ཀྲུང་གོ་དང་ཨ་ཧྥེ་རི་ཁའི་འགོ་ཁྲིད་མི་སྣས་ཀྲུང་གོ་དང་ཨ་ཧྥེ་རི་ཁའི་མཛའ་མཐུན་མཉམ་ལས་ཀྱི་ཇུས་ཆེན་ཐུན་མོང་ཐོག་གྲོས་བསྡུར་དང་། ཀྲུང་གོ་དང་ཨ་ཧྥེ་རི་ཁའི་འཕེལ་རྒྱས་ཀྱི་མཛེས་སྡུག་ལྡན་པའི་འཆར་གཞི་མཉམ་འགོད་བྱས་པ་དེས་ཀྲུང་གོ་དང་ཨ་ཧྥེ་རི་ཁའི་འབྲེལ་བ་འཕེལ་རྒྱས་ཀྱི་གནས་ཚད་གསར་པ་བཏོད་དེ། ཀྲུང་གོ་དང་ཨ་ཧྥེ་རི་ཁའི་ལས་དབང་གཅིག་མཐུན་ཚོགས་པའི་ལེའུ་གསར་པ་རྩོམ་ངེས་རེད།

2024ལོའི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་དབུ་ཚོགས་ཟླ་9ཚེས་4ཉིན་ནས་ཚེས་6ཉིན་བར་པེ་ཅིང་དུ་འཚོག་རྒྱུ་རེད། ད་རེས་དབུ་ཚོགས་ཀྱི་བརྗོད་དོན་གཙོ་བོ་ནི“ལག་གདང་སྦྲེལ་ནས་དེང་རབས་ཅན་ལ་སྐུལ་འདེད་བཏང་སྟེ་ཆུ་ཚད་མཐོ་བའི་ཀྲུང་གོ་དང་ཨ་ཧྥེ་རི་ཁའི་ལས་དབང་གཅིག་མཐུན་ཚོགས་པ་མཉམ་དུ་འཛུགས་དགོས”ཞེས་པ་དེ་རེད། འདི་ལོའི་གླེང་སྟེགས་ཀྱི་ཚོགས་འདུ་ནི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་དེ་ཉིད་དབུ་ཚོགས་ཀྱི་རྣམ་པའི་ཐོག་ནས་གཉེར་ཐེངས་བཞི་པ་ཡིན་པ་དང་། ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་ཨ་ཧྥེ་རི་ཁ་ཕྱོགས་ཀྱི་ཁོངས་མིའི་འགོ་ཁྲིད་མི་སྣ་གདན་ཞུས་ལྟར་ཚོགས་འདུར་ཞུགས་རྒྱུ་དང་ཨ་ཧྥེ་རི་ཁ་གླིང་གི་ས་ཁུལ་གྱི་རྩ་འཛུགས་དང་རྒྱལ་སྤྱིའི་རྩ་འཛུགས་ཀྱི་འབྲེལ་ཡོད་འཐུས་མི་དབུ་ཚོགས་ཀྱི་འབྲེལ་ཡོད་བྱེད་སྒོར་ཞུགས་རྒྱུ་ཡིན་པ་རེད། ཀྲུང་གོ་དང་ཨ་ཧྥེ་རི་ཁའི་འགོ་ཁྲིད་མི་སྣས་ཀྲུང་གོ་དང་ཨ་ཧྥེ་རི་ཁའི་མཛའ་མཐུན་མཉམ་ལས་ཀྱི་ཇུས་ཆེན་ལ་ཐུན་མོང་ཐོག་གྲོས་བསྡུར་དང་། ཀྲུང་གོ་དང་ཨ་ཧྥེ་རི་ཁའི་འཕེལ་རྒྱས་ཀྱི་མཛེས་སྡུག་ལྡན་པའི་འཆར་གཞི་མཉམ་འགོད་བྱས་པ་དེས་ཀྲུང་གོ་དང་ཨ་ཧྥེ་རི་ཁའི་འབྲེལ་བ་འཕེལ་རྒྱས་ཀྱི་གནས་ཚད་གསར་པ་བཏོད་དེ། ཀྲུང་གོ་དང་ཨ་ཧྥེ་རི་ཁའི་ལས་དབང་གཅིག་མཐུན་ཚོགས་པའི་ལེའུ་གསར་པ་རྩོམ་ངེས་རེད།

ཀྲུང་གོ་ནི་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེ་ཤོས་དེ་ཡིན་པ་དང་ཨ་ཧྥེ་རི་ཁ་ནི་འཕེལ་རྒྱས་འགྲོ་བཞིན་པའི་རྒྱལ་ཁབ་གཅིག་སྡུད་ཆེ་ཤོས་ཀྱི་སྐམ་ས་ཆེན་མོ་ཞིག་རེད། ལོ་རྒྱུས་ཀྱི་མྱོང་བ་འདྲ་མཚུངས་དང་ཐུན་མོང་གི་ལོ་རྒྱུས་ལས་འགན་གྱིས་ཀྲུང་གོ་དང་ཨ་ཧྥེ་རི་ཁ་ཕན་ཚུན་དམ་པོར་སྦྲེལ་ཡོད། “ཟོལ་མེད་མཛའ་མཐུན་དང་། ལྟ་སྟངས་འདྲ་མཉམ། གཉིས་ཁེ་གཉིས་ཕན། ཐུན་མོང་འཕེལ་རྒྱས། བདེན་པ་སྐྱོང་བ། དྲང་བདེན་སྲུང་སྐྱོང་། དུས་དཔག་བབ་བསྟུན། སྒོ་དབྱེ་ཁོང་ཡངས”བཅས་ཀྱི་ཀྲུང་གོ་དང་ཨ་ཧྥེ་རི་ཁའི་མཛའ་མཐུན་མཉམ་ལས་ཀྱི་སྙིང་སྟོབས་ནི་ཀྲུང་གོ་དང་ཨ་ཧྥེ་རི་ཁ་ཕྱོགས་གཉིས་ཀྱིས་ལོ་བཅུ་གྲངས་ཁ་ཤས་ནང་བདེ་སྡུག་མཉམ་མྱོང་དང་དཔུང་པ་མཉམ་གཤིབ་ཀྱིས་འབད་འཐབ་བྱས་པའི་མཚོན་ཚུལ་དངོས་ཤིག་རེད་ལ། ཀྲུང་གོ་དང་ཨ་ཧྥེ་རི་ཁའི་མཛའ་མཐུན་གྱི་འབྲེལ་བ་སྔ་འཛིན་ཕྱི་གཏོད་བྱེད་པའི་སྟོབས་ཤུགས་ཀྱི་འབྱུང་རྩ་ཞིག་ཀྱང་རེད། ཀྲུང་གོས་ཐོག་མཐའ་བར་གསུམ་དུ་ཨ་ཧྥེ་རི་ཁའི་རྒྱལ་ཁབ་དང་མཐུན་སྒྲིལ་མཉམ་ལས་འཕེལ་རྒྱས་གཏོང་རྒྱུ་དེ་ཕྱི་ཕྱོགས་སྲིད་ཇུས་ཀྱི་རྨང་གཞི་གལ་ཆེན་ཞིག་ཏུ་བརྩི་བ་དང་། ཐོག་མཐའ་བར་གསུམ་དུ་བདེན་པ་བདེན་ཐུབ་ཀྱི་འདུ་ཤེས་རྒྱུན་འཛིན་བྱས་ནས་ཀྲུང་གོ་དང་ཨ་ཧྥེ་རི་ཁའི་དབར་གྱི་འབྲེལ་བ་འཕེལ་རྒྱས་གཏོང་གི་ཡོད་པས། ཨ་ཧྥེ་རི་ཁའི་རྒྱལ་ཁབ་ཀྱིས་རང་བཙན་རང་བརྟེན་སྲུང་སྐྱོང་དང་། འཕེལ་རྒྱས་དང་དར་རྒྱས་ལ་སྐུལ་འདེད་གཏོང་བའི་འགྲོ་ལམ་ཐོག་གི་གྲོགས་པོ་བློས་ཐུབ་དང་རོགས་ཟླ་ཟོལ་མེད་ཅིག་རེད། ཀྲུང་གོ་དང་ཨ་ཧྥེ་རི་ཁ་ཕྱོགས་གཉིས་པོས་2024ལོར་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་དབུ་ཚོགས་གོ་སྐབས་སུ་བྱས་ཏེ། ཀྲུང་གོ་དང་ཨ་ཧྥེ་རི་ཁའི་མཛའ་མཐུན་མཉམ་ལས་ཀྱི་སྙིང་སྟོབས་མུ་མཐུད་དར་སྤེལ་བཏང་ནས། མཉམ་ལས་གཉིས་ཕན་དང་ཐུན་མོང་འཕེལ་རྒྱས་ཀྱི་འགྲོ་ལམ་ཐོག་གྲོགས་སྒྲིག་མདུན་སྐྱོད་ཀྱིས་དུས་རབས་གསར་པར་ཀྲུང་གོ་དང་ཨ་ཧྥེ་རི་ཁའི་ལས་དབང་གཅིག་མཐུན་ཚོགས་པའི་འབྲེལ་ཐག་སྔར་བས་དམ་དུ་གཏོང་རྒྱུ་རེད།

ཀྲུང་གོ་དང་ཨ་ཧྥེ་རི་ཁས་ཐོག་མཐའ་བར་གསུམ་དུ་མཉམ་ལས་ལ་དམིགས་ཏེ། ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་གྲུབ་འབྲས་ཁག་དོན་འཁྱོལ་ལ་སྐུལ་འདེད་བཏང་ནས། ཀྲུང་གོ་དང་ཨ་ཧྥེ་རི་ཁ་ཐུན་མོང་འཕེལ་རྒྱས་ལ་སྐུལ་འདེད་ནུས་ལྡན་བཏང་བ་དང་ཀྲུང་གོ་དང་ཨ་ཧྥེ་རི་ཁའི་མི་དམངས་ལ་དངོས་དངོས་རྗེན་རྗེན་གྱི་ཁེ་ཕན་སྦྱིན་པས། ཆུ་ཚད་མཐོ་བའི་ཀྲུང་གོ་དང་ཨ་ཧྥེ་རི་ཁའི་ལས་དབང་གཅིག་མཐུན་ཚོགས་པ་མཉམ་དུ་འཛུགས་པར་རྨང་གཞི་བརྟན་པོ་ཞིག་བཏིང་ཡོད། “ཨ་ཧྥེ་རི་ཁ་དང་ཀྲུང་གོ་ཕྱོགས་གཉིས་པོས་མཛའ་མཐུན་དང་། བརྩི་འཇོག ཡིད་ཆེས། གཉིས་ཕན་བཅས་ཀྱི་རྨང་གཞིའི་ཐོག་ཨ་ཧྥེ་རི་ཁ་དང་ཀྲུང་གོའི་འབྲེལ་བ་འཕེལ་རྒྱས་ལ་སྐུལ་འདེད་ཧུར་ཐག་གཏོང་གི་ཡོད་པ་དང་། གཡུར་དུ་ཟ་བའི་མཉམ་ལས་ཀྱི་གྲུབ་འབྲས་ལ་བརྟེན་ནས་ཨ་ཧྥེ་རི་ཁ་དང་ཀྲུང་གོའི་མཉམ་ལས་གླེང་སྟེགས་ནི་མཐུན་སྒྲིལ་དང་། བརྟན་པོ། ཕན་ཆེ་བཅས་ཀྱི་མཉམ་ལས་ཀྱི་ལམ་སྲོལ་ཞིག་ཡིན་པ་ར་སྤྲོད་བྱས་ཡོད” “ཨ་ཧྥེ་རི་ཁ་དང་ཀྲུང་གོའི་མཉམ་ལས་གླེང་སྟེགས་ཀྱིས་ཨ་ཧྥེ་རི་ཁ་དང་ཀྲུང་གོའི་འབྲེལ་བ་འཕེལ་རྒྱས་མྱུར་པོ་ཡོང་བར་སྐུལ་འདེད་བཏང་ཡོད” “ཨ་ཧྥེ་རི་ཁ་དང་ཀྲུང་གོས་ལག་གདང་སྦྲེལ་ནས་ཨ་ཧྥེ་རི་ཁ་དང་ཀྲུང་གོའི་མཉམ་ལས་གླེང་སྟེགས་ཀྱི་འདྲ་མཉམ་གྲོས་བསྡུར་དང་། རྒྱུས་ལོན་ཆེར་གཏོང་། ཐུན་མོང་གི་ངོས་འཛིན་ཆེར་གཏོང་། མཛའ་གྲོགས་ལ་ཤུགས་སྣོན། མཉམ་ལས་ལ་སྐུལ་འདེད་བཅས་ཀྱི་དམིགས་ཡུལ་ལག་ལེན་ཧུར་ཐག་བསྟར་གྱི་ཡོད་པས། གྲུབ་འབྲས་དེ་བས་མང་བ་ཐོབ་ངེས་ཡིན་པ་དང་ཨ་ཧྥེ་རི་ཁ་དང་ཀྲུང་གོའི་མི་དམངས་ལ་མུ་མཐུད་བདེ་སྐྱིད་སྐྲུན་ངེས་ཡིན་པའི་ཡིད་ཆེས་ཡོད”ཅེས་པ་སོགས་གླེང་སྟེགས་ཀྱི་ལམ་སྲོལ་དང་གྲུབ་འབྲས་ལ་ཨ་ཧྥེ་རི་ཁའི་མི་སྣའི་དགའ་བསུ་ཆེན་པོ་ཐོབ་པ་དང་རྒྱལ་སྤྱིའི་སྤྱི་ཚོགས་ཀྱི་གདེང་འཇོག་མཐོ་པོ་ཐོབ་ཡོད།

དེང་གི་འཛམ་གླིང་ལ་ལོ་བརྒྱར་བྱུང་མ་མྱོང་བའི་འགྱུར་ལྡོག་ཆེན་པོ་ཡོང་བཞིན་ཡོད་པ་དང་། ཀྲུང་གོ་དང་ཨ་ཧྥེ་རི་ཁས་གཙོས་པའི“གོ་ལ་ཧྲིལ་པོའི་ལྷོ་ཕྱོགས”འཕེལ་རྒྱས་མྱུར་པོ་ཕྱིན་ཏེ། འཛམ་གླིང་ལོ་རྒྱུས་ཀྱི་འཕེལ་རིམ་ལ་ཤུགས་རྐྱེན་ཟབ་མོ་ཐེབས་བཞིན་ཡོད། ཀྲུང་གོ་དང་ཨ་ཧྥེ་རི་ཁ་ཕྱོགས་གཉིས་པོས་2024ལོའི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་དབུ་ཚོགས་གོ་སྐབས་སུ་བྱས་ཏེ། མཐུན་སྒྲིལ་མཉམ་ལས་སྔར་བས་ཟབ་ཏུ་གཏོང་བ་དང་། འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཐུན་མོང་གི་ཁེ་ཕན་ལ་སྲུང་སྐྱོང་བྱེད་པ། འདྲ་མཉམ་དང་གོ་རིམ་ལྡན་པའི་འཛམ་གླིང་སྣེ་མང་ཅན་དང་ཀུན་ཕན་ཁོང་ཡངས་ཀྱི་དཔལ་འབྱོར་གོ་ལ་ཧྲིལ་པོ་ཅན་མཉམ་དུ་དར་སྤེལ་གཏོང་བ་བཅས་བྱས་ཏེ། ལག་གདང་སྦྲེལ་ནས་དེང་རབས་ཅན་ལ་སྐུལ་འདེད་གཏོང་བ་དང་། ཆུ་ཚད་མཐོ་བའི་ཀྲུང་གོ་དང་ཨ་ཧྥེ་རི་ཁའི་ལས་དབང་གཅིག་མཐུན་ཚོགས་པ་མཉམ་དུ་བསྐྲུན་པར་ཐུན་མོང་གི་ངོས་འཛིན་སྔར་ལས་མང་བ་གཅིག་སྡུད་བྱེད་པ། མིའི་རིགས་ཀྱི་དེང་རབས་ཅན་ལ་སྐུལ་འདེད་གཏོང་བ་དང་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་ཆེད་ལེགས་སྐྱེས་གསར་པ་འབུལ་རྒྱུའི་རེ་སྒུག་བྱེད་བཞིན་ཡོད།