འདི་ནི་དགེ་རྒན་གྱིས་སློབ་མ་ཚོར་གློག་ལས་ཀྱི་རྒྱུན་ཤེས་སློབ་བཞིན་པ།

“སྲིད་གཞུང་གིས་ད་ཐེངས་གསོ་སྦྱོང་གནང་བར་ཐུགས་རྗེ་ཆེ་ཞུ་གི་ཡིན། ཁྱིམ་གྱི་སྒོ་རྩར་ལག་རྩལ་སྦྱོང་ཐུབ་པས། ང་ཚོའི་ལས་ཞུགས་ཀྱི་གདེང་ཚོད་ཀྱང་ཆེ་རུ་ཕྱིན་སོང་། ད་ཐེངས་ངས་གློག་ལས་ཀྱི་ལག་རྩལ་སྦྱངས་པས་ཁྱིམ་ལ་མཛེས་བཟོ་བྱེད་སྐབས་སྤྱོད་ཆོག་ཆོག་ཡོད། སླད་ཕྱིན་གོ་སྐབས་བྱུང་ཚེ། གློག་ལས་ཀྱི་ལས་ཀ་ཞིག་བཙལ་ནས་ཡོང་འབབ་གསོག་གི་ཡིན”ཞེས་གསོ་སྦྱོང་ལ་ཞུགས་མཁན་ནག་ཆུ་གྲོང་ཁྱེར་ཤན་རྩ་རྫོང་ཤན་རྩ་གྲོང་རྡལ་རིངས་ན་མཐོ་གྲོང་ཚོའི་ཡུལ་མིས་དགའ་ཚོར་ཆེན་པོས་བརྗོད།

ཡུལ་མིས་བཤད་པའི་གསོ་སྦྱོང་ནི་ཉེ་ཆར་ནག་ཆུ་གྲོང་ཁྱེར་ཤན་རྩ་གྲོང་རྡལ་རིངས་ན་མཐོ་གྲོང་ཚོར་བཅའ་སྡོད་གུང་གཞོན་སྡེ་ཚོགས་བོད་རང་སྐྱོང་ལྗོངས་ཨུ་ཡོན་ལྷན་ཁང་གི་ལས་དོན་རུ་ཁག་གིས་བོད་ལྗོངས་ལས་རིགས་ལག་རྩལ་སློབ་གླིང་དང་། གྲོང་ཚོར་བཅའ་སྡོད་ཤན་རྩ་རྫོང་གཞུང་ལས་ཁང་། ཤན་རྩ་གྲོང་རྡལ་སྲིད་གཞུང་བཅས་དང་མཉམ་དུ་གཉེར་བའི་རླངས་འཁོར་ཉམས་བཟོ་དང་གློག་ལས་རྩལ་ནུས་ཀྱི་གསོ་སྦྱོང་དེ་རེད།

རླངས་འཁོར་ཉམས་བཟོའི་གསོ་སྦྱོང་འཛིན་གྲྭར་གསར་འགོད་པས་བོད་ལྗོངས་ལས་རིགས་ལག་རྩལ་སློབ་གླིང་གི་དགེ་རྒན་ཚོགས་པས་རླངས་འཁོར་ཧྲིལ་པོ་དང་སྒུལ་བྱེད་འཕྲུལ་ཆས་ཀྱི་གྲུབ་ཆར་ངོས་འཛིན་དང་། སྒོ་ལྷེབ་བརྗེ་སྟངས་དང་འཕྲུལ་སྣུམ་བརྗེ་བ་སོགས་ཀྱི་ཐད་ནས་རེ་རེ་བཞིན་འགྲེལ་བཤད་ཞིབ་ཕྲ་རྒྱག་བཞིན་པ་མཐོང་བྱུང་། དགེ་རྒན་གྱིས་འགྲེལ་བཤད་ཞིབ་ཕྲ་རྒྱག་བཞིན་པར་སློབ་མ་རྣམས་ཀྱིས་ནན་ཏན་ངང་ཉན་བཞིན་འདུག་ཅིང་། སྒོ་ལྷེབ་བརྗེ་སྟངས་སྐོར་འགྲེལ་བཤད་རྒྱག་སྐབས། སློབ་ཁྲིད་དགེ་རྒན་གྱིས་ཡུལ་མི་ཚོའི་སྣེ་ཁྲིད་དེ་རླངས་འཁོར་ཐོག་ལག་རྩལ་དངོས་སུ་དམར་ཁྲིད་བྱས་པ་དང་འགྲེལ་བཤད་རྒྱག་གིན་སྐམ་པ་བཟུང་སྟེ་འཁོར་བཀག་གི་ཡན་ལག་ཕུམ་བཤིག་ནས་ཇི་ལྟར་བརྗེ་བའི་བརྒྱུད་རིམ་བསླབས་པར་སློབ་ཁྲིད་ཧྲིལ་པོའི་ནང་དོན་ཞིབ་ཅིང་ཕྲ་ལ་གསོན་ཉམས་དོད་པོ་ཞིག་ཡོད་པ་རེད།

གློག་ལས་རྩལ་ནུས་གསོ་སྦྱོང་འཛིན་གྲྭའི་ནང་དོན་ནི་ཚང་མའི་རྒྱུན་གཏན་འཚོ་བ་དང་འབྲེལ་བ་དམ་ཟབ་ཡོད་པས་གྲོང་མིའི་ཧུར་སེམས་ཧ་ཅང་ཆེན་པོ་ཡོད། སློབ་ཁྲིད་དགེ་རྒན་གྱིས་གློག་ལས་ཀྱི་རྨང་གཞིའི་ཤེས་བྱ་དང་། བདེ་འཇགས་ཐོན་སྐྱེད་ཀྱི་རྒྱུན་ཤེས། ཕྱོགས་རྐྱང་པའི་གློག་ནུས་འཇལ་ཆས་ཀྱི་གློག་སྒྲོན་སྒྲིག་སྦྱོར་དང་སྐུད་སྦྲེལ། གློག་འཁྱུད་པའི་ལས་འཛོལ་དང་། དེ་བཞིན་ས་གནས་ས་ཐོག་ཏུ་མྱུར་སྐྱོབ་བྱེད་ཐབས་སོགས་ཁྱབ་ཁོངས་མང་པོའི་ཉེར་སྤྱོད་ལག་རྩལ་ཐོག་ནས་ཡུལ་མི་ཚོར་གློག་ལས་ཀྱི་རྩལ་ནུས་གསོ་སྦྱོང་གི་སློབ་ཚན་མི་འདྲ་བ་ཁྲིད་པ་རེད། སློབ་ཁྲིད་མཇུག་འགྲིལ་མ་ཐག་ཚང་མས་ཚ་ཚ་འུར་འུར་ངང་གྲོས་བསྡུར་བྱས་པ་དང་གྲོང་མི་ཁག་གཅིག་གིས་ཁྱིམ་དུ་ལོག་མ་ཐག་རང་ཁྱིམ་གྱི་གློག་ཆས་སྤྱད་ནས་སྦྱོང་བརྡར་བྱེད་ཀྱི་ཡོད།

ཤེས་རྟོགས་བྱུང་བར་གཞིགས་ན། གསོ་སྦྱོང་ཁྲོད་ཤན་རྩ་རྫོང་ཤན་རྩ་གྲོང་རྡལ་གྱི་སློབ་མ་46ཞུགས་པའི་ནང་སློབ་གྲྭ་ཆེ་མོ་བ་5ཡོད། དཔྱད་ཞིབ་བྱས་པ་བརྒྱུད། སློབ་མ་ཡོངས་ཀྱི་ཡིག་རྒྱུགས་འཕྲོད་ཚད་100%ཟིན་ཡོད། གྲངས་གཞི་དེ་ཐོག་ནས་གསོ་སྦྱོང་གི་སྤུས་ཚད་ལེགས་པ་དང་སློབ་མ་ཚོའི་སློབ་སྦྱོང་གི་སྤྲོ་སྣང་མངོན་པ་མ་ཟད། ཁོང་ཚོའི་འབྱུང་འགྱུར་གྱི་ལས་ཞུགས་ལམ་བུར་རྨང་གཞི་བརྟན་པོ་ཞིག་བཏིང་ཐུབ་ཡོད་པ་རེད།