ཉེ་ཆར། གསར་འགོད་པར་རྒྱལ་ཁབ་གློག་དྲ་བོད་ལྗོངས་གློག་ཤུགས་ཚད་ཡོད་ཀུང་སི་ནས་ཤེས་རྟོགས་བྱུང་བར། འདི་ལོའི་ཟླ་དང་པོ་ནས་དྲུག་པའི་བར་བོད་ཀྱི་སྤྱི་ཚོགས་ཧྲིལ་པོར་གློག་སྤྱོད་ཚད་མགྱོགས་མྱུར་འཕར་བ་དེ་དུས་མཚུངས་ལས་15.68%འཕར་ཡོད་པ་རེད།

གྲངས་གཞི་ལས་མངོན་པར། ལོ་སྟོད་དུ་བོད་ཀྱི་སྤྱི་ཚོགས་ཧྲིལ་པོར་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་74.41ཟིན་པའི་ཁྲོད་ཐོན་ལས་དང་པོས་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་1ཟིན་པ་དེ་དུས་མཚུངས་ལས་45.97%འཕར་བ་དང་། ཐོན་ལས་གཉིས་པས་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་31.06ཟིན་པ་དེ་དུས་མཚུངས་ལས་3.91%འཕར་བ། ཐོན་ལས་གསུམ་པས་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་26.56ཟིན་པ་དེ་དུས་མཚུངས་ལས་16.27%འཕར་ཡོད་པ་རེད།

འདི་ལོ་ནས་བཟུང་། རྒྱལ་ཁབ་གློག་དྲ་བོད་ལྗོངས་གློག་ཤུགས་ཚད་ཡོད་ཀུང་སིས་ཐོག་མཐའ་བར་གསུམ་དུ་གློག་གཏོང་འགན་ལེན་གྱི་འགན་འཁྲི་ཕྲག་ཏུ་བརྟན་པོར་ཁུར་ཏེ་ལོ་འཁོར་གྱི་གློག་གཏོང་འགན་ལེན་ལས་དོན་གྱི་ཇུས་གཞི་བཀྲམ་ནས། “28+10”ཡི་ལས་འགན་དང་བྱ་ཐབས་གསེད་བཀྲོལ་དང་ལོ་ལྔའི་གློག་གཏོང་འགན་ལེན་གྱི་འཆར་གཞི་དོན་འཁྱོལ་བྱས་ཡོད། དགོས་མཁོའི་ཕྱོགས་ཀྱི་གློག་དྲའི་འགན་ལེན་རྣམ་གྲངས་ལ་དམ་འཛིན་ནན་པོ་བྱས་ནས་ནུས་རྒྱུ་གསར་པའི་ཐོན་ཁུངས་ཀྱི་གློག་གཏོང་ལས་གྲྭ་10ལ་སྐུལ་འདེད་བརྟན་པོ་བཏང་ཞིང་། ཚན་རིག་དང་མཐུན་པའི་ངང་གློག་དྲ་འཁོར་རྒྱུག་བྱེད་སྟངས་བཀོད་སྒྲིག་དང་གློག་དྲ་གཙོ་བོའི་ཉམས་བཟོ་ཆེན་པོའི་རྣམ་གྲངས་363སྒྲིག་འཛུགས་ཞིབ་ཚགས་བྱས་ཏེ་རྒྱུན་རྣམ་ཅན་གྱི་སྒྲིག་ཆས་ལ་སྐོར་ཞིབ་དང་། གློག་ཡོད་ཞིབ་བཤེར་ཐེངས་4200ལྷག་ཙམ་བྱས་པས་སྒྲིག་ཆས་ལ་སྐྱོན་ཤོར་ནས་འཁོར་རྒྱུག་བྱེད་མཚམས་འཇོག་ཚད་དུས་མཚུངས་ལས་52%ཆག་ནས་རིམ་རྩིས་བྱས་ན་གློག་མི་ཆད་པར་ལས་སྒྲུབ་བྱེད་ཚད་ཐེངས་51ཟིན་པ་དང་། དུད་ཚང་ལ་གློག་ཆད་ཚད་ཆུ་ཚོད་3799.85ཉུང་དུ་ཕྱིན་པ། གློག་འགན་ལེན་ཐུབ་ཚད་དུས་མཚུངས་ལས་བརྒྱ་ཆའི་གྲངས་0.27འཕར་བ། གློག་དྲས་ཉེན་ཁར་ཁ་གཏད་གཅོག་ནུས་རྒྱུན་མཐུད་འཕར་བ་བཅས་བྱུང་ཡོད།

དེ་དང་ཆབས་ཅིག་ཏུ་ཁེ་ལས་ཀྱི་འཁོར་ཁང་དང་ཐོན་སྐྱེད་ཀྱི་འཐབ་ས་དང་པོར་གློག་སྤྱོད་ཀྱི་ཞབས་འདེགས་མུ་མཐུད་ཞུས་ཤིང་། ལས་རིགས་རྒྱ་ཆེར་བཏང་ནས་འདུན་ཞུའི་གློག་སྤྱོད་སྒྲིག་ཆས་སྤྱོད་མཁན་ཁྲི་17.13ལ་གཤོང་ཚད་སྟོང་ཧྥུའུ་ཨན་ཁྲི་281.75གསར་དུ་སྒྲིག་སྦྱོར་དང་གཤོང་ཚད་ཆེ་རུ་བཏང་བ་དེ་དུས་མཚུངས་ལས་3.69%དང་43.34%སོ་སོར་འཕར་ཞིང་། “མེད་པ་གསུམ”དང“གྲོན་ཆུང་གསུམ”ལག་ལེན་བསྟར་བ་ལས་གློག་སྤྱོད་མཁན་3771ལ་ཕན་པ་ཐོབ་ནས་སྤྱོད་མཁན་ལ་མ་དངུལ་སྒོར་ཁྲི་1138.79གྲོན་ཆུང་ཐུབ་པ་མ་ཟད། གློག་བརྒྱུད་གཏོང་སྒྱུར་བཀོད་ལས་མཐའ་སྣེ་སྤྱོད་མཁན་ཁྲི་1.14ལ་ཕན་པ་ཐོབ་ནས་རིམ་རྩིས་བྱས་ན་གློག་སྤྱོད་མཁན་གྱི་མ་གནས་སྒོར་ཁྲི་600ལྷག་ཙམ་གྲོན་ཆུང་ཐུབ་ཡོད་པ་རེད།