ལོ་འགོ་ནས་བཟུང་། ལྗོངས་ཡོངས་ཀྱི་རིམ་པ་ཁག་དང་སྡེ་ཚན་ཁག་གིས་མ་འཇོག་དོན་འཁྱོལ་ལས་དོན་ལ་མཐོང་ཆེན་བྱས་ནས“དཔལ་འབྱོར་ལ་འབད་བརྩོན་དང་འཕེལ་རྒྱས་ལ་དམ་འཛིན་བྱེད་པའི”ལོ་དཀྱིལ་འགག་སྒྲོལ་བྱ་སྤྱོད་ཀྱི་བཀོད་སྒྲིག་གཞིར་བཟུང་། ནུས་ཤུགས་ཡོད་རྒུས་རྣམ་གྲངས་དམ་འཛིན་དང་། མ་འཇོག་ལ་སྐུལ་འདེད། བརྟན་པོའི་ངང་འཕར་རྒྱུ་བཅས་བྱས་ནས་དཔལ་འབྱོར་རྒྱུན་མཐུད་བརྟན་པོའི་ངང་འཁོར་རྒྱུག་ཐུབ་པར་འདེགས་སྐྱོར་ཧུར་ཐག་བྱས་ཡོད། མིག་སྔའི་བར་རིམ་རྩིས་བརྒྱབ་ན། ཀྲུང་དབྱང་གི་མ་འཇོག་སྒོར་དུང་ཕྱུར་593.65དོན་འཁྱོལ་བྱས་ནས་ལོ་འཁོར་ལས་འགན་གྱི་74.2%ལེགས་གྲུབ་བྱུང་བའི་ནང་། ཀྲུང་དབྱང་གི་སྔོན་རྩིས་ནང་གི་མ་དངུལ་སྒོར་དུང་ཕྱུར་157.72དང་། ནོར་སྲིད་ཀྱི་མ་དངུལ་སྒོར་དུང་ཕྱུར་114.75 རླངས་འཁོར་ཉོ་སྒྲུབ་དཔྱ་ཁྲལ་སྒོར་དུང་ཕྱུར་243.42 དམངས་སྤྱོད་མཁའ་འགྲུལ་འཕེལ་རྒྱས་ཐེབས་རྩ་སྒོར་དུང་ཕྱུར་8.06 རྒྱན་ཤོག་སྤྱི་ཕན་མ་དངུལ་སྒོར་དུང་ཕྱུར་10.68 གསར་སྣོན་རྒྱལ་བུན་སྒོར་དུང་ཕྱུར་59.02བཅས་ཡོད་པ་རེད།

ཤེས་རྟོགས་བྱུང་བར་གཞིགས་ན། ལོ་འཁོར་གྱི་རྣམ་གྲངས་འཛུགས་སྐྲུན་གྱི་མྱུར་ཚད་མགྱོགས་སུ་གཏོང་ཆེད། ལྗོངས་ཡོངས་ཀྱི་འབྲེལ་ཡོད་སྡེ་ཚན་ཁག་གིས་སྤྱི་འདོམས་མཐུན་སྦྱོར་བྱེད་ཤུགས་ཆེ་རུ་བཏང་ནས་བྱེད་པོའི་འགན་འཁྲི་དང་དུས་ཚོད་ཁ་གསལ་བཟོས་ཏེ་འཆར་གཞིའི་གསལ་ཐོ་དང་། མྱུར་ཚད་གསལ་ཐོ། གནད་དོན་གསལ་ཐོ་བཅས“གསལ་ཐོ་གསུམ”གྱི་ལས་ཀའི་བྱ་ཐབས་སྤྱད་དེ་རྣམ་གྲངས་འཛུགས་སྐྲུན་གྱི་དཀའ་གནད་དང་འགག་གནད་བསལ་ཞིང་། “ཟླ་རེར་བཀོད་གཏོང་རེ་དང་། དུས་ཚིགས་རེར་གྲངས་བཤེར་རེ། ལོ་ཕྱེད་རེར་དབྱེ་ཞིབ་རེ། ལོ་མཇུག་རེར་ཕྱོགས་སྡོམ་རེ”བཅས་ཀྱི་ལས་ཀའི་ལམ་སྲོལ་གཞིར་བཟུང་། གཙོ་གནད་རྣམ་གྲངས་འཛུགས་སྐྲུན་གྱི་བཀོད་གཏོང་ལ་ཕྱོགས་ཡོངས་ནས་ཤུགས་སྣོན་བརྒྱབ་ཡོད། འདི་ལོའི་ལོ་སྟོད་དུ། ལྗོངས་ཡོངས་ཀྱི་གཙོ་གནད་འཛུགས་སྐྲུན་རྣམ་གྲངས་122ལས་འགོ་ཚུགས་པ་དང་ལས་འགོ་ཚུགས་ཚད་79.2%ཟིན་པ་མ་ཟད། མ་དངུལ་སྒོར་དུང་ཕྱུར་730བཏང་ནས་དུས་མཚུངས་ལས་32%འཕར་ཡོད་པ་རེད།

དེ་དང་ཆབས་ཅིག ཞིང་ཆེན་རིམ་པའི་འགོ་ཁྲིད་ཀྱིས་རྣམ་གྲངས་གལ་ཆེན་འགན་གཙང་ལེན་པར་སྐུལ་འདེད་གཏོང་བའི་ལམ་སྲོལ་གསར་གཏོད་བྱས་པ་དང་། 2024ལོའི་རང་སྐྱོང་ལྗོངས་ཀྱི་འགོ་ཁྲིད་ཀྱིས་རྣམ་གྲངས་གལ་ཆེན་འགན་གཙང་ལེན་པའི་གསལ་ཐོ་བཀྲམ་པ། “འགོ་ཁྲིད་ཀྱིས་འགན་འཁྲི་གཙང་ལེན་དང་། ཆེད་དོན་ཚན་ཁག་གི་ཞབས་ཞུ། དུས་བཀག་བཀོད་གཏོང་། ནུས་ཤུགས་ཡོད་རྒུས་སྐུལ་འདེད་གཏོང་བ”བཅས་ཀྱི་ལས་ཀའི་རྩ་དོན་དང“རྣམ་གྲངས་གཅིག་དང་། འགོ་ཁྲིད་གཅིག ཇུས་གཞི་ཆ་ཚང་གཅིག དམ་འཛིན་མཐར་ཕྱིན་བྱེད་པ”བཅས་ཀྱི་ལས་ཀའི་རྣམ་པ་བཏོན་ཡོད། མིག་སྔར་འགན་འཁྲི་གཙང་ལེན་གྱི་རྣམ་གྲངས་གལ་ཆེན་21ནང་ནས་12འཛུགས་སྐྲུན་བྱེད་འགོ་ཚུགས་པ་དང་རིམ་རྩིས་བརྒྱབ་ན། མ་དངུལ་སྒོར་དུང་ཕྱུར་277.6བཏང་བ་དང་ལོ་འཁོར་གྱི་དམིགས་ཚད་ལས་འགན་གྱི་41.7%ལེགས་གྲུབ་བྱུང་ནས་གཞི་རྩའི་ཆ་ནས་དུས་རིམ་བཞིན་བསྒྲུབས་ཡོད་པ་རེད།