ཤིན་ཧྭ་གསར་འགྱུར་ཁང་ཁམ་ཕུ་ཁྲེའི་གྲོང་ཁྱེར་ཤན་ལི་ནས་གློག་འཕྲིན་འབྱོར་གསལ། 2024ལོ་ནི“ཀྲུང་གོ་དང་ཁམ་ཕུ་ཁྲེའི་མི་ཆོས་རིག་གནས་སྤེལ་རེས་ལོ”ཡིན་ཞིང་། ཀྲུང་གོ་དང་ཁམ་ཕུ་ཁྲེ་རྒྱལ་ཁབ་གཉིས་པོའི་རིག་གནས་སྤེལ་རེས་སྔར་བས་ཟབ་ཏུ་བཏང་ནས“ཡུན་ནན་དུ་ཡུལ་སྐོར་བྱས་ནས་ཝུའུ་ཀོར་ལྟ་བའི”བྱེད་སྒོའི་གྲུབ་འབྲས་བརྟན་དུ་གཏོང་ཆེད། ཚེས་6ཉིན་ཁམ་ཕུ་ཁྲེའི་ཤན་ལི་ཝུའུ་ཀོ་རྒྱལ་སྤྱིའི་གནམ་ཐང་གི་ཀྲུང་གོ་དང་ཁམ་ཕུ་ཁྲེའི་རིག་གནས་བར་ཁྱམས་སྤྱོད་འགོ་ཚུགས་པའི་མཛད་སྒོ་གྲོང་ཁྱེར་ཤན་ལི་རུ་འཚོགས་པ་རེད།

ཀྲུང་གོའི་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་ཕྱི་ཕྱོགས་ཁྱབ་སྤེལ་ཅུས་ཀྱི་འབྲེལ་ཡོད་འགན་འཁུར་བློ་མཐུན་དང་། ཁམ་ཕུ་ཁྲེའི་གསར་འགྱུར་པུའི་རྒྱལ་དོན་དྲུང་ཡིག་ཆིང་ལན། ཁམ་ཕུ་ཁྲེའི་ཤན་ལི་ཞིང་ཆེན་གྱི་ཧྲེང་ཀྲང་གཞོན་པ་ཨའོ་སེན་ཁཱ་སོགས་ཀྲུང་གོ་དང་ཁམ་ཕུ་ཁྲེའི་རྒྱལ་ཁབ་གཉིས་ཀྱི་སྐུ་མགྲོན་བྱེད་སྒོར་ཞུགས་པ་རེད། རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་ཕྱི་ཕྱོགས་ཁྱབ་སྤེལ་ཅུས་ཀྱི་འབྲེལ་ཡོད་འགན་འཁུར་བློ་མཐུན་དང་ཆིང་ལན་གྱིས་མཉམ་དུ་ཤན་ལི་ཝུའུ་ཀོ་རྒྱལ་སྤྱིའི་གནམ་ཐང་གི་ཀྲུང་གོ་དང་ཁམ་ཕུ་ཁྲེའི་རིག་གནས་བར་ཁྱམས་ཀྱི་ཡོལ་ཁེབས་ཕྱེ་བ་རེད།

ཤན་ལི་ཝུའུ་ཀོ་རྒྱལ་སྤྱིའི་གནམ་ཐང་གི་ཀྲུང་གོ་དང་ཁམ་ཕུ་ཁྲེའི་རིག་གནས་བར་ཁྱམས་དེ་གནམ་ཐང་གི་རྒྱལ་སྤྱིའི་འགྲུལ་པ་ཐོན་སའི་ས་ཁོངས་སུ་བཙུགས་པ་དང་། དེའི་ནང“འཛམ་གླིང་ཤུལ་བཞག་ངོ་འཕྲད་གདོང་ཐུག་བྱེད། ཤེས་དཔལ་དཔྱད་གཞིར་འཛིན་རེས་ལག་གདང་སྦྲེལ”བརྗོད་དོན་གཙོ་བོར་བྱས་པའི་པར་རིས་འགྲེམས་སྟོན་དང་འཇགས་རྣམ་འགྲེམས་སྟོན་ཁུལ་སོགས་ཀྱི་ནང་དོན་ཚུད་ཡོད། དེའི་ནང་བརྗོད་དོན་གཙོ་བོའི་པར་རིས་འགྲེམས་སྟོན་ལ་ཀྲུང་གོ་དང་ཁམ་ཕུ་ཁྲེ་རྒྱལ་ཁབ་གཉིས་གཙོ་བོར་བྱས་ནས་མེ་ཀུང་གཙང་པོའི་ངོགས་ཀྱི་རྒྱལ་ཁབ་གཞན་དག་ལ་ཁྱབ་པའི་པར་རིས་སྤུས་ལེགས་100འགྲེམས་སྟོན་བྱས་ཡོད། འཇགས་རྣམ་འགྲེམས་སྟོན་ཁུལ་གྱིས“འཚེམ་དྲུབ”དང་། “བརྐོས་མ” “ཚོན་རིས”བཅས་ཀྱི་བརྗོད་དོན་གཙོ་བོ་གསུམ་ལ་དམིགས་ནས་ཀྲུང་གོའི་ཡུན་ནན་དང་ཁམ་ཕུ་ཁྲེའི་མངོན་མིན་རིག་གནས་ཤུལ་བཞག་གི་དངོས་རྫས་འགྲེམས་སྟོན་བྱས་ཡོད། ད་དུང་རིག་གནས་བར་ཁྱམས་སྤྱོད་འགོ་ཚུགས་པའི་ཉིན་དེར་ཀྲུང་གོ་དང་ཁམ་ཕུ་ཁྲེ་རྒྱལ་ཁབ་གཉིས་ཀྱི་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་དང་འཁྲབ་སྟོན་པས་མངོན་མིན་རིག་གནས་ཤུལ་བཞག་གི་རིག་གནས་འགྲེམས་སྟོན་དང་འགྲེམས་འཁྲབ་བྱས་པ་དང་ཆབས་ཅིག གནམ་གྲུ་སྒུག་མཁན་ཡུལ་སྐོར་བ་དང་སྤེལ་རེས་ཀྱང་བྱས་པ་རེད།