཏོང་འདོད་མེད་ལ། དེ་བས་མི་སེར་གྱིས་རེ་བ་ཆེན་པོ་བཅོལ་བ་ཆུད་ཟོས་སུ་གཏོང་ག་ལ་ཕོད།

“ངས་མུ་མཐུད་འདི་གར་བསྡད་ནས་ལས་དོན་དེ་ལེགས་པར་སྒྲུབ་ཀྱི་ཡིན”ལིའུ་ཧྲུའུ་ཧྥུང་གིས་ཨན་ཧུའེ་ཞིང་ཆེན་གྱི་བོད་སྐྱོར་ལས་དོན་རུ་ཁག་དང་འབྲེལ་མཐུད་ཧུར་ཐག་བྱས་ཤིང་། ཨན་ཧུའེ་ཞིང་ཆེན་གྱི“ལོ་ལྔ་ཚན་བཅུ་བཞི་པའི”བོད་སྐྱོར་འཆར་འགོད་ནས་མ་དངུལ་སྒོར་ཁྲི་500བརྩོན་ལེན་བྱུང་བ་དག་མཚོ་སྣའི་ཇའི་ཐོན་ལས་ཀྱི་ཕྱོགས་ཡོངས་མཐོར་གཏོང་ལས་གྲྭའི་རྣམ་གྲངས་འཛུགས་སྐྲུན་ཐད་སྤྱད་དེ། ལག་རྩལ་གྲུབ་འབྲས་ཁག་ཐོན་སྐྱེད་ནུས་ཤུགས་སུ་བསྒྱུར་ནས་མཚོ་སྣའི་སྤུས་ལེགས་ཅན་དང་སྤུས་རྟགས་ཅན་འཛུགས་སྐྲུན་ལ་སྐུལ་འདེད་བཏང་བ་རེད།

དེས་ན་ལེགས་པོ་རོང་གི་ཇ་རྭའི་རྒྱ་ཁྱོན་མུའུ་200ཡང་མ་ཟིན་པ་ནས་ད་ཆའི་མུའུ་670ལྷག་ཙམ་བར་ཆེ་རུ་སོང་བ་དང་། ཇ་རྭ་རྙིང་པ་སླར་གསོའི་རྣམ་པའི་ཐོག་ནས་སྤུས་ཚད་ལེགས་སུ་བཏང་བ་བརྒྱུད། ཇ་ལོ་སོས་པ་མུའུ་རེའི་ཐོན་ཚད་རྒྱ་མ་100ཡང་མ་ཟིན་པ་ནས་ད་ཆའི་རྒྱ་མ་སྟོང་ལྷག་ཙམ་བར་མང་དུ་སོང་བ། བོད་ཇ་ཐོན་ནུས་རྒྱ་མ་5000མ་ཟིན་པ་ནས་ད་ཆའི་རྒྱ་མ་ཁྲི་10བར་འཕར་བ། ཇ་ལོའི་ཐོན་རྫས་རིན་ཐང་སྒོར་ཁྲི་40ཡང་མ་ཟིན་པ་ནས་ད་ཆའི་སྒོར་ཁྲི་602བར་འཕར་བ་ལ་སོགས། གྲངས་གཞི་ཁག་ནས་མཚོ་སྣའི་ཇའི་ཐོན་ལས་ཀྱིས“སྣ་ཁ་དང་། སྤུས་ཚད། ཐོན་རྟགས། སྤུས་རྟགས”བཅས་མཐོར་གཏོང་ལ་ཐོབ་པའི་དགའ་བ་སྐྱེ་འོས་པའི་ཕན་འབྲས་མངོན།

2021ལོའི“པེ་ཅིང་རྒྱལ་སྤྱིའི་ཇ་ལས་འགྲེམས་སྟོན་དང་། མ་ལན་ཏའོ་རྒྱལ་སྤྱིའི་ཇ་ལས་རིག་གནས་འགྲེམས་སྟོན། དྲ་ཐོག་དམངས་ཕན་འཛད་སྤྱོད་དུས་ཆེན”བཅས་ཐོག་གི་ཇ་ལོའི་ཐོན་རྫས་དཔྱད་འདེམས་དང་འདེམས་སྒྲུག་བྱེད་སྒོའི་ཁྲོད་དུ། ལེགས་པོ་རོང་ནས་ཐོན་པའི“གངས་ལྗོངས་ཀྱི་ཇ་མའོ་ཧྥེང”ཇ་ལྗང་དང“གངས་ལྗོངས་ཀྱི་ལེགས་ཇ”ཇ་པ་ཏིར་དམིགས་བསལ་གྱི་གསེར་གྱི་བྱ་དགའ་དང་གསེར་གྱི་བྱ་དགའ་སོ་སོར་ཐོབ་སྟེ། སྔོན་མའི“སྡོང་རྒན་རྙིང་པ”ད་ཆ“གསེར་དངུལ་ཡལ་འདབ”ལ་གྱུར་ཡོད།

ལིའུ་ཧྲུའུ་ཧྥུང་དགའ་ཤོས་བྱེད་པ་ནི“ནང་དུ་གདན་འདྲེན་པ་དང་ཕྱིར་སྐྱོད་པ”དང་བརྒྱུད་རོགས་ཁྲིད་གསུམ་སོགས་ཀྱི་རྣམ་པ་བརྒྱུད། མཚོ་སྣ་གྲོང་ཁྱེར་ལ“རྟག་ཏུ་སྡོད་མཁན་བོད་སྐྱོར་ལས་དོན་རུ་ཁག”ཅིག་བཞག་ཡོད་ལ། ཟླ་བ་པད་མ་དང་སྤེན་པ་ཚེ་རིང་གིས་ཚབ་མཚོན་དུ་བྱས་པའི་ཇ་འདེབས་ལག་རྩལ་མི་སྣ་འབོར་ཆེན་གསོ་སྐྱོང་བྱུང་བ་དེ་རེད། ཁོང་ཚོས་ཇ་སྡོང་འདེབས་གསོ་དང་ཐོན་མཐོའི་ཇ་ར་བདག་སྐྱོང་དོ་དམ་ནས་ཇ་སྤུས་དག་ལས་སྣོན་གྱི་ལག་རྩལ་རབ་དང་རིམ་པ་ཕྱོགས་ཡོངས་དང་བརྒྱུད་རིམ་ལྡན་པའི་སྒོ་ནས་ཁོང་དུ་ཆུད། ཁོང་ཚོ་ནི་མཚོ་སྣའི་ཇ་ལོ་ཐོན་སྐྱེད་ཀྱི་རྐང་འཛིན་སྟོབས་ཤུགས་རེད། ཟླ་བ་པད་མས་ཇ་ལོ་ཐོན་སྐྱེད་ཁྲོད་དུ་ལེགས་སྐྱེས་མངོན་གསལ་དོད་པོ་ཕུལ་བར་བརྟེན་རང་སྐྱོང་ལྗོངས་ཀྱི་ཕུལ་བྱུང་ཞིང་འབྲོག་པའི་ཚན་རྩལ་ཆེད་མངགས་པ་དང་རང་སྐྱོང་ལྗོངས་ཀྱི་སྐབས་དྲུག་པའི་ངལ་རྩོལ་དཔེ་བཟང་ལ་བདམས་པ་མ་ཟད། ད་དུང་མཚོ་སྣ་གྲོང་ཁྱེར་མི་དམངས་འཐུས་ཚོགས་ཀྱི་འཐུས་མི་དང་སླད་གྲོང་ཚོའི་བུད་མེད་མཉམ་འབྲེལ་ལྷན་ཚོགས་ཀྱི་ཀྲུའུ་ཞིར་མིང་འདོན་འདེམས་བསྐོ་བྱས། སྤེན་པ་ཚེ་རིང་སླད་ཤང་ཇ་ལོ་མཉམ་ལས་ཁང་གི་ལས་འཛིན་འགོ་གཙོར་བདམས་ཐོན་བྱུང་བ་དང་ཁོང་གིས་མཚོ་སྣ་གྲོང་ཁྱེར་སླད་ཤང་གི་ཇ་ལོ་ཐོན་སྐྱེད་ལས་དོན་ལ་བློ་གྲོས་དང་སྟོབས་ཤུགས་མུ་མཐུད་སྐྱེས་སུ་ཕུལ་དང་འབུལ་བཞིན་མཆིས།