ཉེ་ཆར་གསར་འགོད་པར་ལོ་དཀྱིལ་གྱི་བོད་རང་སྐྱོང་ལྗོངས་ནོར་སྲིད་ལས་དོན་ཚོགས་འདུ་ནས་ཤེས་རྟོགས་བྱུང་བར། ལོ་སྟོད་དུ་ལྗོངས་ཡོངས་ཀྱི་ནོར་སྲིད་ཁོངས་གཏོགས་ཀྱིས་འགན་ནུས་ཧུར་ཐག་བཏོན་པས་ནོར་སྲིད་གཏོང་ཡོང“གཉིས་འཕར”བྱུང་སྟེ། ལྗོངས་ཡོངས་ཀྱི་སྤྱིར་བཏང་གི་སྤྱི་པའི་སྔོན་རྩིས་ཡོང་སྒོ་སྒོར་དུང་ཕྱུར་136.4ཟིན་པ་དེ་དུས་མཚུངས་ལས་19.5%འཕར་ནས་རྒྱལ་ཡོངས་ཀྱི་མདུན་གྲལ་དུ་སླེབས་པ་དང་། ལྗོངས་ཡོངས་ཀྱི་སྤྱིར་བཏང་གི་སྤྱི་པའི་སྔོན་རྩིས་གཏོང་སྒོ་སྒོར་དུང་ཕྱུར་1343.5ཟིན་ནས་13.6%འཕར་ཏེ་གཏོང་ཡོང་འཕེལ་ཚུལ་ཉེ་བའི་ལོ་གསུམ་གྱི་དུས་མཚུངས་ཀྱི་ཆུ་ཚད་ཡག་ཤོས་སུ་སླེབས་ཡོད།

“བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་ཐུགས་ཁུར་གཟབ་བཞེས་དང་འགྱུར་མེད་སྟོབས་ལྡན་གྱི་འགོ་ཁྲིད་འོག ལྗོངས་ཡོངས་ཀྱི་ནོར་སྲིད་ཁོངས་གཏོགས་ཀྱིས་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་ནན་ཏན་དང་ནོར་སྲིད་གཏོང་ཡོང་གི་དོ་དམ་སོགས་ཀྱི་ལས་དོན་ཁག་ལེགས་པར་བསྒྲུབས་པ་དང་ཆབས་ཅིག‘2+1’ཀྱི་ནོར་སྲིད་ཕྱོགས་བསྡུས་དོ་དམ་དང་། ལྗོངས་ཐད་གཏོགས་ཀྱིས་རྫོང་ལ་དོ་དམ། སློབ་གསོའི་ཁོངས་གཏོགས་ཀྱི་ནོར་སྲིད་ཐག་གཅོད་བྱེད་དབང་དང་གཏོང་ཡོང་འགན་འཁྲི་ཁག་བགོས་སོགས་ཀྱི་གཙོ་གནད་ནོར་སྲིད་སྒྱུར་བཅོས་ལ་སྐུལ་འདེད་བརྟན་པོ་བཏང་ནས་སྒྱུར་བཅོས་ཀྱི་ནུས་ཕྱོད་ཟམ་མི་ཆད་པར་བཏོན་ཡོད”ཅེས་རང་སྐྱོང་ལྗོངས་ནོར་སྲིད་ཐིང་གི་འབྲེལ་ཡོད་འགན་འཁུར་བས་ངོ་སྤྲོད་བྱས།

ནོར་སྲིད་དོ་དམ་ནི་ནོར་སྲིད་ལས་དོན་ཡག་པོ་སྒྲུབ་པའི“ནང་རྩལ”ལྟ་བུ་ཞིག་ཡིན་པས། དེ་ནི་གཞི་རྩའི་ལས་དོན་ཞིག་ཡིན་ལ་ལྟེ་བའི་འགན་ནུས་ཤིག་ཀྱང་ཡིན། ལོ་སྨད་དུ་ལྗོངས་ཡོངས་ཀྱི་ནོར་སྲིད་ཁོངས་གཏོགས་ཀྱིས་ནོར་སྲིད་དོ་དམ་གྱི་ནུས་ཕྱོད་མཐོ་རུ་གཏོང་བར་འབད་བརྩོན་དང་སང་ལོའི་སྔོན་རྩིས་འཆར་འགོད་ཡག་པོ་བྱས་ཏེ། སྒྱུར་སྤྲོད་ཁག་བགོས་ཀྱི་ཚད་ལྡན་རང་བཞིན་དང་གོ་ཆོད་ཡུན་ཚད་སྔར་བས་ཆེ་རུ་བཏང་ནས་སྔོན་རྩིས་དོ་དམ་གྱི་རྨང་གཞི་ཟམ་མི་ཆད་པར་བརྟན་དུ་གཏོང་རྒྱུ་དང་། ལྗོངས་ཐད་གཏོགས་ཀྱིས་རྫོང་གི་ནོར་སྲིད་སྒྱུར་བཅོས་ལ་དོ་དམ་བྱེད་པའི་སྐོར་གྱི་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་ནན་ཏན་བྱས་ནས་ལྗོངས་ཐད་གཏོགས་ཀྱིས་རྫོང་གི་སྒྱུར་བཅོས་ལ་དོ་དམ་མུ་མཐུད་ཟབ་ཏུ་གཏོང་རྒྱུ། སྔོན་རྩིས་བཅའ་ཁྲིམས་ཀྱི་བླང་བྱ་དོན་འཁྱོལ་བྱས་ནས་སྔོན་རྩིས་དང་དོ་དམ་གཉིས་གཞི་གཅིག་ཅན་དང་རྩིས་ཁྲ་ཚོད་ལྟ་གཅིག་སྡུད་ཚབ་གཉེར་སོགས་བེད་ཡག་པོ་སྤྱད་དེ་གཞི་རིམ་ནོར་སྲིད་ཀྱི་ནོར་དོན་དོ་དམ་ལ་ཤུགས་སྣོན་རྒྱག་རྒྱུ། “རིགས་བཞིའི”སྒྲིག་འགལ་ཁྲིམས་འགལ་གྱི་བྱེད་སྤྱོད་ལ་ཆེད་དོན་བཅོས་སྒྲིག་མུ་མཐུད་བྱེད་པ་དང་། རྒྱང་ཁྲིད་དང་ཡུལ་གཞན་ནས་དཔྱད་འདེམས་བྱེད་རྒྱུ་ཁྱབ་སྤེལ་ཤུགས་ཆེན་གཏོང་བ། སྲིད་གཞུང་གིས་གུད་སྐྱོབ་ལས་གནས་ཉོ་སྒྲུབ་བྱེད་པའི་ཐབས་ལམ་ཤར་བགྲོད་ཡོང་བ་བཅས་བྱས་ཏེ་སྲིད་གཞུང་གི་ཉོ་སྒྲུབ་དོ་དམ་ཚད་ལྡན་དུ་རྒྱུན་མཐུད་གཏོང་རྒྱུ། ནོར་སྲིད་གཏོང་ཡོང་ཁྲོད་ཀྱི“འགན་ལེན་གསུམ”གྱི་གཏོང་ཡོང་སྔོན་དུ་འཇོག་པའི་གོ་རིམ་མཐའ་འཁྱོངས་བྱས་ནས“འགན་ལེན་གསུམ”གྱི་སྔོན་རྩིས་འཆར་འགོད་སྔོན་ནས་བཀོད་དེ“འགན་ལེན་གསུམ”གྱི་མཐའ་ཚད་ཐ་སྐྱོང་ཏན་ཏིག་ཡོང་བ་བྱ་རྒྱུ། ནོར་དོན་རྩིས་གཉེར་ལ་ལྟ་སྐུལ་བྱ་ཤུགས་ཆེ་རུ་མུ་མཐུད་བཏང་ནས་ནོར་དཔལ་གྱི་སྒྲིག་ལམ་ནན་དུ་ཏན་ཏིག་གཏོང་རྒྱུ་ཡིན་པ་རེད།